Kev Sau Qoob Loo uas Tsis Zoo Tag Nrho

Ua ib tug tub hluas thaum kuv loj hlob tuaj, kuv kawm seb tej caij nyoog hauv ib xyoos sib pauv heev nyob rau hauv Montana sab qab teb tim sab hnub poob. Lub caij uas kuv nyiam tshaj plaws yog lub caij nplooj ntoo zeeg—lub caij sau qoob loo. Kuv tsev neeg twb cia siab thiab thov Vajtswv ntau lub hlis lawm kom peb tej hauj lwm yuav tau paj thaum peb tau qoob loo ntau nplua mias. Kuv niam txiv txhawj txog huab cua, seb cov tsiaj txhu thiab qoob loo nyob li cas, thiab ntau yam ntxiv uas lawv yeej tswj tsis tau li.

Thaum kuv loj hlob tuaj, kuv txawm paub hais tias tej no tseem ceeb npaum li cas. Peb txoj kev ua neej nyob yeej vam cov qoob loo. Kuv txiv qhia kuv txog tej cuab yeej uas peb siv sau cov txhuv los. Kuv saib nws tsav tej tshuab los rau hauv daim teb, txiav ib co nplej, ces mam li xyuas seb cov txhuv puas poob los rau hauv lub tsheb cab es tsis yog muab pov tseg nrog cov npluag nplej. Nws ua li no ob peb zaug, ces txhua zaus tau txav lub tshuab me ntsis. Kuv tau khiav ntawm ib sab lub tshuab ntawd thiab tau xyuas hauv tej npluag nplej nrog nws thiab ua txuj li kuv paub tias kuv tab tom ua li cas.

Tom qab nws pom zoo seb tau pauv lub tshuab li cas lawm, kuv txawm pom ib co nplej nyob hauv av nrog cov npluag nplej thiab muab cev rau nws saib es ntsia nws txawv txav. Kuv yeej nco qab ntsoov tias kuv txiv hais li cas rau kuv: “Nws zoo txaus thiab yog qhov zoo tshaj plaws uas lub tshuab no ua tau.” Kuv tsis tshua pom zoo rau nws cov lus, ces kuv thiaj xav ntsoov txog tej yam tsis zoo ntawm txoj kev sau qoob loo no.

Tsis ntev tom qab ntawd, thaum huab cua pib no thaum yuav tsaus ntuj, kuv pom cov noog thiab os ya los rau daim teb thiab noj tej nplej tej txhuv ua ntej lawv pib ya mus nram qab teb. Lawv tau no cov nplej uas poob tom teb thaum peb sau qoob loo tsis txhij txhua li ntawd. Vajtswv twb ua kom zoo tag nrho lawm. Tsis tau poob ib lub noob hlo li.

Feem ntau hauv ntiaj teb no thiab hauv peb lub Koom Txoos peb xav ua kom zoo tag nrho txhua lub sij hawm. Kev qhauj tawm hauv social media, kev xav tsis thwj, thiab peb txoj kev tsim txom peb tus kheej ua rau peb xav tias peb zoo tsis txaus—peb xav yuam kev tias peb zoo tsis txaus thiab yeej yuav yog li ntawd tas mus li. Ib txhia neeg xav yuam kev txog tus Cawm Seej txoj kev caw hais tias “nej cia li ua zoo tag nrho.”¹

Nco qab hais tias ua zoo tag nrho yeej txawv qhov uas yus hloov los ua zoo tag nrho hauv Khetos.² Kev ua zoo tag nrho yog ib yam uas yus ua tsis tau, thiab ua rau yus muab yus tus kheej piv rau lwm tus neeg. Qhov no ua rau peb xav tias peb muaj txim thiab txhawj xeeb thiab ua rau peb txav deb ntawm lwm tus neeg thiab nyob nrug deb.

