Taimi Feʻinasiʻakí
ʻOku ou Talangofua kia Sīsū Kalaisi Koeʻuhí ʻOku ou ʻOfa ʻIate Ia
Te ke lava ʻo ongoʻi e ʻofa ʻa e Fakamoʻuí kiate koé ʻo fakafou ʻi he Laumālie Māʻoniʻoní. Ko e fē taimi ʻokú ke ongoʻi ai ʻa e ʻofa ʻa e Fakamoʻuí? ʻI he taimi ʻokú ke fai ai hoʻo lotú pe lau ʻa e folofolá pe hiva ha foʻi hiva ʻa e Palaimelí? ʻOkú ke ongoʻi ʻEne ʻofá ʻi he taimi ʻokú ke maʻu ai ʻa e sākalamēnití? Ko e hā ʻoku hoko ʻi he taimi ʻokú ke ongoʻi ai ʻa e ʻofa ko ʻení? ʻOku māfana ho lotó? ʻOkú ke ongoʻi nonga? ʻOku hanga ʻe heʻetau ongoʻi e ʻofa ʻa e Fakamoʻuí ʻo ʻai kitautolu ke tau fie fakahaaʻi ʻetau ʻofa kiate Iá.
ʻOku hanga ʻe he potufolofola ʻo e māhina ní ʻo akoʻi kitautolu te tau lava ʻo fakahaaʻi ʻetau ʻofa ki he ʻOtuá ʻaki haʻatau tauhi ʻEne ngaahi fekaú. Hiki ʻi hoʻo tohinoa ʻo e folofolá ha niʻihi ʻo e ngaahi fekau ʻokú ke ʻiloʻi e founga ke tauhi ʻakí. Ko e taimi ʻoku tau tauhi ai ʻa e ngaahi fekaú ke fakahaaʻi ʻetau ʻofa ki he ʻOtuá, ʻokú Ne tāpuakiʻi leva kitautolu ke tau ongoʻi ʻEne ʻofá ʻo lahi ange.
Sepitema 2010 Tohinoa Fakafolofolá
Lau ʻa eSione 14:15.
Lotu ki he Tamai Hēvaní ke tokoni atu ke ke fakahaaʻi hoʻo ʻofa kiate Iá ʻaki hoʻo talangofuá.
Ako maʻuloto ʻa e Sione 14:15 pea lau ia ki ha niʻihi kehe.
Fili ha taha ʻo e ngaahi ʻekitivitī ko ʻení, pe faʻu pē haʻo ʻekitivitī pē ʻaʻau:
-
Tokoniʻi ha taha kehe ke ne ako maʻuloto ʻa e Sione 14:15.
-
ʻOku maʻu ʻa e Fekau ʻe Hongofulú ʻi he ʻEkesōtosi 20:3–17. Lau ʻa e ngaahi veesi ko iá; pea fakafonu ʻa e ngaahi foʻi maka ʻi he peesi 63 ʻaki ha fakatātā pe ha ngaahi foʻi lea ke ne fakamatalaʻi ʻa e fekaú taki taha. Fokotuʻu ha taumuʻa ke tauhi faivelenga ange ha taha ʻo e ngaahi fekaú ʻi he lolotonga ʻo e uiké.
-
Talanoa mo hoʻo ongomātuʻá pe faiako Palaimelí fekauʻaki mo ha taimi naʻa nau ongoʻi ai ʻa e Laumālie Māʻoniʻoní pea mo ʻiloʻi ʻoku ʻofa ʻa e Fakamoʻuí ʻiate kinautolu.
-
Fakamanatuʻi ʻa e ngaahi taimi naʻá ke ongoʻi ai ʻa e ʻofa ʻa e Fakamoʻuí peá ke fakamatalaʻi kinautolu ʻi hoʻo tohinoá.
ʻOku tokoni fēfē ʻa e meʻa naʻá ke faí ke mahino kiate koe ʻa e Sione 14:15?
Hiki ʻi hoʻo tohinoá pe tā ha fakatātā fekauʻaki mo e meʻa naʻá ke faí.
Toʻohemá: tā fakatātaaʻi ʻe James Johnson; toʻomataʻú: tā fakatātaaʻi ʻe Scott Greer