“Kapitulo 47: Si Joseph Smith Nangayo sa Presidente ug Panabang: Marso–Nobyembre 1839,” Mga Istorya sa Pagtulun-an ug mga Pakigsaad (2002), 176–79
“Kapitulo 47,” Mga Istorya sa Pagtulun-an ug mga Pakigsaad, 176–79
Kapitulo 47
Si Joseph Smith Nangayo sa Presidente ug Panabang
(Marso–Nobyembre 1839)
Si Joseph Smith nagsulat ngadto sa mga Santos samtang diha siya sulod sa bilanggoan sa Liberty. Siya nagsulti kanila sa paghimo ug sulat bahin sa mga butang nga gihimo sa mga dautang tawo kanila. Sila mopadala gayud unsay ilang gisulat ngadto sa mga pangulo sa nasud.
Si Joseph nagsulti sa mga Santos pagsulat sa mga ngalan sa dautan nga mga katawhan nga nagdagmal kanila. Sila kinahanglan mosulti giunsa pagguba ang ilang mga pinuy-anan ug mga umahan.
Usa ka adlaw niana dihay mga magbalantay nga nagdala kang Joseph ug upat sa iyang mga kahigalaan ngadto sa laing bilanggoan. Si Joseph ug iyang mga kahigalaan mipalit ug duha ka kabayo gikan sa mga magbalantay. Sila mihatag ug mga saput aron ibayad sa usa ka kabayo. Sila misaad sa pagbayad alang sa laing kabayo sa ubang panahon.
Usa ka gabii niana upat sa mga magbalantay nangahubog ug nangatulog. Lain nga magbalantay mitabang kang Joseph ug iyang mga kahigalaan sa paglayas.
Si Joseph ug iyang mga kauban nagpulipuli sa pagsakay sa mga kabayo. Sila nangadto sa Quincy, Illinois. Miabut sa napulo ka mga adlaw ang ilang pag-adto didto.
Si Joseph ug iyang mga kahigalaan nagkakita sa ilang mga banay. Sila malipayon nga nagkauban pag-usab.
Ang mga Santos nagkinahanglan nga mangita ug usa ka dapit sa Illinois aron magtukod ug usa ka siyudad. Sila namalit ug yuta daplin sa suba sa Mississippi. Ang yuta basa ug lapukon. Si Joseph ug ang mga Santos namalhin didto. Sila nagtrabaho pag-ayo aron sa paghimo sa yuta nga mauga. Sila nagtukod ug mga pinuy-anan ug nagtanom ug mga halaman. Sila nagtukod ug usa ka maanindot nga siyudad. Ilang ginganlan ang siyudad ug Nauvoo. Ang Nauvoo nagkahulogan ug usa ka matahum nga dapit.
Sa wala madugay, si Joseph Smith miadto aron makigkita sa presidente sa Tinipong Bansa. Si Joseph Smith mipahibalo sa presidente kalabut sa mga manggugubot nga panon didto sa Missouri. Siya misulti giunsa sa mga dautang tawo pagsunog ang mga pinuy-anan sa mga Santos ug pagpangawat ang ilang mga kahayopan.
Si Joseph miingon nga ang uban nga mga Santos gipamatay. Ang uban nga mga Santos gibilanggo. Siya mipakita sa presidente unsay gisulat sa mga Santos. Si Joseph miingon nga ang mga pangulo sa Missouri dili motabang sa mga Santos. Siya mihangyo sa presidente sa pagtabang sa mga Santos ug silotan ang ilang mga kaaway.
Ang presidente miingon nga siya nasayud nga ang mga Santos nag-antus. Apan dili siya mohimo ug bisan unsa aron pagtabang kanila. Kon siya motabang sa mga Santos, ang katawhan sa Missouri masuko.
Naguol si Joseph tungod kay ang presidente dili motabang sa mga Santos. Ang Langitnong Amahan lamang ang motabang kaniya.