Zaj Dab Neeg Easter uas Zoo Tshaj Plaws

Nyaj nej nco qab thaum twb nyeem ib tsab ntawv los ntawm Thawj Pawg Thawj Tswj Hwm hauv nej pawg ntseeg los sis ceg ntseeg ob peb lim tiam tas los. Tsab ntawv ntawd tshaj tawm tias Hnub Caiv tom ntej—Easter Sunday—txhua pawg ntseeg thiab ceg ntseeg yuav sib ntsib ua ke rau kev sib ntsib txais lub cim nco txog xwb, thiaj li muaj sij hawm ntxiv kom teev tiam Vajtswv nrog nej tsev neeg thiaj li ua koob tsheej txog hnub phav tseem ceeb no.¹

Thawj Pawg Thawj Tswj Hwm tsab ntawv no ua rau kuv xav ntau yam txog qhov uas kuv tsev neeg tau ua koob tsheej txog Easter li cas dhau los. Kuv yim xav txog peb txoj kev ua koob tsheej los, kuv yim xav seb peb puas nco qab ntsoov txog lub ntsiab ntawm hnub phav no, uas yog hnub tseem ceeb kawg nkaus rau tag nrho cov uas ntseeg Yexus Khetos.

Tej kev xav no ua rau kuv xav ntxiv txog qhov uas peb tau ua koob tsheej txog Christmas thiab Easter li cas. Thaum lub Kaum Ob Hlis Ntuj, peb ua tej kab lig kev cai xws li hu nkauj zaj “Jingle Bells,” muaj cov thom khwm Christmas, pub khoom plig rau lwm tus thiab ua lwm yam uas muaj nqis heev—xws li kev saib xyuas cov uas xav tau, kev hu nkauj tej zaj nkauj qhuas Vajtswv uas peb nyiam, thiab kev nyeem cov vaj lug kub txog zaj dab neeg Christmas nyob hauv Lukas 2. Txhua zaus thaum peb nyeem zaj dab neeg no los ntawm ib phau Npaivnpaum loj heev, peb tsev neeg ua zoo ib yam li nej tsev neeg ua—muab txoj phaum kauv taub hau thiab hnav tsho khuam da dej kom sawv cev tam Yauxej, Maivliag, thiab neeg coob uas tau los teev tiam tus me nyuam mos liab Yexus, peb ua yeeb yam txog zaj dab neeg ntawm tus Cawm Seej txoj kev yug los.

Tiam sis peb txoj kev ua koob tsheej rau hnub Easter tsis zoo ib yam. Kuv xav tias peb tsev neeg tau “mus rau lub tsev koom txoos” xwb kom thiaj li nco txog Yexus Khetos thaum txog hnub Easter; ces thaum nyob ua ke nrog peb tsev neeg, peb tau koom ua ke ua lwm yam kab lig kev cai kom nco txog Easter. Kuv nyiam saib wb cov me nyuam thiab tam sim no wb cov xeeb ntxwv nrhiav cov qe Easter thiab nrhiav hauv lawv cov pob tawb Easter.

Tiam sis Thawj Pawg Thawj Tswj Hwm tsab ntawv ua rau kuv tsim dheev. Lawv tau caw peb ua tib zoo hwm tus Tswv thaum ua koob tsheej txog lub sij hawm tseem ceeb tshaj plaws hauv lub ntiaj teb—Yexus Khetos txoj Kev Theej Txhoj thiab txoj Kev Sawv Rov Los—tiam sis lawv kuj tau muab sij hawm ntxiv rau peb siv nrog tsev neeg thiab phooj ywg hauv Hnub Caiv Easter.

Daim Duab

Tus Cawm Seej uas tau sawv rov los

Cov lus los ntawm tus Yaj Saub Joseph Smith no qhia ntxiv txog qhov uas tej xwm uas muaj hauv lub caij Easter tseem ceeb npaum li cas: “Cov hauv paus ntsiab cai ntawm peb txoj kev ntseeg yog zaj lus tim khawv ntawm cov Thwj Tim thiab cov Yaj Saub, txog Yexus Khetos, hais tias Nws tau tuag, tau raug muab faus, thiab tau sawv rov los hnub thib peb, thiab tau nce mus dua saum ntuj ceeb tsheej lawm; thiab tag nrho lwm yam uas hais txog peb txoj kev ntseeg ces yog kev txuas ntxiv rau qhov no xwb.”²

Lesa thiab kuv wb tau sib tham txog tej yam uas wb tsev neeg ua tau zoo dua hauv lub caij Easter. Tej zaum lo lus nug uas wb nug wb tus kheej yog ib lo lus uas zoo rau peb txhua tus xav txog: Peb yuav ua li cas kom coj yam ntxwv txog kev qhia thiab kev ua koob tsheej txog Yexus Khetos txoj Kev Sawv Rov Los, zaj dab neeg Easter, kom ua zoo npaum li cov kab lig kev cai uas ua thaum nco txog Yexus Khetos txoj kev yug los, zaj dab neeg txog Christmas?

Zoo nkaus li peb txhua tus sim ua li no. Kuv pom tias muaj Tsoom Haiv Neeg Ntseeg hauv Hnub Nyoog Kawg ntxiv uas sim tsom ntsoov rau Yexus Khetos hauv lub caij Easter. Lawv ua tej yam kab lig kev cai thaum Hnub Caiv Toov Laj thiab Hnub Friday Zoo raws li lwm tus neeg ntseeg Khetos ua. Tej zaum peb yuav xav ua raws li tej kab lig kev cai tsim nyog ua kom nco txog Yexus Khetos hauv lub caij Easter ua lwm haiv neeg nyob thoob plaws lub ntiaj teb ua.

Tus kws kawm Phau Tshiab N. T. Wright hais tias: “Peb yuav tsum ua tej yam tshiab kom ua koob tsheej txog Easter: thaum kos duab, sau ntawv nyeem, cov me nyuam tej kev ua si, sau paj lug, sau zaj nkauj, kev seev cev, kev ntaus tswb, kev qoj nkauj tshwj xeeb. … Nov yog peb txoj kev ua koob tsheej tseem ceeb tshaj plaws. Yog tsis muaj Christmas ces nyob hauv phau Npaivnpaum zoo li yus tsuas tshem ob tshooj hauv phau Mathais thiab phau Lukas xwb. Tiam sis yog tias tsis muaj Easter, ces ntshe yuav tsis muaj Phau Tshiab; tsis muaj kev ntseeg Khetos.”³

Peb saib Phau Vaj Lug Kub Npaivnpaum rau nqi vim phau no qhia peb txog Yexus Khetos txoj kev yug los, txoj hauj lwm qhuab qhia, txoj Kev Raug Ntsia Saum Ntoo Khaub Lig, thiab txoj Kev Sawv Rov Los. Tsis muaj lwm cov lus uas muaj kev cia siab rau tag nrho noob neej zoo npaum li cov lus uas ib tug tim tswv tau hais thaum Easter sawv ntxov nyob ntawm lub Ntxa hauv lub Vaj: “Nws twb sawv rov los.”⁴ Peb ua Vajtswv tsaug rau qhov peb muaj cov vaj lug kub Phau Tshiab uas qhia txog zaj dab neeg Easter thiab tus Cawm Seej txoj hauj lwm qhuab qhia hauv Yudas thiab Kalilais.

Thaum Lesa thiab kuv tau xav txog tej yam uas wb ua tau kom tsom ntsoov rau Yexus Khetos thaum nrog wb tsev neeg ua koob tsheej txog Easter, wb tau sib tham txog qhov uas wb yuav ua kab lig kev cai twg kom nyeem vaj lug kub ua ke—zoo li kev nyeem Lukas 2 rau lub caij Easter.

