Txais Tau Vajtswv lub Hwj Chim Dhau Los ntawm tej Kev Khi Lus
Thaum nej taug txoj kev ua raws li tej kev khi lus, txij ntawm kev cai raus dej mus txog nyob hauv lub tuam tsev thiab tas nej lub neej, kuv cog lus tias nej yuav muaj hwj chim taug txoj kev txawv ntawm txoj kev uas txhua tus nyiam mus.
Thaum lub Kaum Ib Hlis Ntuj tas los, kuv muaj cib fim muab lub Tuam Tsev Belém Brazil fij tseg. Yeej ua rau kuv zoo siab kawg vim kuv tau nrog cov mej zeej ntawm lub Koom Txoos nyob hauv Brazil sab qaum teb koom ua ke. Thaum lub sij hawm ntawd, kuv kawm tias Belém yog qhov chaw nkag rau thaj tsam ntawm tus dej uas muaj zog tshaj hauv lub ntiaj teb, tus Dej Amazon.
Txawm yog tus dej no muaj zog heev, ob zaug ib xyoos, muaj ib yam dab tsi txawv heev tshwm sim. Thaum lub hnub, lub hli, thiab lub ntiaj teb nyob ncaj qha, ib nthw dej loj kawg li ntws kom tus dej thim rov qab txawv ntawm qhov uas tus dej ib txwm ntws. Twb tau sau ntawv txog tej lub sij hawm thaum muaj tej nthwv dej siab npaum li 6 mev1 uas mus deb npaum li 50 kilaumev2 thim rov qab li no. Qhov no hu ua tidal bore, los yog dej tho kev thim rov qab, es cov neeg hauv qhov chaw ntawd hu uapororoca los sis “nyooj laws,” vim nrov nrov heev thaum ua li ntawd. Peb yuav tsum txiav txim hais tias txhua yam yuav tsum ua raws li Vajtswv lub hwj chim, tsis hais tus dej loj tshaj plaws, tus dej Amazon.
Ib yam li tus dej Amazon ntws mus, peb lub neej yeej mus li ntawd; peb ib txwm ua raws li tej yam uas neeg coob ua. Ib yam li tus dej Amazon, thaum muaj Vajtswv txoj kev pab, peb muaj peev xwm ua tej yam uas neeg ib txwm tsis ua. Vim hais tias, yeej tsis yog ib yam uas neeg coob txo hwj chim, ua siab mos siab muag ua raws li Vajtswv lub siab nyiam. Tiam sis tsuas yog peb ua li ntawd xwb peb thiaj li yuav hloov siab, rov qab mus cuag Vajtswv, thiab ua raws li peb txoj hmoov nyob mus ib txhis li.
Tsis zoo li tus dej Amazon, peb yuav tsum xaiv seb peb puas yuav ywj rau Vajtswv lub hwj chim los sis ua neej raws li lwm tus “ntws mus” xwb.3 Txoj kev mus tsis raws li tus dej txoj kev ntws los tej zaum yuav nyuaj heev. Tiam sis thaum peb ywj rau “tus Vaj Ntsuj Plig Dawb Huv tej kev tshoov siab” thiab tso kev ua neeg qia dub ntawm tus neeg ntawm sab cev nqaij daim tawv tseg,4 ces peb txais tau tus Cawm Seej lub hwj chim kom peb muaj peev xwm hloov, lub hwj chim ua tej yam nyuaj.
Thawj Tswj Hwm Russell M. Nelson tau qhia peb paub ua li no. Nws cog lus tias, “Txhua tus uas khi lus thaum lawv ua kev cai raus dej thiab nyob hauv lub tuam tsev—thiab ua raws li tej kev khi lus ntawd—txais tau Yexus Khetos lub hwj chim ntxiv.”5 Los yog hais tias, peb txais tau Vajtswv lub hwj chim, tiam sis tsuas yog thaum peb nrog Nws khi lus dawb ceev xwb.
Ua ntej ntuj tsim teb raug, Vajtswv tau txhim tsa tej kev khi lus kom peb, uas yog Nws cov me nyuam, thiaj li yuav nrog Nws sib koom siab ua ke. Raws li ib txoj kev cai uas yeej tsis hloov nyob mus ib txhis li, Nws qhia tias yuav tsum ua li cas kom thiaj li txais kev hloov siab, kev cawm seej, thiab kev tsa nto. Nyob hauv lub neej no, peb khi lus li no thaum peb ua cov kab ke pov thawj hwj thiab cog lus tias peb yuav ua raws li tej yam uas Vajtswv xav kom peb ua, ces Vajtswv cog lus tias peb yuav txais tau cov koob hmoov.6
Kev khi lus yog ib txoj kev cog lus uas peb yuav tsum npaj ua ntej, to taub zoo, thiab ua raws nraim li.7 Qhov uas yus nrog Vajtswv khi lus yeej tsis zoo ib yam li kev lam cog lus xwb. Qhov thib ib, yuav tsum muaj txoj cai pov thawj hwj. Qhov thib ob, kev lam cog lus yeej tsis muaj zog txaus ua rau peb txawj tiv txoj kev uas tus dej ntws. Peb ua kev khi lus tsuas yog thaum peb xav cog lus tias peb yeej xav ua raws li kev khi lus xwb.8 Peb hloov los ua Vajtswv cov me nyuam khi lus thiab txais Nws lub nceeg vaj ua peb tug, qhov tseem ceeb yog thaum peb ua raws nraim li peb tej kev khi lus.
Lo lus txoj kev ua raws li kev khi lus hais txog tej kev khi lus uas peb khi kom peb los cuag Yexus Khetos thiab nrog Nws sib raug zoo. Los ntawm txoj kev sib khi no, peb txais tau Nws lub hwj chim mus ib txhis li. Txoj kev no pib thaum peb ntseeg Yexus Khetos thiab hloov siab lees txim, tom qab ntawd ua kev cai raus dej thiab txais lub txiaj ntsim Vaj Ntsuj Plig Dawb Huv.9 Yexus Khetos tau qhia peb kom paub pib txoj kev no thaum Nws tau ua kev cai raus dej.10 Raws li Phau Tshiab hais nyob hauv Malakaus thiab Lukas, thaum Yexus ua kev cai raus dej Leej Txiv Saum Ntuj Ceeb Tsheej tau hais rau Yexus hais tias, “Koj yog kuv tus Tub uas kuv hlub. Kuv txaus siab rau koj.” Thaum peb pib taug txoj kev ua raws li kev khi lus thaum peb ua kev cai raus dej, kuv xav tias Leej Txiv Saum Ntuj Ceeb Tsheej hais ib yam li ntawd rau peb txhua tus: “Koj yog kuv tus me nyuam uas ua rau kuv zoo siab. Tsis txhob tso tseg.”11
Thaum peb ua kev cai raus dej thiab thaum peb txais lub cim nco txog,12 peb ua tim khawv tias peb txaus siab ris Yexus Khetos lub npe.13 Thaum xav txog qhov no, cia peb nco txog lo lus txib hauv Phau Qub, “Nej yuav tsum tsis txhob muab tus Tswv nej tus Vajtswv lub npe hais ua dog ua dig.”14 Rau peb cov neeg hauv lub caij nyoog no, ua rau peb xav tias yog kev txwv tsis pub peb hais phem txog Vajtswv lub npe. Lo lus txib kuj hais li ntawd thiab, tiam sis muaj ib qho tseem ceeb tshaj. Lo lus Henplais uas txhais tias “muab” txhais tias yus “ris” los sis ”nqa”, ib yam li ib tug chij uas qhia tias ib pawg neeg los sis ib tug neeg yog leej twg.15 Lo lus ua txhais tias “ua dog ua dig” txhais tias “tsis muaj nqis” los sis “dag.”16 Yog li ntawd lo lus txib kom tsis txhob muab tus Tswv lub npe hais ua dog ua dig txhais tias, “Nej yuav tsum tsis txhob hais tias nej yog Yexus Khetos cov thwj tim tsuas yog nej muaj siab xav sawv Nws cev tiag tiag.”
Peb los ua Nws cov thwj tim thiab sawv Nws cev tiag tiag thaum peb txhob txwm ris Yexus Khetos lub npe zuj zus dhau los ntawm peb tej kev khi lus. Peb tej kev khi lus ua rau peb muaj hwj chim taug txoj kev ua raws li kev khi lus vim peb txoj kev nrog Yexus Khetos thiab peb Leej Txiv Saum Ntuj Ceeb Tsheej sib raug zoo hloov. Peb nrog Nkawd khi ua ke vim tau nrog Nkawd khi lus.
