Tus Tswv Puas Tau Zam Txim Pub rau Kuv Tiag?
Kev cog lus rau txhua tus hais tias yuav zam txim tag nrho rau lawv—dhau los ntawm Yexus Khetos txoj Kev Theej Txhoj.
Ntau xyoos tas los, kuv tus poj niam thiab kuv wb tsiv tsev mus rau Idaho, es wb qhib ib lub lag luam tshiab. Twb siv sij hawm ntev heev nyob hauv hoob kas. Zoo siab uas wb nyob tsis deb ntawm chaw ua hauj lwm no. Txhua lub lim tiam, Shawna thiab wb peb tug ntxhais—txhua tus tsis tau muaj rau xyoo—lawv yuav tuaj rau wb hoob kas kom noj su ua ke.
Muaj ib hnub zoo li ntawd tom qab peb tsev neeg noj su ua ke, kuv pom tias tus ntxhais uas muaj tsib xyoos, Michelle, tau sau ib zaj lus rau kuv rau ntawm ib daim ntawv me me thiab muab lo rau kuv tus xov tooj hauv hoob kas.
Daim ntawv hais tias, “Txiv, nco ntsoov hlub kuv. Hlub, Michelle.” Qhov no ua rau ib leej txiv hluas nco qab txog tej yam uas tseem ceeb tshaj plaws.
Cov kwv tij thiab cov muam, kuv ua tim khawv tias peb Leej Txiv Saum Ntuj Ceeb Tsheej nco ntsoov txog peb thiab Nws hlub peb zoo tag nrho. Kuv xav nug li no tias: Peb puas nco ntsoov txog Nws? Thiab peb puas hlub Nws?
Thaum yav tas los, kuv yog ib tug thawj coj hauv lub Koom Txoos. Muaj ib tug tub hluas, Danny, uas yeej zoo kawg. Nws mloog lus, muaj lub siab dawb, thiab nws muaj siab xav ua zoo. Tiam sis, tom qab nws kawm ntawv high school tas lawm, nws pib koom nrog ib pawg neeg tsis tshua zoo. Nws siv tshuaj phem, uas yog methamphetamine, thiab pib quav yeeb quav tshuaj thiab raug puas tsuaj zuj zus. Tsis ntev, ces nws tus yam ntxwv twb hloov hlo lawm. Saib nws los yeej tsis zoo li qub lawm. Qhov uas tau hloov loj tshaj plaws yog nws qhov muag—txoj kev kaj hauv nws qhov muag twb qauj les. Ob peb zaug kuv sim nrog nws tham, tiam sis ua tsis taus. Nws tsis kam ua li ntawd.
Nyuaj rau kuv saib tus tub hluas zoo kawg raug txom nyem thiab ua ib lub neej uas tsis yog lawm! Nws yeej muaj peev xwm ua zoo dua.
Ces muaj ib hnub, pib muaj ib qho txuj ci tseem ceeb rau nws.
Nws tau mus rau kev sib ntsib txais lub cim nco txog thaum nws tus kwv hais lus tim khawv ua ntej yuav mus ua tub txib. Nyob hauv kev sib ntsib ntawd, Danny hnov ib yam dab tsi uas nws tsis tau hnov tau ntev lawm. Nws hnov tus Tswv txoj kev hlub. Nws muaj kev cia siab lawm.
Txawm yog nws xav hloov, kev hloov yog ib yam nyuaj rau Danny. Tej kev muaj yees thiab kev muaj txim los ua rau nws xav tias yuav luag ris tsis taus.
Muaj ib hub, thaum kuv txiav nyom, Danny tsav tsheb tuaj. Nws ntxhov siab heev. Kuv tua lub tshuab txiav nyom, thiab wb zaum ua ke ntawm tus ntaiv rau lub qab khav kom thiaj tsis sov. Ces nws qhib siab qhia kuv nws xav li cas. Nws xav xav rov qab los tiag tiag. Tiam sis, kev txiav yeeb thiab kev tso lub neej ntawd tseg yog ib yam nyuaj kawg nkaus. Nws hais tias nws muaj txim ntau heev, nws txaj muag vim nws twb poob deb. Nws nug hais tias, “Tus Tswv puas yuav zam txim pub rau kuv tiag? Puas muaj ib txoj kev rov qab mus cuag Nws tiag”
Tom qab nws hais txog nws tej kev nyuaj siab txhawj xeeb, wb nyeem Amas tshooj 36 ua ke:
“Muaj tseeb tiag, kuv nco qab txog tag nrho kuv tej kev txhaum thiab tej kev ua phem. …
“Muaj tseeb tiag, … twb ua rau kuv tus ntsuj plig raug tsim txom nrog txoj kev ntshai uas tsis pom qab piav thaum kuv tsuas xav txog qhov uas kuv yuav los rau hauv Vajtswv lub xub ntiag xwb” (nqe 13–14).
