Yexus Khetos Yog cov Niam Tsev Txiv Tsev lub Dag Zog

Nej puas tau xav tias Leej Txiv Saum Ntuj Ceeb Tsheej pheej hmoo npaum li cas txhua zaus Nws xa ib tug me nyuam los rau hauv lub ntiaj teb no? Yog Nws cov ntsuj plig tub thiab ntxhais. Lawv muaj peev xwm loj kawg nkaus. Lawv txoj hmoov yog hloov los ua neeg uas zoo, muaj kev tshav ntuj, thiab qhov tseeb. Tiam sis thaum lawv los rau hauv lub ntiaj teb lawv pab tsis taus lawv tus kheej ua ib yam dab tsi tsuas yog quaj xwb. Lawv tsis nco qab txog lub sij hawm uas lawv nrog Vajtswv nyob, thiab tsis nco qab qhov uas lawv yog leej twg thiab lawv muaj peev xwm hloov los ua neeg zoo li cas. Lawv txoj kev to taub lub neej, kev hlub, Vajtswv, thiab Nws txoj hau kev yeej nyob ntawm tej yam uas lawv pom ntawm cov neeg nyob ib puag ncig—qhov tseem ceeb yog lawv niam lawv txiv, uas tseem kawm txog tej ntawd ib yam thiab.

Daim Duab

Me nyuam mos liab

Vajtswv tau muab “ib lub luag hauj lwm tseem ceeb dawb ceev [rau cov niam txiv] kom cob nkawd cov me nyuam raws li kev hlub thiab kev ncaj ncees, kom npaj muab raws li lawv toob kas ntawm sab nqaij daim tawv thiab sab ntsuj plig, thiab kom qhia lawv …ua raws li Vajtswv cov lus txib.”⁴

Hais li ntawd mas ntshe yuav ua rau cov niam tsev txiv tsev zoo pw tsis tsaug zog.

Kuv zaj lus rau tag nrho cov niam tsev txiv tsev yog li no:

Tus Tswv hlub nej.

Nws nrog nraim nej nyob.

Nws sawv ntawm nej ib sab.

Nws yog nej lub dag zog thaum nej coj nej cov me nyuam kom xaiv kev ncaj ncees.

Cia li ua siab loj thiab muaj kev zoo siab lees txais kev lav ris no. Tsis txhob muab txoj hauj lwm uas yog lub hauv paus ntawm cov koob hmoov los saum ntuj los no rau lwm tus hlo li. Raws li txoj moo zoo tej ntsiab cai qhia, nej yog cov uas yuav tsum coj nej cov me nyuam kom paub ua neej txhua hnub. Cia li pab nej cov me nyuam ntseeg Yexus Khetos, nyiam Nws txoj moo zoo thiab Nws lub Koom Txoos, thiab npaj xaiv kev ncaj ncees mus tas lawv lub neej. Muaj tseeb tiag, nov yog Vajtswv txoj hau kev rau cov niam tsev txiv tsev.

Dab Ntxwg Nyoog yuav tawm tsam nej, meem txom nej, sim ua rau nej poob siab.

Tiam sis txhua tus me nyuam tau txais Khetos txoj Kev Kaj kom muab nws txuas rau lub ntuj ceeb tsheej. Thiab tus Cawm Seej yuav pab nej, coj nej kev, thiab txhawb nqa nej. Cia li nrhiav Nws txoj kev pab. Thov tus Tswv!

Daim Duab

Tus Tswv Yexus Khetos

Ib yam li Yexus Khetos yog cov tub hluas ntxhais hluas lub dag zog, Yexus Khetos kuj yog cov niam tsev txiv tsev lub dag zog.

Tej lub sij hawm peb xav tias muaj lwm tus uas tsim nyog dua peb kom coj thiab qhia peb cov me nyuam. Tiam sis nej xav tias nej tsis txaus npaum li cas los, nej muaj ib yam uas ua rau nej tsim nyog dua lwm tus: nej txoj kev hlub nej cov me nyuam.

Tus niam tsev txiv tsev rau ib tug me nyuam yeej yog ib lub hwj chim muaj zog tshaj plaws. Yeej yog ib yam hauv lub ntiaj teb uas yuav nyob mus ib txhis li tiag.

