Ko e Ongoongoleleí ʻOku maʻá e Tokotaha Kotoa pē

ʻI hoku taʻu 11, naʻe hiki ai hoku fāmilí ki Siamane Hihifo. Naʻe fakalele ʻe heʻeku tangataʻeikí mo ʻeku fineʻeikí ha fale fō ko ʻemau maʻuʻanga moʻuí, pea ko au ʻa e tamasiʻi fetuku foó. Naʻá ku sio ʻi ha ngaahi pasikala lanu kulokula ngingila, pea naʻá ku fakaʻamu ʻe lava ke u maʻu ha taha ke fai ʻaki ʻeku fetukutukú. Ka naʻá ku fie maʻu ʻe au ha pasikala mālohi ke ne toho ʻa e saliote ne ʻi ai ʻa e foó. Naʻá ku heka takai ʻo toho ʻa e saliote fō mamafa ko iá ki muʻa he kamata ʻa e akó pea ʻi he tuku ʻa e akó. Naʻe hoko ko ha meʻa faingataʻa ke te vakai ki he vaʻinga ʻa e fānau kehé. Ka naʻe pau ke ngāue mālohi ʻa e tokotaha kotoa pē ʻi homau fāmilí, pea ko ha konga mahuʻinga ia ʻo e pisinisi ʻa e fāmilí.

ʻI heʻeku tupu ʻo lahi haké, naʻá ku ako ai ki he ngaahi tāpuaki ʻo hono fakahoko ha ngaahi meʻa naʻe ʻikai ke te ʻilo ʻe kita he taimi ko iá ʻoku mahuʻinga mo lelei kiate kita. Ko e taimi naʻá ku fuʻu kei siʻi aí, naʻá ku puke ʻi ha mahaki ʻo e maʻamaʻá, ka naʻe ʻikai ke ʻilo ia ʻe ha taha he taimi ko iá. Ko e taimi naʻá ku tupu ai ʻo lahi angé, naʻá ku hū leva ki he laulāpuna fakakautaú. Naʻe fakatokangaʻi ʻe he kau toketaá ʻa e ngaahi foʻi ʻila ʻi hoku maʻamaʻá. Kae tuʻunga ʻi heʻeku ngāue mālohi ʻi hono ʻaka takai e pasikalá ʻa e ngaahi uta mamafa ko iá, naʻe hangē ne moʻui ai pē hoku sinó ʻiate ia peé. Ne u fakatupu ha ke kātaki. Naʻá ku fakatupu ha mālohi. Ne pehē ʻe he kau toketaá ne fakaleleiʻi pē ʻe he mahakí ia pea naʻe lava ʻeku sivi moʻui leleí. Ka ne taʻe-ʻoua ia, naʻe ʻikai ke u mei lava au ʻo hoko ko ha pailate.

ʻI heʻeku hoko ko e pailaté, ne u puna takai he funga māmaní. Naʻe ʻikai ke u teitei pāhia au ʻi he sio ʻi he ngaahi fetuʻú, ʻaó, pea mo e fōtunga ʻo e fonuá. Naʻá ku mamata ki he fakaʻofoʻofa ʻo ha ngaahi fonua kehekehe fakataha mo honau ngaahi anga fakafonuá. Naʻá ku ʻilo mei heʻeku ʻalu ki he ngaahi feituʻu ko iá mo ʻeku mamata ki he kakaí pea mo mamata ki he Siasi ʻi he ngaahi feituʻu kehekehe ko iá, ko e ongoongoleleí ʻoku maʻá e toko taha kotoa pē, tatau ai pē pe ko e fē ʻa e puleʻanga ʻokú ke nofo aí pe ko e hā hono ngaahi tukufakaholó. Ko e ongoongolelei ia ʻo Sīsū Kalaisí. Ko e folofola ʻa e ʻOtuá—tatau ai pē pe ʻoku hiki ʻi he folofolá pe lea ʻaki ʻe he kau palōfita moʻuí, pe ʻoku tau lau ia ʻi he ngaahi makasini ʻa e Siasí pe fanongo ai ʻi he ngaahi konifelenisi lahí—ʻoku maʻá e tokotaha kotoa pē.