Tom qab nyeem tej nqe no, Danny hais tias, “Kuv xav zoo ib yam li no!”
Wb nyeem ntxiv:
“Thaum kuv raug tsim txom los ntawm qhov uas kuv nco qab txog kuv tej kev txhaum ntau, saib seb, kuv kuj nco qab txog kuv txiv txoj kev qhia tej yuav muaj los yav tom ntej rau cov neeg ntsig txog qhov uas ib tug hu ua Yexus Khetos, Vajtswv ib tug Tub, yuav los theej neeg ntiaj teb tej kev txhaum. …
“Thiab auj, txoj kev xyiv fab loj kawg nkaus, thiab kuv tau pom txoj kev kaj zoo kawg nkaus” (nqe 17, 20).
Thaum wb nyeem tej nqe vaj lug kub no, nws pib los kua muag. Amas txoj kev xyiv fab yeej yog kev xyiv fab uas nws xav tau.
Wb tau sib tham txog qhov uas Amas tau ua tej yam phem heev. Tiam sis, tom qab nws hloov siab lees txim, nws tsis tau rov qab mus. Nws tau los ua Yexus Khetos ib tug thwj tim. Nws tau los ua ib tug yaj saub! Ua rau Danny rua muag loj heev. “Ib tug yaj saub?” nws hais.
Kuv teb tias, “Yog mas, ib tug yaj saub. Tsis xav kom koj ntxhov siab!”
Wb tau sib tham txog qhov uas txawm yog nws tsis tau ua txhaum loj npaum li Amas, nws kuj tau txais kev cog lus zoo li cog lus rau txhua tus hais tias yuav zam txim tag nrho rau lawv—dhau los ntawm Yexus Khetos txoj Kev Theej Txhoj.
Ces Danny to taub lawm. Nws paub tias nws yuav tsum ua li cas: nws yuav tsum pib tso siab rau tus Tswv thiab zam txim rau nws tus kheej!
Danny txoj kev hloov siab yeej yog ib qho txuj ci tseem ceeb. Thaum sij hawm dhau mus, nws tus yam ntxwv hloov, thiab qhov muag rov qab ci ntsa iab. Nws rais los ua tsim nyog mus rau lub tuam tsev! Nws twb rov qab los lawm!
Ob peb hlis tom qab ntawd, kuv nug Danny seb nws puas xav xa ib daim ntawv thov mus ua tub txib. Nws txoj kev teb ua rau kuv xav tsis thoob.
Nws hais tias, “Kuv xav mus ua tub txib, tiam sis koj paub tias kuv twb mus qhov twg thiab kuv twb ua dab tsi lawm! Kuv xav tias kuv yuav tsis tsim nyog mus.”
Kuv teb tias, “Tej zaum koj hais yog lawm. Tiam sis, tsis muaj dab tsi uas tav peb kev kom tsis txhob thov seb. Yog tias zam koj lawm, koj yuav paub tias koj twb qhia tus Tswv tias koj xav ua hauj lwm rau Nws tiag tiag.” Nws qhov muag cia ntsa iab zuj zus. Nws zoo siab kawg txog lub tswv yim no. Nws xav tias tej zaum yuav tsis pub nws mus, tiam sis nws txaus siab xav sim seb.
Ob peb lim tiam tom qab ntawd, nws xav tsis thoob, vim muaj ib qho txuj ci tseem ceeb ntxiv. Danny txais kev hu mus ua ib tug tub txib.
Ob peb lub hlis tom qab Danny mus txog qhov chaw tshaj tawm txoj moo zoo, ib tug hu tuaj rau kuv. Nws tus thawj tswj hwm hais tias, “Ua cas tus tub hluas ho zoo li no? Nws yog tus tub txib zoo tshaj txhua tus tub txib uas kuv tau ntsib!” Nyob hauv hnub nyoog no, tus thawj tswj hwm tau txais ib tug uas zoo li Amas tus Hluas lawm.
Ob xyoos tom qab ntawd, Danny rov qab los tsev, nws twb tau ua hauj lwm rau tus Tswv kawg siab kawg ntsws kawg dag kawg zog.
Tom qab nws hais ib zaj lus hauv kev sib ntsib txais lub cim nco txog, kuv twb rov qab mus tsev, ces hnov leej twg khob qhov rooj. Danny los kua muag sawv ntawm qhov rooj ntawd. Nws hais tias, “Koj puas kam nrog kuv tham rau ib me pliag?” Wb mus sab nraum zaum ntawm tus ntaiv ib yam li qub.
