Lub Teb Yeej Yog Yexus Khetos

Kuv cov kwv tij thiab cov muam, ob hnub no twb ntxiv dag zog rau peb sab ntsuj plig. Cov nkauj los yeej zoo mloog. Cov uas tau hais lus tau hais tus Tswv cov lus. Kuv thov kom nej yuav xav kom tus Vaj Ntsuj Plig Dawb Huv coj nej txoj hau kev thaum nej kawm thiab xav txog tej lus tseeb uas qhia los ntawm lub sam thiaj no. Cov lus no twb yog los ntawm Vajtswv los.

Ib lub lim tiam tom ntej yog Hnub Caiv Easter. Yeej yog tib hnub tseem ceeb tshaj plaws rau cov neeg uas coj raws li Yexus Khetos. Peb ua koob tsheej txog Christmas vim peb muaj Easter. Lub lim tiam no, zaj lus kawm hauv phau Los, Nrog Kuv Mus yuav pab nej kawm txog tus Cawm Seej txoj kev nkag mus hauv Yeluxalees, Nws txoj kev ntiab neeg phem tawm lub tuam tsev, Nws txoj kev raug txom nyem hauv lub Vaj Khexemanes, Nws txoj kev Raug Ntsia Saum Ntoo Khaub Lig, Nws txoj Kev Sawv Rov Los, thiab Nws txoj kev tshwm sim rau Nws cov ntseeg.¹

Cia li xav txog tej nqe dawb huv no thiab ua txhua yam nej ua tau kom hais ua tsaug rau peb Leej Txiv Saum Ntuj Ceeb Tsheej vim Nws txib Nws Tib Leeg Tub.² Vim muaj Yexus Khetos, peb yuav hloov siab lees txim thiab txais kev zam txim rau peb tej kev txhaum. Vim muaj Nws, peb txhua tus yuav sawv rov los.

Kuv kuj caw nej rov qab kawm txog zaj lus uas hais txog tus Cawm Seej txoj kev tshwm sim rau cov Neeg Nifais nyob hauv Amelikas, raws li sau hauv phau 3 Nifais. Tsis ntev ua ntej Nws tshwm sim, cov neeg tau hnov Nws lub suab, uas hais tej lus thov no:

“Nim no nej puas tseem tsis kam tig rov los cuag kuv, thiab hloov siab lees txim rau nej tej kev txhaum, thiab hloov siab los ntseeg, xwv kom kuv yuav kho tau nej?

“… Saib seb, kuv txhais npab hlub tshua twb muab cev tuaj rau nej, thiab tus uas yuav los, kuv yuav txais yuav tus ntawd; thiab cov uas los cuag kuv tau koob hmoov.”³

Cov kwv tij thiab cov muam, Yexus Khetos hais ib yam li ntawd rau nej hnub no. Kuv thov kom nej yuav los cuag Nws, Nws thiaj li kho tau nej zoo! Nws yuav kho nej tej kev txhaum thaum nej hloov siab lees txim. Nws yuav kho nej txoj kev nyuaj siab thiab kev ntshai. Nws yuav kho nej thaum nej raug mob los ntawm lub ntiaj teb no.

Txawm nej muaj lus nug los sis muaj teeb meem li cas los, kev teb yeej nyob ntawm Yexus Khetos lub neej thiab tej lus qhia. Cia li kawm txog txoj Kev Theej Txhoj, Nws txoj kev hlub, Nws lub siab hlub tshua, Nws cov lus qhuab qhia, thiab Nws txoj moo zoo uas kho peb zoo thiab pab peb vam meej. Muab siab npuab Nws! Cia li coj raws li Nws.

Peb ua cov tuam tsev vim yog Yexus Khetos. Txhua lub tuam tsev yog Nws lub tsev dawb huv. Qhov uas nej khi lus thiab txais cov kab ke hauv lub tuam tsev, thiab nrhiav kom nyob ze Nws nyob haud, qhov ntawd yuav ua rau nej tau koob hmoov ntau tshaj lwm txoj kev teev tiam. Yog vim li ntawd, peb ua txhua yam peb ua tau kom peb cov mej zeej nyob thoob plaws lub ntiaj teb yuav txais tau cov koob hmoov ntawm lub tuam tsev. Hnub no, kuv zoo siab tshaj tawm txog kev npaj ua tej lub tuam tsev tshiab nyob hauv tej qhov chaw no:

• Retalhuleu, Guatemala

• Iquitos, Peru

• Teresina, Brazil

• Natal, Brazil

• Tuguegarao City, Philippines

• Iloilo, Philippines

• Jakarta, Indonesia

• Hamburg, Germany

• Lethbridge, Alberta, Canada

• San Jose, California

• Bakersfield, California

• Springfield, Missouri

• Charlotte, North Carolina

• Winchester, Virginia

• Harrisburg, Pennsylvania

Kuv cov kwv tij thiab cov muam, kuv ua tim khawv tias Yexus Khetos coj Nws lub Koom Txoos. Kuv ua tim khawv tias kev coj raws li Nws yog tib txoj kev kom muaj kev zoo siab uas kav ib txhis. Kuv paub tias Nws muab Nws lub hwj chim rau cov neeg uas ua raws li Nws tej kev khi lus, cov uas “muaj txoj kev ncaj ncees thiab Vajtswv lub hwj chim uas muaj yeeb koob heev los ua ntaj riam thaiv lawv.”⁴ Kuv ua tim khawv li no, thiab qhia nej tias kuv hlub nej thiab foom koob hmoov rau nej, los ntawm Yexus Khetos lub npe, amees.