Tsis Txhob Muab Cib Fim Ua Tim Khawv txog Yexus Khetos Tso Tseg

Tsib xyoos dhau los, peb twb tsa tes txhawb nqa Thawj Tswj Hwm Russell M. Nelson ua tus Thawj Tswj Hwm ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg―nws yog uas uas sawv tus Tswv cev hais lus thaum lub sij hawm no ntawm kev loj hlob thiab kev tshwm sim. Los ntawm nws, peb tau txais kev caw thiab nws tau cog lus rau peb tias tej koob hmoov zoo kawg nkaus yuav los thaum peb muab peb lub neej rau ntawm peb tus Cawm Seej, Yexus Khetos.

Nyob rau xyoo 2011, thaum kuv thiab kuv tus txiv pab coj cov tub txib hauv lub nroog Curitiba nyob teb chaws Brazil, kuv lub xov tooj nrov thaum kuv koom kev sib ntsib. Kuv maj mus tig lub xov tooj tawm, thiab pom tias yog kuv txiv hu. Kuv tawm ntawm kev sib ntsib thiab teb: “Nyob zoo, Txiv!”

Nws lub suab tu siab heev: “Nyob zoo, Bonnie. Kuv yuam tsum qhia koj ib yam. Kuv muaj mob ALS.”

Kuv tsis paub ua li cas, “Tos rawv! ALS yog dab tsi?”

Kuv txiv twb pib qhia, “Kuv lub hlwb tseem yuav khiav zoo tiam sis kuv lub cev yuav qaug zog zuj zus.”

Kuv pib xav txog qhov tshwm sim ntawm cov xov xwm tu siab ntawd thiab kuv lub neej hloov tag nrho. Tiam sis hnub ntawd, yog nws kab lub kawg uas ua twb tshoov kuv lub siab kawg nkaus. Kuv txiv hais, “Bonnie, tsis txhob muab lub cib fim ua tim khawv txog Yexus Khetos tso tseg.”

Kuv tau xav txog thiab thov Vajtswv txog Txiv cov lus. Kuv pheej nug kuv tus kheej seb kuv puas paub tseeb tias txoj kev tsis txhob muab cib fim ua tim khawv txog Yexus Khetos tso tseg yog dab tsi.

Ib yam li nej, tej lub sij hawm kuv tau sawv ua tim khawv txog Yexus Khetos thaum thawj Hnub Caiv ntawm ib lub hlis. Ntau zaus kuv twb ua tim khawv txog txoj moo zoo thaum kuv qhia ib zaj lus. Kuv tau ua siab loj qhia qhov tseeb thiab qhia tias Yexus Khetos los saum ntuj los thaum kuv ua ib tug ntxhais txib.

Tiam sis qhov nws hais mas zoo li nws hais rau kuv ib leeg xwb! Zoo li nws hais tias, “Bonnie, tsis txhob cia lub ntiaj teb kov yeej koj! Ua raws nraim li koj tej kev khi lus nrog tus Cawm Seej. Rau siab kom txais tau Nws cov koob hmoov txhua hnub, thiab nws yuav txawj ua tim khawv dhau los ntawm tus Vaj Ntsuj Plig Dawb Huv txog Nws lub hwj chim thiab lub hwj huam hauv nej lub neej!”

Peb nyob hauv ib lub ntiaj teb uas poob lawm, muaj tej yam uas meem txom peb ntxias peb qhov muag thiab lub siab kom nqis mus tsis txhob ntsia saum ntuj ceeb tsheej. Ib yam li cov Neeg Nifais nyob hauv 3 Nifais 11, peb xav tau Yexus Khetos. Nej puas txawj xav tias yuav zoo li cas, nrog cov neeg uas raug tej kev kub ntxhov thiab kev puas tsuaj ntau heev? Yuav zoo li cas yog nej hnov tus Tswv txoj kev caw:

“Cia li sawv thiab los cuag kuv, xwv kom nej thiaj tau cev nej txhais tes los xuas kuv sab tav, thiab xwv kom nej thiaj tau xuas tej qhov ntsia hlau hauv kuv ob txhais tes thiab hauv kuv ob txhais taw, xwv kom nej thiaj paub tias kuv yog … tus Vajtswv ntawm tag nrho lub ntiaj teb, thiab tau raug tua rau neeg ntiaj teb tej kev txhaum.

“Thiab … cov neeg coob coob txav mus … ib leeg txav mus zuj zus … thiab pom ntawm lawv lub qhov muag thiab xuas ntawm lawv txhais tes, thiab paub … thiab … lawv txhua tus tau txav mus thiab pom ntawm lawv tus kheej.”¹

Cov Neeg Nifais no twb mus cev lawv txhais tes los xuas Nws sab tav thiab xaus tej qhov ntsia hlau hauv Nws txhais tes thiab txhais ko taw, lawv thiaj li yuav paub lawv tus kheej tias tus no yog tus Khetos. Ib yam li ntawd, neeg rau siab ntseeg coob uas peb tau kawm txog nyob hauv Phau Tshiab xyoo no tau tos ntsoov rau Yexus Khetos txoj kev txoj los. Ces lawv tawm hauv lawv tej thaj av thiab tej qhov chaw ua hauj lwm mus, thiab muab lawv tej rooj noj mov tso tseg thiab nrog Nws mus, mus ntsib Nws, txav mus ze Nws, thiab nrog Nws zaum. Peb puas xav xav pom ntawm peb tus kheej ib yam li cov neeg coob nyob hauv cov vaj lug kub? Cov koob hmoov uas peb nrhiav tsis tseem ceeb npaum li lawv cov los?

