Tsom Ntsoov rau Yexus Khetos

Peb tej kev khi lus pab peb tsom ntsoov, xav txog, thiab ua tej yam raws li Yexus Khetos ua. Thaum peb “muab siab npuab tej kev khi lus uas [peb] tau khi lawm,” peb yuav txawj pom “ tej yam ntawm lub ntiaj teb” uas peb yuav tsum muab “tso tseg” thiab “tej yam ntawm ib qhov chaw uas zoo dua” uas peb yuav rau siab nrhiav.⁸

Amoos cov neeg tau ua li ntawd nyob hauv Phau Ntawv Maumoos. Thaum lawv kawm txog Yexus Khetos thiab tsom ntsoov rau Nws, lawv to taub tias lawv yuav tsum muab lawv tej cuab yeej ua rog faus cia thiab tau hloov los ua neeg siab ncaj tag nrho thiab lawv “txawv lwm cov neeg vim yog lawv txoj kev mob siab hlub tshua rau Vajtswv.”⁹

Kev ua raws li peb tej kev khi lus pab peb nrhiav tej yam uas cia tus Ntsuj Plig nyob thiab xyeej tej yam uas ua rau tus Ntsuj Plig tawm mus—“vim peb paub tias yog peb yuav tsim nyog muaj tus Vaj Ntsuj Plig Dawb Huv nrog peb nyob, peb yeej yuav tsim nyog nrog Leej Txiv Saum Ntuj Ceeb Tsheej thiab Nws Leej Tub, Yexus Khetos, nyob.”¹⁰ Qhov no txhais hais tias tej zaum peb yuav tsum hais tej lus zoo dua. Tej zaum peb yuav tsum muab tej yam peb pheej ua uas tsis zoo rau peb sab ntsuj plig hloov kom ua tej yam tshiab uas ua rau peb sib raug zoo nrog tus Tswv, xws li kev thov Vajtswv thiab kev kawm vaj lug kub txhua hnub, peb tus kheej thiab nrog peb tsev neeg.

Thawj Tswj Hwm Russell M. Nelson hais tias “Txhua tus uas khi lus thaum lawv ua kev cai raus dej thiab nyob hauv lub tuam tsev—thiab ua raws li tej kev khi lus ntawd—txais tau Yexus Khetos lub hwj chim ntxiv. …

“Lub nqi zog rau kev ua raws li Vajtswv tej kev khi lus yog lub hwj chim saum ntuj ceeb tsheej—lub hwj chim uas txhawb peb lub zog kom nyiaj dhau peb tej kev sim siab, kev ntxias, thiab kev mob lub siab.”¹¹

Qhov uas peb rov qab khi lus thaum peb txais lub cim nco txog txhua hnub Sunday yog ib lub cib fim zoo kom xav seb peb yog neeg zoo li cas¹² thiab rov qab tsom ntsoov rau Yexus Khetos. Thaum peb txais lub cim nco txog, peb cog lus tias peb yuav “nco ntsoov txog nws” tas mus li.¹³ Lo lus tas mus li los yeej tseem ceeb heev. Lo lus no qhia tias peb muaj tus Cawm Seej lub hwj huam nyob hauv txhua yam ntawm peb lub neej. Tsis yog peb nco txog Nws nyob hauv lub koom txoos xwb los sis thaum peb thov Vajtswv los sis thaum peb raug teeb meem thiab xav tau kev pab.

Tej lub sij hawm muaj tej yam uas ua rau peb tig mus rau lwm yam. Peb tsis nco qab. Peb tsis tsom ntsoov. Tiam sis qhov uas peb rov qab khi lus txhais tias peb yeej xav nco ntsoov txog tus Cawm Seej, peb yuav sim nco txog Nws kom tas lub lim tiam ntawd, thiab peb yuav rov qab cog lus thiab tsom ntsoov rau Nws dua thaum peb txais lub cim nco txog lub lim tiam tom ntej.

