“Գլուխ 16: Ջոզեֆ Սմիթը և Սիդնի Րիգդոնը սովորում են Սիոնի մասին: 1830թ.,” Վարդապետություն և Ուխտեր - Պատմություններ (2002), 61–63
“Գլուխ 16,” Վարդապետություն և Ուխտեր - Պատմություններ, 61–63
Գլուխ 16
Ջոզեֆ Սմիթը և Սիդնի Րիգդոնը սովորում են Սիոնի մասին
1830թ.
Միսիոներները Սիդնի Րիգդոնին տվեցին Մորմոնի Գրքի մեկ օրինակ և ուսուցանեցին ավետարանի մասին: Սիդնին կարդաց Մորմոնի Գիրքը և աղոթեց դրա մասին: Երկնային Հայրը նրան հայտնեց, որ ավետարանը ճշմարիտ է և Սիդնին մկրտվեց:
Սիդնի Րիգդոնը իր եկեղեցու անդամներին խնդրեց լսել միսիոներներին, և նրանցից շատերն այդպես էլ արեցին: Շուտով 1,000 մարդ մկրտվեց Կիրթլենդում:
Սիդնի Րիգդոնը ցանկացավ հանդիպել Ջոզեֆ Սմիթին, և գնաց Նյու Յորք: Երբ Սիդնին եկավ, Ջոզեֆ Սմիթը նրա համար հայտնություն ստացավ: Հայտնության մեջ Հիսուսն ասաց, որ Սիդնի Րիգդոնը մեծ բաներ պետք է աներ: Նա պետք է ուսուցաներ ավետարանը շատ մարդկանց: Նա պետք է մկրտեր նրանց և շնորհեր Սուրբ Հոգու պարգևը:
Հիսուսը Ջոզեֆին և Սիդնիին ասաց, որ Աստվածաշնչի որոշ մասեր շատ տարիներ առաջ փոխվել են: Այլ կարևոր մասեր հանվել էին: Հիսուսն ասաց, որ Նա Ջոզեֆ Սմիթին կհայտնի, թե Աստվածաշնչի որ մասերը պետք է ուղղվեն: Սիդնին պետք է գրի առներ այն ուղղումները, որոնք Ջոզեֆը կթելադրեր:
Մի պատմություն, որն Աստվածաշնչում ավարտված չէր, Ենովքի մասին է, որը մեծ մարգարե էր: Նրա մարդիկ այնքան արդարակյաց էին, որ Տերը նրանց կոչում էր Սիոն: Ենովքի ժողովուրդը կառուցեց մի քաղաք, որի անունը Սիոն էր: Սիոնում մարդիկ սիրում էին միմյանց և հոգ էին տանում միմյանց մասին: Ոչ ոք աղքատ չէր, ոչ էլ դժբախտ:
Սիոնում բոլորը պահում էին Երկնային Հոր պատվիրանները: Մարդիկ այնքան արդարակյաց էին, որ Տերն ապրում էր նրանց մեջ: Հետագայում նա Սիոնի ժողովրդին Իր հետ վերցրեց երկինք:
Հիսուսը Ջոզեֆ Սմիթին ասաց, որ Սրբերը պետք է մեկ այլ քաղաք կառուցեին Սիոն անունով: Քաղաքը պետք է հիասքանչ լիներ: Այնտեղ չէր լինի վատ մարդ: Քաղաքում ապրողները պետք է սիրեին միմյանց և լինեին երջանիկ: Հիսուսն ասաց, որ Նա կգար և կապրեր նրանց հետ: