ʻOku ʻi ai ha kakai ʻi heʻeku kalasi Lautohi Faka-Sāpaté ʻoku ʻikai ke nau ʻapasia. Kuó u ʻosi lea ki he faiakó pea mo ʻeku pīsopé. Ko e hā ha toe meʻa te u lava ʻo fai?

ʻUluakí, tā koe ha sīpinga ki he niʻihi kehe ʻi hoʻo kalasí. ʻAi ke ʻilonga hoʻo tokanga ki he meʻa ne teuteu ʻe he faiakó. Kapau te nau sio ʻokú ke tokanga, te nau fakatokangaʻi leva ʻoku mahuʻinga e meʻa ʻoku akoʻí.

ʻE tokanga ange ʻa e kau mēmipa ʻo e kalasí kapau ʻe fakakau kinautolu, pea ʻi hoʻo kau ʻaʻau mo tohoakiʻi mai kinautolu ʻaki hano fai ha ngaahi fehuʻi mo e talí, te ne fakaʻaiʻai ai ʻa e fealēleaʻakí pea mo e fakakaukau fakamātoato fekauʻaki mo e tefitó.

Lotu ke ʻomi ʻe he Laumālie Māʻoniʻoní ha nonga mo ha mālohi fakalaumālie ki hoʻomou kalasí koeʻuhí ke mou lava kotoa ʻo ako mei he lēsoní.

Fakaʻosí, ʻofa mo ke fakamolemoleʻi ʻa kinautolu ʻoku nau fakatupu moveuveú. Neongo te ke fehiʻa heʻenau tōʻongá, ʻoku ngalingali he ʻikai ke nau liliu kapau te nau ongoʻi ʻokú ke ʻita maʻu pē pe ʻokú ke sio lalo kiate kinautolu. Ka ke lotua mo tokoniʻi kinautolu. Ko e taimi te nau sio ai ʻokú ke tokanga ange mo loto vēkeveke ki he lēsoní, ʻe lava ke mafola atu hoʻo loto vēkeveké.