Thaum Yexus Khetos tau mus xyuas cov Neeg Nifais ntawm lub tuam tsev, Nws tsis caw lawv nyob deb thiab ntsia Nws xwb, tiam sis Nws hais kom lawv los kov Nws, kom paub ntawm lawv tus kheej txog tus Cawm Seej ntawm tag nrho cov noob neej. Peb yuav ua li cas kom nyob ze txaus thiaj li yuav paub tseeb tias muaj Yexus Khetos tiag? Tej zaum nov yog ib feem ntawm qhov uas kuv txiv sim qhia kuv. Txawm peb tsis nyob hauv tib qho chaw ib yam li cov uas twb nrog Yexus Khetos taug kev thaum Nws ua hauj lwm qhuab qhia hauv lub ntiaj teb no, dhau los ntawm tus Vaj Ntsuj Plig Dawb Huv peb yuav muaj Nws lub hwj chim txhua hnub! Ntau npaum li peb xav tau!

Cov ntxhais hluas nyob thoob plaws lub ntiaj teb tau qhia kuv ntau txog kev nrhiav Yexus Khetos thiab kev paub tseeb txog Nws txhua hnub. Cia kuv qhia nej txog ob tug ntxhais lub tswv yim:

Livvy tau saib lub tuam rooj sab laj tas nws lub neej. Muaj tseeb tiag, nyob hauv nws lub tsev nws tsev neeg ib txwm saib tag nrho tsib tuas ua ke. Dhau los, Livvy siv sij hawm thaum saib lub tuam rooj sab laj kos duab los sis, tej lub sij hawm, tsaug zog. Tiam sis thaum lub Kaum Hli Ntuj tas los lub tuam rooj sab laj no tsis zoo ib yam. Twb pab nws tus kheej.

Zaum no, Livvy txiav txim siab ua ib tug uas mloog zoo. Nws twb muab nws tus xov tooj tej ntawv ceeb toom tua thiab sau ntawv txog tej uas tus Ntsuj Plig tshoov nws lub siab ua. Nws xav tsis thoob thaum nws hnov tej yam uas Vajtswv xav kom nws hnov thiab ua. Txoj kev txiav txim siab no twb pab nws tom qab kiag thaum ntawd.

Ob peb hnub tom qab ntawd xwb nws cov phooj ywg caw nws mus saib movie uas tsis tsim txiaj. Nws hais tias, “Ua rau kuv hnov tej lus thiab tus ntsuj plig uas muaj thaum saib lub rooj sab laj hauv kuv lub siab, thiab kuv twb tsis yeem nrog lawv mus.” Nws kuj ua siab loj ua tim khawv txog tus Cawm Seej nyob hauv nws pawg ntseeg.

Tom qab ntawd nws hais tias, “Qhov xav tsis thoob, thaum kuv hais lus ua tim khawv tias Yexus yog tus Khetos, ces kuv rov qab hnov tus Vaj Ntsuj Plig Dawb Huv pom zoo rau kuv tej lus.”

Livvy tsis tau lam mloog lub rooj sab laj xwb; nws twb mloog zoo, kawg siab kawg ntsws, thiaj li nrhiav tau tus Cawm Seej nyob ntawd.

Thiab muaj Maddy. Thaum nws tsev neeg tsum tsis mus rau lub tsev koom txoos ntxiv lawm, Maddy tsis paub tseeb nws yuav tsum ua li cas. Nws to taub tias yog ib yam tseem ceeb uas tsis muaj hauv nws lub neej. Yog li ntawd, thaum nws muaj 13 xyoos xwb, Maddy mus rau lub tsev koom txoos nws ib leeg xwb. Txawm yog kev nyob yus ib leeg yog ib yam nyuaj los, nws paub tias nws nrhiav tau tus Cawm Seej nyob hauv lub koom txoos thiab nws xav nyob ntawm qhov chaw uas Yexus nyob. Nws hais tias, “Nyob hauv lub tsev koom txoos zoo li kuv tus ntsuj plig twb txog tsev lawm.”

Maddy twb nco ntsoov tias nws tsev neeg tau ua kev sib khi ua ke mus ib txhis li. Nws pib coj nws cov nus mus rau lub tsev koom txoos thiab nrog lawv kawm vaj lug kub tom tsev. Nws niam pib koom ua nrog lawv thiab. Maddy qhia nws niam txog nws txoj kev xav mus ua ntxhais txib thiab thov nws niam seb nws niam puas npaj siab mus rau lub tuam tsev nrog nws.

