“Ua Neej Nrog Kuv, thiab Kuv Nrog Koj; Yog Li Ntawd Taug Kev Nrog Kuv Mus”
Tus Cawm Seej txoj kev cog lus tias Nws yuav nrog nraim peb yeej muaj tseeb rau txhua tus mej zeej uas ua raws li lawv tej kev khi lus hauv Nws lub Koom Txoos no.
Tus yaj saub puag thaum ub Enauj, raws li hais nyob hauv Phau Qub, phau Lus Qhuab Qhia thiab Kev Khi Lus, thiab phau lub Hlaws uas Muaj Nqis Heev,1 yeej yog ib tug tseem ceeb ntawm kev txhim tsa lub nroog Xi-oos.
Cov vaj lug kub zaj lus hais txog thaum Vajtswv hu Enauj ua hauj lwm qhia tias “nws hnov ib lub suab saum ntuj ceeb tsheej tuaj, hais tias: Kuv tus tub Enauj, cia li qhia tej yuav muaj los yav tom ntej rau cov neeg no, thiab hais rau lawv tias—Cia li hloov siab lees txim, … vim lawv lub siab tawv ruaj, thiab lawv pob ntseg twb tsis hnov, thiab lawv qhov muag twb tsis pom kev deb.”2
“Thiab thaum Enauj tau hnov tej lus no, nws txawm txhos caug pe hauv av … thiab hais lus rau tus Tswv, hais tias: Yog vim li cas koj ho pom zoo rau kuv, thiab kuv tsuas yog ib tug tub hluas xwb, thiab tag nrho cov neeg ntxub kuv; vim kuv hais lus taj; ua cas kuv ho yog koj ib tug tub qhe?”3
Cia li to taub tias thaum lub sij hawm uas tus Tswv hu Enauj ua hauj lwm, nws twb paub zoo txog nws tej kev qaug zog thiab tej yam nws ua tsis taus. Nyiaj peb txhua tus twb muaj tej lub sij hawm zoo ib yam li Enauj no thaum peb ua hauj lwm hauv lub Koom Txoos. Tiam sis hnub no kuv ntseeg tias tus Tswv tej lus teb qhov uas Enauj thov los yeej qhia tau peb txhua tus.
“Thiab tus Tswv hais rau Enauj tias: Cia li mus thiab ua li kuv tau txib koj, thiab yuav tsis muaj neeg nkaug koj. Cia li qhib koj lub qhov ncauj, thiab yuav ua kom muaj puv npo, thiab kuv yuav qhia kom koj paub hais. …
“Saib seb kuv tus Ntsuj Plig twb nrog koj, yog li ntawd kuv yuav txhawb tag nrho koj tej lus; thiab tej roob yuav khiav ntawm koj xub ntiag mus, thiab tej dej yuav lem ntawm txoj kev uas tej dej ntws; thiab koj yuav ua neej nrog kuv, thiab kuv nrog koj; yog li ntawd taug kev nrog kuv mus.”4
Enauj tau hloov los ua ib tug yaj saub uas muaj hwj chim thiab tau ua li Vajtswv hais kom ua ib txoj hauj lwm tseem ceeb kawg nkaus, tiam sis thaum xub thawj nws tsis txawj qhuab qhia li ntawd! Tiam sis, nws txoj kev muaj peev xwm tau loj hlob tuaj thaum nws kawm nrog Vajtswv Leej Tub sib raug zoo thiab taug kev nrog Nws.
Kuv rau siab thov Vajtswv kom tus Vaj Ntsuj Plig Dawb Huv pab peb thaum peb xav txog tus Tswv tej lus ntuas rau Enauj thiab qhov uas tej lus ntawd muaj nqis rau peb.
Koj Yuav Ua Neej Nrog Kuv
Tus Tswv Yexus Khetos caw peb txhua tus ua neej nrog Nws.5 Tiam sis peb yuav ua li cas kom kawm thiab los ua neej nrog Nws?