Tej zaum nej xav tias nej tsis tshua nrog nej cov me nyuam sib raug zoo. Tus Cawm Seej lub hwj chim pab tau. Nws kho neeg mob, thiab Nws txawj kho tib neeg kom sib raug zoo. Nws ua kom muaj cov ncuav thiab ntse ntau ntxiv, thiab Nws txawj ua kom muaj kev hlub thiab kev zoo siab hauv nej lub tsev ntau ntxiv thiab.

Nej txoj kev hlub rau nej cov me nyuam tsim ib qho chaw zoo rau nej qhia lawv txog qhov tseeb thiab txhawb nqa lawv txoj kev ntseeg. Cia li ua kom muaj ib lub tsev rau kev thov Vajtswv, kev kawm ntawv, thiab kev ntseeg; ib lub tsev uas muaj kev xyiv fab, ib lub tsev uas tib neeg sib raug zoo, Vajtswv lub tsev.⁵ Thiab “cia li thov Leej Txiv kawg siab kawg ntsws, xwv kom nej yuav muaj [Nws] txoj kev hlub no puv npo, uas nws … muab rau … cov uas coj raws li nws Leej Tub, Yexus Khetos.”⁶

Nej cov niam tsev txiv tsev kuj muaj peev xwm ntxiv thiab vim nej muaj cib fim pab nej cov me nyuam hloov txhua hnub. Cov phooj ywg, cov xib hwb, thiab cov neeg uas ua yeeb yam los yeej yuav nyob tsis ntev. Tiam sis nej muaj peev xwm ua cov neeg uas nrog nraim koj tus me nyuam nyob tas lawv lub neej.

Tej zaum nej yuav xav tias tej yam nej ua yeej me me heev thaum muab piv rau tej lub suab nrov uas nej cov me nyuam hnov hauv lub ntiaj teb no. Tej lub sij hawm nej yuav xav tias nej tsis tshua pab dab tsi li. Tiam sis nco ntsoov tias “los ntawm tej yam me me, tus Tswv coj tau tej yam tseem ceeb los.”⁷ Ib zaug thaum ua tsev neeg hmo ua ke, thaum sib tham txog txoj moo zoo, los sis thaum coj yam ntxwv zoo tej zaum yuav tsis hloov nej tus me nyuam lub neej thaum tib lub sij hawm ntawd, ib yam li ib tee nag tsis ua rau ib lub paj loj hlob tuaj tam sim ntawd. Tiam sis qhov uas yus ua tej yam me me thiab yooj yim, ib hnub dhau ib hnub, yeej tu nej cov me nyuam zoo tshaj qhov uas muaj dej nyab tej zaug xwb.⁸

Li no yog tus Tswv txoj kev. Nws hais lus rau nej thiab nej tus me nyuam nrog ib lub suab yau yau, tsis yog ib lub suab nrov li xob quaj.⁹ Nws tau kho Na-amas, tsis yog los ntawm “tej yam nyuaj los” tiam sis los ntawm ib yam yooj yim ua kom raus dej xya zaus.¹⁰ Cov neeg Ixayees nyiam noj cov nqaij noog ncuab nyob hauv roob moj sab qhua, tiam sis qhov uas pab lawv tsis tshaib plab txhua hnub yog qhov txuj ci tseem ceeb me me thiab yooj yim ntawm cov manas—yog lawv cov mov mog uas noj txhua hnub.¹¹

Cov kwv tij thiab cov muam, cov mov mog txhua hnub los yeej zoo tshaj thaum npaj thiab muab rau lawv hauv tsev. Qhov uas yus pab lawv tu lawv txoj kev ntseeg thiab zaj lus tim khawv los ntawm tej yam me me thiab yooj yim, ib zaug dhau ib zaug, thaum ua neej txhua hnub, yeej yog qhov zoo tshaj.¹²

Txhua lub sij hawm yog ib lub sij hawm rau nej qhia. Txhua lo lus uas nej hais thiab txhua yam nej ua yuav coj nej kev kom paub xaiv li cas.¹³

Tej zaum nej yuav tsis pom tej uas muaj los ntawm nej txoj kev rau siab ua tej no. Tiam sis tsis txhob tso tseg. Tus Tswv hais tias, “Txhua yam yuav tsum tshwm sim los thaum txog lub sij hawm. Yog li ntawd, tsis txhob nkees ua tej yam zoo, vim nej tab tom teeb lub hauv paus ntawm ib txoj hauj lwm loj.”¹⁴ Puas muaj ib txoj hauj lwm tseem ceeb dua kev pab Vajtswv cov me nyuam uas muaj nqis kawm tias lawv yog leej twg tiag thiab txhawb nqa lawv txoj kev ntseeg Yexus Khetos, Nws txoj moo zoo, thiab Nws lub Koom Txoos? Yexus Khetos yuav foom koob hmoov rau nej thaum nej siv zog ua tsis tu tsis tseg.

