Cov uas Coj Raws Li tus Tub Vaj Ntxwv ntawm Kev Thaj Yeeb

Kom ua tau raws li kev tshwm sim rau Xakhaliyas,¹ Yexus tau caij ib tug zag los rau hauv lub Nroog Dawb Huv, uas thaum ub yog ib “lub cim rau cov neeg Yudais cov nom tswv,”² uas yeej haum tus Vaj Ntxwv ntawm cov vaj ntxwv thiab Tub Vaj Ntxwv ntawm Kev Thaj Yeeb.³ Muaj cov ntseeg nyob puag ncig muaj kev zoo siab, uas tau nthuav lawv tej ris tsho, pua cov nplooj toov laj, thiab lwm cov nplooj tom txoj kev uas Yexus taug ntawd. Lawv tau qhuas Vajtswv, es qw nrov nrov hais tias, “Thov Vajtswv foom koob hmoov rau tus vaj ntxwv uas Vajtswv txib los! Thov kom saum ntuj muaj kev kaj siab lug, thiab kom sawv daws hwm Vajtswv tus uas muaj tshwj chim ci ntsa iab.”⁴ Thiab ntxiv tias, “Cia li qhuas Daviv tus Tub: Thov Vajtswv foom koob hmoov rau tus uas Vajtswv txib los; Cia li qhuas Vajtswv tus uas nyob saum ntuj ceeb tsheej.”⁵ Qhov tseem ceeb no, uas peb ua koob tsheej hu ua Hnub Caiv Toov Laj, yog qhov hauv paus rau tej yam xwm uas yuav los hauv lub lim tiam uas thaum kawg tus Cawm Seej ua kev txi thiab muaj qhov txuj ci uas yog lub ntxa uas tsis muaj dab tsi hauv.

Peb cov uas raws Nws qab, peb yog Nws cov neeg txawv, uas raug hu los tshaj tawm Nws tej txiaj ntsim,⁶ cov uas txhawb nqa kev thaj yeeb uas Nws ua siab dawb pub rau peb thiab Nws ua txoj kev theej txhoj. Txoj kev thaj yeeb no yog qhov txiaj ntsim uas cog lus tseg rau txhua tus neeg uas tig lawv lub siab lub ntsws rau tus Cawm Seej thiab ua neej ncaj ncees; kev thaj yeeb ntawd ntxiv zog rau peb lub neej no thiab pab peb nyiaj taus tej teeb meem hauv peb lub neej.

Nyob rau xyoo 1847, tus Tswv qhia ib Tsoom Haiv Neeg Ntseeg uas xav tau kev thaj yeeb thiab pab lawv koom ib lub siab kom lawv tiv taus tej kev nyuaj thaum lawv taug kev mus rau sab hnub poob. Tus Tswv qhia ib Tsoom Haiv Neeg Ntseeg ntau yam, ib yam li kom “tsis txhob sib cav sib ceg ntxiv; tsis txhob hais lus phem ib leeg txog ib leeg ntxiv.”⁷ Nqe vaj lug kub no qhia tias cov uas ua ncaj ncees thiab sim ua raws li tus Tswv tus Ntsuj Plig tau lus cog tseg hais tias lawv yuav muaj kev thaj yeeb uas yuav pab lawv nyiaj mus dhau tej kev kub kev ntxhov hauv peb lub caij lub nyoog no.⁸

Ua cov uas coj raws li tus Tub Vaj Ntxwv ntawm Kev Thaj Yeeb, peb tau lus qhuab qhia kom “muab lawv lub siab sib khi ua ke los ntawm kev koom siab koom ntsws thiab los ntawm kev ib leeg hlub ib leeg.”⁹ Tsis ntev tas los no peb tus yaj saub Thawj Tswj Hwm Russell M. Nelson, qhia tias, “Kev sib cav sib ceg yeej txhaum txhua yam uas tus Cawm Seej tau qhia.”¹⁰ Peb tus yaj saub kuj thov kom peb sawv daws kom ua txhua yam peb ua tau kom txiav txhua yam kev tsis sib haum uas ua rau peb chim siab nyob hauv peb lub neej.”¹¹