Txoj kev ua raws li kev khi lus ua rau peb txais tau cov kab ke hauv lub tuam tsev, xws li lub tuam tsev txoj kab ke txais lub vaj txiaj ntsim.17 Lub vaj txiaj ntsim yog Vajtswv lub txiaj ntsim uas Nws pub tej kev khi lus rau peb kom peb nrog Nws sib raug zoo ntxiv. Nyob hauv lub vaj txiaj ntsim, peb khi lus tias, qhov thib ib, peb yuav siv zog ua raws li Vajtswv cov lus txib; qhov thib ob, hloov siab lees txim nrog ib lub siab mob thiab lub siab xav ua zoo; qhov thib peb, ua raws li Yexus Khetos txoj moo zoo. Peb ua li no thaum peb muab siab rau ntseeg Nws, khi lus nrog Vajtswv thaum peb txais cov kab ke cawm seej thiab kev tsa nto, ua raws li tej kev khi lus kom tas peb lub neej, thiab siv zog ua raws li thawj ob txoj lus txib kom hlub Vajtswv thiab cov neeg zej zog. Qhov thib plaub, peb khi lus tias peb yuav ua raws li txoj kev cai coj dawb huv, thiab, qhov thib tsib, peb khi lus tias yuav muab peb tus kheej thiab txhua yam uas tus Tswv foom koob hmoov rau peb fij tseg kom txhim tsa Nws lub Koom Txoos.18
Thaum peb ua raws li tej kev khi lus hauv lub tuam tsev, peb kawm ntxiv txog tus Tswv tej lub hom phiaj thiab txais tus Vaj Ntsuj Plig Dawb Huv tag nrho.19 Peb txais tej lus qhia rau peb lub neej. Peb hloov ua cov thwj tim zoo peb thiaj li yuav tsis ua li me nyuam yaus uas tsis paub dab tsi.20 Tiam sis, peb muaj ib lub zeem muag pom mus ib txhis li thiab haj yam muaj siab xav ua hauj lwm pab Vajtswv thiab lwm tus. Peb muaj peev xwm ntxiv kom ua raws li peb tej lub hom phiaj hauv lub neej no. Vajtswv pov hwm peb kom txhob raug phem,21 thiab peb muaj hwj chim ntxiv kom tiv dhau kev ntxias thiab hloov siab lees txim thaum peb ua yuam kev.22 Thaum peb ua yuam kev, ces qhov uas peb nco txog peb tej kev khi lus rau Vajtswv yuav pab peb rov qab ua zoo. Thaum peb txais tau Vajtswv lub hwj chim, peb hloov los ua pororoca, peb muaj peev xwm tawm tsam lub ntiaj teb, nyob hauv peb lub neej no thiab nyob mus ib txhis li. Thaum kawg, peb txoj hmoov hloov vim txoj kev ua raws li kev khi lus ua rau peb txais tau kev tsa nto thiab txoj sia nyob mus ib txhis li.23
Kev ua raws li tej kev khi lus uas ua thaum ua kev cai raus dej thiab nyob hauv lub tuam tsev ua rau peb muaj zog txaus nyiaj kom dhau tej kev sim siab thiab kev tu siab ntawm lub neej no.24 Cov lus qhuab qhia ntawm tej kev khi lus no ua rau peb txais tau kev cia siab, kev nplij siab, thiab nyob kaj siab lug.
Kuv pog thiab yawg Lena Sofia thiab Matts Leander Renlund tau txais Vajtswv lub hwj chim dhau los ntawm nkawd txoj kev khi lus thaum ua kev cai raus dej thaum nkawd koom lub Koom Txoos nyob rau xyoo 1912 nyob hauv Finland. Nkawd zoo siab koom thawj ceg ntseeg ntawm lub Koom Txoos nyob hauv Finland.
Leander raug mob ntsws qhuav thiab tas sim neej tsib xyoos tom qab ntawd thaum Lena xeeb tub uas yog tus me nyuam thib kaum. Tus me nyuam ntawd, kuv txiv, yug los ob lub hlis tom qab Leander tas sim neej lawm. Lena tau muab nws tus txiv faus es nws kuj muab xya tus me nyuam faus thiab. Nws yog ib tug poj ntsuam txom nyem kawg, nyuaj rau nws heev. Tau 20 xyoo nws tsis pw tsaug zog zoo. Thaum nruab hnub, nws khwv kom nws tsev neeg tau noj tau haus. Thaum hmo ntuj, nws tau saib xyuas nws tsev neeg uas tab tom tas sim neej. Yeej nyuaj xav tias nws ho ua li cas.
