“Tsis Muaj Dab Tsi Zoo Nkauj thiab Qab Zib Heev Npaum Li Kuv txoj Kev Xyiv Fab”

Hauv cov vaj lug kub, lo lus kev xyiv fab txhais tau tias ntau tshaj tej kev txaus siab los sis tej kev zoo siab uas los rau peb rau ib pliag nkaus xwb es ib vuag dua ntais lawm. Kev xyiv fab uas hais txog no yog ib yam ntawm ib tug xeeb ceem uas coj zoo li Vajtswv, es peb yuav txais tau kev xyiv fab puv npo thaum peb rov qab mus nrog Vajtswv nyob.³ Kev xyiv fab no yeej tob, yeej txawj txhawb nqa, yeej kav tau mus ntev tshaj plaws, thiab yeej hloov tau peb lub nej ntau tshaj lwm yam kev ua si los sis kev nplij siab uas muaj hauv lub ntiaj teb no.

Vajtswv tsim peb kom peb thiaj muaj kev xyiv fab. Twb yog peb txoj hmoov ua Leej Txiv Saum Ntuj Ceeb Tsheej cov me nyuam uas Nws hlub. Nws xav muab Nws txoj kev xyiv fab pub rau peb. Tus yaj saub Lihais qhia tias Vajtswv lub tswv yim rau peb txhua tus yog kom peb “yuav muaj kev xyiv fab.”⁴ Vim peb nyob hauv ib lub ntiaj teb uas poob lawm, feem ntau zoo li peb ncav tsis cuag txoj kev xyiv fab uas kav ib txhis. Tiam sis nyob hauv ib nqe tom qab ntawd, Lihais piav hais tias “tus Mexiyas [los] … , xwv kom nws yuav txhiv [peb] dim txoj kev poob.”⁵ Kev txhiv dim, dhau ntawm tus Cawm Seej Yexus Khetos, ua kom thiaj muaj kev xyiv fab.

Txoj moo zoo yog ib txoj lus muaj kev cia siab, ib “txoj lus muaj kev xyiv fab,”⁶ thiab txoj kev uas tag nrho txhua tus yuav muaj kev kaj siab lug thiab kev xyiv fab hauv lub neej no thiab txais kev xyiv fab puv npo hauv lub neej tom ntej.⁷

Txoj kev xyiv fab kuv hais txog yog ib lub txiaj ntsim rau cov ntseeg, tiam sis yuav tsum them tus nqi thiaj tau. Kev xyiv fab tsis pheej yig los sis lam tau lam muaj. Tsis yog li ntawd, kev xyiv fab no yog “[Yexus] Khetos cov ntshav muaj nuj nqi heev yuav.”⁸ Yog tias peb to taub zoo saib txoj kev xyiv fab no muaj nuj nqi heev npaum li cas, peb yuav tsis ua xyem xyav kom thiaj txi tau ib yam dab tsi ntawm lub ntiaj teb no los sis hloov peb lub neej kom thiaj txais tau.

Ib tug vaj ntxwv uas muaj hwj chim hauv Phau Ntawv Maumoos to taub li no. Nws noog hais tias, “Kuv yuav ua li cas kom kuv yug los ntawm Vajtswv, thiab muab tus ntsuj plig phem no rho tawm hauv kuv lub siab mus, thiab txais yuav nws tus Ntsuj Plig, xwv kom kuv yuav muaj kev xyiv fab puv npo … ? Nws hais tias, saib seb, kuv yuav muab txhua yam uas kuv muaj tso pov tseg, muaj tseeb tiag, kuv yuav tso kuv txoj kev kav teb chaws, xwv kom kuv yuav tau txais txoj kev xyiv fab heev no.”⁹

Tus tub txib Aaron teb tus vaj ntxwv lo lus noog hais tias, “Yog koj xav tau qhov no, … pe Vajtswv … [thiab] hloov siab lees txim rau tag nrho koj tej kev txhaum.”¹⁰ Kev hloov siab lees txim yog txoj kev mus txais tau kev xyiv fab¹¹ vim yog txoj kev uas coj peb mus cuag tus Cawm Seej Yexus Khetos.¹²

Rau ib txhia neeg, qhov uas txoj kev hloov siab yog ib txoj kev mus kom tau kev xyiv fab zoo li yog qhov fab ntxeev. Qee zaum kev hloov siab lees txim yeej mob siab thiab nyuaj heev. Thaum hloov siab lees txim peb yuav tsum lees paub tias tej qhov uas peb xav thiab ua—twb yog tej qhov uas peb ntseeg thiab—yuam kev lawm. Kev hloov siab lees txim kuj yog qhov uas peb yuav tsum hloov tiag, thiab qee zaum, ua li ntawd ua rau peb nyob tsis tswm. Tiam sis kev xyiv fab thiab kev nyob tswm tsis zoo ib yam. Kev ua txhaum—suav qhov uas peb ua txhaum txaus siab lam tau lam nyob—tab kaum peb txoj kev xyiv fab.

