Kev Ntseeg Yexus Khetos cov Lus Qhuab Qhia

Kuv xav hauv kuv lub siab, kuv pom tus yaj saub Nifais uas laus heev zaum ntawm nws lub rooj sau ntawv, nrog cov phiaj kub, thiab nws tus cwj hau ntse ntse nyob ntawm nws txhais tes.

Nifais sau twb yuav tas rau hauv cov phiaj. Nws sau hais tias, “Thiab nim no, kuv cov kwv tij uas kuv hlub es, kuv xaus kuv tej lus hais.”¹ Tiam sis, tsis ntev tom qab ntawd, tus Ntsuj Plig tau yaum kom Nifais rov qab sau ib zaj lus kawg ntxiv hauv cov phiaj. Nrog kev tshoov siab zoo kawg nkaus los ntawm tus Vaj Ntsuj Plig Dawg Huv lub hwj chim, Nifais rov qab tuav nws tus cwj hau ntse ntse rau ntawm nws txhais tes thiab sau, “Yog li ntawd tej yam uas kuv tau sau twb txaus kuv lawm, tsuas yog tshuav ob peb lo lus, … Kuv yuav tsum hais txog Khetos txoj lus qhuab qhia.”²

Peb zoo siab ua Vajtswv tsaug tas li rau “ob peb lo lus” ntawd³ thiab rau tus Ntsuj Plig uas yaum kom Nifais sau tej ntawd. Nifais zaj lus txog Khetos txoj lus qhuab qhia yeej yog ib yam muaj nqis heev rau cov uas los nyeem tas zog. Zaj lus ntawd muaj txoj kev ua yog toog pom tus Cawm Seej ua kev cai raus dej⁴ thiab hnov Leej Tub lub suab uas caw txhua tus coj raws li Nws⁵ thiab “ua tej yam uas [peb] tau pom [Nws] ua.”⁶ Zaj lus ntawd muaj Nifais tej lus tim khawv rau cov tib neeg uas, nrog kev ntseeg Khetos, hloov siab lees txim tiag thiab raws tus Cawm Seej mus ua kev cai raus dej yuav “txais tus Vaj Ntsuj Plig Dawb Hub; muaj tseeb tiag, tom qab ntawd txoj kev cai raus ntawm hluav taws thiab ntawm tus Vaj Ntsuj Plig Dawb Huv.”⁷ Peb hnov Leej Txiv lub suab ua tim khawv tias: “Muaj tseeb tiag, Tus kuv Hlub tej lus yeej muaj tseeb thiab ncaj tsis tu tsis tseg. Tus uas nyiaj mus kom txog thaum kawg, tus ntawd yuav dim.”⁸

Thawj Tswj Hwm Russell M. Nelson tau hais txog qhov tseem ceeb tshaj ntawm Khetos txoj lus qhuab qhia thaum nws hais lus rau cov thawj coj nyuam qhuav tau hu: “Qhov tseem ceeb tshaj plaws, peb xav kom peb cov tub txib … muaj Khetos txoj lus qhuab qhia nyob rau hauv lawv lub siab—nyob hauv lawv lub siab ntsws.”⁹

Phau Qhia Kuv txoj Moo Zoo hais tsib lub ntsiab tseem ceeb txog Khetos cov lus qhuab qhia. Phau no hais tias “[Peb] caw lwm tus neeg los cuag Khetos thaum pab lawv lees txais txoj moo zoo uas txum tim rov qab los los ntawm txoj kev ntseeg Yexus Khetos thiab Nws txoj Kev Theej Txhoj, kev hloov siab lees txim, kev cai raus dej, txais lub txiaj ntsim Vaj Ntsuj Plig Dawb Huv, thiab nyiaj kom mus txog thaum kawg.”¹⁰

Tiam sis qhov tseem ceeb ntawm Khetos txoj lus qhuab qhia tsis yog rau cov tub txib xwb! Thiab qhov ntawd muaj nqi heev tshaj cov lus uas hais txog tsib yam tseem ceeb ntawd xwb. Khetos cov lus qhuab qhia yog txoj kev cai ntawm txoj moo zoo. Yog txoj hau kev kom txais tau txoj sia nyob mus ib txhis.