Nws hais tias, “Thawj Tswj Hwm, koj puas xav tias tus Tswv zam txim pub rau kuv tiag?”
Lub sij hawm ntawd kuv koom nws los kua muag thiab. Yexus Khetos ib tug thwj tim uas twb rau siab mus qhia thiab ua tim khawv txog tus Cawm Seej twb sawv ntawm kuv lub xub ntiag. Nws yog ib tug uas coj yam ntxwv txog lub hwj chim ntawm tus Cawm Seej txoj Kev Theej Txhoj uas kho mob thiab txhawb nqa.
Kuv hais tias, “Danny! Koj puas tau saib hauv tsom iav? Koj puas tau pom koj qhov muag? Koj qhov muag ci ntsia iab, thiab koj muaj tus Tswv tus Ntsuj Plig puv npo. Tus Tswv twb zam txim pub rau koj lawm! Koj yeej zoo kawg! Koj yuav tsum mus tom ntej hauv koj lub neej. Tsis txhob saib tom qab! Saib rau yav tom ntej pom txoj kab ke uas koj yuav ua ntxiv.”
Tseem muaj qhov txuj ci tseem ceeb no. Danny yuav poj niam hauv lub tuam tsev thiab rov qab mus kawm ntawv, nws tau ib daim ntawv master. Nws tseem ua hauj lwm pab tus Tswv nrog meej mom thaum nws ua raws li nws txoj kev hu. Qhov tseem ceeb dua, nws yog ib tus txiv tsev uas siab zoo thiab rau siab ntseeg. Nws yog Yexus Khetos ib tug thwj tim.
Thawj Tswj Hwm Russell M. Nelson tau qhia tias, “Yog tis muaj [tus Cawm Seej] txoj Kev Theej Txhoj nyob mus ib txhis li, tag nrho cov noob neej yuav poob mus tsis muaj leej twg dim.”1 Danny tsis tau poob li, thiab tus Tswv yeej muaj peev xwm cawm peb dim. Nws sawv ntawm qhov rooj kom txhawb nqa peb, txhawb peb dag zog, thiab zam txim rau peb. Nws nco ntsoov hlub peb!
Muaj ib lub sij hawm hauv Phau Ntawv Maumoos uas qhia tias tus Cawm Seej hlub Vajtswv cov me nyuam npaum li cas: “Thaum Yexus hais li no tas lawm, nws rov tsa nws lub qhov muag ntsia ib puag ncig ntawm cov neeg coob coob, thiab pom tias lawv los kua muag, thiab ntsia ntsoov nws zoo li lawv xav thov kom nws nrog lawv nyob ib nyuag ntev me ntsis” (3 Nifais 17:5).
Tus Cawm Seej twb tau siv tas ib hnub txhawb pab cov neeg. Tiam sis tseem tshuav ntxiv Nws yuav tsum ua—Nws yuav tsum mus xyuas Nws lwm cov yaj; Nws yuav tsum mus ntsib Nws Txiv.
Txawm yog muaj tej kev lav ris no, Nws paub tias cov neeg xav kom Nws nyob ntev zog me ntsis. Ces, vim tus Cawm Seej muaj lub siab hlub, tau muaj ib qho txuj ci tseem ceeb loj tshaj plaws:
Nws nyob ntev zog.
Nws foom koob hmoov rau lawv.
Nws txhawb pab lawv cov me nyuam ib tug dhau ib tug.
Nws thov Vajtswv pab lawv; Nws nrog lawv quaj.
Thiab Nws tau kho lawv zoo. (Saib 3 Nifais 17.)
Nws txoj kev cog lus yeej nyob mus ib txhis li: Nws yuav kho peb zoo.
Rau cov uas tau yuam kev tawm ntawm txoj kev khi lus mus, xav kom nej paub tias yeej muaj kev cia siab, muaj kev kho mob, thiab yeej muaj ib txoj kev rov qab los.
Nws zaj lus txog kev cia siab yeej zoo li tshuaj kho mob rau txhua tus uas nyob hauv ib lub ntiaj teb uas ntxhov hnyo. Tus Cawm Seej hais tias, “Kuv yog txoj kev, qhov tseeb thiab txoj sia” (Yauhas 14:6).
Cov kwv tij thiab cov muam, thov kom peb nco qab nrhiav Nws, hlub Nws, thiab nco ntsoov txog Nws.
Kuv ua tim khawv tias Vajtswv muaj txoj sia nyob thiab Nws hlub peb. Kuv ua tim khawv tias Yexus Khetos yog tus Cawm Seej thiab tus Txhiv Dim ntawm lub ntiaj teb. Nws yog tus uas kho mob zoo. Kuv paub tias kuv tus Txhiv Dim muaj txoj sia nyob! Los ntawm Yexus Khetos lub npe, amees.