Lena nyiaj dhau tej yam no vim nws paub tias nws tus txiv thiab cov me nyuam uas tas sim neej lawm yog nws li nyob mus ib txhis li. Cov lus qhuab qhia ntawm lub tuam tsev cov koob hmoov, xws li tsev neeg uas nyob mus ib txhis li, ua rau nws kaj siab vim nws tso siab rau lub hwj chim sib khi. Nyob hauv lub neej no, nws tsis txais nws lub vaj txiaj ntsim thiab nws tsis tau nrog Leander sib khi, tiam sis Leander yog ib tug tseem ceeb rau nws thiab yog ib feem ntawm nws txoj kev cia siab rau yav tom ntej.
Nyob rau xyoo 1938, Lena tau xa cov ntaub ntawv kom ua cov kab ke hauv lub tuam tsev rau nws tsev neeg uas tau tas sim neej lawm, yeej yog ib feem ntawm thawj cov ntaub ntawv uas xa los ntawm Finland. Tom qab nws tso lub ntiaj teb no tseg, twb tau ua cov kab ke hauv lub tuam tsev rau nws, Leander, thiab nws cov me nyuam uas tau tas sim neej lawm. Muaj neeg sawv nws cev ua qhov vaj txiaj ntsim, Lena thiab Leander ua kev cai sib khi, thiab tau muab nkawd cov me nyuam uas tas sim neej lawm thiab kuv txiv khi rau nkawd. Ib yam li lwm tus, Lena “muab siab rau ntseeg mus txog hnub uas lawv tuag; [nws] tseem tsis tau tau tej uas Vajtswv cog lus tseg …, tiam sis [nws] cia siab hais tias yav tom ntej [nws] yuav tau, [nws] thiaj zoo siab tos.”25
Lena tau ua neej zoo ib yam li nws twb tau khi tej kev khi lus no lawm. Nws paub tias nws tej kev khi lus thaum ua kev cai raus dej thiab txais lub cim nco txog ua rau nws muab siab npuab tus Cawm Seej. Nws tau “cia kev ntshaw tus Txhiv Dim qhov chaw dawb huv ua rau [nws] muaj kev cia siab.”26 Lena tau xav tias yog Vajtswv txoj kev hlub tshua uas nws tau kawm txog qhov uas tsev neeg nyob tau ua ke mus ib txhis li ua ntej nws raug tej kev txom nyem hauv nws lub neej. Los ntawm tej kev khi lus, nws tau txais Vajtswv lub hwj chim pab nws nyiaj dhau thiab kov yeej kev tu siab ntawm nws tej teeb meem thiab tej kev nyuaj siab.
Thaum nej taug txoj kev ua raws li tej kev khi lus, txij ntawm kev cai raus dej mus txog nyob hauv lub tuam tsev thiab tas nej lub neej, kuv cog lus tias nej yuav muaj hwj chim taug txoj kev txawv ntawm txoj kev uas txhua tus nyiam mus—kom nej muaj lub hwj chim kawm, lub hwj chim hloov siab lees txim, thiab lub hwj chim hloov los ua neeg dawb huv, thiab lub hwj chim nrhiav tau kev cia siab, kev nplij siab, thiab kev xyiv fab thaum nej raug tej teeb meem hauv lub neej no. Kuv cog lus rau nej thiab nej tsev neeg tias nej yuav txais kev pov hwm kom txhob raug tus yeeb ncuab lub hwj huam, yog tias nej rau siab tsom ntsoov rau lub tuam tsev hauv nej lub neej.
Thaum nej los cuag Khetos thiab nrog Nws thiab Leej Txiv Saum Ntuj Ceeb Tsheej sib raug zoo dhau los ntawm nej tej kev khi lus ces yuav muaj ib yam uas txawv heev. Nej hloov los ua neeg zoo tag nrho dhau los ntawm Yexus Khetos.27 Nej hloov los ua Vajtswv cov me nyuam khi lus thiab txais Nws lub nceeg vaj ua nej tug.28 Kuv xav tias Nws yuav hais li no rau nej, “Koj yog kuv tus me nyuam uas kuv hlub. Zoo siab koj tau rov qab los tsev.” Los ntawm Yexus Khetos lub npe, amees.