Cia peb xav txog cov ntsiab lus no thaum xav txog Khetos txoj kev hlub dawb paug rau peb thiab peb, cov uas raws Nws qab, sim muaj rau lwm tus neeg. Cov vaj lug kub qhia hais tias kev hlub no yog kev siab hlub.¹² Thaum peb xav txog kev siab hlub, peb xub xav txog txoj kev ua zoo thiab muab khoom pub rau cov neeg txom nyem ntawm sab cev nqaij tawv, khoom ntiaj teb, los sis kev nyuaj siab. Tab sis mas, kev siab hlub tsis yog ib yam uas peb lam pub rau lwm tus neeg, tiam sis yog tus Cawm Seej ib qho txiaj ntsim thiab ua tau ib yam ntawm peb tus cwj pwm. Yog li ntawd tus Tswv qhia peb kom peb yuav cia li muab txoj kev sib khi ua ke uas yog kev siab hlub coj los hnav, “uas yog txoj kev sib khi ua ke ntawm kev zoo tag nrho thiab kev kaj siab.”¹³ Yog tsis muaj kev siab hlub, ces peb tsis muaj qab hau,¹⁴ thiab peb txais tsis tau qhov chaw uas tus Tswv tau npaj tseg rau peb saum Leej Txiv Saum Ntuj Ceeb Tsheej lub tsev.¹⁵

Yexus qhia tseeb tias kev ua zoo tag nrho thiab kev thaj yeeb yog dab tsi, qhov tseem ceeb yog qhov Nws ua siab zoo raug Nws tej kev txom nyem. Nej sim xav seb Yexus xav li cas thaum Nws ntxuav Nws cov thwj tim ko taw, txawm twb paub lawm hais tias lawv ib tug twg yuav ntxeev siab rau Nws hmo ntawd kiag.¹⁶ Los yog thaum Yexus, ob peb xuab moos tom qab ntawd, tau kho tus txiv neej uas nrog Yudas tuaj lub pob ntseg, Yudas yog tus uas ntxeev siab, ces lawv tuaj ntes Yexus.¹⁷ Los yog thaum tus Cawm Seej, sawv ntawm Philaj, es cov pov thawj thiab cov txwj laug liam nws tsis ncaj, thiab Nws tsis tau hais ib lo lus tawm tsam tej lus tsis ncaj uas lawv hais txog Nws, thiab Nws ua rau cov tub rog Loos xav tsis thoob.¹⁸

Dhau ntawm peb qhov teeb meem no, tus Cawm Seej, txawm muaj kev nyuaj siab thiab tu siab los, qhia peb los ntawm Nws tus yam ntxwv tias “txoj kev siab hlub tiv taus ntev, thiab siab zoo; … thiab tsis xav tau luag tug; … thiab tsis khav theeb, tsis xav rau nws tus kheej xwb, tsis chim siab, [thiab] tsis xav txog tej yam phem.”¹⁹

Lwm yam uas peb xav txog, thiab pauv tau peb txoj kev ua thwj tim thiab peb txoj kev tshaj tawm tus Cawm Seej kev thaj yeeb, twb yog qhov uas peb ib leeg ua li cas rau ib leeg. Hauv Nws txoj kev qhuab qhia tib neeg, tus Cawm Seej qhia ntau heev txog kev hlub, kev siab hlub, kev ua siab ntev, txo hwj chim thiab kev khuv leej uas yog tej cwj pwm uas cov uas xav txav los ze Nws yuav muaj thiab yuav txhawb nqa Nws txoj kev thaj yeeb. Tej cwj pwm no yog tej txiaj ntsim uas los ntawm Vajtswv los, thiab thaum peb sim kho peb tus kheej kom muaj tej no, peb yuav pib pom peb cov kwv tij zeg zog tej kev txawv thiab tej kev qaug zog txawv me ntsis ces yuav haj yam muaj kev khuv leej, kev siab zoo, kev saib tau, thiab pom zoo rau lawv. Ib qho uas qhia tseeb tias peb tab tom txav los ze tus Cawm Seej thiab rais los mus ua neeg zoo li Nws yog thaum peb hlub, ua siab ntev, thiab siab zoo rau lwm leej lwm tus, tab txawm muaj xwm dab tsi los xij.