Muaj tseeb tiag, kev tsom ntsoov Yexus Khetos tsis yog ib yam yus ua thaum Hub Caiv hauv lub tsev koom txoos xwb. Thaum Thawj Tswj Hwm Nelson piav txog Los, Nrog Kuv Mus nyob rau xyoo 2018, nws hais tias, “Twb txog lub sij hawm rau ib lub Koom Txoos uas ua hauv tsev.”¹⁴ Nws hais tias peb yuav tsum “pauv [peb] lub tsev los ua ib qho chaw cawm sia vim muaj kev ntseeg” thiab “ib lub hauv paus rau txoj kev kawm txoj moo zoo.” Thiab nws tau cog lus txog plaub yam yog peb yuav ua li ntawd.¹⁵

Kev cog lus thib ib: “Nej cov Hnub Caiv yuav ua rau nej zoo siab” Yuav los ua ib hnub thaum peb los nyob ze zuj zus rau tus Cawm Seej. Ib yam li ib tug ntxhais hluas los ntawm Peru hais tias, “Tus Tswv hnub yog hnub uas kuv txais lus teb ntau los ntawm tus Tswv.”

Kev cog lus thib ob: “Nej cov me nyuam yuav xav kawm thiab ua neej raws li tus Cawm Seej tej lus qhia.” Yog vim li no, “peb hais txog Khetos, peb xyiv fab rau Khetos, [thiab] peb qhia txog Khetos, … xwv kom peb cov me nyuam yuav paub cia siab rau lub hauv paus twg kom txais kev zam txim rau lawv tej kev txhaum.”¹⁶

Peb ua li no kom yuav muaj ib hnub, thaum peb tus tub mus ua hauj lwm los sis mus ncig pem roob los sis mus tua tsiaj hauv hav zoov, ib yam li Enos ua, ces nws yuav nco qab txog tej yam uas peb tau qhia nws txog Khetos thiab txog txoj kev xyiv fab uas los ntawm kev ua raws li txoj moo zoo. Thiab leej twg paub? Tej zaum hnub ntawd nws yuav ntshaw tej yam ntawm sab ntsuj plig heev ua rau nws xav tig mus rau Yexus Khetos nws thiaj li yuav hnov tus Tswv lub suab hais rau nws tias, “Twb zam txim rau koj tej kev txhaum lawm, thiab koj yuav tau koob hmoov.”¹⁷

Kev cog lus thib peb: “Dab Ntxwg Nyoog lub hwj chim hauv nej lub neej thiab nej lub tsev yuav tsawg zuj zus mus.” Vim li cas? Vim hais tias thaum peb tsom ntsoov rau Yexus Khetos ntxiv, ces ua rau peb tsis xav ua txhaum.¹⁸ Thaum peb lub tsev muaj tus Cawm Seej txoj kev kaj puv npo, ces tsis muaj chaw rau tus yeeb ncuab txoj kev tsaus ntuj.

Kev cog lus thib plaub: “Yuav muaj tej kev pauv loj uas kav ntev mus hauv nej tsev neeg.” Vim li cas? Vim hais tias qhov uas Yexus Khetos hloov yeej yog “ib txoj kev hloov loj heev.”¹⁹ Nws hloov peb tej cwj pwm; peb los ua “neeg tshiab.”²⁰ Peb hloov los ua neeg zoo li tus Cawm Seej zuj zus, muaj Nws txoj kev hlub dawb paug rau txhua tus ntawm Vajtswv cov me nyuam.

Leej twg tsis xav kom muaj raws li tej kev cog lus no nyob hauv lawv lub neej thiab lawv tsev neeg? Peb yuav tsum ua li cas kom txais tau? Lus teb yog peb yuav tsum hloov peb lub tsev kom ua ib qho chaw cawm sia vim muaj kev ntseeg thiab ib qho chaw rau kev kawm txoj moo zoo. Peb yuav ua li cas thiaj ua tau li ntawd? Thaum peb tsom ntsoov rau Leej Txiv Saum Ntuj Ceeb Tsheej thiab Yexus Khetos, muab Nkawd ua lub hauv paus ntawm peb tsev neeg lub neej, ob tug tseem ceeb tshaj plaws ntawm peb lub tsev.

