“Kapitulo 62: Ang Unang mga Pumupuyo Nangadto sa Walog sa Salt Lake: Hunyo 1846–Hulyo 1847,” Mga Istorya sa Pagtulun-an ug mga Pakigsaad (2002), 224–29
“Kapitulo 62,” Mga Istorya sa Pagtulun-an ug mga Pakigsaad, 224–29
Kapitulo 62
Ang Unang mga Pumupuyo Nangadto sa Walog sa Salt Lake
(Hunyo 1846–Hulyo 1847)
Ang unang mga pumupuyo didto pa sa Council Bluffs. Nagkinahanglan sila ug daghan nga kusganon nga mga lalaki aron sa pagtabang kanila sa ilang biyahe. Kadaghanan sa mga batan-on nga lalaki nakauban sa Mormon Batalyon. Busa ang unang mga pumupuyo nakahukom nga dili usa sila moadto sa Rocky Mountains hangtud moabut ang tingpamulak.
Ang mga Santos gitugutan sa mga Indian nga makaangkon ug mga luna sa yuta sa pikas nga bahin sa suba. Didto ang mga Santos nagtukod ug usa ka lungsod nga ginganlan ug Winter Quarters. Sila naghimo ug mga dalan ug nagtukod ug mga balay. Ang uban nga mga balay anaa sa mga langub sa kilid sa mga bungtod. Ang unang mga pumupuyo nananom ug mga lagutmon.
Gibahin ni Brigham Young ang siyudad ngadto sa mga purok. Siya mipili ug mga tawo aron himoon ug mga bishop. Adunay mga Indian nga naghimo ug kasamok ngadto sa unang mga pumupuyo. Ang unang mga pumupuyo naghimo ug paril libot sa siyudad aron sa pagbantay nga ang mga Indian dili makasuiod aron dili makahimo ug kasamok.
Samtang ang mga unang pumupuyo didto sa Winter Quarters si Brigham Young nakadawat ug usa ka pagpadayag. Ang Ginoo misulti kaniya unsaon pagpangandam sa katawhan aron sa pagbiya alang sa ilang panaw. Siya misulti ni Brigham Young unsay angay nga buhaton sa katawhan samtang sila nagbiyahe.
Ang Ginoo miingon nga ang katawhan kinahanglan bahin-bahinon sa gagmay nga mga pundok. Matag pundok adunay usa ka pangulo. Ang katawhan kinahanglan mosunod sa ilang mga pangulo. Kinahanglan magtinabangay gayud sila sa usag-usa. Kinahanglan ilang atimanon kadtong mga banay nga walay inahan o amahan.
Matag pundok kinahanglan adunay iyang kaugalingong mga karomata ug pagkaon. Matag pundok kinahanglan adunay mga katawhan mga masayud unsaon pag-ayo sa mga karomata, motukod ug mga balay, mananom ug mga lagutmon, ug mohimo ug mga taytayan.
Ang Ginoo miingon unsa pay angay buhaton sa mga Santos. Kinahanglan gayud nga maghupot sila sa iyang mga kasugoan. Ila gayud nga tumanon ang ilang mga panaad sa usag usa. Dili gayud sila magsulti ug dautan sa usag usa. Sila magmatinud-anon. Ila gayud nga iuli ang mga butang nga ilang gihulaman ug nakit-an.
Ang Ginoo buot nga ang mga unang pumupuyo magmalipayon. Miingon siya kanila sa pag-uban ug awit ug sayaw. Dili gayud sila mahadlok. Motabang gayud siya kanila. Siya misulti kanila nga adunay kasamok. Apan ang ilang mga kasamok makahimo kanila nga Iabaw pang maayo nga katawhan. Mapanalanginan hinoon sila.
Si Brigham Young mituman unsay gisulti sa Ginoo kaniya sa pagbuhat. Iyang gibahin ang katawhan ngadto sa mga pundok. Matag pundok sangkap na sa tanan nilang gikinahanglan aron sa pagtukod ug usa ka siyudad sa kabukiran.
Ang mga Santos adunay usa ka komperensya. Unya si Brigham Young mipili ug usa ka pundok nga unang molarga. Dihay 143 ka mga lalaki, tulo ka mga babaye, ug duha ka mga bata. Sa pagkasunod adlaw ang unang pundok mibiya sa Winter Quarters.
Matag usa adunay buluhaton nga himoon sa ilang paglakaw. Ang mga kababayen-an maoy mag-atiman sa mga kabataan. Sila ang magluto sa pagkaon. Ang tanang mga kalalakin-an adunay mga pusil alang sa pagpanalipod sa katawhan ug mga hayopan.
Ang unang mga pumupuyo mibiyahe tibuok adlaw. Magabii mamahulay sila. Ilang ipahiluna ang ilang mga karomata aron kini maglibot kanila. Ang katawhan ug mga hayopan anaa sulod sa naglibot nga mga karomata. Naghaling sila ug kalayo ug nagluto sa pagkaon.
Nag-awit sila ug nagsayaw. Usa sa mga awit mao ang “Duol, Duol, Kamo mga Santos.” Kini makahupay sa katawhan sa ilang gibati.
Ang usa ka tawo mohuyop sa turutot aron pagpahibalo nga panahon na sa tingkatulog. Ang unang mga pumupuyo mag-ampo daan sa dayong pangatulog.
Layo kaayo ang biyahe sa unang mga pumupuyo sa ilang pagtabok sa kapatagan. Upat ka bulan ang ilang pagbiyahe. Sila nakahimamat ug lainlaing mga katawhan sa ilang paglakaw. Ang ubang mga katawhan mga manglilit-ag. Ilang gipasidan-an si Brigham Young sa dili pag-adto sa Rocky Mountains. Sila miingon nga ang mga lagutmon dili gayud moturok didto.
Ang ubang mga katawhan misulti kang Brigham Young nga adto lang sa California dad-a ang mga Santos. Apan si Brigham Young miingon nga ang Ginoo mipakita kaniya asa dad-a ang mga Santos. Iya gayud sundon ang Ginoo.
Sa katapusan miabut ang unang mga pumupuyo sa kabukiran. Malisud kaayo ang pagbiyahe didto.
Si Brigham Young nagdaut. Dili siya makabiyahe ug madali. Mipili siya ug pipila ka mga tawo aron mouna. Siya misulti kanila nga moadto sila sa Dakong Walog sa Salt Lake. Magsugod silag pananom ug mga lagutmon.
Ang mga kalakin-an midala sa ilang mga karomata sa ibabaw sa kabukiran. Sila midulhog ngadto sa walog. Sila namahulay sa daplin sa sapa.
Sila miampo sa Ginoo. Sila mihangyo kaniya nga panalanginan ang mga binhi nga ilang itanom. Gipananom sa kalakin-an ang mga binhi.
Sa pagkasunod adlaw nangabut sila si Brigham Young ug ang unang mga pumupuyo didto sa walog. Gitan-aw ni Brigham Young ang walog gikan sa iyang karomata. Siya nasayud nga mao kini ang dapit nga buot ang Ginoo nga puy-an sa mga Santos. Si Brigham Young miingon, “Mao kini ang tukma nga dapit. Padayon.“ Ang mga Santos mipadulhog sa ilang mga karomata paingon sa walog. Petsa 24 kini sa Hulyo 1847.