Lub Tuam Rooj Sab Laj
Kuv lub Siab Tsom Ntsoov rau txoj Kev Xav txog Yexus Khetos No
Plaub Hlis Ntuj xyoo 2023 lub Tuam Rooj Sab Laj

Kuv lub Siab Tsom Ntsoov rau txoj Kev Xav txog Yexus Khetos No

Los ntawm Txwj Laug Neil L. Andersen

Ntawm Pawg Kaum Ob tug Thwj Tim

Thaum nej tsom ntsoov rau txoj kev xav txog Yexus Khetos, kuv cog lus rau nej tias lub ntuj yuav coj nej kev thiab yuav muab hwj chim uas los saum ntuj los rau nej.

Nyob hauv lub caij Easter no, kuv thov ib yam li hais nyob hauv zaj nkauj qhuas Vajtswv no, “Coj peb, auj, tus Tswv Yehauvas.”1

Ib zaj dab neeg hauv Phau Ntawv Maumoos qhia txog ib tug tub hluas los ntawm ib tsev neeg uas muaj koob muaj npe hu ua Amas es cov vaj lug kub qhia tias nws yog ib tug uas tsis ntseeg.2 Nws txawj hais lus thiab txawj haub ntxias kom lwm tus coj raws li nws. Xav tsis thoob uas ib tug tim tswv tau tshwm sim rau Amas thiab nws cov phooj ywg. Amas qaug rau hauv av thiab qaug zog heev lawv thiaj li nqa nws mus rau nws txiv tsev. Nws pw tsis xeev ntev li peb hnub.3 Tom qab ntawd, nws piav tias thaum cov ib puag ncig nws xav tias nws tsis xeev li, nws sab ntsuj plig mob heev, vim nws xav txog nws lub neej thaum nws tsis ua raws li cov lus txib. Nws piav tias nws “tus ntsuj plig raug txom nyem kawg nkaus thiab raug tsim txom nrog tag nrho [nws] tej kev txhaum”4 thiab nws “raug tsim txom nrog txoj kev tsim txom uas nyob mus ib txhis.”5

Thaum nws poob siab lawm, nws nco qab tias nws txiv qhia thaum nws hluas txog “qhov uas ib tug hu ua Yexus Khetos, Vajtswv ib tug Tub, yuav los theej neeg ntiaj teb tej kev txhaum.”6 Ces ua rau nws hais qhov tseem ceeb no hais tias: “Thaum kuv lub siab tsom ntsoov rau txoj kev xav no, kuv thov nyob hauv kuv lub siab tias: Auj Yexus, koj tus uas yog Vajtswv Leej Tub, thov hlub tshua kuv.”7 Thaum nws thov kom muaj tus Cawm Seej lub hwj chim, muaj ib qho txuj ci tseem ceeb:nws hais tias, “Thaum kuv xav li no, kuv cia li tsis nco qab txog kuv tej kev mob ntxiv lawm.”8 Ua ciav nws nyob kaj siab lug thiab muaj txoj kev kaj. Nws hais tias, “Tsis muaj dab tsi zoo nkauj thiab qab zib heev npaum li kuv txoj kev xyiv fab.”9

Amas lub siab tau “tsom ntsoov” rau txoj kev xav txog Yexus Khetos no. Yog tias peb siv cov lus “caught hold upon” hais txog lwm yam, tej zaum peb yuav hais tias “Nws tuav tus nqaj thaum nws tab tom yuav vau,” uas txhais tias nws txawm tuav rawv ib yam uas txhos rau lub hauv paus ruaj nrees.

Yog Amas lub siab uas tuav raws qhov tseeb uas muaj hwj chim txog Yexus Khetos txoj kev theej txhoj. Thaum nws ua raws li kev ntseeg qhov tseeb ntawd, thiab los ntawm Vajtswv lub hwj chim thiab txoj kev tshav ntuj, ces twb pab nws dim kev nyuaj siab txhawj xeeb thiab npaj ib txoj kev rau nws nyob thaum yav tom ntej.

