Ko ʻEku Tohi ʻa Molomona pē ʻAʻaku

ʻI ʻAokosi ʻo e 2005, ʻi he taimi ne fakahoko ai ʻe Palesiteni Kōtoni B. Hingikelī (1910–2008) ʻa e tukupā ki he kāingalotu ʻo e Siasí ke nau lau ʻa e Tohi ʻa Molomoná ke ʻosi ki muʻa he ngataʻanga ʻo e taʻú, naʻá ku palōmesi ai te u lau ʻa e tohí ke ʻosi. Naʻá ku maheni mo e ngaahi talanoa ʻi he Tohi ʻa Molomoná ka naʻe teʻeki ke u lau kotoa ʻo ʻosi. Ko ia naʻá ku fakapapau te u tauhi ʻeku palōmesí.

Naʻe ʻosi akoʻi au ke u fakaʻaongaʻi ʻa e folofolá ʻi heʻeku moʻuí pea ngaohi ia ke hoko ko ha konga ʻo ʻeku moʻuí. Pea ʻi heʻeku lau iá, naʻá ku hiki ʻi he ngaahi tafaʻaki ʻo e pēsí ʻa e meʻa naʻá ku pehē ko e tefitoʻi fakakaukau ia ʻo e potufolofolá. Naʻá ku toe laineʻi foki ʻa e ngaahi foʻi lea mo e kupuʻi lea naʻe toutou hā aí ke fakamahino ʻoku fakamamafaʻi.

Naʻá ku hiki hoku hingoá he tafaʻaki ʻo e ngaahi hingoa ʻi he folofolá ke tokoni ke u manatuʻi ko e folofola ʻa e ʻOtuá ki he kakai kehé ʻe lava pē ke hoko ko ha folofola mai ia kiate au. Hangē ko ʻení, ʻi he 2 Nīfai 2:28 naʻá ku hiki ai hoku hingoá: “Pea ko ʻeni, [Hilalī], ʻoku ou loto ke [ke] sio ki he Fakalaloa lahí, pea tokanga ki heʻene ngaahi fekau mahuʻingá.” Ko e lahi ange ʻeku ʻai e Tohi ʻa Molomoná ke kaunga fakahangatonu kiate aú, ko e lahi ange ia ʻeku loto vēkeveke ke lau fakaʻaho iá.

ʻI heʻeku lau fakaʻaho iá , naʻe ʻuhingamālie mo fakamāfana ange ʻeku ngaahi lotú. Naʻá ku toe lava foki heni ke tokanga ange ki heʻeku ngaahi kalasí mo muimui ki he ngaahi ueʻi ʻa e Laumālié ke fakakaungāmeʻa ki he niʻihi kehé. ʻI he pō fakaʻositaʻú, ne ʻosi ai ʻeku lau e Tohi ʻa Molomoná.

Naʻe toki mahino heni kiate au hono mahuʻinga ke lau kakato ʻa e Tohi ʻa Molomoná, fakataha mo e ngaahi folofola kehé, pea loto ke u toe fakahoko tā-tuʻo lahi ia ʻi heʻeku moʻuí.