“Kapitulo 46: Si Joseph Smith Sulod sa Bilanggoan sa Liberty: Marso 1839,” Mga Istorya sa Pagtulun-an ug mga Pakigsaad (2002), 173–75
“Kapitulo 46,” Mga Istorya sa Pagtulun-an ug mga Pakigsaad, 173–75
Kapitulo 46
Si Joseph Smith Sulod sa Bilanggoan sa Liberty
(Marso 1839)
Si Joseph Smith ug ang iyang mga kauban nabilanggo sulod sa daghang mga adlaw. Unya gibalhin sila ngadto sa laing bilanggoan. Didto kini sa Liberty, Missouri.
Ang bilanggoan sa Liberty tugnaw ug hugaw. Si Joseph ug iyang mga kauban nag-antus sa hilabihan. Usahay igaid sila sa mga kadina. Mapugos sila sa paghigda sa salog.
Ang pagkaon dili maayo. Usahay butangan kini ug hilo ug madaut sila.
Si Joseph naguol. Siya ug iyang mga kauban nabilanggo sa dugay na nga panahon. Si Joseph wala masayud kon makagawas pa ba sila. Siya nabalaka mahitungod sa Simbahan.
Si Joseph miampo ngadto sa Langitnong Amahan. Siya nangutana unsa ka dugay siya ug ang mga Santos kinahanglan nga mag-antus. Siya mihangyo sa Langitnong Amahan sa pagtabang kanila. Si Joseph mihangyo sa Langitnong Amahan nga silotan ang ilang mga kaaway.
Si Jesus misulti kang Joseph nga siya mag-antus lamang sa diyutay nga panahon. Iyang gisultihan si Joseph nga magmaisug. Unya ang Dios manalangin kaniya. Si Jesus miingon nga si Joseph mahibalik na sa iyang mga higala sa dili madugay. Si Joseph gihigugma sa iyang mga kahigalaan ug malipay nga makakita kaniya.
Si Jesus nasayud unsay gibuhat sa mga tawong dautan. Siya misulti ni Joseph unsaon niya pagsilot sila. Ang mga dautang katawhan dili gayud makahupot ug gahum sa pagkapari. Ang ilang mga anak dili makahupot sa gahum sa pagkapari. Ang dautan nga mga katawhan mag-antus ug mamatay.
Si Jesus misulti kang Joseph sa daghang maayo nga mga butang nga mahitabo sa mga Santos. Walay makapugong sa Dios sa pagpanalangin kanila. Ang Espiritu Santo magtug-an kanila sa kahibulongang mga butang kalabut sa gahum sa Dios. Sila makat-on mahitungod sa langit ug yuta.
Si Jesus miingon nga si Joseph dili gayud mahadlok kon siya mag-antus. Si Joseph dili mabalaka kon siya adunay mga kasamok. Si Jesus miingon nga ang mga kasamok alang sa atong kaayohan. Ang mga kasamok makatabang kanato sa pagkakat-on. Si Jesus nag-antus labaw pa kay kang bisan kinsa.