Hnub no Maddy nyob hauv MTC. Nws ua hauj lwm rau Vajtswv. Nws ua tim khawv txog Yexus Khetos. Nws tus yam ntxwv twb pab nws niam nws txiv ob leeg rov qab mus rau lub tuam tsev thiab rov qab mus cuag Yexus Khetos.

Ib yam li Livvy thiab Maddy, thaum peb xaiv kom nrhiav Yexus Khetos, tus Ntsuj Plig yuav ua tim khawv txog Nws nyob hauv ntau xwm txheej. Tus Ntsuj Plig yuav ua tim khawv rau peb thaum peb yoo mov, thov Vajtswv, cia siab tos ntsoov thiab mus tom ntej. Peb yuav txav mus ze Yexus Khetos thaum peb teev tiam ntau hauv lub tuam tsev, hloov siab lees txim txhua hnub, kawm vaj lug kub, mus rau lub tsev koom txoos thiab seminary, xav txog yawg suab txoj koob hmoov, ua neeg tsim nyog txais cov kab ke, thiab ua raws li peb tej kev khi lus. Tag nrho tej no yuav pab tus Ntsuj Plig tshoov peb lub siab, thiab ua rau peb nyob kaj siab lug thiab pov hwm peb. Tiam sis peb puas saib tej no yog tej lub cib fim dawb ceev kom ua tim khawv txog Yexus Khetos?

Kuv twb mus rau lub tuam tsev ntau zaus, tiam sis thaum kuv teev tiam hauv tus Tswv lub tsev, ces ua rau kuv hloov siab. Tej lub sij hawm thaum kuv yoo mov, zoo li kuv tshaib plab xwb, tiam sis lwm lub sij hawm, kuv ua tib zoo mloog tus Ntsuj Plig lus. Tej lub sij hawm kuv tau thov Vajtswv thaum lam hais tej lus zoo ib yam li qub, tiam sis lwm lub sij hawm kuv tau xav txais tus Tswv tej lus qhia thaum kuv thov Nws.

Yeej muaj hwj chim thaum yus ua tej yam dawb huv no vim yus xav ua tim khawv txog Yexus, tsis yog qhia hais tias yus twb ua lawm xwb. Yuav ua tus txheej txheem no zuj zus, tiam sis yog yus siv zog ua thiab kawm txog Yexus Khetos txhua hnub ces yuav muaj hwj chim ntxiv. Thaum peb kawm thiab ua raws li Nws tej lus qhia tsis tu tsis tseg, ces peb yuav ua tim khawv txog Nws; peb nrog Nws thiab peb Leej Txiv Saum Ntuj Ceeb Tsheej sib raug zoo. Peb pib hloov los ua neeg zoo li Nkawd.

Tus yeeb ncuab tsim tej lub suab nrov nrov heev thiaj ua nyuaj rau peb hnov tus Tswv lub suab. Peb lub ntiaj teb, peb tej teeb meem, peb tej xwm txheej los yeej yuav tsis nyob ntsiag to xwb, tiam sis peb yuav tsum tshawb nrhiav tej yam txog Yexus Khetos kom “mloog Nws hais” meej.² Peb yuav tsum muaj peev xwm ua cov thwj tim thiab ua tim khawv kom peb yuav tsom ntsoov txog qhov uas peb tso siab rau tus Cawm Seej txhua hnub.

Kuv txiv twb tas sim neej no 11 xyoos tas los lawm, tiam sis kuv tseem nco ntsoov nws tej lus. “Bonnie, tsis txhob muab lub cib fim ua tim khawv txog Yexus Khetos tso tseg.” Kuv caw nej nrog kuv koom ua ke ua raws li nws caw kuv. Nrhiav Yexus Khetos nyob hauv txhua qhov chaw—kuv cog lus tias Nws yuav nyob ntawd!³ Kev xyiv fab nyob ntawm peb txoj kev txaus siab txav los ze Yexus Khetos thiab pom ntawm peb tus kheej.

Peb paub tias nyob hauv lub caij nyoog kawg no, “txhua lub hauv caug yuav txhos, thiab txhua tus nplaig yuav lees”⁴ hais tias Yexus yog tus Khetos. Kuv thov kom txoj kev ua tim khawv li no yuav yog ib qho uas yooj yim rau peb ua tam sim no—peb yuav siv txhua lub cib fim kom ua tim khawv nrog kev zoo siab hais tias: Yexus Khetos muaj txoj sia nyob!

Auj, kuv hlub Nws heev. Peb ua Nws tsaug rau Nws txoj Kev Theej Txhoj, uas “ua rau peb sawv daws txais tau txoj sia nyob mus ib txhis thiab kev tsis txawj tuag.”⁵ Kuv ua tim khawv txog tus Cawm Seej txoj kev zoo thiab lub yeeb koob loj kawg nkaus los ntawm Nws lub npe dawb ceev, uas yog Yexus Khetos, amees.