“Kapitulo 34: Ang Dios Nagpahimatngon sa mga Katawhan sa Zion: Hulyo–Agosto 1833,” Mga Istorya sa Pagtulun-an ug mga Pakigsaad (2002), 128–31
“Kapitulo 34,” Mga Istorya sa Pagtulun-an ug mga Pakigsaad, 128–31
Kapitulo 34
Ang Dios Nagpahimatngon sa mga Katawhan sa Zion
(Hulyo–Agosto 1833)
Ang Dios nagmando ug daghang mga Santos sa pag-adto sa Jackson County, Missouri. Daghang mga katawhan nangadto didto sa pagpuyo. Sila nagtukod ug mga balay, tindahan, ug usa ka imprintahanan.
Si Satanas dili buot sa mga Santos nga mopuyo didto sa Jackson County. Siya dili buot kanila nga motukod ug siyudad sa Zion. Siya buot nga ang ubang mga katawhan mahimong mangil-ad ngadto kanila. Si Satanas buot nga ang mga dautang tawo mopapahawa sa mga Santos sa Jackson County. Ang mga dautang katawhan mihimo sumala sa kabubut-on ni Satanas. Sila misulay sa pagpapahawa sa mga Santos.
Usa ka manggugubot nga panon sa mga katawhan nga masuk-anon nagtagbo. Ang manggugubot nga panon mipadala sa ubang mga lalaki sa pagpakigkita sa mga pangulo sa Simbahan. Ang mga lalaki misulti sa mga Santos nga sila kinahanglan mobiya sa Jackson County. Apan ang mga pangulo sa Simbahan nasayud nga ang Dios buot nga sila motukod ug siyudad sa Zion diha sa Jackson County. Sila misulti sa manggugubot nga panon nga ang mga Santos dili makabiya.
Ang mga dautan nga tawo mibalik ngadto sa manggugubot nga panon. Hilabihan kasuko sa mga manggugubot nga panon. Ilang gilungkab ang imprintahanan sa mga Santos. Sila miguba niini. Ang mga Santos dili na makaimprinta sa mga basahon ug mga pamantalaan.
Ang mga manggugubot nga panon midakop kang Bishop Partridge ug ni igsoon Allen ug gihuboan sila sa ilang mga saput. Sila mibutang ug mainit nga alkitran ug mga balhibo sa ilang panit. Nakit-an sa mga manggugubot nga panon ang ubang mga santos ug gibunalan sila.
Human sa tulo ka adlaw ang mga dautan nga mga tawo nangagi lahus sa lungsod. Ilang gipamusil ang mga kabalayan. Naninggit sila ug mga ngil-ad nga mga butang ngadto sa mga Santos. Sila miingon nga sila mobunal sa bisan kinsa nga ilang madakpan. Sila naninguha sa pagpangita sa mga pangulo sa Simbahan. Ang mga pangulo sa Simbahan nanago gikan sa mga manggugubot nga panon.
Usa sa mga pangulo mao si Oliver Cowdery. Siya mibiya sa Jackson County. Siya miadto aron sa pagpakigkita ni Joseph sa Kirtland.
Si Oliver misulti kang Joseph unsa ang gibuhat sa mga dautan nga katawhan sa Zion. Ang mga Santos sa Jackson County buot nga masayud unsa ang ilang buhaton.
Si Joseph misulti kang Oliver mahitungod sa pipila ka mga pagpadayag nga gihatag ni Jesus kaniya. Ang Ginoo miingon nga ang mga Santos kinahanglan motukod ug usa ka templo sa Zion. Ang mga Santos kinahanglan mobayad sa ikapulo. Ang ikapulo nga salapi ibayad alang sa templo. Si Jesus misulti kang Joseph nga ang Zion mahimo nga dako kon ang mga Santos mosunod sa Dios. Ang mga Santos pagasilotan kon sila dili mosunod sa Dios.
Si Jesus miingon nga ang mga Santos kinahanglan mosunod sa mga balaod sa nasud. Ang mga Santos kinahanglan mopili sa mga matarung nga katawhan nga mahimong pangulo sa yuta. Usahay ang mga dautan nga katawhan mahimong pangulo sa yuta. Kini makahimo sa mga matarung nga katawhan nga dili malipayon.
Ang Ginoo nagmando sa mga Santos sa paghunong sa pagbuhat sa mga butang nga dautan. Si Jesus miingon nga ang Santos dili gayud mabalaka sa mga manggugubot nga panon. Dili nila dumtan ang dautan nga mga katawhan. Ang mga Santos kinahanglan mopasaylo sa ilang mga kaaway. Sila makig-away lamang kon ang Dios magmando kanila sa pakig-away. Ang Dios mosilot sa dautan nga mga tawo.
Wala madugay, si Jesus miingon ngadto sa mga Santos sa Zion nga sila makaangkon ug kasamok sa makadiyot nga panahon. Sila wala magsunod sa mga kasugoan. May adlaw ra, nga si Jesus motabang sa mga Santos sa pagtukod sa Zion. Unya mopanalangin kanila.