Raws li tus sau zaj nkauj hais hauv vaj lug kub, “Thaum tsaus ntuj muaj kev quaj ntsuag, tiam sis thaum kaj ntug muaj kev zoo siab.”¹³ Thaum peb hloov siab lees txim, peb yuav tsum tsom ntsoov qhov kev xyiv fab uas yuav muaj los tom qab no. Tej zaum lub sij hawm tsaus ntuj zoo li yuav ntev heev, tiam sis lub sij hawm kaj ntug yeej yuav los, thiab, auj, qhov kev nyab xeeb thiab kev xyiv fab qab zib heev npaum li cas thaum tus Cawm Seej txoj Kev Theej Txhoj cawm peb dim ntawm kev txhaum thiab kev txom nyem.

Cia li xav txog qhov uas muaj los rau Amas hauv Phau Ntawv Maumoos. Nws “raug tsim txom nrog txoj kev tsim txom uas nyob mus ib txhis” thiab nws tus ntsuj plig “raug txom nyem kawg nkaus” vim yog nws tej kev txhaum. Tiam sis thaum nws tig mus rau tus Cawm Seej kom tau kev hlub tshua, nws “cia li tsis nco qab txog [nws] tej kev mob ntxiv lawm.”¹⁴

Nws hais txuas ntxiv hais tias, “Thiab auj, txoj kev xyiv fab loj kawg nkaus, thiab kuv tau pom txoj kev kaj zoo kawg nkaus; muaj tseeb tiag, … tsis muaj dab tsi zoo nkauj thiab qab zib npaum li kuv txoj kev xyiv fab.”¹⁵

Nov yog txoj kev xyiv fab uas muaj rau lawv cov uas los cuag Yexus Khetos dhau ntawm kev hloov siab lees txim.¹⁶ Raws li Thawj Tswj Hwm Russell M. Nelson qhia hais tias:

“Kev hloov siab lees txim qhib peb txoj kev txais tau Yexus Khetos txoj Kev Theej Txhoj lub hwj chim. …

“Thaum peb xaiv hloov siab lees txim, peb txiav txim siab tias peb yuav hloov! Peb cia tus Cawm Seej muab peb hloov los ua tus neeg zoo tshaj peb ua tau. Peb xaiv kom peb sab ntsuj plig loj tuaj thiab muaj kev xyiv fab—yog kev xyiv fab uas los ntawm Nws txoj kev txhiv dim. Thaum peb xaiv hloov siab lees txim, peb xaiv kev hloov los ua neeg zoo li Yexus Khetos ntxiv!”¹⁷

Kev hloov siab lees txim coj kev xyiv fab los rau peb vim nws npaj peb lub siab txais kev tshoov siab los ntawm tus Vaj Ntsuj Plig Dawb Huv los. Muaj kev xyiv fab txhais tau tias muaj tus Vaj Ntsuj Plig Dawb Huv puv npo. Thiab muaj kev xyiv fab txhais tau tias muaj tus Vaj Ntsuj Plig Dawb Huv puv npo.¹⁸ Peb txoj kev xyiv fab loj hlob tuaj thaum peb rau siab ua hauj lwm txhua hnub kom coj tus Ntsuj Plig los rau hauv peb lub neej. Raws li tus yaj saub Maumoos qhia, “Txawm li ntawd los lawv yoo mov thiab thov Vajtswv tsis tu tsis tseg, thiab lawv txoj kev txo hwj chim loj hlob muaj zog zuj zus tuaj, thiab lawv txoj kev ntseeg Khetos ruaj khov zuj zus tuaj, txog rau thaum lawv muaj kev xyiv fab thiab kev nplij siab puv nkaus.”¹⁹ Tus Tswv cog lus rau tag nrho lawv cov uas ua hauj lwm raws Nws qab hais tias, “Kuv yuav cia kuv tus Ntsuj Plig los rau koj, tus uas yuav ua kom koj lub siab to taub, tus uas yuav ua kom koj tus ntsuj plig muaj txoj kev xyiv fab puv npo.”²⁰

Tom qab uas peb muaj kev xyiv fab uas los ntawm kev hloov siab lees txim tiag, peb ham tsis xav muab txoj kev xyiv fab ntawd pub rau lwm tus neeg. Thaum peb ua li ntawd, peb txoj kev xyiv fab loj hlob tuaj. Twb yog qhov uas muaj los rau Amas.

Nws hais tias, “Qhov no yog kuv txoj kev zoo siab, hais tias tej zaum kuv yuav ua tau zoo li ib rab cuab yeej nyob hauv Vajtswv txhais tes mus coj ib txhia neeg los rau txoj kev hloov siab lees txim; thiab qhov no yog kuv txoj kev xyiv fab.

