Nws Kho Tau Kuv!

Maulaunais cog lus hais tias yog peb nyeem Phau Ntawv Maumoos ces mam li nug Vajtswv Leej Txiv Nyob Mus Ib Txhis, nrog lub siab dawb paug, nrog kev mob siab ntso, thiab muaj kev ntseeg Khetos seb qhov no puas muaj tseeb, Vajtswv yuav qhia qhov tseeb los ntawm tus Vaj Ntsuj Plig Dawb Huv lub hwj chim.¹ Ntau plhom leej neeg tau ua raws li txoj kev cog lus no thiab tau lus tim khawv hais tias twb muab tag nrho Yexus Khetos txoj moo zoo txum tim rov qab los lawm.

Maulaunais ntuas peb hais tias, thaum peb nyeem Phau Ntawv Maumoos, kom peb yuav “nco txog saib tus Tswv tau hlub tshua rau noob neej npaum li cas, txij li thaum tsim Adas nqis los mus txog lub sij hawm uas nej yuav txais tej yam no, … thiab [kom] xav zoo zoo txog tej ntawd hauv [peb] tej siab.”² Tej dab neeg thiab lus qhia hauv Phau Ntawv Maumoos qhia peb thiab ua tim khawv txog tus Cawm Seej txoj kev hlub, kev khuv leej, thiab kev hlub tshua.

Kuv txiv tso lus neej no tseg thaum lub Plaub Hlis Ntuj 2013. Thaum kuv npaj hais lus hauv nws lub ntees tuag, kuv muaj hmoov vim kuv paub thiab nyiam cov nqe vaj lug kub uas nws nyiam tshaj. Nws twb qhia tej ntawd thaum peb tsev neeg sib sau ua ke, thiab nws nrog kuv nyeem tej no thaum kuv xav tau kev qhuab ntuas, kev coj qhia, los yog thaum xav ntxiv zog rau kuv txoj kev ntseeg. Kuv tau hnov nws qhia tej ntawd hauv nej tej zaj lus thiab hauj lwm. Tsis yog kuv paub tej ntawd xwb, tiam sis kuv tseem nco qab ntsoov nws lub suab thiab tej kev xav hauv kuv nruab siab thaum nws qhia tej ntawd. Thaum qhia tej nqe vaj lug kub thiab tej kev xav ntawd, kuv txiv pab kuv muaj kev ntseeg tus Tswv Yexus Khetos uas ruaj khov.

Kuv txiv nyiam zaj dab neeg txog tus Cawm Seej txoj kev tuaj xyuas cov neeg Nifais.³ Zaj ntawd qhia txog tus Tswv Yexus Khetos uas twb sawv rov los thiab tau kev tsa nto lawm. Nws twb haus lub khob dej iab lawm thiab tau raug txhua yam kev txom nyem xwv kom peb yuav tsis raug yog tias peb hloov siab lees txim.⁴ Nws tau mus xyuas lub ntuj ntsuj plig lawm thiab tau pib txoj kev tshaj tawm txoj moo zoo nyob ntawd.⁵ Nws tau sawv hauv qhov tuag rov qab los, Nws twb mus ntsib Leej Txiv es raug txib mus qhia vaj lug kub rau cov neeg Nifais uas yuav foom koob hmoov rau ntau tiam neeg tom ntej.⁶ Nws raug kev tsa nto lawm thiab tau tag nrho Nws lub hwj chim thiab hwj huam uas kav mus ib txhis. Peb kawm tau los ntawm txhua yam me me hauv Nws tej lus qhia.

Hauv 3 Nifais 11, peb nyeem txog qhov uas tus Cawm Seej nqi saum ntuj los es qhia cov neeg Nifais tias Nws yog Yexus Khetos, uas cov yaj saub ua tim khawv tias yuav los rau hauv lub ntiaj teb. Nws tshaj tawm tias Nws yog Qhov Kaj rau lub Ntiaj Teb thiab Nws muab yeeb koob rau Leej Txiv thaum nws los ris neeg ntiaj teb tej kev txhaum. Nws caw cov neeg los muab lawv tej tes xuas qhov mob ntawm Nws sab tav thiab xuas tej qhov ntsia hlau hauv Nws tes thiab Nws taw. Nws xav kom lawv paub tias Nws yog Haiv Neeg Ixayees tus Vajtswv uas tau raug tua rau neeg ntiaj teb tej kev txhaum. Cov neeg muaj kev zoo siab, ib leeg dhau ib leeg mus pom thiab hnov tias twb yog Nws ntag, tus uas tau raug muab sau cia los ntawm tej yaj saub, tias yuav los.⁷