Lo lus Askiv abide yog qhov uas yus ua neej los sis nrog ib tug neeg nyob ruaj nrees tsis txav mus hlo li. Txwj Laug Jeffrey R. Holland piav tias “abiding” yog is lo lus uas hais tias yus “‘nrog lwm tus nyob—tiam sis yus nyob mus ib txhis li.’ Nov yog qhov uas txoj moo zoo qhia rau … txhua leej txhua tus … nyob thoob plaws lub ntiaj teb. Cia li los, tiam sis nyob tas mus li. Cia li muaj kev ntseeg thiab kev nyiaj mus. Cia li los ua neej ruaj nrees, kom pab nej thiab pab txhua tiam neeg uas yuav muaj tom qab nej.”6 Yog li ntawd, peb ua neej nrog Yexus Khetos thaum peb nyob ruaj nrees teev tiam tus Txhiv Dim thiab ua raws li Nws tej lub hom phiaj dawb huv, tsis hais thaum raug phem los raug zoo los yog.7
Peb pib ua neej nrog tus Tswv thaum peb siv peb txoj kev ywj siab xaiv kom kwv Nws tus quab8 thaum peb khi lus thiab ua cov kab ke ntawm txoj moo zoo. Qhov uas peb tej kev khi lus khi peb rau peb Leej Txiv Saum Ntuj Ceeb Tsheej thiab Nws Leej Tub uas tau sawv rov los yeej yog lub hauv paus ntawm lub zeem muag, kev cia siab, lub hwj chim, kev kaj siab lug, thiab kev xyiv fab uas nyob mus ib txhis; kuj yog ib lub hauv paus ruaj nrees9 rau peb ua peb lub neej.
Peb ua neej nrog Nws thaum peb siv zog ua raws li peb tej kev khi lus uas peb khi nrog Leej Txiv thiab Leej Tub. Piv txwv hais tias, kev rau siab thov Leej Txiv Saum Ntuj Ceeb Tsheej Nyob Mus Ib Txhis Li los ntawm Nws Leej Tub uas Nws Hlub ua rau peb txoj kev sib khi lus nrog Nkawd muaj zog.
Peb ua neej nrog Nws thaum peb mloog ntsoov Yexus Khetos tej lus. Tus Cawm Seej cov lus qhuab qhia pab peb uas yog Nws cov me nyuam khi lus, los nyob ze Nws10 thiab yuav qhia peb txhua yam uas peb yuav tsum ua.11
Peb ua neej nrog Nws thaum peb rau siab npaj txais txoj kab ke ntawm lub cim nco txog, xav txog peb tej kev khi lus, thiab hloov siab lees txim tiag tiag. Qhov uas peb tsim nyog txais lub cim nco txog yeej ua tim khawv rau Vajtswv tias peb txaus siab ris Yexus Khetos lub npe thiab siv zog “nco ntsoov txog nws”12 tom qab lub sij hawm uas peb txais txoj kab ke dawb ceev ntawd.
Thiab peb ua neej nrog Nws thaum peb ua hauj lwm pab Vajtswv los ntawm peb txoj kev pab Nws cov me nyuam thiab txoj kev txhawb pab peb cov kwv tij thiab cov muam.13
Tus Cawm Seej hais tias, “Yog nej ua raws li kuv tej lus, nej yuav muaj lub siab hlub ib yam li kuv ua raws li kuv Txiv tej lus thiab kuv muaj lub siab hlub ib yam li nws.”14
Kuv twb tau piav me ntsis txog plaub yam uas peb ua tau kom peb nrog nraim tus Cawm Seej nyob. Es tam sim no kuv caw peb txhua tus uas yog Nws cov thwj tim kom thov, nrhiav, khob qhov rooj, thiab kawm los ntawm tus Vaj Ntsuj Plig Dawb Huv lub hwj chim txog lwm yam uas peb ua taus kom tsom ntsoov rau Yexus Khetos nyob hauv peb lub neej thau peb ua txhua yam.
Thiab Kuv Nrog Koj
Tus Cawm Seej txoj kev cog lus rau cov neeg uas coj raws li Nws muaj ob feem: yog peb ua neej nrog Nws, Nws yuav nrog peb. Tiam sis Yexus Khetos puas muaj peev xwm nrog peb txhua tus? Lo lus teb lus nug no yeej hais tias muaj mas!