Ces wb tau txais kev tshoov siab los saum ntuj los: Muaj tej nqe tseem ceeb txog Easter nyob hauv Phau Tshiab, tiam sis peb Tsoom Haiv Neeg Ntseeg hauv Hnub Nyoog Kawg muaj ib lub txiaj ntsim zoo kawg nkaus rau lub caij Easter. Ib lub txiaj ntsim uas ua tim khawv txog qhov txuj ci tseem ceeb ntawm Easter uas tej zaum muaj cov vaj lug kub txog Easter zoo tshaj txhua phau ntawv uas cov neeg ntseeg Khetos sau. Kuv yeej hais txog Phau Ntawv Maumoos, thiab qhov tseem ceeb, zaj lus txog Yexus Khetos txoj kev tshwm sim rau cov neeg hauv Sab Ntuj Tshiab, tom qab Nws sawv rov los.

Tus Yaj Saub Joseph Smith piav hais tias Phau Ntawv Maumoos yog “phau uas raug tshaj txhua phau ntawv nyob hauv ntiaj teb no,”⁵ thiab pib ntawm 3 Nifais 11, nws qhia zaj dab neeg txog tus Khetos uas sawv rov los txoj kev mus xyuas cov Neeg Nifais, uas yog tus Cawm Seej txoj hauj lwm qhuab qhia hauv lub caij Easter. Cov vaj lug kub Easter no ua tim khawv txog tus Tswv Yexus Khetos txoj Kev Sawv Rov Los.

Nyob hauv tej tshooj no, Yexus Khetos hu kaum ob tug thwj tim, qhia ib yam li Nws Zaj Lus Qhia Pem Roob feem ntau, tshaj tawm tias Nws tau ua kom Mauxes txoj kev cai tiav lawm, thiab qhia txog qhov uas thaum yav tom ntej cov neeg ntseeg hauv hnub nyoog kawg yuav muab Ixayees sau los ua ke. Nws kho cov neeg mob thiab hais cov lus zoo kawg nkaus thov Vajtswv pab lawv kom “twb tsis muaj ib tug nplaig uas txawj hais, thiab twb tsis muaj ib tug neeg uas txawj sau, thiab neeg lub siab twb tsis muaj peev xwm to taub txog tej yam tseem ceeb thiab zoo kawg nkaus ib yam li peb pom thiab hnov Yexus hais; thiab twb tsis muaj leej twg to taub txog txoj kev xyiv fab uas muaj puv npo rau peb tus ntsuj plig nyob rau lub sij hawm uas peb tau hnov nws thov Leej Txiv rau peb.”⁶

Daim Duab

Yexus Khetos tshwm sim rau cov Neeg Nifais

Lub caij Easter no, peb tsev neeg yuav tsom ntsoov rau thawj 17 nqe ntawm 3 Nifais 11, uas nej txhua tus paub zoo. Nej paub tias ib co neeg coob tau sib sau ua ke nyob ntawm lub tuam tsev hauv thaj av Huaj Vam es lawv hnov Vajtswv tus uas yog Leej Txiv lub suab thiab pom Yexus Khetos nqis los saum ntuj los kom caw lawv li no:

“Cia li sawv thiab los cuag kuv, … xwv kom nej thiaj tau xuas tej qhov ntsia hlau hauv kuv ob txhais tes thiab hauv kuv ob txhais taw, xwv kom nej thiaj paub tias kuv yog … tus Vajtswv ntawm tag nrho lub ntiaj teb, thiab tau raug tua rau neeg ntiaj teb tej kev txhaum.