Yexus qhia cov neeg Nifais tias kev hloov siab lees txim tseem ceeb npaum li cas, txog txoj kev rais los mus ua neeg zoo li me nyuam yaus, thiab yuav tsum ua kev cai raus dej los ntawm ib tug uas muaj Nws txoj cai. Ces Nws thiaj qhia ntau heev txog tej lus qhuab qhia uas peb tab tom kawm xyoo no hauv Phau Tshiab.

Hauv 3 Nifais 17, peb nyeem hais tias Yexus tau qhia cov neeg ntawd tias twb txog sij hawm rau Nws mus ntsib Leej Txiv thiab muab Nws tus Kheej rau tej xeem neeg Ixayees uas ploj lawm tau pom thiab.⁸ Nws tsa qhov muag ntsia puag ncig cov neeg coob coob, Nws pom tias lawv los kua muag, ntsia ntsoov Nws zoo li lawv xav thov kom nws nrog lawv nyob ib nyuag ntev me ntsis.⁹

Tus Cawm Seej lo lus teb cov neeg Nifais yeej ua siab zoo thiab tau qhuab qhia lawv. Nws hais tias, “Saib seb, kuv lub siab muaj kev khuv leej puv npo rau nej.”¹⁰

Kuv ntseeg hais tias Nws txoj kev khuv leej yog ntau tshaj qhov uas nws pom cov neeg ntawd quaj xwb. Zoo nkaus li Nws pom lawv dhau ntawm Nws txoj kev theej lawv lub txhoj. Nws pom lawv txhua yam kev mob, kev nyuaj siab, thiab kev ntxias. Nws pom lawv tej kev mob nkees. Nws pom lawv tej kev qaug zog, thiab Nws paub los ntawm Nws txoj kev raug txom nyem hauv lub Vaj Khexemanes thiab saum lub Roob Khauj Khaum Taub Hau seb yuav ua li cas thiaj nplij tau lawv lub siab.¹¹

Ib yam li ntawd, thaum peb tus Cawm Seej, Yexus Khetos, saib peb, Nws pom thiab to taub peb tej kev mob thiab tej nras uas peb ev uas yog peb tej kev txhaum. Nws pom peb tej kev quav thiab tej teeb meem. Nws pom peb tej kev nyuaj siab kev cov nyom txawm zoo li cas los xij—thiab Nws muaj kev khuv leej rau peb.

Tom qab ntawd Nws thiaj caw cov neeg Nifais tias: “Nej puas muaj neeg mob nyob hauv nej? Coj lawv los ntawm no. Nej puas muaj neeg ceg tawv, los sis dig muag, los sis neeg khoov duav, los sis neeg tu ceg tu npab, los sis neeg mob ruas, los sis cov uas qhuav tes qhuav taw, los sis cov uas lag ntseg, los sis cov uas raug txom nyem ib yam dab tsi? Coj lawv los ntawm no thiab kuv yuav kho kom lawv zoo, vim kuv muaj kev khuv leej rau nej; kuv lub siab muaj kev hlub tshua puv npo.”¹²

Ces cov neeg txawm los “nrog rau tag nrho lawv tej neeg uas raug txom nyem txhua yam; thiab nws kho tau lawv txhua tus zoo thaum lawv coj cov neeg no mus rau nws.”¹³

Hauv xyoo 1990 peb nyob hauv ib lub me nyuam zos hu ua Sale, hauv Victoria, Australia teb. Peb zoo siab ua tej hauj lwm hauv peb tsev neeg, tom lub Koom Txoos, thiab tsev hauj lwm. Muaj ib hnub Saturday thaum lub caij ntug sov ua ntej Christmas, peb tau txiav txim mus ua si tom tshav puam thiab hiav txwv. Peb tsev neeg twb ua si ib hnub nkaus, ces peb txawm mus zaum hauv tsheb thiab sawv kev mus tsev. Thaum tsav tsheb mus, kuv tsaug zog ces peb txawm sib tsoo tsheb. Tom qab ib pliag thaum kuv rov qab meej pem, kuv ntsia ib ncig lub tsheb. Es pom tias kuv tus poj niam, Maxine, lov ceg thiab ua pa nyuaj heev. Nws tus kaus siab lov lawm. Wb peb tug ntxhais ceeb tas tiam sis zoo nkaus li tsis raug mob. Kuv raug mob me me thiab. Tiam sis wb tus tub uas tsuas muaj tsib hlis tsis nco qab lawm.