Ib txoj kev ntxiv uas tus Tswv txhawb nqa cov niam tsev txiv tsev kom lawv muaj hwj chim yog los ntawm lub txiaj ntsim txais kev tshwm sim. Vajtswv yeej xav tso Nws tus Ntsuj Plig nrog cov niam tsev txiv tsev nyob kom coj lawv kev.

Thaum nej thov Vajtswv thiab mloog tus Ntsuj Plig lus zoo, Nws yuav ceeb toom nej txog tej xwm txheej phem uas nej tsis pom.¹⁵ Nws yuav qhia nej txog nej cov me nyuam tej txiaj ntsim, lawv tej kev muaj zog, thiab tej kev txhawj uas lawv tsis hais txog.¹⁶ Vajtswv yuav pab nej saib nej cov me nyuam ib yam li Nws saib lawv—tsis saib lub cev ntaj ntsug, tiam sis saib neeg lub siab.¹⁷

Nrog Vajtswv txoj kev pab, nej yuav kawm paub nej cov me nyuam ib yam li Vajtswv paub lawv. Kuv caw nej lees yuav Vajtswv txoj kev caw nej tsev neeg txais kev tshwm sim. Nrhiav Nws tej lus qhia thaum nej thov Vajtswv.¹⁸

Tej zaum txoj kev pab tseem ceeb tshaj uas Yexus Khetos muab rau cov niam tsev txiv tsev yog “txoj kev hloov loj heev” nyob hauv nej lub siab.¹⁹ Qhov no yog ib qho txuj ci tseem ceeb uas txhua tus xav tau.

Rau ib me pliag, cia li xav txog qhov xwm txheej no: Nej nyob hauv lub tsev koom txoos, mloog ib zaj lus txog tej tsev neeg. Tus uas hais lus piav txog ib tsev neeg uas zoo tag nrho nyob hauv ib lub tsev uas zoo tag nrho. Tus txiv thiab tus poj niam yeej tsis sib cav sib ceg. Cov me nyuam nyeem cov vaj lug kub mus txog lub sij hawm ua cov ntaub ntawv uas nqa tom tsev. Thiab lawv mloog zaj nkauj “Ib Leeg Hlub Ib Leeg.”²⁰ Ua ntej tus neeg hais lus hais tias txhua tus yuav zoo siab koom ua ke tu hoob nab, ua rau nej xav tias, “Ntshe kuv tsev neeg yeej yuav tsis zoo li no.”

Cov kwv tij thiab cov muam, tsis txhob txhawj! Txhua leej txhua tus nyob hauv pawg ntseeg xav zoo ib yam li nej! Muaj tseeb tiag, tag nrho cov niam tsev txiv tsev txhawj tias lawv zoo tsis txaus.

Zoo siab uas muaj ib lub hauv paus uas los saum ntuj los kom pab cov niam tsev txiv tsev: Yog Yexus Khetos. Nws yog lub hauv paus ntawm peb txoj kev hloov siab loj heev.

Thaum nej qhib nej lub siab rau tus Cawm Seej thiab Nws tej lus qhia, Nws yuav qhia nej txog nej tej kev qaug zog. Yog nej txo hwj chim tso siab rau Yexus Khetos, Nws yuav ua kom tej kev qaug zog ntawd los ua tej uas muaj zog.²¹ Nws yog tus Vajtswv uas ua tej txuj ci tseem ceeb.

Qhov no puas txhais hais tias nej thiab nej tsev neeg yuav zoo tag nrho? Tsis yog li ntawd. Tiam sis nej yuav ua zoo dua. Dhau los ntawm tus Cawm Seej txoj kev tshav ntuj, nej yuav pib muaj tej cwj pwm uas cov niam tsev txiv tsev zoo muaj zuj zus xws li: kev hlub Vajtswv thiab Nws cov me nyuam, kev ua siab ntev, kev tsis qia dub, muaj siab mos siab muag, thiab kev ua siab loj kom xaiv qhov yog.

