Yexus Khetos tej Lus Qhia
Tus Tswv muab cov vaj lug kub rau peb kom coj peb lub neej. Kuv zaj lus hnub no yog tej nqe vaj lug kub uas tau xaiv los ntawm peb tus Cawm Seej tej lus—tej yam uas Nws tau hais.
Peb ntseeg Yexus Khetos. Vim peb yog cov mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, peb teev tiam Nws thiab ua raws li Nws tej lus qhia nyob hauv cov vaj lug kub.
Ua ntej txoj Kev Poob, peb Leej Txiv Saum Ntuj Ceeb Tsheej tau hais ncaj qha rau Adas thiab Evas. Tom qab ntawd, Leej Txiv tau hais tias Nws Tib Leeg Tub, Yexus Khetos, yog peb tus Cawm Seej thiab tus Txhiv Dim thiab txib peb “mloog Nws hais.”1 Los ntawm cov lus qhia no peb kawm tias cov vaj lug kub uas “Vajtswv” los sis “tus Tswv” hais yuav luag tag nrho yog Yehauvas, peb tus Tswv, Yexus Khetos, cov lus.2
Tus Tswv muab cov vaj lug kub rau peb kom coj peb lub neej. Raws li tus yaj saub Nifais qhia peb, peb yuav tsum “mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua.”3 Cov vaj lug kub uas hais txog Yexus tej hauj lwm qhuab qhia feem ntau piav txog tej yam uas Nws ua. Kuv zaj lus hnub no yog tej nqe vaj lug kub uas tau xaiv los ntawm peb tus Cawm Seej tej lus—tej yam uas Nws tau hais. Nov yog cov lus uas sau nyob hauv Phau Tshiab (suav cov lus los ntawm Joseph Smith tej kev tshoov siab thiab) thiab nyob hauv Phau Ntawv Maumoos. Tej yam uas tau xaiv no yog raws sij hawm li peb tus Cawm Seej tau hais.
“Kuv qhia tseeb rau koj hais tias tus neeg uas tsis tau yug los ntawm dej thiab ntawm Vaj Ntsuj Plig, tus ntawd yeej mus tsis tau Vajtswv lub [nceeg vaj] li.”4
“Txhua tus uas tshaib thiab nqhis txoj kev ncaj ncees tau koob hmoov, vim lawv yuav muaj tus Vaj Ntsuj Plig Dawb Huv puv npo.”5
“Txhua tus uas ua kom muaj kev thaj yeeb tau koob hmoov, vim yuav hu lawv ua Vajtswv cov me nyuam.”6
“Saib seb, lawv txheej thaum ub sau tseg hais tias, nej yuav tsum tsis txhob deev luag poj luag txiv:
“Tiam sis kuv hais rau nej tias, tus uas ntsia ib tug poj niam, xav nrog nws pw, ces twb deev luag poj nyob hauv nws lub siab lawm.”7
“Thiab saib seb nej twb hnov hais tias, nej yuav tsum hlub nej tus neeg zej zog thiab ntxub nej tus yeeb ncuab.
“Tiam sis … kuv hais rau nej tias, hlub nej cov yeeb ncuab, foom koob hmoov rau cov uas foom tsis zoo rau nej, ua zoo rau cov uas ntxub nej, thiab thov Vajtswv rau cov uas txhob txwm siv nej thiab tsim txom nej;
“Xwv kom nej yuav los ua nej Leej Txiv tus uas nyob saum ntuj ceeb tsheej cov me nyuam; vim nws cia nws lub hnub ci rau cov neeg phem thiab rau cov neeg zoo.”8
“Yog tias nej zam txim rau neeg tej kev txhaum ces nej Leej Txiv tus uas nyob saum ntuj ceeb tsheej kuj yuav zam txim rau nej thiab;
“Tiam sis yog nej tsis zam txim rau neeg tej kev txhaum ces nej Leej Txiv los kuj yuav tsis zam txim rau nej thiab.”9
“Yog nej nyiam uas raws li neeg ntiaj teb ua, ces neeg ntiaj teb yuav hlub nej. Tiam sis nej tsis nyiam ua raws li neeg ntiaj teb ua, rau qhov kuv twb xaiv nej tawm hauv lub ntiaj teb no lawm; yog li ntawd, neeg ntiaj teb thiaj li ntxub nej.”10
“Yog li ntawd, tsis txhob nrhiav tej uas yog lub ntiaj teb no li tiam sis nej cia li xub nrhiav kev txhim tsa Vajtswv lub nceeg vaj tso, thiab tsa nws txoj kev ncaj ncees, thiab yuav muab tag nrho tej yam no ntxiv rau nej.”11
“Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus. Ua li no thiaj raws li Mauxes txoj kev cai thiab raws li cov cev Vajtswv lus tau qhia tseg lawm.”12
“Nej yuav tsum ceev faj cov cev lus cuav; thaum lawv tuaj cuag nej, lawv ua txuj ua li lawv yog cov yaj, tiam sis lawv lub siab phem ib yam li hma.