Kuv xav tawm ib lub tswv yim kom nej pib ua li no thaum nej kawm Yexus Khetos tej lus, raws li nyob hauv cov vaj lug kub, txhua hnub. Tsis muaj ib tug txheej txheem rau kev kawm vaj lug kub uas zoo tag nrho. Tej zaum nej yuav kawm 5 los sis 10 feeb txhua hnub—los sis kawm ntev me ntsis. Tej zaum nej yuav xav kawm ib tshooj los sis ob peb nqe txhua hnub. Ib txhia nyiam kawm thaum sawv ntxov ua ntej lawv mus rau lub tsev kawm ntawv los sis mus ua hauj lwm. Lwm tus nyiam nyeem thaum hmo ntuj ua ntej pw tsaug zog. Muaj tej khub niam txiv uas qhia kuv tias lawv nyias kawm nyias tus kheej thaum mus ua hauj lwm ces lawv ntaus ntawv qhia tias lawv tau kawm dab tsi, thiaj li ceev cia tej yam uas lawv hais thiab sib tham txog.

Phau Los, Nrog Kuv Mus muaj tej lub tswv yim ntau txog tej yam ntxim ua thiab tej kev pab cov neeg thiab tsev neeg kawm txoj moo zoo cov ntsiab cai los ntawm cov vaj lug kub. Cov vidi-aus txog phau Npaivnpaum thiab Phau Ntawv Maumoos los yeej yog tej cuab yeej muaj nqis kom pab nej tsev neeg to taub cov vaj lug kub. Cov me nyuam thiab cov tub hluas ntxhais hluas feem ntau nyiam cov dab neeg los ntawm cov vaj lug kub. Tej dab neeg no, thiab txoj moo zoo tej ntsiab cai uas lawv kawm los nej cov me nyuam yuav nco ntsoov, ib yam li ib tug phooj ywg zoo, thaum twg lawv xav tau neeg ua yam ntxwv txog kev pab lwm tus, kev tsim txiaj, kev mloog lus, kev ua siab ntev, kev nyiaj mus, kev tshwm sim, kev siab hlub, kev txo hwj chim, thiab kev ntseeg Yexus Khetos. Thaum sij hawm dhau mus, ces nej txoj kev mloog ntsoov Vajtswv txoj lus yuav zoo zuj zus thiab yuav pab koj cov me nyuam los nyob ze tus Cawm Seej. Lawv yuav paub Nws zoo dua li qub.

Tus Tswv Yexus Khetos muaj txoj sia nyob hnub no. Nws yuav nrog nraim peb nyob hauv peb lub neej. Nws yog tus uas kho taus peb tej teeb meem, tiam sis peb yuav tsum tsa muag saib Nws. Nws tau hais tias, “Ntsia ntsoov kuv nrog txhua txoj kev xav; tsis txhob xyem xyav, tsis txhob ntshai.”²¹ Thaum peb tsom ntsoov rau Nws thiab peb Leej Txiv Saum Ntuj Ceeb Tsheej, ua raws li peb tej kev khi lus rau Nkawd, thiab tsom ntsoov rau Nkawd hauv peb tsev neeg, peb yuav los ua cov neeg uas Thawj Tswj Hwm Nelson xav txog hais tias: “Ib co neeg uas muaj peev xwm thiab tsim nyog txais tus Tswv thaum Nws rov qab los, ib co neeg uas tau xaiv Yexus Khetos thiab tsis xaiv ib lub ntiaj teb uas poob lawm, ib co neeg uas xyiv fab siv lawv txoj kev ywj siab xaiv kom ua raws li Yexus Khetos tej kev cai uas siab thiab dawb huv dua.”²² Los ntawm Yexus Khetos lub npe, amees.