Naʻe Fie maʻu ʻe Simi ʻEku Tokoní

Hili pē ha taimi nounou mei heʻema mali ʻi he Temipale Sōlekí, naʻá ma nofo totongi mo Simi ʻi ha fale ʻakau ʻi he matāfanga ʻo ʻOlikoní. Ko Simí ko ha ʻenisinia tā mape ki he puleʻangá, naʻá ne tokangaʻi hono vakaiʻi mo hono fakatonutonu ha mape ʻo e matāfanga ʻo ʻOlikoní. ʻI he pongipongi kotoa pē, naʻá ne ʻalu fakataha ai mo ha tokotaha ʻenisinia ʻe taha ke hoko atu ʻa e ngāue mei he ʻaho ki muʻá. Naʻe faingataʻa ʻene ngāué koeʻuhí he naʻe fuʻu ʻuluʻakauʻia ʻa e matāfangá.

ʻI ha efiafi ʻe taha, ne ʻamanaki ke u kamata teuteu ʻa e meʻatokoni efiafí, kuo haʻu ki heʻeku fakakaukaú ha ongo mālohi ʻoku ʻikai mahuʻinga ʻeku feimeʻatokoni efiafí. He ʻikai foki mai ʻa Simi ia ʻo maʻu meʻatokoni he efiafi ko ʻení. Naʻe haʻu mo ha toe fakakaukau ʻe taha: ʻOku faingataʻaʻia ʻa Simi pea ʻokú ne fie maʻu ʻeku tokoní!

Naʻe ʻikai ke u fanongo ki ha leʻo, ka naʻe mahino ʻaupito ʻa e pōpoakí ki hoku ʻatamaí ʻo hangē pē ne lea mai ʻaki iá. Kuo pau ke u tokoni ki ai, ka ʻoku ʻi fē? ʻOku ngāue ʻi he ʻaho kotoa pē ʻi he matāfangá, ka naʻe ʻikai ke u ʻilo ʻe au pe ʻoku ngāue ʻi fē he ʻaho ko iá. Naʻá ku ongoʻi naʻe ueʻi au ke u heka ki he kaá ʻo lele he hala lahí, ka te u afe ki he tafaʻaki fē ʻo e halá? Naʻá ku kiʻi manavasiʻi, ka naʻá ku ongoʻi ʻoku totonu ke u afe ki he tafaʻaki fakatongá. Naʻá ku fakalaka atu ʻi he ngaahi afenga lahi ʻi he tafaʻakí, pea ʻe lava pē ke hoko ha taha ʻo e ngaahi afe ko iá ko e feituʻu ia ʻoku ngāue ai ʻa Simí.

Naʻe haʻu ʻa e ongo kiate au ke u afe mei he hala lahí ʻo muimui ʻi ha taha ʻo e ngaahi hala fāsiʻí. Naʻe ʻuha, pea ʻi he ʻosi ha maile nai ʻe taha pe ua, ne hoko atu ki ha hala pelepela. Naʻá ku fakakaukau leva ke u tafoki ʻo foki. Naʻe fakaʻau ke fakapoʻuli, peá u pehē, “Meʻa fakavalevale moʻoni ko ʻeku haʻú.”

Ka ne ʻikai fuoloa ʻeku afe hake ki he hala lahí kuó u aʻu mai ki ha ongo ʻenisinia ongosia mo loto mamahi, kuó na likoliko ʻi he pelepelá, he ʻikai ha taha ia te ne fie fakaheka kinaua. Ne talamai ʻe Simi mo hono kaungā-ngāué ne tō ʻena lolí ʻi ha loto pelepela. Naʻá na feinga ke fakaʻatā ka naʻe aʻu pē ʻo na liʻaki ka na lue lalo mai he loto vao ʻakaú ki he hala lahí.

Naʻá na fifili ʻo pehē, “Naʻe anga fēfē hoʻo ʻilo ʻa e feituʻu ʻokú ma ʻi aí?” peá na fiefia ʻi heʻeku ʻiloʻi kinauá. Naʻe tatau pē ʻeku fiefiá mo kinaua ʻi heʻeku fakamatala ange e founga hono tataki au ʻe he Laumālié.

ʻI heʻeku tūʻulutui mo Simi ʻo lotu he efiafi ko iá, naʻá ma fakafetaʻi koeʻuhí ko e ivi takiekina ʻo e Laumālie Maʻoniʻoní, ʻa ia naʻe hoko mai kiate au ko e tali ʻo e ngaahi lotu kole tokoni ʻa hoku husepānití.