Ib lub Suab ntawm Kev Zoo Siab!

“Nim no, peb hnov dab tsi nyob hauv txoj moo zoo uas peb tau txais? Ib lub suab ntawm kev zoo siab! Ib lub suab ntawm kev hlub tshua los saum ntuj ceeb tsheej los; thiab ib lub suab ntawm kev tseeb tawm hauv av los; … ib lub suab ntawm kev zoo siab rau cov ciaj thiab cov tuag; tej moo zoo siab ntawm kev xyiv fab heev.”¹

Cov kwv tij thiab cov muam, thaum hnov tus Yaj Saub Joseph Smith cov lus no yus yeej yuav pib luag nyav!

Joseph cov lus yeej piav txog kev zoo siab uas yus nrhiav tau hauv Vajtswv peb Leej Txiv Saum Ntuj Ceeb Tsheej txoj kev zoo siab, rau qhov peb yeej paub hais tias, “muaj tib neeg xwv kom lawv yuav muaj kev xyiv fab.”²

Peb sawv daws qw muaj kev zoo siab³ hauv peb lub neej uas ntej yug los thaum peb hnov txog Vajtswv txoj kev zoo siab, thiab peb pheej qw muaj kev zoo siab thaum peb ua raws li Nws txoj hau kev. Tiam sis vim li cas tus Yaj Saub muaj kev zoo siab tshaj tawm li no? Yog vim li cas nws thiaj muaj tej kev xav tob tob li no?

Tus Yaj Saub Joseph tab tom qhia txog txoj kev ua kev cai raus dej rau cov neeg uas tuag lawm. Nov twb yog ib txoj kev tshwm sim zoo kawg uas sawv daws zoo siab hnov. Thaum cov mej zeej hauv lub Koom Txoos xub kawm hais tias lawv ua tau kev cai raus dej rau cov neeg uas lawv hlub uas tuag lawm, lawv muaj kev zoo siab heev. Wilford Woodruff hais tias, “Lub sij hawm uas kuv hnov ntawd, kuv tus ntsuj plig muaj kev zoo siab heev!”⁴

Kev cai raus dej rau cov neeg uas tuag uas yus hlub tsis yog tib txoj kev tseeb uas tus Tswv yuav muab tshwm sim thiab txum tim rov qab los. Tseem muaj ntau yam txiaj ntsim los sis vaj txiaj ntsim uas Vajtswv xav muab rau Nws cov tub cov ntxhais.

Tej txiaj ntsim no kuj yog txoj cai pov thawj hwj, tej kev khi lus thiab kab ke, kev sib yuav uas kav mus ib txhis, txoj kev khi cov me nyuam rau lawv niam txiv nyob rau hauv Vajtswv tsev neeg, thiab qhov zoo tshaj yog foom koob hmoov kom lawv tau rov qab mus nrog Vajtswv peb Leej Txiv Saum Ntuj Ceeb Tsheej thiab Nws tus Tub, Yexus Khetos nyob ua ke. Txhua yam koob hmoov no yog vim muaj Yexus Khetos txoj Kev Theej Txhoj.

Vim Vajtswv xav tias tej no yog Nws tej koob hmoov siab thiab dawb huv tshaj,⁵ Nws txib kom lawv yuav ua cov tsev dawb ceev es nyob hauv Nws mam li muab tej txij ntsim zoo kawg no rau Nws cov me nyuam.⁶ Tej tsev no yuav yog Nws lub tsev hauv ntiaj teb no. Tej tsev no yug ua lub tuam tsev kom tej yam uas muab khi hauv lub ntiaj teb los ntawm Nws lub npe thiab Nws txoj lus thiab Nws txoj cai ces tej ntawd yuav muab khi nyob saum ntuj thiab.⁷

Niaj hnub nim no ua ib tug mej zeej hauv lub Koom Txoos, yeej yooj yim rau peb ib txhia lam saib tej kev tseeb no tsis tshua tseem ceeb. Lawv yog tej yam uas peb twb ib txwm muaj. Tej thaum yuav pab peb yog peb saib tej no siv lub qhov muag uas ib tug neeg uas nyuam qhuav kawm txog tej no saib thiab. Tsis ntev tas los no kuv kawm paub txog qhov no.

