Tus Tswv Yexus Khetos Qhia Peb Kom Txhawb Pab Lwm Tus

Tus Tswv Yexus Khetos:

“Kuv yog tus tswv yug yaj uas zoo. Tus tswv yug yaj uas zoo txaus siab tuag theej paj yaj. …

“Ib yam li Leej Txiv paub kuv thiab kuv paub Leej Txiv. Kuv txaus siab tuag theej kuv pab yaj.”¹

Nyob hauv cov vaj lug kub txhais lus Kilis, lo lus zoo kuj txhais tias “zoo kawg nkaus, muaj koob meej.” Yog li ntawd, hnub no kuv xav hais txog tus Tswv Yug Yaj Zoo, tus Tswv Yug Yaj uas Muaj Koob Meej, tus Tswv Yug Yaj Zoo Kawg Nkaus, tus uas yog Yexus Khetos.

Nyob hauv Phau Tshiab, Nws hu ua “tus tswv yug yaj zoo,”² tus “Tswv Yug Yaj,”³ thiab tus “Tswv uas yug nej thiab saib xyuas nej lub siab.”⁴

Nyob hauv Phau Qub, Yaxayas sau hais tias, “Nws yuav tu nws pab yaj ib yam li tus tswv yug yaj.”⁵

Nyob hauv Phau Ntawv Maumoos, Nws hu ua “tus tswv yug yaj zoo”⁶ thiab “tus tswv yug yaj tseeb thiab zoo.”⁷

Nyob hauv phau Lus Qhuab Qhia thiab Kev Khi Lus, Nws hais tias, “Yog li ntawd, kuv nyob nrog nraim nej, thiab kuv yog tus tswv yug yaj zoo”⁸

Hauv peb lub caij nyoog, Thawj Tswj Hwm Russell M. Nelson tau hais tias: “Tus Tswv Yug Yaj Zoo hlub thiab saib xyuas tag nrho cov uas nyob hauv Nws pab yaj, thiab peb yog cov uas pab Nws yug yaj.” Peb muaj cib fim ris Nws txoj kev hlub mus kom hlub peb cov phooj ywg thiab cov neeg zej zog—saib xyuas, tu, thiab pub lawv noj—ib yam li tus Cawm Seej xav kom peb ua.”⁹

Tsis ntev tas los, Thawj Tswj Hwm Nelson kuj tau hais tias: “Ib qho uas yeej yuav muaj nyob hauv tus Tswv lub Koom Txoos uas tseeb thiab muaj txoj sia yog qhov uas yuav muaj tus txheej txheem kom coj txoj kev txhawb pab Vajtswv cov me nyuam thiab lawv tsev neeg. Vim nov yog Nws lub Koom Txoos, peb cov uas yog Nws cov tub qhe yuav txhawb pab ib tug mus ib tug, ib yam li Nws tau ua. Peb yuav txhawb pab lawv los ntawm Nws lub npe, nrog Nws lub hwj chim thiab txoj cai, thiab nrog Nws txoj kev ua siab zoo.”¹⁰

Thaum cov Falixais thiab cov xib hwb qhia kev cai yws yws txog tus Tswv, “hais tias, Tus no nrog cov neeg txhaum ua ke thiab nrog lawv noj mov,”¹¹ Nws teb lawv hais peb zaj dab neeg uas peb hu ua zaj lus piv txwv txog cov yaj poob zoo, zaj lus piv txwv txog lub nyiaj npib uas ua poob, thiab zaj lus piv txwv txog tus tub ua loj leeb.

Kuv xav txog qhov uas thaum Lukas, tus uas sau phau Txoj Moo Zoo, hais peb zag dab neeg no nws siv zaj lus piv txwv hais txog ib zag xwb, tsis hais txog peb zag.¹² Zoo li tus Tswv qhia txog ib lub ntsiab uas muaj peb zaj dab neeg—tej zaj uas hais tej naj npawb sib txawv: 100 tus yaj, 10 tus nyiaj npib, thiab 2 tug tub.

Tiam sis tus naj npawb tseem ceeb hauv txhua zaj dab neeg no yeej yog tus naj npawb ib. Thiab ib qho uas peb kawm tau los ntawm tus naj npawb ntawd yog qhov uas txawm nej yog ib tug uas pab tus tswv yug yaj rau 100 tus txwj laug nyob hauv nej pawg txwj laug los sis ib tug uas pab 10 tus ntxhais hluas los sis ib tug xib hwb rau 2 tug me nyuam los, nej yeej yuav tsum txhawb lawv, saib xyuas lawv, thiab hlub lawv ib tug dhau ib tug. Nej yeej tsis hais tias, “Tus yaj no ruam ua luaj” los sis “Tsis tas muaj lub nyiaj npib ntawd” los sis “Tus tub no ntxeev siab lawm.” Yog tias peb muaj “Khetos txoj kev hlub uas dawb paug,”¹³ ces peb yuav zoo li tus txiv neej hauv zaj lus piv txwv txog tus yaj uas poob zoo, es peb yuav “tso cuaj caum cuaj tug rau tom hav zaub, thiab mus nrhiav tus yaj uas ploj lawm kom tau [… kom tau … kom tau].”¹⁴ Los sis zoo li tus poj niam hauv zaj dab neeg txog lub nyiaj npib uas poob lawm, peb yuav “taws teeb, cheb tsev thiab tshawb nrhiav txhua qhov kom tau [… kom tau … kom tau] lub nyiaj ntawd.”¹⁵ Yog tias peb muaj “Khetos txoj kev hlub uas dawb paug,” peb yuav ua raws leej txiv tus yam ntxwv nyob hauv zaj dab neeg txog tus tub ua txhaum, thaum tus tub “los tsis tau txog uas tseem nyob hov deb, nws txiv pom nws thiab hlub nws kawg; nws txiv dhia loo mus puag nkaus tus tub nwj.”¹⁶

Peb puas to taub tus txiv neej lub siab uas tsuas muaj ib tug yaj xwb uas poob zoo? Los sis tus poj niam lub siab uas nrhiav tsis tau ib lub nyiaj xwb? Los sis txoj kev hlub nyob hauv tus tub ua txhaum txiv lub siab?