Txawm yog peb tsis tau ib qho txuj ci tseem ceeb uas loj npaum li Amas li los, tej kev tshwm sim li no yeej tseem ceeb rau peb nyob mus ib txhis li. Peb lub siab twb “tsom ntsoov rau txoj kev xav” txog Yexus Khetos thiab Nw txoj kev txi theej txhoj, thiab peb twb txais qhov kaj thiab kev xyiv fab uas muaj tom qab ntawd.

Tsom Ntsoov rau txoj Kev Xav txog Yexus Khetos

Kuv thov Vajtswv hauv lub caij Easter no kom peb yuav txhob txwm txhawb nqa txoj kev xav uas tseem ceeb tshaj plaws no nyob hauv peb tus ntsuj plig,10 kom loj hlob tuaj zuj zus hauv peb lub siab, kom coj peb txoj hau kev thaum peb xav thiab ua tej yam, thiab ua rau peb txais kev xyiv fab los ntawm tus Cawm Seej txoj kev hlub.11

Qhov uas peb tsom ntsoov rau Yexus Khetos lub hwj chim tsis txhais tias peb tsuas xav txog Nws xwb. Tiam sis qhov ntawd txhais tias txhua yam uas peb xav yeej yog los ntawm Nws txoj kev hlub, Nws lub neej thiab tej lus qhia, thiab Nws txoj kev theej txhoj thiab txoj Kev Sawv Rov Los. Peb yeej nco ntsoov txog Nws, vim peb txoj kev xav txog Nws yeej tsis tu tsis tseg thiab peb qhuas Nws kawg siab kawg ntsws!12 Peb thov Vajtswv thiab xav txog tej lub sij hawm uas peb txav los nyob ze Nws. Peb zoo siab xav txog tej daim duab zoo, cov vaj lug kub, thiab cov nkauj qhuas Vajtswv kom thiaj li pab peb thaum yuav tsum xav txog ntau yam hauv peb lub neej tas li. Peb txoj kev hlub Nws yeej tsis ua rau peb dim tau kev tu siab hauv lub neej no, tiam sis ua rau peb taug kev hla tej teeb meem ntawd nrog lub hwj chim uas loj dua li peb lub zog.

Yexus, thaum kuv tsuas xav txog koj

Twb ua rau kuv zoo siab;

Tiam sis zoo tshaj yog pom tau koj

Thiab so hauv koj xub ntiag.13

Nco ntsoov tias nej yog Leej Txiv Saum Ntuj Ceeb Tsheej cov me nyuam ntsuj plig. Raw sli tus Thwj Tim Povlauj piav tias, peb yog “Vajtswv cov me tub me nyuam.”14 Nej twb paub tias nej yog leej twg ntev los lawm ua ntej nej los rau hauv lub ntiaj teb no. Peb Leej Txiv tau tsim ib txoj hau kev zoo tag nrho kom peb los rau hauv lub ntiaj teb, kawm, thiab rov qab mus cuag Nws. Nws txib Nws Tib Leeg Tub kom dhau los ntawm Nws txoj Kev Theej Txhoj thiab txoj Kev Sawv Rov Los, peb yuav muaj txoj sia tom qab tuag; thiab thaum peb muab siab rau ntseeg Nws thiab hloov siab lees txim rau peb tej kev txhaum,15 peb txais kev zam txim thiab muaj kev cia siab tias yuav muaj txoj sia nyob mus ib txhis li.16

Tsom Ntsoov rau Peb Sab Ntsuj Plig thiab lub Siab Ntsws

Nyob hauv lub neej no, yuav tsum tsom ntsoov rau peb sab ntsuj plig thiab lub siab ntsws.17 Peb lub siab ua rau peb muaj txoj sia, muaj peev xwm xaiv, thiab paub qhov zoo thiab qhov phem.18 Peb tus ntsuj plig txais cov lus tim khawv tias Vajtswv yog peb Leej Txiv, Yexus Khetos yog Vajtswv Leej Tub, thiab Nkawd tej lus qhia yuav coj peb mus txais kev zoo siab nyob no thiab txoj sia nyob mus ib txhis hauv lub neej tom ntej.