Nyob hauv Phau Ntawv Maumoos, peb kawm txog Amas cov lus qhia thiab txoj kev ua tim khawv rau cov neeg pluag uas txo hwj chim vim lawv raug txom nyem heev. Thaum nws qhia lawv, nws muab txoj lus piv rau ib lub noob uas yuav tsum cog thiab tu, ces nws piav tias “txoj lus” yog Yexus Khetos lub neej, ntiag tug hauj lwm, thiab txoj kev theej txhoj.
Amas hais tias, “Pib ntseeg Vajtswv Leej Tub, ntseeg tias nws yuav los txhiv nws cov neeg dim, thiab ntseeg tias nws yuav los raug kev txom nyem thiab tuag theej rau lawv tej kev txhaum; thiab ntseeg tias nws yuav sawv hauv qhov tuag rov qab los, qhov uas yuav ua kom muaj tau txoj kev sawv rov los, kom tib neeg txhua tus yuav tau los sawv ntawm nws xub ntiag, kom raug txiav txim thaum txog hnub kawg thiab hnub txiav txim, raws li tej yam lawv ua.”15
Vim Amas tau piav tias “txoj lus” yog li no, cia li xav txog lub ntsiab ntawm tej lus uas nws qhia tom qab ntawd.
“Thiab nim no … kuv xav kom nej yuav cog txoj lus no rau hauv nej lub siab, thiab thaum txoj lus pib loj hlob nej cia li tu txoj lus los ntawm nej txoj kev ntseeg. Thiab saib seb, txoj lus no yuav hloov los ua ib tsob ntoo, yuav loj hlob nyob hauv nej mus rau txoj sia uas kav ib txhis. Thiab thaum ntawd thov Vajtswv pub rau nej kom nej tej nra yuav sib, los ntawm txoj kev xyiv fab txog nws Leej Tub. Thiab txhua yam no nej yeej ua tau yog nej yuav ua.”16
Lub noob uas peb yuav tsum cog rau hauv peb lub siab yeej yog txoj lus—yog Yexus Khetos lub neej, ntiag tug hauj lwm, thiab cov lus qhuab qhia. Thiab thaum peb muaj kev ntseeg tu txoj lus no, ces lub noob yuav los ua ib tsob ntoo uas loj hlob nyob hauv peb kom peb muaj txoj sia uas kav ib txhis li.17
Lub ntsiab ntawm tus ntoo nyob hauv Lihais txoj kev ua yog toog yog dab tsi? Tus ntoo kuj yog ib lub cim txog Yexus Khetos.18
Kuv cov kwv tij thiab cov muam, Txoj Lus puas nyob hauv peb? Puas tau sau tus Cawm Seej txoj moo zoo nyob rau hauv peb lub siab?19 Peb puas hloov los ua neeg zoo li Nws zuj zus? Tus ntoo uas yog Khetos puas loj hlob nyob hauv peb? Peb puas siv zog hloov los ua “neeg tshiab”20 dhau los ntawm Nws?21
Tej zaum yog qhov uas peb muaj peev xwm ua li no ua rau Amas xav nug hais tias: “Nej sab ntsuj plig puas tau yug los ntawm Vajtswv? Nej puas tau txais nws tus yam ntxwv rau nej lub ntsej muag? Puas tau ua rau nej lub siab hloov loj heev zoo li no?”22
Peb yeej yuav tsum nco txog tus Tswv tej lus qhia rau Enauj, “Koj yuav ua neej nrog kuv, thiab kuv nrog koj.”23 Thiab kuv ua tim khawv tias tus Cawm Seej txoj kev cog lus tias Nws yuav nrog nraim peb yeej muaj tseeb rau txhua tus mej zeej uas ua raws li lawv tej kev khi lus hauv Nws lub Koom Txoos no.
Yog Li Ntawd Taug Kev Nrog Kuv
Tus Thwj Tim Povlauj tau qhuab ntuas cov ntseeg uas tau txais tus Tswv hais tias: “Yog li ntawd nej yuav tsum … nrog nws koom ib txoj sia.”24
Qhov uas yus taug kev nrog tus Cawm Seej thiab nrog Nws koom ib txoj sia qhia txog ob yam tseem ceeb ntawm kev ua thwj tim: (1) yuav tsum ua raws li Vajtswv cov lus txib, thiab (2) yuav tsum nco ntsoov thiab ua raws li tej kev khi lus uas ua rau peb koom nrog Leej Txiv thiab Leej Tub.