Xyoo tas los no, tsis ntev ua ntej rov qab muab lub Tuam Tsev hauv Tokyo Japan fij tseg, coob leej uas tsis koom peb txoj kev ntseeg tau los xyuas hauv lub tuam tsev ntawd. Ib tug uas tuaj xyuas ntawd yog ib tug thawj coj los ntawm lwm txoj kev teev ntuj. Peb tau qhia tus neeg no txog Leej Txiv Saum Ntuj Ceeb Tsheej txoj hau kev zoo siab, Yexus Khetos ua txoj hauj lwm dab tsi, thiab lus qhuab qhia uas hais tias tsev neeg nyob tau ua ke tas mus ib txhis yog ua txoj kab ke muab sib khi.

Thaum xaus txoj kev ncig xyuas no, kuv tau cawm peb tus phooj ywg no los qhia seb nws xav li cas. Hais txog txoj kev muab tej yim neeg khi ua ke—cov thaum ub, niaj hnub nim no, thiab cov yav tom ntej—tus neeg siab zoo no txawm uas tib zoo nug hais tias, “Cov mej zeej hauv nej txoj kev ntseeg puas paub txoj lus qhuab qhia no tseem ceeb npaum li cas?” Nws hais ntxiv tias, “Tej zaum txoj lus qhuab qhia no yog tib txoj lus uas yuav muab lub ntiaj teb no khi ua ke vim sawv daws yeej sib faib siab lawm.”

Nws hais tej lus muaj hwj chim heev. Tus txiv neej no tsis yog xav tsis thoob vim kho tau ib lub tuam tsev zoo nkauj heev tiam sis twb yog vim txoj lus qhuab qhia uas hais tias tsev neeg nyob tau ua ke thiab muab khi rau Leej Txiv Saum Ntuj Ceeb Tsheej thiab Yexus Khetos tas mus li.⁸

Peb yuav tsum txhob xav tsis thoob, thaum uas ib tug neeg uas tsis koom peb txoj kev teev ntuj pom hais tias muaj tej xwm tseem ceeb heev hauv lub tuam tsev. Ib yam uas peb lam saib ua ib qho me me los sis ib yam uas tsuas zoo xws luag es lwm tus neeg pom hais tias yog ib yam tseem ceeb thiab muaj yeeb koob thaum lawv hnov thiab pom thawj thawj zaug xwb.

Txawm yog twb muaj tej lub tuam tsev puag thaum ub thiab, txij thaum muab Yexus Khetos txoj moo zoo Txum Tim Rov Qab Los, txoj kev ua cov tuam tsev yog ib txoj hauj lwm tseem ceeb rau txhua tus yaj saub txij li tus Yaj Saub Joseph Smith. Thiab yooj yim rau peb to taub yog vim li cas.

Thaum tus Yaj Saub Joseph tab tom qhia txog kev cai raus dej rau cov uas tuag, nws qhia lwm txoj lus tseeb tseem ceeb. Nws qhia tias: “Cia kuv hais tseeb rau nej tias tej no yog tej ntsiab cai ntsig txog cov tuag thiab cov ciaj uas hais txog peb txoj kev cawm seej Vim yuav tsum muaj lawv txoj kev cawm seej thiaj li muaj peb txoj kev cawm seej, … tsis muaj peev xwm ua kom lawv zoo tag nrho yog hais tias tsis muaj peb—thiab tsis muaj peev xwm ua kom peb zoo tag nrho yog hais tias tsis muaj peb cov tuag.”⁹

Yog li peb thiaj pom tias, lub ntsiab rau cov tuam tsev thiab tej hauj lwm uas ua hauv rau cov neeg ciaj thiab cov tuag thiaj yog ib qho yooj yim pom.

Tus yeeb ncuab yeej saib ntsoov. Tej kab ke thiab kev khi lus hauv lub tuam tsev yeej tsim txom nws lub hwj chim, thiab nws ua txhua yam nws ua tau kom nres txoj hauj lwm no. Vim li cas? Vim nws paub txog lub hwj chim uas los ntawm txoj hauj lwm dawb huv no. Thaum muab txhua lub tuam tsev tshiab fij tseg, Yexus Khetos lub hwj chim cawm seej nchav mus thoob plaws lub ntiaj teb kom tawm tsam tus yeeb ncuab tej hauj lwm thiab txhiv peb dim thaum peb los cuag Yexus. Thaum haj yam muaj cov tuam tsev thiab cov neeg uas ua raws li tej kev khi lus, ces dab ntxwg nyoog pib qaug zog.