“Thiab … cov neeg coob coob txav mus, … ib leeg txav mus zuj zus … thiab pom ntawm lawv lub qhov muag thiab xuas ntawm lawv txhais tes, … thiab ua tim khawv tias, twb yog nws. …

“Thiab … lawv qw nrov nrov ua ke, hais tias:

“Hauxanas! Cia li qhuas tus Vajtswv uas Siab Tshaj Plaws lub npe! Thiab lawv vau rau ntawm Yexus ko taw, thiab teev tiam nws.”⁷

Cia li xav txog qhov uas cov Neeg Nifais nyob ntawm lub tuam tsev tau kov tus Tswv uas sawv rov los txhais tes! Peb cia siab tias yuav ua ib txoj kab lig kev cai Easter tshiab thaum peb nyeem tej tshooj no nyob hauv 3 Nifais ib yam li peb nyeem Lukas 2 thaum lub caij Christmas. Muaj tseeb tiag, Phau Ntawv Maumoos hais txog zaj dab neeg Easter uas zoo tshaj plaws. Yeej tsis xav kom zaj dab neeg Easter uas zoo tshaj plaws no ua ib zaj uas tsis muaj leej twg hnov.

Kuv caw nej xav txog Phau Ntawv Maumoos thiab xav txog zaj lus tim khawv tseem ceeb uas qhia tias Yexus Khetos twb sawv rov los thiab Khetos cov lus qhuab qhia uas muaj nqis heev nyob haud.

Tej zaum peb xav nug seb, Kev nyeem cov vaj lug kub hauv Phau Ntawv Maumoos yuav ua li cas kom foom koob hmoov rau peb thiab cov uas peb hlub lub neej hauv lub caij Easter? Yeej yuav pab ntau heev. Txhua zaus peb nyeem thiab kawm los ntawm Phau Ntawv Maumoos peb paub tias yuav muaj tej yam zoo kawg nkaus tshwm sim.

Tsis ntev tas los, Lesa thiab kuv wb mus rau lub ntees tuag ntawm ib tug phooj ywg, ib tug poj niam uas mob heev nws thiaj li tas sim neej ntxov. Peb tau koom ua ke nrog nws tsev neeg thiab cov phooj ywg zoo, sib tham txog tej yam uas peb nco txog ib tug neeg zoo nkauj uas tau pab peb lub neej.

Thaum sawv deb me ntsis ntawm lub hleb thiab sib tham nrog lwm tus, kuv pom ob tug me nyuam ntxhais mus nyob ze lub hleb thiab ncav ko taw kom pom lawv tus phauj hauv lub hleb uas zoo kawg. Tsis muaj lwm tus nyob ze, Lesa thiaj li mus ze nkawd thiab zaum khwj ywb kom nplij nkawd lub siab thiab qhia nkawd. Nws nug nkawd seb nkawd puas nyob zoo thiab nkawd puas paub nkawd tus phauj nyob qhov twg lawm. Nkawd qhia tias nkawd nyuaj siab, tiam sis Vajtswv ob tug ntxhais no, tso siab rau Nws, thiab hais tias nkawd paub tias nkawd tus phauj zoo siab heev, vim nws nrog Yexus nyob.

Thaum nkawd tseem hluas li ntawd, nkawd nyob kaj siab lug vim paub txog txoj hau kev zoo siab, thiab raws li cov me nyuam ua, nkawd ua tim khawv txog qhov uas tus Cawm Seej twb Sawv Rov Los lawm tiag. Nkawd paub hauv nkawd lub siab vim muaj niam muaj txiv, tsev neeg, thiab cov thawj coj hauv lub Koom Haum Me Nyuam Yaus tau muab ib lub noob cog hauv nkawd lub siab kom nkawd ntseeg Yexus Khetos thiab txoj sia nyob mus ib txhis. Nkawd muaj tswv yim heev, es ob tug ntxhais hluas to taub tej yam tseeb uas peb yuav to taub los ntawm zaj lus Easter thiab tus Cawm Seej uas sawv rov los lawm txoj hauj lwm qhuab qhia thiab cov yaj saub tej lus nyob hauv Phau Ntawv Maumoos.

Kuv tau pom tias thaum Thawj Tswj Hwm Russell M. Nelson muab ib Phau Ntawv Maumoos rau ib tug uas tsis ntseeg li peb, xws li cov thawj coj thoob plaws lub ntiaj teb, feem ntau nws qhib phau 3 Nifais thiab nyeem txog qhov uas tus Khetos uas sawv rov los tau tshwm sim rau cov Neeg Nifais pom. Thaum nws ua li ntawd, tus yaj saub uas muaj txoj sia nyob ua tim khawv txog tus Khetos uas muaj txoj sia nyob.