Txawm muaj kev kub ntxhov ib ncig lub tsheb los, wb tus ntxhais hlob Kate, hais rau kuv tias, “Txiv, koj yuav tsum foom koob hmoov rau Jarom.” Txawm nyuaj tawm los, kuv thiab cov ntxhais tau tawm ntawm lub tsheb. Maxine txav tsis tau. Kuv maj mam nqa Jarom; ces kuv txawm pw ntxeev tiaj, kuv tso nws ntawm kuv xub ntiag thiab tau muab lub pov thawj hwj ib txoj koob hmoov rau nws. Plaub caug na this tom qab ntawd thaum lub tsheb thauj neeg mob tuaj txog, Jarom twb tsim los.

Hmo ntawd kuv tseg peb tug neeg hauv kuv tsev neeg tom lub tsev kho mob es tau ntiav tsheb thauj kuv thiab kuv ob tug ntxhais mus tsev. Hmo ntev ntev ntawd, kuv tau taij thov Leej Txiv Saum Ntuj Ceeb Tsheej kom kuv tsev neeg thiab cov uas raug mob hauv lwm lub tsheb yuav zoo mob zoo nkees. Muaj hmoov kawg, vim kuv cov lus thov thiab lwm cov neeg coob tej lus thov twb pab tau sawv daws. Nyob nyob ces sawv daws txawm zoo mob, peb tau koob hmoov zoo kawg.

Tab sis mas kuv pheej xav tias kuv tau ua txhaum thiab tu siab vim kuv ua kom peb sib tsoos tsheb li ntawd. Kuv tau tsim hmo ntuj thiab nco qab ntsoov txog tej xwm txheej ntawd. Kuv siv ntau xyoos sim nrhiav kev thaj yeeb thiab zam txim rau kuv tus kheej. Ces, thaum yog ib tug thawj coj pov thawj hwj, kuv tab tom pab lwm tus neeg hloov siab lees txim thiab hnov tus Cawm Seej txoj kev khuv leej, kev zam txim, thiab kev hlub, kuv txawm paub tias Nws kuj kho tau kuv thiab.

Tus Cawm Seej txoj kev kho thiab kev cawm dim yog rau tej yam uas peb lam ua yuam kev, kev xaiv tsis zoo, tej teeb meem, thiab kev cov nyom txhua yam huv tib si—thiab pab tau peb tej kev txhaum thiab. Thaum kuv tig mus rau Nws, kuv tej kev xav tias muaj txim thiab tu siab rau kuv tus kheej txawm pauv los ua kev thaj yeeb thiab kev kaj siab.

Thawj Tswj Hwm Russell M. Nelson qhia tias: “Thaum tus Cawm Seej tau theej peb txhua tus lub txhoj, Nws tau qhib kev rau cov uas coj raws li Nws kom lawv txais tau Nws lub hwj chim kho mob, txhawb zog, thiab txhiv dim. Tej koob hmoov no los muab rau tag nrho cov uas xav mloog Nws hais thiab coj raws li Nws.”¹⁴

Cov kwv tij thiab cov muam, txawm nej tab tom ris tej nra uas yog kev txog kev txhaum, raug kev nyuaj siab vim lwm tus ua txhaum rau koj thaum ub, los yog zam tsis tau txim rau koj tus kheej vim koj ua yuam kev lawm, koj muaj cai txais kev kho thiab kev cawm dim los ntawm tus Cawm Seej Yexus Khetos.

Kuv ua tim khawv hais tias Nws muaj txoj sia nyob. Nws yog peb tus Cawm Seej thiab tus Txhiv Dim. Nws hlub peb. Nws muab kev khuv leej rau peb, thiab Nws muaj kev hlub tshua, thiab Nws kho tau nej zoo. Los ntawm Yexus Khetos lub npe, amees.