Amas lub siab tau tsom ntsoov rau txoj kev xav txog Yexus Khetos no. Txoj kev xav no twb hloov nws lub neej. Lub tuam rooj sab laj yog ib lub sij hawm kom to taub tias tus Tswv xav kom peb ua li cas thiab hloov los ua neeg zoo li cas. Twb yog ib lub sij hawm rau peb xav txog qhov uas peb ua zoo li cas thiab. Thaum kuv mus ua kuv tej hauj lwm hauv lub Koom Txoos nyob thoob plaws lub ntiaj teb, kuv twb pom cov mej zeej uas rau siab ua ncaj ncees hauv lub Koom Txoos lawv lub hwj chim ntawm sab ntsuj plig tau loj zuj zus.

Tsib xyoos tas los, tus yaj saub hais kom peb tsom ntsoov rau tus Cawm Seej ntxiv thaum peb siv lub npe tseeb ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.19 Peb muab siab npuab Nws thaum peb hais Nws lub npe ntxiv.

Plaub xyoo tas los, vim tau txiav sij hawm rau peb tej kev sib ntsib txais lub cim nco txog, peb thiaj tsom ntsoov rau kev txais lub cim nco txog tus Tswv. Peb xav txog Yexus Khetos ntxiv thiab peb haj yam rau siab xav ua raws li txoj kev cog lus tias peb yuav ris Nws lub npe thiab nco ntsoov txog Nws.20

Thaum peb raug phaum mob uas kis thoob plaws lub ntiaj teb thiab thaum muaj phau Los, Nrog Kuv Mus pab peb, peb tau kawm ntxiv txog tus Cawm Seej tej lus qhia hauv peb lub tsev, thiaj li pab peb teev tiam tus Cawm Seej txhua lub lim tiam.

Thaum peb ua raws li Thawj Tswj Hwm Russell M. Nelson cov lus qhia kom “mloog Nws hais,”21 peb haj yam muaj peev xwm mloog tus Vaj Ntsuj Plig Dawb Huv tej lus ntxhi thiab pom tus Tswv txoj kev pab peb hauv peb lub neej.

Vim tau tshaj tawm thiab ua tej lub tuam tsev tshiab ntxiv, peb nkag mus hauv tus Tswv lub tuam tsev ntau ntxiv thiab txais cov koob hmoov uas Nws cog lus tias peb yuav txais. Peb haj yam xav txog qhov uas Yexus Khetos yog peb tus Cawm Seej thiab tus Txhiv Dim no.

Thawj Tswj Hwm Nelson hais tias: “Kev ua ib tug thwj tim uas muaj hwj chim … los tsis yog ib qho yooj yim los sis tsis yog ib qho yus lam ua xwb. Peb yuav tsum tsom ntsoov rau tus Cawm Seej thiab Nws txoj moo zoo. Yog ib qho nyuaj kom ntsia ntsoov Nws nrog txhua txoj kev xav.”22

Yog peb tsom ntsoov rau Yexus Khetos, txhua yam nyob ib puag ncig peb—tsis ploj mus—tiam sis peb saib tej ntawd dhau ntawm peb txoj kev hlub Nws. Tej yam uas tsis tshua tseem ceeb ploj mus, thiab peb muab tej yam uas tsis yog raws li Nws txoj kev kaj thiab tus cwj pwm tshem tawm. Thaum nej tsom ntsoov rau txoj kev xav txog Yexus Khetos no, tso siab rau Nws, thiab ua raws li Nws cov lus txib, kuv cog lus tias nej yuav txais tej lus qhia thiab lub hwj chim saum ntuj—lub hwj chim uas ua rau nej muaj zog ua raws li nej tej kev khi lus, nyob kaj siab lug thaum muaj teeb meem, thiab kev xyiv fab thaum txais cov koob hmoov.

Nco txog Yexus Khetos

Ob peb lub lim tiam tas los, Kathy thiab kuv wb mus xyuas Matt thiab Sarah Johnson lub tsev. Dai rau ntawm phab ntsa yog ib daim duab txog nkawd tsev neeg, ib daim duab txog tus Cawm Seej, thiab kev kos duab txog lub tuam tsev.