Peb tsis muaj peev xwm sawv ua tim khawv txog Yexus Khetos mus txog thaum peb txawj ua tim khawv txog Nws. Phau Ntawv Maumoos yog ib phau uas ua tim khawv ntxiv txog Yexus Khetos vim nyob hauv phau no dawb ceev, cov yaj saub coob ua tim khawv txog qhov uas Yexus Khetos yuav los, thiab ua tim khawv tias Nws twb los lawm.

Kuv tuav ib Phau Ntawv Maumoos los ntawm thawj zaug uas muab luam tawm. Thaum kuv ua li no yeej ib txwm tshoov kuv lub siab. Thaum kuv yog ib tug neeg laus, ua rau kuv xav tsis thoob thaum xav txog tej yam uas Joseph Smith tau ua kom muab phau vaj lug kub txhais lus thiab muab luam tawm. Tej txuj ci tseem ceeb uas yuav tsum muaj los yeej nyuaj rau peb xav txog.

Tiam sis qhov ntawd tsis yog vim li cas phau no tshoov kuv lub siab. Yog vim phau no, ntau tshaj lwm phau ntawv uas tau muab luam tawm hauv lub ntiaj teb, ua tim khawv txog Yexus Khetos lub neej, txoj hauj lwm qhuab qhia, tej lus qhia, txoj Kev Theej Txhoj, thiab txoj Kev Sawv Rov Los. Kuv cov kwv tij thiab cov muam, kev kawm los ntawm phau ntawv txog Yexus Khetos no yuav hloov nej lub neej. Yuav qhib nej qhov muag kom txawj pom tej cib fim tshiab. Yuav ua rau nej cia siab ntxiv thiab muaj txoj kev siab hlub. Qhov tseem ceb, phau no yuav txhawb nqa nej txoj kev ntseeg Yexus Khetos thiab foom koob hmoov rau nej kom paub tseeb tias Nws thiab peb Leej Txiv paub nej, hlub nej, thiab xav kom nej rov qab mus tsev, lub tsev nyob mus ib txhis.

Cov kwv tij cov muam, twb txog lub sij hawm uas cov yaj saub puag thaum hais txog, “thaum txoj kev pab txog tus Cawm Seej yuav nthuav mus thoob plaws rau txhua haiv neeg, txhua xeem neeg, txhua yam lus, thiab txhua yam neeg.”⁸ Peb tab tom pom tej yam uas muaj raws li tej lus qhia no, dhau los ntawm Phau Ntawv Maumoos txoj kev ua tim khawv txog Yexus Khetos.

Daim Duab

Tus Tswv Yexus Khetos

Tsis muaj ib phau ntawv uas qhia zoo dua hais tias:

• Vim muaj Yexus Khetos, txhua yam tau hloov lawm.

• Vim muaj Yexus Khetos, txhua yam zoo dua.

• Vim muaj Yexus Khetos, peb ua tau neej—tiv tau kev raug mob.

• Vim muaj Yexus Khetos, peb ua tau txhua yam.

Tus Cawm Seej txoj kev sawv rov los, raws li Vajtswv uas yog Leej Txiv hais, yog zaj lus zoo kawg nkaus hauv lub caij Easter. Zaj lus no yuav pab peb tsev neeg txais tau ib zaj lus tim khawv txog Yexus Khetos uas yog peb tus Cawm Seej thiab tus Txhiv Dim, tus uas tau muab tej hlua ntawm txoj kev tuag tu.

Kuv ua tim khawv tias Phau Ntawv Maumoos muaj tseeb thiab ua tim khawv tias Yexus Khetos yog Vajtswv Leej Tub uas muaj txoj sia nyob. Los ntawm Yexus Khetos lub npe, amees.