Feem ntau peb pom ib co neeg uas hais tej lus phem thiab tsis zoo txog tej cwj pwm, kev qaug zog, thiab lwm tus neeg cov tswv yim, haj yam muaj li no thaum lwm tus neeg muaj tej cwj pwm thiab tej kev xav uas txawv lawv li. Yus yeej pom cov neeg no xa tej lus tsis zoo no rau lwm tus neeg, ces lawv rov qab hais tej lus ntawd txawm lawv tsis paub tseeb tau muaj xwm dab tsi tiag tiag. Tu siab kawg, vim tej tshooj social media txhawb nqa kev coj cwj pwm li no thiab hais tias yog qhov tseeb xwb. Thaum tsis tswj, tej kev sib tham hauv hluav taws xob no ua rau tib neeg sib tawm tsam thiab sib cav sib ceg, ua kom yus poob siab, mob siab, thiab muaj kev chim siab.

Nifais qhia txog lub caij nyoog kawg tias, tus dab phem yuav ua lim hiam thiab ua rau tib neeg tej siab los tawm tsam tej yam zoo.²⁰ Cov vaj lug kub qhia tias “txhua yam uas caw thiab yaum kom ua zoo, thiab hlub Vajtswv, thiab ua hauj lwm rau nws, yog tej kev tshoov siab uas los ntawm Vajtswv.”²¹ Qhov fab ntxeev yog, “thiab tej uas phem yog los ntawm tus dab phem los; vim tus dab phem yog Vajtswv ib tug yeeb ncuab, thiab tawm tsam nws tsis tu ncua, thiab caw thiab ntxias kom ua txhaum, thiab kom ua tej uas phem tsis tu ncua.”²²

Thaum xav txog tej lus qhia no, yus thiaj to taub yog vim li cas dab ntxwg nyoog sim ua rau tib neeg muaj kev kub kev ntxhov thiab kom Vajtswv cov me nyuam ib leeg chim rau ib leeg. Dab Ntxwg Nyoog zoo siab thaum nws pom tib neeg luag thuam, tsim txom, thiab hais lus phem rau ib leeg. Qhov no ua rau ib tug neeg tus cwj pwm, lub yeeb koob, thiab xeeb ceem puas tsuaj thaum txiav txim tsis ncaj rau tus neeg ntawd. Tseem ceeb heev kom nco qab tias thaum muaj kev xav li no hauv peb lub neej, peb thiaj cia dab ntxwg nyoog ua rau peb muaj kev tsis sib haum xeeb, peb thiaj mag qhov cuab ntxiab no.

Yog peb tsis ceev faj txog peb tej kev xav, tej lus, thiab tej yam peb ua, tej zaum peb yuav raug tus yeeb ncuab tej kev dag ntxias, ua rau peb tsis sib raug zoo nrog cov uas nyob ib puag ncig peb thiab cov uas peb hlub.

Cov kwv tij thiab cov muam, vim peb yog tus Tswv cov neeg txawv thiab cov uas txhawb nqa Nws txoj kev thaj yeeb, peb yuav tsum tsis txhob cia tus dab phem tej kev dag ntxias raug peb lub siab. Peb yuav tsum tsis txhob ris ib lub nra uas lwj heev kom tej kev xav, tej kev sib raug zoo, thiab tib neeg lub neej puas tsuaj. Txoj moo zoo yeej ua rau neeg zoo siab.