Cov kwv tij thiab cov muam, yog peb yuav ua li Thawj Tswj Hwm Nelson cov lus caw ntawd kom muab Khetos txoj lus qhuab qhia nyob rau hauv peb lub siab ntsws, ces peb yuav tsum hloov siab los ntseeg tus Tswv ntxiv los ntawm kev kawm, kev thov Vajtswv, kev rau siab ntseeg ua neej, thiab kev hloov siab lees txim tsis tu tsis tseg. Peb yuav tsum caw tus Vaj Tus Vaj Ntsuj Plig Dawb Huv los muab Khetos txoj lus qhuab qhia tso rau hauv peb “lub siab”¹¹ kom tob thiab nyob mus ib txhis zoo li thaum Nifais tau sau rau hauv cov phiaj kub.

Thaum lub Kaum Hli Ntuj tas los, Thawj Tswj Hwm Nelson nug, “Kev kov yeej lub ntiaj teb txhais li cas?” Nws hais tias, “Yog kev tso siab rau Khetos cov lus qhuab qhia ntau dua li yus tso siab rau tib neeg lub tswv yim.”¹²

Lo lus tso siab los txhais tias “koj vam khom tau ib tug neeg los sis ib yam dab tsi tus cwj pwm, kev txawj, kev muaj zog, los sis qhov tseeb.”¹³ Tus neeg ntawd yog Yexus Khetos, thiab yam ntawd yog Nws cov lus qhuab qhia.

Kev txhob txwm tso siab rau Khetos txoj lus qhuab qhia hloov tau tej yam hauv peb lub neej li cas?

Yog peb tso siab rau Khetos txoj lus qhuab qhia, peb ntseeg Khetos txaus lawm los ua neej nyob raws nraim li Nws hais txhua lo lus.¹⁴ Peb yuav kawm txog Yexus Khetos txoj hauj lwm,¹⁵ Nws tej lus qhia, thiab Nws txoj Kev Theej Txhoj uas nyob mus ib txhis li tas ib sim neej, tsis hais kawm txog Nws txoj Kev Sawv Rov Los huv tib si. Peb yuav kawm Nws tej lus cog tseg thiab tej yam yuav tsum ua li cas kom thiaj li tau Nws tej kev cog lus.¹⁶ Thaum peb kawm, peb yuav haj yam muaj lub siab hlub tus Tswv.

Yog peb tso siab rau Yexus Khetos cov lus qhuab qhia, ces peb yuav xav thov peb Leej Txiv Saum Ntuj Ceeb Tsheej txhua hnub peb thiaj li yuav ua Nws tsaug vim Nws muab lub txiaj ntsim uas yog Nws tus Tub rau peb thiab tag nrho tej yam uas Nws foom koob hmoov rau peb.¹⁷ Peb yuav thov kom muaj tus Vaj Ntsuj Plig Dawb Huv nrog nraim peb nyob¹⁸ thov kom ua raws nraim li Nws lub siab nyam,¹⁹ thov kom xav txog peb tej kev khi lus thiab rov qab cog lus peb yuav ua raws li tej kev khi lus ntawd.²⁰ Peb yuav thov kom peb txhawb nqa thiab hlub peb cov yaj saub cov pom tau, thiab cov txais kev tshwm sim;²¹ kom thov Vajtswv zam txim rau peb,²² thiab thov kom muaj zog tiv dhau kev ntxias.²³ Kuv caw nej kom nco ntsoov thov Vajtswv, nrhiav kev kom paub txuas lus nrog Vajtswv txhua hnub.

