Nco Qab Seb Dab Tsi Thiaj Tseem Ceeb

Lub lim tiam no thaum peb nco txog tus Cawm Seej txoj kev rov qab los rau hauv lub nroog Yeluxalees tsis ntev ua ntej Nws txoj kev theej txhoj, kuv nco txog Nws cov lus uas muab kev cia siab thiab nplij siab hais tias: “Kuv yog txoj kev sawv hauv qhov tuag rov qab los thiab yog txoj sia. Tus uas ntseeg kuv, txawm yog nws tuag lawm los nws yeej yuav muaj txoj sia.”¹

Kuv hlub Nws. Kuv ntseeg Nws. Kuv hais lus tim khawv tias Nws yog txoj Kev Sawv Rov Los thiab Txoj Sia.

Zaj lus tim khawv no tau nplij kuv siab thiab ntxiv zog rau kuv tau plaub xyoos tawm no txij li kuv tus poj niam, Barbara, tso lub neej no tseg. Kuv nco nws.

Feem ntau, kuv nco txog wb txoj kev sib yuav uas kav mus ib txhis thiab wb txoj kev ua neej nyob ua ke.

Yav tas los lawm kuv qhia seb kuv ua li cas thiaj ntsib Barbara thiab qhov ntawd qhia kuv txog txoj kev “ua taug qab” ib yam li kuv kawm thaum kuv mus ua tub txib. Kuv tau rov qab mus ntsib nws sai sai tom qab wb xub sib ntsib vim hais tias nws zoo nkauj, nto moo, thiab muaj neeg coob xav tham nws. Kuv nyiam nws heev vim nws tsis muaj hlob thiab ua siab zoo. Kuv nyiam nws txoj kev ua phooj ywg. Kuv xav tias wb yuav tsum nyob ua ke. Kuv xav tias yeej yooj yim npaum li ntawd.

Barbara wb sib tham, wb tau sib nyiam heev, tiam sis nws tsis paub tseeb hais tias kev sib yuav puas yog ib qho zoo rau nws.

Tsis txaus vim kuv paub; Barbara yuav tsum paub rau nws tus kheej. Kuv paub yog wb siv sij hawm yoo mov thiab thov Vajtswv txog qhov no, Barbara yuav txais tau lus tshwm sim los saum ntuj los.

Wb siv ib lim piam uas wb tsis sib tham kom wb tau yoo mov thiab thov Vajtswv ib leeg xwb kom wb paub wb tus kheej. Kuv muaj hmoov, vim nws tau kev tshwm sim tib yam li kuv txais. Li lawv hais ces, zaj dab neeg yog li ntawd xwb.

Thaum Barbara tso lub neej no tseg, wb cov me nyuam sau ob peb zag lus ntawm nws daim lag zeb ntawm nws lub ntxa txog tej yam uas Barbara xav kom lawv nco. Ib zaj lus ntawd hais tias “yam uas tseem ceeb tshaj yog yam uas kav ntev tshaj.”

Hnub no kuv yuav qhia nej txog kuv tej kev xav txog tej yam uas tseem ceeb tshaj.

Qhov thib ib, ib txoj kev sib raug zoo nrog peb Leej Txiv Saum Ntuj Ceeb Tsheej thiab Nws tus Tub, tus Tswv Yexus Khetos, yog qhov tseem ceeb tshaj plaws. Txoj kev sib raug zoo no yog qhov tseem ceeb tshaj plaws tas sim no thiab nyob mus ib txhis.

Qhov thib ob, txoj kev sib raug zoo nrog tsev neeg yog ib yam tseem ceeb heev thiab.

Nyob hauv kuv txoj kev qhuab qhia tib neeg, kuv tau mus xyuas coob tug neeg thiab tsev neeg uas raug xwm txheej heev vim muaj cua daj cua dub. Muaj coob leej uas tsis muaj chaw nyob, tshaib plab, thiab ntshai. Lawv xav tau kev pab kho mob, zaub mov, thiab chaw nyob.

Lawv kuj xav tau lawv tsev neeg thiab.

Kuv paub tias ib txhia tsis muaj ib tse neeg uas sib hlub, ces kuv thiaj hais txog cov kwv tij neej tsa, phooj ywg, thiab yus pawg ntseeg uas ua tau “tsev neeg.” Tej kev sib raug zoo no tseem ceeb rau yus txoj kev noj qab nyob zoo ntawm sab cev nqaij tawv thiab sab paj hlwb tib si.

Tej kev sib raug zoo muab tau kev hlub, kev xyiv fab, kev zoo siab, thiab ua rau yus muaj chaw nyob.