Muaj tseeb tiag, peb leej twg tsis zoo tag nrho, muaj tej lub sij hawm thaum peb sawv daws raug ntxias los ua tej yam tsis zoo li no. Vim Nws muaj txoj kev hlub zoo tag nrho thiab kev paub txog tib neeg tej cwj pwm, tus Cawm Seej pheej sim ceeb toom peb txog tej kev xwm txheej. Nws qhia peb tias, “Vim txoj kev txiav txim twg uas nej siv los txiav txim rau lwm tus, nej kuj yuav raug txiav txim thiab: thiab txoj kev ntsuas twg uas nej siv los ntsuas lwm tus, kuj yuav siv los ntsuas nej thiab.”²³

Kuv cov kwv tij thiab cov muam, thaum peb sim kho peb tus cwj pwm kom zoo li tus Cawm Seej, peb rais los mus ua Nws tej cuab yeej uas kho kom muaj kev thaj yeeb hauv ntiaj teb no raws nraim li Yexus twb teem tseg lawm. Kuv caw nej los xav seb yuav ua li cas thiaj hloov peb lub siab los ua neeg uas txhawb nqa thiab txhawb pab tib neeg, cov neeg uas to taub lwm tus thiab zam txim rau lawv, cov neeg uas nrhiav tej yam zoo hauv lwm tus neeg, thiab nco qab ntsoov hais tias “yog tias muaj ib yam twg uas tsim txiaj, ntxim hlub, los sis muaj moo zoo los sis txaus qhuas, peb nrhiav kom tau tej ntawd.”²⁴

Kuv cog lus rau nej tias thaum peb kho peb tus kheej kom muaj tej cwj pwm no, peb yuav haj yam sib raug zoo thiab txawj xav txog lwm leej lwm tus²⁵ thiab yuav muaj kev xyiv fab, kev thaj yeeb, thiab sab ntsuj plig yuav loj hlob tuaj.²⁶ Tus Tswv yeej yuav pom tej yam peb ua thiab muab tej txiaj ntsim rau peb uas pab peb ua taus siab ntev thiab siab zoo rau lwm tus neeg tej yam uas sib txawv, kev qaug zog, thiab tej yam tsis zoo. Tsis tas li ntawd xwb, peb yuav haj yam muaj cuab kav ua siab loj kom txhob tu siab los sis ua phem rau cov neeg uas ua rau peb mob siab. Peb yuav haj yam muaj lub siab xav zam txim rau cov neeg uas ua phem rau peb los sis cov uas hais lus phem txog peb, xws li tus Cawm Seej ua, ces peb tus cwj pwm thiaj yuav hloov hlo.

Hnub no uas yog Hnub Caiv Toov Laj, thov kom peb yuav nthuav peb txoj kev hlub thiab cov nplooj toov laj uas yog kev siab hlub, es taug kev raws tus Tub Vaj Ntxwv ntawm Kev Thaj Yeeb taug thaum peb npaj ua koob tsheej Hnub Caiv tuaj no vim lub toj ntxa tsis muaj leej twg nyob hauv lawm. Ua cov kwv tij thiab cov muam hauv Khetos, cia peb muaj kev zoo siab tshawj tawm hais tias, “Cia li qhuas Daviv tus Tub: Thov Vajtswv foom koob hmoov rau tus uas Vajtswv txib los; Cia li qhuas Vajtswv tus uas nyob saum ntuj ceeb tsheej.”²⁷

Kuv hais lus tim khawv tias Yexus Khetos muaj siab nyob thiab tias Nws txoj kev hlub, yeej nyob ntawd rau txhua tus neeg uas xav nrog Nws taug kev thiab txais nws txoj kev thaj yeeb hauv lub ntiaj teb no thiab hauv lub neej tom ntej. Kuv hais tej lus no hauv tus Cawm Seej thiab tus Txhiv Dim lub npe dawb huv, tus uas yog Yexus Khetos, amees.