Thaum nyuam qhuav pib lub Koom Txoos no, ib txhia txhawj tsam yuav ua ib lub tuam tsev tshiab, vim lawv hais tias, “Thaum twg peb pib ua ib lub tuam tsev ces lub ntuj txiag teb tsaus yeej pib los tawm tsam.” Tiam sis Brigham Young ua siab loj tshaj tawm tias, “Kuv yeej xav kom pom muaj li ntawd dua ib zaug.”¹⁰

Nyob hauv lub neej txawj tuag no, peb yeej yuav tsis dim kev tsov kev rog, tiam sis peb muaj hwj chim kov yeej tus yeeb ncuab. Lub hwj chim thiab hwj huam ntawd los ntawm Yexus Khetos los thaum uas peb ua thiab ceev peb tej kev sib khi lus hauv lub tuam tsev.

Thawj Tswj Hwm Russell M. Nelson tau qhia tias: “Lub sij hawm tseem yuav los thaum cov uas tsis ua raws li tus Tswv hais yeej yuav muab raug cais tawm ntawm cov uas ua raws li Nws hais. Peb yuav muaj kev thaj yeeb thaum peb ua neeg tsim nyog mus rau hauv nws lub tsev dawb huv.”¹¹

Nov yog ib txhia koob hmoov uas Vajtswv tau cog lus tseg rau peb dhau ntawm Nws tus yaj saub:

Nej puas xav tau tej txuj ci tseem ceeb? Peb tus yaj saub tau hais tias: “Kuv cog lus rau nej tias tus Tswv yuav muab tej txuj ci loj uas Nws paub tias nej xav tau thaum uas nej muab tej kev txi no thiab mus pe hawm hauv Nws cov tuam tsev.”¹²

Nej puas xav tau kev kho thiab lub hwj chim uas tus Cawm Seej Yexus Khetos muaj? Thawj Tswj Hwm Nelson qhia peb tias “Txhua yam uas peb kawm hauv lub tuam tsev … yuav pab peb to taub txog Yexus Khetos ntxiv. … Thaum peb ua raws li peb tej kev khi lus, Nws pub txiaj ntsim rau peb los ntawm Nws lub hwj chim uas txhawb peb dag zog. Thiab peb yeej yuav xav tau Nws lub hwj chim nyob rau yav tom ntej.”¹³

Thaum thawj Hnub Caiv Toov Laj thaum Yexus Khetos nkag los rau hauv lub nroog Yeluxalees, Nws ib pab thwj tim coob coob pib cav txog [Vajtswv] nrov nrov … hais tias, Thov Vajtswv foom koob hmoov rau tus vaj ntxwv uas Vajtswv txib los.”¹⁴

Zoo rau qhov thaum Hnub Caiv Toov Laj xyoo 1836 tau muab lub Tuam Tsev Kirtland fij tseg. Lub sij hawm ntawd Yexus Khetos cov thwj tim tau muaj kev zoo siab thiab. Nyob hauv zaj lus thov Vajtswv muab lub tuam tsev fij tseg, tus Yaj Saub Joseph Smith tau hais tej lus qhuab ntuas no:

“Auj tus Tswv Vajtswv uas Muaj Hwj Chim Tag Nrho, thov hnov peb tej lus thov, thiab teb peb saum ntuj ceeb tsheej los, … qhov chaw uas koj zaum saum lub rooj theej kiab, nrog yeeb koob, sam xeeb, hwj chim, yeeb haum, [thiab] muaj zog. …

“… Pab peb los ntawm koj tus Ntsuj Plig lub hwj chim, kom peb yuav muab peb lub suab koom nrog cov xelafees ci ntsa iab nyob ib puag ncig koj lub rooj theej kiab, nrog lub suab qhuas, hu nkauj Hauxanas rau Vajtswv thiab tus Me Nyuam Yaj!

“Thiab cia cov no … koj haiv neeg ntseeg qw nrov nrov rau txoj kev xyiv fab.”¹⁵

Cov kwv tij thiab cov muam, Hnub Caiv Toov Laj no, cia peb cov uas yog Yexus Khetos cov ntseeg thiaj li qhuas peb tus Vajtswv Dawb Huv thiab muaj kev xyiv fab rau Nws txoj kev ua zoo rau peb. “Peb hnov dab tsi nyob hauv txoj moo zoo uas peb tau txais?” Tiag tiag “ib lub suab ntawm kev xyiv fab!”¹⁶

Kuv hais kuv zaj lus tim khawv tias nej yuav hnov txoj kev xyiv fab no ntxiv thaum nej los hauv tus Tswv lub tuam tsev dawb ceev. Kuv ua tim khawv rau nej tias nej yuav muaj kev xyiv fab uas Nws xav foom pub rau nej, los ntawm Yexus Khetos lub npe, amees.