“Thaum nej pom lawv tes hauj lwm nej yuav paub. Tsob pos tshauv yeej tsis txi txiv hmab, thiab tsob ntoo pos ntshav yeej tsis txi txiv ncuav pias.
“Ib yam nkaus li ntawd, tsob ntoo zoo yeej txi cov txiv zoo, tsob ntoo phem yeej txi cov txiv phem.”13
“Tsis yog txhua tus uas hu kuv hais tias, Tus Tswv! tus Tswv, ces yuav tau mus Ntuj Ceeb Tsheej. Tiam sis tsuas yog cov uas ua raws li kuv Txiv tus uas nyob saum ntuj lub siab nyiam, thiaj tau mus xwb.”14
“Nej cov uas sab sab vim ris nra hnyav, nej cia li los cuag kuv, kuv yuav cia nej so.
“Kuv yog tus muaj lub siab dawb siab zoo, nej cia li los kwv kuv tus quab thiab kawm tej uas kuv qhia, nej thiaj yuav tau so.
“Tus quab uas kuv muab rau nej kwv yooj yim kwv, thiab lub nra uas kuv muab rau nej ris, lub ntawd tsis hnyav.”15
“Yog leej twg xav nrog kuv mus, tus ntawd yuav tsum tswj nws lub siab, thiab kwv nws tus ntoo khaub lig nrog kuv mus.
“Thiab nim no qhov uas ib tug neeg kwv nws tus ntoo khaub lig, ces yog kom nws xyeej txhua yam uas tsis dawb huv, thiab txhua yam kev ntshaw tej yam hauv ntiaj teb, thiab ua raws li kuv tej lus txib.”16
“Yog li ntawd, tso lub ntiaj teb tseg, thiab cawm nej tus ntsuj plig; vim ib tug neeg yuav tau nqi dab tsi, yog nws tau txhua yam hauv lub ntiaj teb, tiam sis xiam nws tus ntsuj plig? Los sis ib tug neeg yuav muab dab tsi thiaj pauv tau nws tus ntsuj plig?”17
“Yog leej twg txaus siab ua raws li Vajtswv lub siab nyiam, tus ntawd yuav paub hais tias tej lus uas kuv qhia no yog Vajtswv kom kuv hais los sis yog kuv hais kuv xwb.”18
“Yog li ntawd, kuv qhia rau nej hais tias, Nej thov, nej thiaj yuav tau; nej nrhiav, nej thiaj yuav ntsib thiab nej khob, luag thiaj yuav qhib qhov rooj rau nej.
“Rau qhov txhua tus uas thov yeej yuav tau, txhua tus uas nrhiav yeej ntsib, thiab txhua tus uas khob, Vajtswv yeej yuav qhib qhov rooj rau nws.”19
“Kuv muaj dua ib pab yaj uas tsis nyob hauv lub nkuaj no. Kuv yuav tsum mus coj lawv los rau hauv lub nkuaj no; lawv yuav mloog kuv lub suab, thiab lawv yuav los tua ib pab koom ib tug tswv xwb.”20
“Yexus hais rau Mathas hais tias, Kuv yog txoj kev sawv hauv qhov tuag rov qab los thiab yog txoj sia. Tus uas ntseeg kuv, txawm yog nws tuag lawm los nws yeej yuav muaj txoj sia;
“Tus uas muaj sia nyob thiab ntseeg kuv, tus ntawd yuav tsis tuag ib zaug li.”21
“[Txoj lub txib tseem ceeb tshaj plaws yog:] Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog.
“Nqe no thiaj yog nqe uas tseem ceeb dua ntais.
“Thiab nqe ob uas tseem ceeb hais li no hais tias: Hlub koj tej kwv tij zej zog ib yam li koj hlub koj lub cev.
“Mauxes txoj Kev Cai thiab cov cev Vajtswv lus tej lus qhia puav leej nyob tag nrho hauv ob nqe no.”22
“Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub.”23
“Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”24
“Kuv lo lus [txib] yog li no: Nej ib leeg yuav tsum hlub ib leeg, ib yam li kuv hlub nej.”25
“Nej cia li saib kuv ob txhais tes thiab kuv ob txhais ko taw, nej thiaj yuav paub hais tias yog kuv tiag. Nej cia li cev tes kov kuv, nej thiaj li yuav paub, rau qhov dab tsis muaj nqaij tsis muaj txha li uas nej pom kuv muaj no.”26
“Yog li ntawd, nej cia li tawm mus qhia txhua haiv neeg hauv qab ntuj no, kom lawv los ua kuv cov thwj tim: Nej yuav tsum tuav Vaj Leej Txiv, Vaj Leej Tub thiab tus Vaj Ntsuj Plig Dawb Huv lub npe, muab lawv ua kev cai raus dej.
