“Kapitulo 55: Dugang Kasamok alang sa mga Santos: 1843–1844,” Mga Istorya sa Pagtulun-an ug mga Pakigsaad (2002), 199–200
“Kapitulo 55,” Mga Istorya sa Pagtulun-an ug mga Pakigsaad, 199–200
Kapitulo 55
Dugang Kasamok alang sa mga Santos
(1843–1844)
Kasagaran sa mga katawhan duol sa Nauvoo dili mga sakop sa Simbahan. Daghan kanila ang wala makagusto sa mga Santos. Dili sila buot nga ang mga Santos mahimong mga pangulo sa siyudad. Sila naghimo ug kasamok alang sa mga sakop sa Simbahan.
Kadtong maong katawhan nagkatigum sa pagkamanggugubot nga mga panon. Sila nangawat sa mga kahayopan sa mga Santos. Sila nangsunog sa mga kamalig ug mga kabalayan. Sila nanglimbasog aron sa pagpapahawa sa mga Santos gikan sa Nauvoo. Ang mga kapulisan ug mga kasundalohan wala gayud mopugong sa mga manggugubot nga panon. Ang gobernador wala motabang sa mga Santos.
Si Joseph Smith miingon sa mga Santos sa Nauvoo nga sila mahiagum sa kasamok. Ang mga butang nga giingon ni Joseph Smith nahimong tinuod. Si Joseph nasayud nang daan nga ang mga Santos mobiya gayud sa Nauvoo. Sila kinahanglan mangadto sa usa ka dapit diin walay usa nga magsamok kanila.
Si Joseph Smith mihimo ug usa ka panagtigum uban sa mga Apostoles ug pipila ka mga tawo. Siya miingon ngadto kanila nga mangita ug usa ka dapit aron kapuy-an sa mga Santos.
Si Joseph Smith mitan-aw sa mga mapa sa kayutaan. Ang maong mapa nagpakita ug usa ka dapit nga adunay mga tag-as nga kabukiran ug lapad ug ugang walog. Mga Indian ang nagpuyo didto. Si Joseph nasayud nga mao kini ang dapit nga maayo alang sa mga Santos. Ang mga manggugubot nga panon dili na makadagmal kanila. Si Joseph naglaum nga ang mga Santos makaadto didto aron makapuyo.
May mga tawo sa Nauvoo nga mga sakop sa Simbahan. Apan wala na sila motuo sa ebanghelyo. Sila nagdumot ni Joseph Smith. Sila gustong mopatay kaniya. Sila nagsugod ug usa ka pamantalaan. Sila nagmantala ug mga dautang butang bahin kang Joseph ug sa mga Santos.
Ang mga pangulo sa Nauvoo nasuko bahin sa pamantalaan. Ang uban kanila nangadto sa buhatan sa pamantalaan. Ilang gisunog ang mga pamantalaan. Ilang giguba ang mga kahimanan sa pamantalaan. Dili na mapatik ang pamantalaan.