Txoj kev tu tej kev sib raug tseem ceeb no yog ib yam uas peb xaiv los ua. Yus txoj kev xaiv kom koom ib tse neeg muaj kev sib cog lus, kev hlub, ua siab ntev, sib txuas lus, thiab zam txim.² Tej zaum muaj tej lub sij hawm thaum peb tsis pom zoo rau lwm tus neeg txoj kev xav, tiam sis peb ua tau li no tsis tas yuav sib cav sib ceg. Nyob hauv kev tham hluas nkauj hluas nraug thiab kev sib yuav, peb tsis yog lam tau lam sib hlub los sis muaj ib hnub uas peb txawm tsis sib hlub zoo li peb yam ib qho khoom uas lwm tus txav mus txav los xwb. Peb xaiv seb peb ib leeg puas hlub thiab txhawb nqa ib leeg. Peb ua tib yam li ntawd hauv lwm txoj kev nrog tsev neeg sib raug zoo thiab cov phooj ywg uas zoo li peb tsev neeg.

Zaj lus tshaj tawm txog tsev neeg hais tias “txoj kev zoo siab los saum ntuj los ua rau kev ua niam ua txiv, ua tub ua ntxhais, ua kwv ua tij, ua neej ua tsa nyob mus li dhau lub qhov ntxa. Tej kab ke tseem ceeb dawb ceev thiab tej kev cog lus uas muaj hauv tej tuam tsev dawb huv ua rau tib neeg rov qab mus nyob tau ntawm Vajtswv lub xub ntiag thiab ua rau tsev neeg nyob tau ua ke mus ib txhis li.”³

Lwm yam uas tseem ceeb heev yog kom ua raws li tus Ntsuj Plig tej kev tshoov siab hais txog tej kev sib raug zoo tseem ceeb tshaj thiab tej hauj lwm peb ua kom hlub peb cov kwv tij zej zog ib yam li peb hlub peb tus kheej, kuj hais txog kev tej kev qhuab qhia tib neeg. Kuv tau kawm zaj lus no puag ntxov thaum kuv ua ib tug npisov.

Muaj ib hmos no heev, tseem los daus thiab, es kuv tab tom tawm ntawm kuv lub hoob kas ua tus npisov ces kuv tau ib txoj kev tshoov siab kom mus xyuas ib tug poj ntsuam laus laus hauv peb pawg ntseeg. Kuv saib kuv lub moos—twb 10:00 tsaus ntuj lawm. Kuv xav twj ywm hais tias lig dhau mus xyuas nws. Thiab tseem los los daus. Kuv txiav txim siab tias tag kis sawv ntxov kuv mam li mus xyuas nws es txhob mus thaum lig lig li no. Kuv txawm tsav tsheb mus tsev thiab mus pw tiam sis tsaug zog tsis tau hmo ntawd vim tus Ntsuj Plig pheej txob kuv lub siab.

Tag kis sawv ntxov heev, kuv tau tsav tsheb mus rau tus poj ntsuam lub tsev. Nws tus ntxhais teb qhov rooj los kua muag hais tias, “Au, Npisov, ua tsaug vim koj ho tuaj. Niam twb tso lub ntiaj teb no tseg ob xuab moos tas los lawm”—Kuv poob siab tag. Kuv yeej yuav nco qab ntsoov tej kev xav hauv kuv nruab siab. Kuv tau quaj. Leej twg xav tau lawv tus npisov tuav nws txhais tes tshaj tus poj ntsuam no, yuav nplij nws siab, thiab muab txoj koob hmoov kawg rau nws? Kuv tsis tau muaj lub cib fim ntawd vim kuv tsis tau ua raws li tus Ntsuj Plig txoj kev tshoov siab ntawd.⁴

Cov kwv tij thiab cov muam, cov tub ntxhais hluas, thiab cov me nyuam hauv lub Koom Haum Me Nyuam Yaus, kuv hais lus tim khawv tias txoj kev ua raws li tus Ntsuj Plig tej kev tshoov siab yog ib yam tseem ceeb heev hauv tag nrho peb tej kev sib raug zoo.

Qhov kawg mas, thaum Hnub Caiv Nplooj Toov Laj no, kuv hais lus tim khawv tias txoj kev hloov los ntseeg tus Tswv, kev hais lus tim khawv txog Nws, thiab ua hauj lwm pab Nws yog tej yam uas tseem ceeb tshaj plaws thiab.

Txoj kev ntseeg tus Tswv Yexus Khetos yog lub hauv paus rau peb zaj lus tim khawv. Ib zag lus tim khawv yog ib zaj lus pov thawj los sis lus pom zoo rau ib txoj kev tseeb uas kav mus ib txhis uas tog mus hauv ib tug neeg lub siab thiab tus ntsuj plig dhau los ntawm tus Vaj Ntsuj Plig Dawb Huv. Ib zaj lus tim khawv txog Yexus Khetos, uas los ntawm thiab tau dag tau zog los ntawm tus Ntsuj Plig, hloov tau tib neeg lub neej—nws pauv peb txoj kev xav thiab peb ua neej nyob li cas. Ib zaj lus tim khawv tig peb mus rau peb Leej Txiv Saum Ntuj Ceeb Tsheej thiab Nws Tib Leeg Tub.