Nkawd plaub tug ntxhais, Maddy, Ruby, Claire, thiab June, zoo siab hais txog qhov uas lawv hlub lawv niam npaum li cas.

Ntev li ib xyoo tawm Sarah tau teem sij hawm txhua hnub Saturday rau nws tsev neeg mus hauv lub tuam tsev kom nws cov ntxhais yuav muaj cib fim ua kev cai raus dej sawv cev tam cov poj koob yawm txwv uas tau tso lub ntiaj teb no tseg lawm.

Nyob rau lub Kaum Ib Hlis Ntuj xyoo tas los no, Sarah tau teem sij hawm rau nws tsev neeg mus rau lub tuam tsev nyob rau lub lim tiam kawg hauv lub Kaum Ob Hlis Ntuj nyob rau hnub Thursday tsis yog hnub Saturday. Nws hais rau Matt tias, “Kuv vam hais tias koj tsis xav li cas.”

Sarah twb muaj mob kheesxaws, tiam sis cov kws kho mob xav tias nws yuav nyob ntev li ob los peb xyoos ntxiv. Nyob hauv kev sib ntsib txais lub cim nco txog, Sarah tau hais lus tim khawv, hais tias, txawm yog nws yuav raug xwm txheej li cas los, nws hlub tus Cawm Seej kawg siab kawg ntsws thiab tus Cawm Seej “twb yeej lawm.” Nyob rau lub Kaum Ob Hlis Ntuj, ua ciav Sarah pib mob heev zuj zus, thiab nws pw hauv tsev kho mob. Thaum hnub Thursday sawv ntxov, lub Kaum Ob Hlis Ntuj hnub tim 29, nws twb tas sim neej no. Matt tau koom nrog Sarah nyob tas ib hmo.

Nws lub siab ntais rhe thiab nws tsis muaj zog ntawm sab cev nqaij daim tawv thiab sab siab ntsws hlo li, nws tau los tsev, nrog nws cov ntxhais tu siab heev. Thaum Matt saib nws lub xov tooj, nws pom tias muaj ntawv qhia txog Sarah txoj kev teem sij hawm mus rau lub tuam tsev thaum hnub Thursday ntawd. Matt hais tias, “Thaum xub thawj, kuv xav tias, Yeej mus tsis taus.”

Ces Matt lub siab tsom ntsoov rau txoj kev xav no: “Tus Cawm Seej muaj txoj sia nyob. Tsis muaj ib qho chaw zoo tshaj uas peb nyob tau nrog peb tsev neeg tsuas yog nyob hauv Nws lub tuam tsev dawb huv xwb.”

Daim Duab
tsev neeg Johnson

Matt, Maddy, Ruby, Clair, thiab June tau mus rau lub tuam tsev txog lub sij hawm uas Sarah tau teem tseg rau lawv. Matt los kua muag thaum nws muab nws cov ntxhais ua kev cai raus dej. Lawv hnov lawv txoj kev sib hlub thiab sib khi nrog Sarah, thiab lawv hnov tus Cawm Seej txoj kev hlub thiab txoj kev kaj siab lug. Matt qhia tias, “Txawm kuv tu siab kawg nkaus li los, kuv yeej xav qw zoo siab heev, vim kuv paub txog kuv txiv txoj hau kev cawm seej.”

Nyob hauv lub caij Easter no, kuv ua tim khawv txog qhov uas tus Cawm Seej txoj Kev Theej Txhoj thiab Nws txoj Kev Sawv Rov Los muaj tseeb. Thaum nej lub siab tsom ntsoov rau txoj kev xav txog Yexus Khetos no kom ruaj nrees mus ib txhis li, thiab thaum nej rau siab ua nej lub neej raws li txoj kev xav txog tus Cawm Seej no, kuv cog lus tias nej yuav muaj Nws txoj kev cia siab, Nws txoj kev kaj siab lug, thiab Nws txoj kev hlub. Los ntawm Yexus Khetos lub npe, amees.

Lus Cim

  1. “Coj Peb, Auj, tus Tswv Yehauvas,” Cov Nkauj Qhuas Vajtswv, zaj 28.