“Thiab qhia kom lawv paub coj raws li txhua yam uas kuv tau qhia rau nej lawm; thiab kuv yuav nrog nraim nej mus txog hnub uas lub ntiaj teb no kawg.”27
Tom qab Nws txoj hauj lwm qhuab qhia hauv Thaj Av Dawb Huv, Yexus Khetos tau tshwm sim rau cov neeg ncaj ncees hauv Amelikas. Nov yog tej lus uas Nws tau hais nyob ntawd:
“Saib seb, kuv yog Yexus Khetos Vajtswv Leej Tub. Kuv tau tsim lub ntuj thiab lub ntiaj teb, thiab txhua yam uas muaj nyob haud. Kuv twb nrog Leej Txiv txij puag thaum chiv keeb los. Kuv koom nrog Leej Txiv, thiab Leej Txiv koom nrog kuv; thiab yog los ntawm kuv uas Leej Txiv tau yeeb koob rau nws lub npe.”28
“Kuv yog txoj kev kaj thiab txoj sia ntawm neeg ntiaj teb. Kuv yog Alafas thiab Aumenkas, qhov chiv keeb thiab qhov kawg.
“Thiab nej tsis txhob tua tsiaj txi rau kuv ntxiv lawm; muaj tseeb tiag, tso tseg nej tej kev txi thiab nej tej kev hlawv tsiaj, vim kuv yuav tsis txais nej tej kev txi thiab nej tej kev hlawv tsiaj.
“Thiab nej yuav muab lub siab puas tas thiab lub siab xav ua zoo ua kev txi rau kuv. Thiab tus uas yuav los cuag kuv nrog lub siab puas tas thiab lub siab xav ua zoo, kuv yuav muab tus ntawd ua kev cai raus ntawm hluav taws thiab ntawm tus Vaj Ntsuj Plig Dawb Huv. …
“Saib seb, kuv tau los rau neeg ntiaj teb kom coj tau txoj kev txhiv dim los rau neeg ntiaj teb, kom cawm tau neeg ntiaj teb dim ntawm kev txhaum.”29
“Thiab ntxiv kuv hais rau nej, nej yuav tsum hloov siab lees txim, thiab ua kev cai raus dej los ntawm kuv lub npe, thiab hloov los ua zoo li ib tug me nyuam yaus, tsis li ntawd ces nej yeej yuav tsis tau Vajtswv lub nceeg vaj los ua nej tug hlo li.”30
“Yog li ntawd kuv xav kom nej ua neeg zoo tag nrho ib yam li kuv, los sis nej Leej Txiv tus uas nyob saum ntuj ceeb tsheej uas zoo tag nrho.”31
“Kuv hais tseeb tseeb rau nej tias, nej yuav tsum saib xyuas thiab thov Vajtswv tas mus li, nyob tsam nej raug tus dab phem haub ntxias, thiab nws coj nej mus txhom khi.”32
“Yog li ntawd nej yuav tsum thov Leej Txiv tas mus li los ntawm kuv lub npe.”33
“Yog li ntawd, txhua yam uas nej yuav ua, nej yuav tsum ua los ntawm kuv lub npe; yog li ntawd nej yuav tsum hu lub koom txoos li kuv lub npe.”34
“Saib seb kuv twb muab kuv txoj moo zoo rau nej, thiab nov yog txoj moo zoo uas kuv tau muab rau nej—hais tias kuv los rau hauv lub ntiaj teb los ua li kuv Txiv lub siab nyiam, vim kuv Txiv txib kuv los.
“Thiab kuv Txiv txib kuv los xwv kom kuv yuav raug coj mus ntsia saum tus ntoo khaub lig; thiab tom qab uas kuv raug ntsia saum tus ntoo khaub lig lawm, kuv thiaj coj tau txhua leej txhua tus los cuag kuv … raug txiav txim rau tej yam lawv tau ua, seb lawv ua zoo los sis lawv ua phem.”35
“Nim no nov yog txoj lus txib: Cia li hloov siab lees txim, nej txhua tus uas nyob thoob plaws lub ntiaj teb, thiab los cuag kuv thiab ua kev cai raus dej los ntawm kuv lub npe, xwv kom qhov uas nej tau txais tus Vaj Ntsuj Plig Dawb Huv yuav muab nej hloov ua neeg dawb huv, xwv kom nej yuav sawv tsis muaj qhov ceb rau ntawm kuv xub ntiag thaum txog hnub kawg.”36
Peb ntseeg Yexus Khetos. Kuv xaus kuv zaj lus hais tej yam uas Nws tau hais txog qhov uas peb yuav tsum paub thiab coj li cas kom ua raws li Nws tej lus qhia:
“Tus pab uas yog [tus] Vaj Ntsuj Plig Dawb Huv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.”37
Kuv ua tim khawv tias tej lus qhia no muaj tseeb los ntawm Yexus Khetos lub npe, amees.