Amas qhia tias:

“Saib seb, kuv ua tim khawv rau nej tias kuv yeej paub tias tej yam uas kuv tau hais no muaj tseeb. Thiab nej xav seb ua li cas kuv ho paub tias tej yam no muaj tseeb?

“Saib seb, kuv hais rau nej tias Vajtswv tus Ntsuj Plig Dawb Huv ua rau kuv paub tej yam no. Saib seb, kuv tau yoo mov thiab thov Vajtswv tau ntau hnub xwv kom kuv yuav paub tau tej yam no ntawm kuv tus kheej. Thiab nim no kuv paub ntawm kuv tus kheej tias tej yam no muaj tseeb; vim tus Tswv Vajtswv tau ua tej yam no tshwm sim rau kuv los ntawm nws tus Ntsuj Plig Dawb Huv.”⁵

Txoj kev muaj ib zaj lus tim khawv nkaus xwb yuav tsis txaus. Thaum peb txoj kev ntseeg Yexus Khetos loj hlob tuaj, peb yeej xav hais lus tim khawv txog Nws—Nws txoj kev ua zoo, kev hlub, thiab kev ua siab zoo.

Feem ntau hauv peb tej kev sib ntsib hais lus tim khawv thaum Hnub Caiv yoo mov, peb hnov tej lus zoo li “Kuv muaj kev ris txiaj” thiab “Kuv hlub” ntau tshaj qhov uas peb hnov tej lus zoo li “Kuv paub” thiab “Kuv ntseeg.”

Kuv caw nej los hais nej zaj lus tim khawv txog Yexus Khetos kom ntau me ntsis. Ua tim khawv txog tej yam uas nej paub thiab ntseeg thiab tej yam uas nej hnov, tsis yog rau tej yam uas nej muaj kev ris txiaj rau thiab. Ua tim khawv txog tej yam uas nej raug nej thiaj li paub thiab hlub tus Cawm Seej, thiab ua raws li Nws tej lus qhia, thiab txog Nws txoj kev cawm dim thiab muab hwj chim hauv nej lub neej. Thaum nej hais nej zaj lus tim khawv txog tej yam uas nej paub, ntseeg, thiab hnov, ces tus Ntsuj Plig Dawb Huv yuav qhia qhov tseeb rau cov uas ua tib zoo mloog nej zaj lus tim khawv. Lawv yuav ua li no vim lawv tau saib nej los ua ib tug neeg ntseeg Yexus Khetos uas muaj kev thaj yeeb. Lawv thiaj yuav paub ua Nws ib tug ntseeg txhais tau li cas. Lawv kuj yuav hnov ib yam dab tsi uas tej zaum lawv tsis tau hnov dua. Ib zag lus tim khawv los ntawm ib lub siab uas hloov hlo lawm thiab tau kev txhawb los ntawm tus Vaj Ntsuj Plig Dawb Huv lub hwj chim uas nkag los rau hauv lwm tus neeg uas muaj lub siab kam txais yuav.

Cov uas hnov ib yam dab tsi los ntawm nej zaj lus tim khawv mam li thov Vajtswv kom paub seb nej zaj lus tim khawv puas muaj tseeb. Ces lawv thiaj yuav paub rau lawv tus kheej.

Cov kwv tij thiab cov muam, kuv ua tim khawv tias Yexus Khetos yog tus Cawm Seej thiab tus Txhiv Dim ntawm lub ntiaj teb. Nws muaj txoj sia nyob. Nws yog Vajtswv tus Tub uas tau sawv los, thiab nov yog Nws lub Koom Txoos uas Nws tus yaj saub thiab cov thwj tim coj kav. Kuv thov kom txog lub sij hawm uas kuv mus rau lub neej tom ntej, kuv zaj lus tim khawv tseem yuav muaj hwj chim zis.

Nyob hauv kuv txoj kev qhuab qhia tib neeg, kuv tau kawm hais tias tej yam uas tseem ceeb tshaj yog peb txoj kev sib raug zoo nrog peb Leej Txiv Saum Ntuj Ceeb Tsheej thiab Nws Tib Leeg Tub, peb tsev neeg thiab peb cov neeg zej zog, thiab cia tus Tswv tus Ntsuj Plig coj kav tej kev sib raug zoo ntawd xwv kom peb thiaj hais tau lus tim khawv txog tej yam uas tseem ceeb tshaj rau peb thiab cov uas yuav kav ntev tshaj plaws. Los ntawm Yexus Khetos lub npe, amees.