  2. Saib Mauxiyas 27:8.

  3. Saib Amas 36:10.

  4. Amas 36:17.

  5. Amas 36:12.

  6. Amas 36:17.

  7. Amas 36:18. Lwm lub sij hawm uas siv cov lus “caught hold” yog nyob hauv Phau Ntawv Maumoos thaum cov neeg “los tuav tau qhov kawg ntawm tus nqaj hlau” (1 Nifais 8:24, 30).

  8. Amas 36:19.

  9. Amas 36:21.

  10. “Kev ua tsov ua rog loj tshaj plaws hauv lub neej yog kev ua rog ntsiag to nyob hauv yus sab ntsuj plig” (David O. McKay, nyob hauv Conference Report, Plaub Hlis Ntuj 1967, 84).

  11. “[Tej kev xav] qhib kev rau txhua yam peb ua. Peb tej kev xav yeej yog chaw txuas xov tooj, qhov chaw tswj kav tej yam peb ua” (Boyd K. Packer, That All May Be Edified [1982], 33).

    Thawj Tswj Hwm Dallin H. Oaks qhia tias: “Peb txawj tsuj tej kev xav ua phem thiab muab pauv kom xav ua ncaj ncees. Yuav tsum kawm thiab xyaum ua li no. Thawj Tswj Hwm Joseph F. Smith qhia tias ‘kev kawm … kom tswj peb tej kev xav yog qhov uas tseem ceeb heev’” (Pure in Heart [1988], 149).

  12. “Praise to the Lord, the Almighty,” Hymns, zaj 72.

  13. “Yexus, Thaum Kuv Tsuas Xav txog Koj,” Cov Nkauj Qhuas Vajtswv, zaj 56.

  14. Tes Hauj Lwm 17:29.

  15. Saib Lus Qhuab Qhia thiab Kev Khi Lus 58:42–43.

  16. Saib Lus Qhuab Qhia thiab Kev Khi Lus 14:7.

  17. “Yeej tsis muaj leej twg li tsuas yog Vajtswv tib leeg thiaj paub koj tej kev xav thiab tej lub hom phiaj ntawm koj lub siab” (Lus Qhuab Qhia thiab Kev Khi Lus 6:16).

  18. “Tus neeg siab zoo yeej hais tej lus zoo. Tus neeg siab phem yeej hais tej lus phem, rau qhov nws lub siab xav li cas, nws lub ncauj hais li ntawd” (Lukas 6:45).

  19. Saib Russell M. Nelson, “Lub Koom Txoos lub Npe uas Raug Lawm,” Liahona, Kaum Ib Hlis Ntuj 2018, 87–89.

  20. Peb txoj kev khi lus txhua lub lim tiam nyob hauv zaj lus thov Vajtswv foom koob hmoov rau lub cim nco txog yog kom peb yuav “nco ntsoov txog nws” (Maulaunais 4:3; Lus Qhuab Qhia thiab Kev Khi Lus 20:77). Phau Ntawv Maumoos txhawb nqa peb thaum siv lo lus ntawd ob zaug li no: “nco ntsoov, nco ntsoov” (Mauxiyas 2:41; Amas 37:13; Hilamas 5:9). Kev nco ntsoov ntawm sab ntsuj plig yog los ntawm tus Vaj Ntsuj Plig Dawb Huv lub hwj chim: “Nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm” (Yauhas 14:26).

  21. Russell M. Nelson, “Mloog Nws Hais,” Liahona, Tsib Hlis Ntuj 2020, 90.

  22. Russell M. Nelson, “Txais Tau Yexus Khetos lub Hwj Chim rau Hauv Peb lub Neej,” Liahona, Tsib Hlis Ntuj 2017, 41. Thawj Tswj Hwm Nelson hais tias: “Kev xyiv fab uas peb muaj tsis los ntawm peb lub neej qhov chaw puag ncig, tiam sis los ntawm tej yam uas peb tsom ntsoov saib rau nqi hauv peb lub neej” (“Kev Xyiv Fab thiab Kev Nyiaj Kom Dhau ntawm Sab Ntsuj Plig,” Liahona, Kaum Ib Hlis Ntuj 2016, 82).