Kev ua zoo hauv Khetos yog lwm yam. Nws yog qhov uas—tus Vaj Ntsuj Plig Dawb Huv coj kav—es ua rau peb rais los mus ua neeg zoo li tus Cawm Seej. Leej Txiv Saum Ntuj Ceeb Tsheej uas hlub peb twb tsa tej kev cai cia thiab qhia tseeb seb yuav tsum ua li cas nyob ntawm tej kev khi lus uas nws thov kom peb khi tseg. Nws tshem tej kev xav tias peb muaj txim thiab tsis zoo txaus tawm ntawm peb lub siab, es ua rau peb nco qab hais tias Vajtswv pom tseeb hais tias peb yog leej twg. Thaum qhov no txhawb nqa thiab yaum kom peb ua zoo dua, peb raug ntsuam xyuas nyob ntawm seb peb rau siab ntseeg Vajtswv li cas thaum peb sib zog muaj kev ntseeg ua raws li Nws hais. Thaum peb kam los ua raws li tus Cawm Seej caw peb los nrog Nws mus, peb txawm pom hais tias qhov zoo tshaj uas peb ua tau yeej txaus lawm thiab tus Cawm Seej txoj kev tshav ntuj yuav kho peb los ua neeg zoo dua peb xav tau.

Peb pom tau qhov no thaum tus Cawm Seej pub tsib txhiab leej noj.

“Yexus tsa qhov muag saib, nws pom neeg coob coob tab tom tuaj cuag nws; yog li ntawd, nws txawm hais rau Filis hais tias, Peb yuav mus muas mov qhov twg thiaj li txaus sawv daws noj? …

“Filis teb hais tias, Txawm yog muab ob puas tawm lub nyiaj mus yuav mov los ntshai ib leeg tsuas tau ib nyuag qhov me me xwb.

“Yexus cov thwj tim muaj ib tug hu ua Adales, nws yog Ximoos Petus tus kwv, nws hais tias,

“Muaj ib tug me nyuam tub nyob ntawm no, nws muaj tsib lub ncuav thiab ob tug ntses. Tiam sis yuav tsis txaus cov neeg no noj?”³

Nej puas xav paub seb tus Cawm Seej xav li cas txog tus me nyuam tub no, vim nws muaj kev ntseeg li ib tug me nyuam yaus thaum nws muab yam uas nws yeej paub tias yuav tsis txaus sawv daws?

“Yexus muab tsib lub ncuav ntawd los ua Vajtswv tsaug, thiab nws muab faib rau sawv daws noj. Nws muab ob tug ntses los ua ib yam nkaus li ntawd thiab, tus uas yuav noj ntau npaum li cas los tau.

“Thaum sawv daws noj tsau lawm, Yexus hais rau nws cov thwj tim hais tias, Nej cia li mus sau tej uas sawv daws noj tsis tas los, tsis pub ib qho xiam li.”⁴

Tus Cawm Seej ntxiv rau kev txi ntawd kom nws zoo tag nrho.

Tsis ntev tom qab ntawd, Yexus xa Nws cov thwj tim mus caij nkoj. Tsis ntev ces txawm muaj cua daj cua dub hauv hiav txwv thaum nruab hmos. Lawv pib ntshai thaum lawv pom ib tug zoo li dab tab tom taug kev los ntsib lawv saum cov nplaim dej.

“Tam sim ntawd Yexus hais rau lawv hais tias, Nej tsis txhob poob siab! Yog kuv ntag, tsis txhob ntshai.

“Petus hais tias, Tus Tswv, yog hais tias yog koj tiag, thov koj hais kom kuv mus tau saum nplaim dej tuaj cuag koj.

“Yexus teb hais tias, Cia li tuaj. Petus txawm tawm hauv lub nkoj mus ko taw saum nplaim dej mus cuag Yexus.

“Tiam sis thaum Petus pom cua ntsawj hlob hlob nws ntshai kawg li, ces nws txawm tog zog rau hauv dej, nws hu nrov nrov hais tias, Tus Tswv, thov koj pab kuv.