Yog pebtso siab rau Khetos txoj lus qhuab qhia, peb yuav muab tej yam zoo nkauj thiab ci ci ntawm lub ntiaj teb tso tseg kom peb thiaj li tsom ntsoov rau tus Txhiv Dim ntawm lub ntiaj teb.²⁴ Peb yuav txiav los yog tsis txhob siv sij hawm rau social media; tua game; tej yam nkim tsis tsim nyog, los sis tej yam saib uas tsis tsim txiaj; tej kev ntxias ntawm lub ntiaj teb tej nqi zog thiab tsis muaj nqi; thiab lwm yam uas tsis ntxim ua vim cia tej yam cuav thiab tej lub tswv yim cuav uas los ntawm tib neeg. Tsuas yog los ntawm Yexus Khetos xwb peb thiaj li nrhiav tau qhov tseeb thiab kev nyob txaus siab.

Kev hloov siab lees txim tiag tiag²⁵ yuav ua rau peb muaj kev xyiv fab²⁶ tsis tu ncua hauv peb lub neej—kom txais kev zam txim rau peb tej kev txhaum thiab hloov los ua ib tug yam ntxwv ntawm tus Khetos.²⁷ Kev hloov siab lees txim nrog kev ntseeg Khetos ua rau peb txais tau Khetos txoj Kev Theej Txhoj. Thawj Tswj Hwm Dallin H. Oaks tau qhia tias thaum tus Cawm Seej zam txim, Nws “tsis yog ntxuav [peb] los ntawm kev txhaum. Nws kuj ua rau [peb] muaj zog thiab.”²⁸ Peb txhua tus yuav tsum ua zoo dua kom ua raws li Vajtswv cov lus txib thiab ua raws li lub hom phiaj ntawm peb lub neej.

Los ntawm Yexus thiab Nws cov lus qhuab qhia, peb txais dag zog. Nws hais tias, “Kuv hais tseeb tseeb rau nej tias, nov yog kuv txoj lus qhuab qhia, thiab tus uas cog rau saum qhov no yog cog rau saum kuv lub pob zeb, thiab tej rooj vag ntawm ntuj txiag teb tsaus yuav kov tsis yeej lawv.”²⁹

Peb pom tias muaj raws li cov lus cog tseg no nyob hauv cov neeg rau siab ntseeg lub neej. Ze li ib xyoo tas los lawm, kuv muaj cib fim ntsib Travis thiab Kacie. Nkawd tau sib yuav hauv xyoo 2007. Thaum lub sij hawm ntawd, Travis tsis yog ib tug mej zeej ntawm lub Koom Txoos. Txawm Kacie tau, los loj hlob hauv tej tsev ntawm cov Neeg Ntseeg hauv Hnub Nyoog Kawg, nws tau los tsis ntseeg thaum nws yog ib tus ntxhais hluas thiab tau mus deb ntawm nws lub hauv paus.

Nyob rau xyoo 2018, Travis ntsib cov tub txib thiab nws tau ua kev cai raus dej thaum xyoo 2019. Ces Travis tau los ua ib tug tub txib rau Kacie, thiab Kacie tau hloov nws lub neej los ntseeg. Nkawd ob leeg tau mus sib khi ua ke hauv lub tuam tsev lub Cuaj Hlis Ntuj xyoo 2020. Ob xyoo tom qab nws ua kev cai raus dej, Travis tau raug hu mus hauv pawg npisov.

Travis muaj ib hom kab mob txawm heev uas muaj ntau cov qog nyob hauv nws lub cev. Nws tau mus phais mob ntau zog kom tshem tawm cov qog uas rov qab los, tiam sis kho tsis tau qhov kab mob no. Ob peb xyoo tas los, Travis kawm hais tias nws muaj li tsawg tshaj 10 xyoo ua neej.

Kacie muaj retinitis pigmentosa, ib qhov kab mob keeb kwm roj ntshav uas ua rau ob lub qhov muag pib tsis pom kev zuj zus mus txog thaum dig muag.