Kuv tus poj niam, Maria Isabel, thiab kuv tau ua hauj lwm hauv Central America, wb nyob hauv Guatemala City. Nyob ntawd kuv tau muaj cib fim ntsib Julia, ib tug mej zeej uas rau siab ntseeg hauv lub Koom Txoos. Kuv tau txais kev tshoov siab nug nws txog nws tsev neeg. Nws niam tau tas sim neej vim nws mob kheesxaws nyob rau xyoo 2011. Nws txiv yog ib tug thawj coj nyob hauv nws ceg txheem ntseeg, nws yog ib tug npisov thiab ib tug pab cuam rau nws ceg txheem ntseeg tus thawj tswj hwm rau ob peb xyoos. Nws yog ib tug uas pab tus Tswv yug Nws cov yaj tiag. Julia tau qhia kuv txog nws txoj kev mus xyuas txhawb pab lwm tus tas zog. Nws yeej zoo siab tu tus Tswv cov yaj uas muaj nqis heev. Nws twb yuav poj niam tshiab thiab muab siab rau ntseeg hauv lub Koom Txoos.

Ob peb xyoos tom qab ntawd, nws nrauj nws tus poj niam thiab yuav tsum mus rau lub koom txoos nws ib leeg xwb. Nws xav tias ib txhia neeg hais lus phem txog nws vim nws twb nrauj poj niam lawm. Nws tsis tau mus rau lub tsev koom txoos ntxiv vim tab tom muaj kev tu siab ntau heev.

Julia tau hais zoo txog tus neeg pab tus Tswv yug yaj zoo, tus uas khwv ua hauj lwm, hlub tib neeg, thiab muaj kev khuv leej. Kuv nco qab tias kuv ntxhov siab thaum nws piav txog tus txiv neej zoo no. Kuv yeej xav ua ib yam dab tsi rau tus txiv neej no, ib tug txiv neej uas tau ua ntau yam rau neeg coob.

Nws tau muab nws txiv tus naj npawb xov tooj rau kuv thiab kuv pib hu tuaj rau nws, cia siab tias kuv yuav muaj sij hawm ntsib nws. Kuv twb hu ntau zaus rau ob peb lim tiam es nws tsis teb, tiam sis muaj ib hnub nws ho teb xov tooj.

Kuv qhia nws tias kuv tau ntsib nws tus ntxhais, Julia, thiab kuv pheej xav txog qhov uas nws tau ua hauj lwm txhawb pab thiab hlub tus Tswv cov yaj uas muaj nqis tau ntev. Nws tsis tau xav nws yuav hnov ib yam zoo li ntawd. Kuv qhia nws tias kuv xav ntsib nws tim ntsej tim muag. Nws nug seb vim li cas kuv xav sib ntsib li ntawd. Kuv teb tias, “Kuv yeej xav ntsib leej txiv ntawm ib tug ntxhais uas zoo uas luaj.” Nws tsis hais dab tsi rau ib me pliag—yog ib me pliag xwb tiam sis zoo li ntev mus ib txhis li rau kuv. Nws tsuas teb tias, “Thaum twg thiab qhov twg?”

Hnub uas kuv ntsib nws, kuv caw nws qhia kuv tej lub sij hawm thaum nws mus xyuas, txhawb pab, thiab ua hauj lwm pab tus Tswv cov yaj. Thaum nws hais tej zaj dab neeg uas tshoov kuv lub siab, kuv hnov tias nws lub suab tau hloov thiab nws hnov tus ntsuj plig uas muaj thaum nws yog ib tug uas pab tus Tswv yug yaj. Nws tab tom los kua muag. Kuv puab tias yog lub sij hawm yog, tiam sis kuv tsis paub hais li cas. Kuv thov Vajtswv hauv kuv lub siab, “Txiv, thov pab kuv.”

Ua ciav, kuv hnov kuv tus kheej hais tias, “Tij Laug Florian, kuv uas yog tus Tswv tus tub qhe, thov txim vim peb tsis tau pab koj. Thov zam txim pub rau peb. Cia peb muaj sij hawm ntxiv qhia koj tias peb hlub koj tiag. Peb xav tau koj. Koj yog ib tug tseem ceeb rau peb.”

Hnub Caiv tom qab ntawd nws rov qab los. Nws nrog nws tus npisov tham ntev ces nws muab siab rau ntseeg. Ob peb lub hlis tom qab ntawd nws tas sim neej—tiam sis nws twb rov qab los lawm. Nws twb rov qab los lawm. Kuv ua tim khawv tias nrog tus Cawm Seej txoj kev pab, peb yuav hlub Nws cov yaj uas muaj nqis heev thiab txhawb pab li Nws ua. Yog li ntawd, nyob hauv Guatemala City ntawd tus Tswv Yexus Khetos tau coj ib tug yaj uas muaj nqis heev rov qab los nyob hauv Nws pab yaj. Thiab Nws tau qhia kuv ib zaj txog kev txhawb pab uas kuv yeej yuav nco ntsoov. Los ntawm tus Tswv Yug Yaj Zoo, tus Tswv Yug Yaj uas Muaj Yeeb Koob, tus uas yog tus Tswv Yexus Khetos, amees.