“Thiab saib seb, thaum kuv pom kuv cov kwv tij coob leej hloov siab lees txim tiag tiag, thiab los cuag tus Tswv lawv tus Vajtswv, thaum ntawd kuv tus ntsuj plig muaj kev xyiv fab puv npo; thaum ntawd kuv nco qab txog tej uas tus Tswv tau ua rau kuv, … muaj tseeb tiag, thaum ntawd kuv nco qab txog nws txhais npab hlub tshua uas nws tau cev tuaj rau kuv.”²¹

Qhov uas pab lwm tus neeg hloov siab lees txim yog ib txoj kev qhia tus Cawm Seej tias peb ris Nws txiaj, thiab yog ib lub hauv paus kev xyiv fab. Tus Tswv tau cog lus rau peb tias:

“Thiab txawm hais tias neb yuav … coj tau ib tug neeg los cuag kuv xwb los, neb yuav muaj txoj kev xyiv fab loj nrog tus ntawd nyob hauv kuv Txiv lub nceeg vaj!

“Thiab nim no, yog hais tias neb yuav muaj txoj kev xyiv fab loj thaum neb coj tau ib tug neeg los cuag kuv… , ces neb yuav muaj txoj kev xyiv fab loj heev yog hais tias neb coj tau ntau tus neeg los cuag kuv!”²²

Kuv sim xav txog qhov uas tus Cawm Seej xyiv fab npaum li cas txhua lub sij hawm uas peb txais tej koob hmoov ntawm Nws txoj Kev Theej Txhoj hauv peb lub neej.²³ Ib yam li Thawj Tswj Hwm Nelson hais,²⁴ tus Thwj Tim Pov Lauj sau ntawv mus rau cov neeg Henplais hais tias: “Cia li muab txhua yam uas thaiv peb kev thiab tej kev txhaum uas khi peb tso pov tseg, thiab …. ntsia ntsoov Yexus tus uas yog peb lub hauv paus kev ntseeg thiab ua kom peb kev ntseeg tiav. Thaum luag muab nws ntsia rau saum ntoo khaub lig, nws ua siab ntev nyiaj tej kev txom nyem ntawd, … nws yuav zoo siab kawg li; nim no nws twb mus zaum ntawm Vajtswv lub zwm txwv sab xis lawm.”²⁵ Ntau zaus peb hais txog qhov uas tus Cawm Seej raug mob thiab kev txom nyem hnyav heev hauv lub vaj Khexemanes thiab saum lub toj Khauj Khaum Taub Hau, tiam sis tsuas yog tsawg tsawg zaus xwb peb hais txog tus Cawm Seej qhov kev xyiv fab uas Nws tsom ntsoov thaum Nws txo Nws txoj sia theej peb lub txhoj. Tiag tiag, qhov uas Nws raug mob thiab raug txom nyem yog rau peb, kom peb thiaj ntsib tau kev xyiv fab thaum peb rov qab mus cuag Nws rau ntawm Vajtswv lub xub ntiag.

Tom qab uas nws qhia cov neeg hauv teb chaws Amelikas yav thaum ub, tus Cawm Seej qhia tias Nws hlub lawv hais tias:

“Thiab nim no, saib seb, kuv txoj kev xyiv fab ntau heev, twb muaj puv npo, vim yog nej … ; muaj tseeb tiag, thiab txawm yog Leej Txiv los twb zoo siab heev, thiab tag nrho cov tim tswv dawb huv saum ntuj. …

“… Nyob hauv [nej] kuv thiaj muaj txoj kev xyiv fab puv nkaus.”²⁶

Cov kwv tij thiab cov muam, kuv xaus lus kawg es ua tim khawv rau nej, ib zaj lus tim khawv uas yog ib lub txiaj ntsim dawb ceev rau kuv. Kuv ua tim khawv tias Yexus Khetos yog tus Cawm Seej thiab tus Txhiv Dim ntawm lub ntiaj teb. Kuv paub tias Nws hlub peb txhua tus. Nws tsom ntsoov Nws “txoj hauj lwm thiab [Nws] lub yeeb koob,”²⁷ yog kom pab peb txais ib txoj kev xyiv fab puv nkaus hauv Nws. Kuv ua tim khawv tias thaum peb hloov siab lees txim txhua hnub thiab los cuag Yexus Khetos ces peb yuav muaj kev xyiv fab—ib txoj kev xyiv fab uas loj tshaj peb xav tau.²⁸ Yog vim li ntawd peb thiaj nyob hauv lub ntiaj teb no. Yog vim li ntawd Vajtswv thiaj npaj Nws txoj hau kev zoo siab tseg rau peb txhua tus. Yexus Khetos twb yog “txoj kev, qhov tseeb, thiab txoj sia”²⁹ thiab “yeej tsis muaj lwm txoj kev los sis lwm lub npe nyob hauv qab ntuj uas yuav cawm tau tib neeg nyob hauv Vajtswv lub nceeg vaj.”³⁰ Kuv ua tim khawv li no los ntawm Yexus Khetos lub npe dawb ceev, amees.