Kacie qhia kuv txog nws lub neej tom hauv ntej. Nws npaj ntsoov tos tsis ntev tom hauv ntej, thaum nws yuav ua ib tug poj ntsuam, dig muag, tsis muaj nyiaj txiag pab, thiab nws ib leeg saib xyuas nws plaub tug me nyuam xwb. Kuv nug Kacie tias ua cas nws muaj peev xwm xav tau txog tom hauv ntej uas tsis muaj kev cia siab. Nws tau luag ntxhi thiab hais, “Kuv yeej tsis tau zoo siab npaum li no los sis muaj kev cia siab ntxiv hauv kuv lub neej. Wb tso siab rau cov lus cog tseg uas wb tau txais hauv lub tuam tsev.”

Tam sim no Travis yog ib tug npisov. Ob hlis tas los no nws tau rov qab mus phais mob. Tiam sis nws zoo siab thiab nyob kaj siab lug. Kacie ob lub qhov muag tsis tshua pom kev ntxiv lawm. Tam sim no nws muaj ib tug aub uas coj nws kev thiab nws tsav tsis tau ib lub tsheb. Tiam sis nws txaus siab, tus nws cov me nyuam thiab tseem ua ib tug pab cuam hauv Koom Haum Ntxhais Hluas pawg thawj tswj hwm.

Travis thiab Kacie twb ua nkawd lub tsev saum lub pob zeb. Travis thiab Kacie tso siab rau Khetos txoj lus qhuab qhia thiab Vajtswv txoj lus cog tseg tias Vajtswv yuav “fij [nkawd] tej kev txom nyem los ua tej yam uas pab tau [nkawd].”³⁰ Nyob hauv Vajtswv txoj hau kev, kev muab siab rau ntseeg thaum yus raug txom nyem yeej txuas rau kev ua neeg zoo tag nrho dhau los ntawm Yexus Khetos.³¹ Ib yam li tus neeg ntse nyob hauv zaj lus piv txwv ua nws tsev saum lub pob zeb,³² thaum nag los, thiab dej nyab, thiab cua tshuab, thiab nplawm lub tsev uas Travis thiab Kacie tau ua, thiab lub tsev tsis vau, vim tau muab nkawd lub tsev cog rau saum lub pob zeb.³³

Yexus tsis hais rau peb tias tej zaum yuav muaj nag thiab dej nyab thiab cua tshuab hauv peb lub neej; Nws hais txog thaum yeej yuav muaj tej cua dab cua dub tshwm sim. Lub ntsiab cai ntawm zaj lus piv txwv tsis yog tias seb tej cua dab cua dub yuav tshwm sim tiam sis seb peb tau ua li cas raws li Nws caw peb kom hnov thiab ua raws li Nws qhia.³⁴ Tsis muaj lwm txoj kev.

Thaum peb ua peb tej tsev rau ntawm lub hauv paus uas yog kev khi lus nrog Khetos, peb los tso siab rau Khetos txoj lus qhuab qhia lawm thiab peb txais tau Nws cov lus cog tseg tias yuav muaj txoj sia nyob mus ib txhis. Cov tib neeg uas tso siab rau Khetos txoj lus qhuab qhia nyiaj mus tom ntej tsis tu tsis tseg kom mus txog thaum kawg. Tsis muaj lwm txoj kev rau peb txais kev cawm seej hauv lub nceeg vaj saum ntuj ceeb tsheej.³⁵

Kuv ua tim khawv txog tus Tswv Yexus Khetos uas tau muaj txoj sia nyob sawv rov los. Kuv ua tim khawv tias Vajtswv uas yog peb Leej Txiv hlub neeg ntiaj teb kawg li Nws thiaj li txib Nws tus Tub txhiv peb dim kev txhaum³⁶ thiab kho peb zoo ntawm kev tu siab.³⁷ Kuv ua tim khawv tias Vajtswv tau hus nws tus yaj saub, uas yog Thawj Tswj Hwm Russell M. Nelson, tus uas los ntawm nws, Vajtswv hais lus thiab coj peb kev.

Kuv caw nej tso siab rau Khetos cov lus qhuab qhia kawg siab kawg ntsws thiab ua nej lub neej raws li tus Txhiv Dim uas yog peb lub pob zeb. Nws yeej yuav tsis tso nej tseg. Los ntawm Yexus Khetos lub npe, amees.