“Tam sim ntawd Yexus txawm cev loo tes mus tuav nkaus Petus thiab hais tias, Ua li cas koj kev ntseeg yuav tsawg ua luaj li. Ua li cas koj tsis cia siab?”⁵

Cov kwv tij thiab cov muam, tej zaum qhov ntawd tsis tau yog qhov xaus rau kev sib tham ntawd. Kuv ntseeg tias thaum Petus thiab tus Cawm Seej sib tuav tes taug kev mus hauv lub nkoj, Petus yeej ntub dej thiab tej zaum txaj muag heev, es tej zaum tus Cawm Seej hais li no tias: “Au Petus, tsis txhob txhawj txhob ntshai. Yog koj pom tau koj tus kheej li kuv pom koj, koj txoj kev tsis cia siab yuav ploj mus thiab koj yuav haj yam muaj kev ntseeg. Kuv hlub koj, me Petus; koj twb tawm ntawm lub nkoj mus. Koj txoj kev txi no yeej zoo txaus, thiab txawm koj qaug zog me ntsis los, kuv yeej yuav nyob ntawd yuav txhawb nqa koj, thiab yuav ua rau koj txoj kev txi kom zoo tag nrho.”

Txwj Laug Dieter F. Uchtdorf qhia hais tias:

“Kuv ntseeg tias tus Cawm Seej Yexus Khetos yuav xav kom nej pom, hnov, thiab paub tias Nws yog nej lub dag zog. Thiab thaum Nws pab nej, ces yeej tsis muaj ciaj ciam uas tav nej kev. Nej muaj peev xwm uas tsis paub kawg. Nws yuav xav kom nej saib nej tus kheej ib yam li Nws saib nej. Thiab Nws txoj kev saib nej los yeej tsis zoo li neeg ntiaj teb saib nej. …

“Nws muab hwj chim rau cov neeg nkees; thiab Nws muab zog rau cov uas xav tias lawv tsis muaj hwj chim.”⁶

Peb yuav tsum nco qab tias txawm peb txoj kev txi tsis zoo npaum li cas los, tus Cawm Seej muaj cai ua kom qhov ntawd yuav zoo tag nrho. Txawm peb xav tias peb ua me npaum li cas los, peb yuav tsum nco qab tias tus Cawm Seej muaj hwj chim li cas. Ib lo lus siab zoo, kev mus ntsib ib tug neeg hauv peb pawg ntseeg, los sis muaj kev hlub qhia ib hoob Me Nyuam Yaus, yog muaj tus Cawm Seej txoj kev pab, muab kev nplij siab, ua rau neeg ua siab mos siab muag, thiab hloov tib neeg lub neej uas yuav kav mus ib txhis. Peb tej hauj lwm tsis zoo no yuav ua kom muaj tej txuj ci, thiab nyob nyob ces, yuav ua rau peb sau tau qoob loo zoo kawg.

Feem ntau mas peb nyob hauv tej qhov chaw uas yuav rub peb lub siab lub ntsws. Tej zaum peb xav tias peb ua tsis taus. Tej zaum peb ntsia cov neeg uas peb sim pab ntawd thiab xav tias peb yeej tsis tsim nyog li. Cov kwv tij thiab cov muam, yog nej xav li no, cia li ntsia cov txiv neej thiab poj niam zoo kawg nkaus uas zaum nram qab kuv thiab nrog kuv ua hauj lwm.

Kuv hnov tau nej txoj kev mob siab.

Tiam sis, kuv twb kawm tias kev sim ua zoo tag nrho tsis yog yeej txawv qhov uas yus hloov los ua zoo tag nrho hauv Khetos, kev muab yus tus kheej sib piv tsis yog tib yam li sim qog lwm tus. Thaum peb muab peb tus kheej piv rau lwm tus neeg, tsuas muaj ob yam xwb. Peb yuav pom peb tus kheej hais tias peb zoo tshaj lwm tus thiab yuav pib txiav txim thiab xav tsis zoo txog lawv, los yog peb yuav xav tias peb tsis zoo npaum li luag tej thiab yuav pib txhawj, tsim txom peb tus kheej, thiab yuav poob siab. Feem ntau txoj kev muab peb tus kheej piv rau lwm tus tsis pab dab tsi li, tsis txhawb nqa peb, thiab tsuas ua rau peb nyuaj siab xwb. Tiag tiag mas, tej kev muab sib piv li no txawj ua rau peb sab ntsuj plig puas tsuaj, yeej tiv thaiv tsis pub peb txais kev pab ntawm sab ntsuj plig. Qhov fab ntxeev mas, txoj kev qog cov neeg uas peb xav tias lawv zoo li Khetos yeej qhuab qhia, txhawb nqa, thiab pab tau peb ua tau Yexus Khetos cov thwj tim uas ua zoo dua.