Peb txoj kev txhawb kev ntseeg Yexus Khetos yog ib yam uas peb ua hauv tsev, tsom ntsoov rau ib tug zuj zus. Thiab lub Koom Txoos txhawb nqa. Nrog cov vaj lug kub dawb huv thiab cov yaj saub tej lus, tus Cawm Seej lub Koom Txoos kuj muab tej yam uas pab taus cov niam tsev txiv tsev thiab cov me nyuam xaiv tej yam ncaj ncees:

Daim Duab

Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv

• Phau ntawv Ntxiv Dag Zog rau cov Tub Hluas Ntxhais Hluas: Phau Ntawv Coj Kev Pab Neeg Xaiv tsis qhia ntau yam uas yuav tsum ua los sis yuav tsum tsis txhob ua. Phau no qhia tej lus tseeb mus ib txhis li uas pab nej xaiv kom tsom ntsoov rau Yexus Khetos hauv nej lub neej. Nrog cov me nyuam nyeem phau no. Cia lawv sib tham txog phau no. Cia li pab lawv kawm tej lus tseeb nyob mus ib txhis kom coj tau lawv txoj kev xaiv ua tej yam.²²

• Tej rooj sab laj FSY kuj yog ib yam kev pab zoo kawg. Kuv cia siab tias txhua tus tub hluas ntxhais hluas yuav mus. Kuv caw cov tub hluas ntxhais hluas uas tsis tau yuav poj niam yuav txiv koom tej lub rooj sab laj no ua cov xib hwb thiab cov neeg pab. Kuv caw cov niam tsev txiv tsev kom siv tej yam ntawm sab ntsuj plig uas cov tub hluas ntxhais hluas kawm hauv FSY tej rooj sab laj.

• Cov me nyuam thiab cov tub hluas ntxhais hluas nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg muaj cov xib hwb thiab cov thawj coj. Feem ntau nej koom ib tug tub hluas ntxhais hluas lub neej nyob rau ib lub sij hawm tseem ceeb rau lawv kom txhawb nqa lawv txoj kev ntseeg thiab zaj lus tim khawv. Nej ib txhia yog cov neeg uas tsis tau yuav poj niam yuav txiv. Nej ib txhia tsis tau muaj me nyuam hlo li. Nej txoj kev pab Vajtswv cov me nyuam los Vajtswv saib yog ib yam dawb ceev.²³

Kuv cov phooj ywg zoo, kuv cov kwv tij thiab cov muam, kev txhawb kev ntseeg nyob hauv ib tug me nyuam yeej zoo li kev pab ib lub paj loj hlob tuaj. Rub tsis taus tus kav paj kom siab dua. Rub tsis taus kom tus kaus tawg paj ntxov. Thiab yog yus tsis quav ntsej lub paj ces yus yeej yuav tsis xav tias lub paj yuav loj hlob tuaj los sis huaj vam.

Qhov uas nej yuav tsum ua rau tiam neeg uas tab tom loj hlob tuaj yog kev muab cov av zoo rau lawv nrog cov dej uas ntws los saum ntuj los. Muab cov nroj tsuag rub tawm thiab muab txhua yam uas thaiv kev tshav ntuj tshem tawm. Tsim ib qho chaw zoo rau lawv loj hlob tuaj. Cia li ua siab ntev cia tiam neeg uas tab tom loj hlob xaiv tej yam zoo thiab cia Vajtswv ua Nws qhov txuj ci tseem ceeb. Yog ua li ntawd ces thaum kawg yuav muaj ib yam uas zoo nkauj thiab zoo siab tshaj ib yam uas nej ua tau ntawm nej tus kheej xwb.

Nyob hauv Leej Txiv Saum Ntuj Ceeb Tsheej txoj hau kev, Nws xav kom kev txheeb ze hauv tsev neeg nyob mus ib txhis li. Yog li ntawd, nej cov niam tsev txiv tsev yuav tsum tsis txhob tso tseg, tsis hais thaum nej xav tias nej ua tsis zoo thaum yav tas los.

Vim muaj Yexus Khetos, tus uas Txawj Kho Mob thiab tus Cawm Seej, yeej yuav muaj ib txoj kev rau peb rov qab pib dua; Nws yeej muab kev cia siab rau peb.

Yexus Khetos yog tsev neeg lub dag zog.

Yexus Khetos yog cov tub hluas ntxhais hluas lub dag zog.

Yexus Khetos yog cov niam tsev txiv tsev lub dag zog.

Kuv ua tim khawv li no los ntawm Yexus Khetos lub npe, amees.