Yauhas hais tias:
“Yog peb ua raws li Vajtswv tej lus qhia, thiaj yog peb paub nws tseeb.
“Yog ib tug hais tias, Kuv twb paub Vajtswv lawm, tiam sis tus ntawd tsis ua raws li Vajtswv tej lus ces tus ntawd dag xwb, nws yeej tsis paub qhov tseeb li.
“Tiam sis tus uas ua raws li Vajtswv tej lus, tus ntawd thiaj yog tus uas hlub Vajtswv tiag. Twb yog vim li no, peb thiaj paub tseeb hais tias peb nrog Vajtswv sib raug zoo tiag.
“Yog leej twg hais tias, Kuv twb nrog Vajtswv sib raug zoo lawm, tus ntawd yuav tsum ua nws lub neej kom zoo li Yexus Khetos lub.”25
Yexus thov kom peb txhua tus, “Los, nrog kuv mus”26 thiab “nrog kuv taug kev.”27
Kuv ua tim khawv tias thaum peb sib zog mus lawm tom hauv ntej thiab taug kev raws tus Tswv tus Ntsuj Plig txoj kev siab mos siab muag,28 peb tau koob hmoov kom muaj hwj chim, muaj Nws txoj kev coj kev, muaj kev pov hwm, thiab kev kaj siab lug.
Zaj Lus Tim Khawv thiab Kev Cog Lus
Amas piav txog tus Tswv cov lus hais rau txhua leej txhua tus:
“Saib seb, nws caw tib neeg txhua tus, nws txhais caj npab hlub tshua cev tuaj rau lawv, thiab nws hais tias: Cia li hloov siab lees txim, es kuv mam li txais nej.
“… Cia li los cuag kuv thiab nej yuav tau noj cov txiv ntawm tsob ntoo uas cawm neeg txoj sia; muaj tseeb tiag, nej yuav tau noj tej mov mog thiab haus cov dej ntawm txoj sia tsis txwv hlo li.”29
Kuv xav hais txog qhov uas tus Cawm Seej txoj kev thov no muaj nqis npaum li cas. Nws xav xav foom koob hmoov rau txhua tus neeg kom lawv muaj Nws txoj kev tshav ntuj thiab txoj kev hlub tshua, tsis hais cov uas nyob tam sim no, cov uas tas sim neej lawm, thiab cov uas tseem tsis tau yug los.
Ib txhia ntawm lub Koom Txoos cov mej zeej xav tias cov lus qhuab qhia, cov ntsiab cai, thiab zaj lus tim khawv uas hais los ntawm lub sam thiaj hauv lub Tsev rau Rooj Sab Laj no muaj tseeb, tsis hais nyob hauv tej pawg ntseeg nyob thoob plaws lub ntiaj teb—tiam sis nyuaj rau lawv ntseeg tias lawv siv taus tej yam tseeb mus ib txhis no nyob hauv lawv lub neej thiab thaum lawv raug xwm txheej. Lawv ntseeg tiag thiab rau siab ua hauj lwm, tiam sis lawv tseem tsis tau nrog Leej Txiv thiab Nws Leej Tub sib raug zoo dhau los ntawm lawv tej kev khi lus kom lawv lub neej yuav hloov.
Kuv cog lus tias los ntawm tus Vaj Ntsuj Plig Dawb Huv lub hwj chim, nej yuav paub tias tej yam tseeb ntawm txoj moo zoo uas kuv tau sim piav rau nej muaj tseeb—rau nej txhua leej txhua tus.
Kuv zoo siab ua tim khawv tias Yexus Khetos yog peb tus Cawm Seej thiab tus Txhiv Dim uas hlub peb. Yog peb muab siab npuab Nws, Nws yuav muab siab npuab peb.30 Thiab thaum peb tuag kev nrog Nws, peb yuav tau koob hmoov kom txi txiv ntau ntxiv. Kuv ua tim khawv li no los ntawm Yexus Khetos lub npe dawb ceev, amees.