Tus Cawm Seej ua ib tug yam ntxwv rau peb yoog thaum Nws ua raws li Leej Txiv ua. Nws qhia Nws tus thwj tim Filis: “Kuv twb nrog nej nyob ntev los lawm, ua li cas koj tseem tsis tau paub kuv thiab? Tus uas pom kuv, tus ntawd twb pom Leej Txiv lawm. Ua li cas koj tseem yuav hais tias, Thov koj qhia Leej Txiv rau peb pom thiab?”⁷

Ces nws qhia tias, “Kuv qhia tseeb rau nej hais tias tus uas ntseeg kuv yuav ua tej hauj lwm uas kuv ua; tsis yog li ntawd xwb, nws tseem yuav ua tua ntau dua tej uas kuv ua.”⁸

Txawm peb xav tias peb ua me npaum li cas los, yog peb mob siab ua, ces tus Cawm Seej yuav siv peb los ua Nws tej hauj lwm. Yog tias peb tsuas ua zoo npaum li peb ua tau thiab tso siab plhuav rau Nws kho tej yam uas peb ua tsis taus, ces peb yuav pab ua tej txuj ci ib puag ncig peb.

Txwj Laug Dale G. Renlund hais tias, “Koj tsis tas ua zoo tag nrho, tiam sis peb xav tau nej, rau qhov sawv daws uas muaj lub siab xav ua yeej ua tau ib yam dab tsi.”⁹

Thiab xws li Thawj Tswj Hwm Nelson qhia peb tias, “Tus Tswv nyiam thaum peb rau siab ntso.”¹⁰

Tus Cawm Seej nyob tos txais yuav tej yam uas peb ua siab mos muab txi thiab siv nws txoj kev tshav ntuj ua rau tej ntawd kom zoo tag nrho. Vim muaj Khetos, txoj kev sau qoob loo yuav zoo tag nrho. Peb yuav tsum muaj siab loj ntseeg hais tias Nws muab kev tshav ntuj rau peb—hais tias Nws yeej yuav pab peb, cawm peb dim thaum twg peb qaug zog, thiab ua kom peb zoo tag nrho thaum peb tsis ua hauj lwm zoo tag nrho.

Nyob hauv zaj paj lug txog tus neeg tseb noob, tus Cawm Seej piav txog cov noob uas poob hauv cov av zoo. Ib txhia tau ib pua npauj, ib txhia tau rau caum, ho lwm co tau peb caug npauj. Txhua lub no nyob hauv Nws txoj kev sau qoob loo zoo tag nrho.¹¹

Tus yaj saub Maulaunais caw sawv daws hais tias, “Muaj tseeb tiag, cia li los cuag Khetos, thiab cia li los ua neeg zoo tag nrho vim yog los ntawm nws, … thiab yog nej yuav xyeej txhua yam uas tsis los ntawm Vajtswv tawm ntawm nej tus kheej mus, thiab hlub Vajtswv kawg nej lub siab thiab lub dag lub zog, ces nws txoj kev tshav ntuj yeej txaus rau nej, xwv kom nws txoj kev tshav ntuj yuav cia nej los ua neeg zoo tag nrho vim yog los ntawm Khetos.”¹²

Cov kwv tij thiab cov muam, kuv hais lus tim khawv txog Khetos, tus uas muaj chim ua rau peb tej kev txi yuav zoo tag nrho. Cia peb sim ua zoo npaum li peb ua tau, coj tej yam peb coj tau, muaj kev ntseeg, tso peb tej kev txi rau ntawm Nws ko taw. Hais li no los ntawm Nws tus uas yog tus Xib Hwb zoo rau kev sau qoob loo, tus uas yog Yexus Khetos, amees.