Txoj Hauj Lwm hauv lub Tuam Tsev thiab Kev Nrhiav Tsev Neeg Zaj Keeb Kwm—Yog Tib txoj Hauj Lwm

Thaum ua li ntawd ces ua rau kuv ris Vajtswv txiaj rau Haiv Neeg Ntseeg hauv Kirtland, Ohio, uas tau khwv ua hauj lwm thiab ua kev txi loj heev kom ua ib lub tuam tsev zoo nkauj tiav nyob rau lub caij nplooj ntoo hlav ntawm xyoo 1836—yog thawj lub tuam tsev hauv lub caij nyoog no. Nyob rau lub Peb Hlis Ntuj ntawm xyoo ntawd, twb muaj ib txhiab tawm tus neeg sib sau ua ke hauv lub tuam tsev thiab nyob ntawm qhov chaw nkag haud kom saib kev sib ntsib muab fij tseg. Tus Yaj Saub Joseph Smith tau sawv kom thov Vajtswv muab fij tseg, uas nws tau txais los ntawm kev tshwm sim lawm (saib Lus Qhuab Qhia thiab Kev Khi Lus 109). Nyob hauv zaj lus thov ntawd nws piav txog cov koob hmoov zoo kawg nkaus uas yuav los rau cov neeg uas tsim nyog nkag mus haud tus Tswv lub tuam tsev. Ces pawg hu nkauj tau hu zaj nkauj “Vajtswv tus Ntsuj Plig” thiab pawg ntseeg sawv Qw Hauxanas “muaj zog zis cuag li … yuav tsa lub ru tsev rau ntawm lub tsev” (Teachings of Presidents of the Church: Joseph Smith [2007], 307).

Ib lub lim tiam tom qab ntawd tus Yaj Saub tau piav txog qhov uas tus Tswv tau tshwm sim hauv lub tuam tsev, thiab hais tias:

“Vim saib seb, kuv tau txais yuav lub tsev no, thiab kuv lub npe yuav nyob ntawm no; thiab kuv yuav ua kuv tus kheej tshwm sim los rau kuv cov neeg los ntawm txoj kev hlub tshua rau hauv lub tsev no. …

“Thiab lub suab npe ntawm lub tsev no yuav nthuav mus rau pej kum teb chaws; thiab qhov no yog qhov pib ntawm txoj koob hmoov uas yuav muab nplua mias foom rau saum kuv cov neeg taub hau” (Lus Qhuab Qhia thiab Kev Khi Lus 110:7, 10).

Tom qab nws txais kev ua yog toog no, Eliyas yog tus yaj saub uas tus Tswv coj mus saum ntuj ceeb tsheej lawm nws tsis tau tuag li, es Eliyas tshwm sim rau tus Yaj Saub Joseph Smith thiab Oliver Cowdery pom thiab hais tias:

“Saib seb, lub sij hawm tau los txhij tag lawm, uas Malakis lub qhov ncauj tau hais—ua tim khawv hais tias yuav xa [Eliyas] [uas yog tus yaj saub] los, ua ntej hnub tseem ceeb thiab txaus ntshai heev ntawm tus Tswv yuav los—

“Kom muab cov txiv lub siab tig mus rau cov me nyuam, thiab cov me nyuam mus rau cov txiv, nyob tsam tag nrho neeg ntiaj teb yuav raug kev foom tsis zoo—

“Yog li ntawd, muab cov yawm sij ntawm lub caij nyoog tso txoj cai no cob rau hauv neb txhais tes; thiab los ntawm qhov no neb yuav paub hais tias twb yuav txog hnub tseem ceeb thiab txaus ntshai heev ntawm tus Tswv lawm, twb txog ntawm taw rooj” (Lus Qhuab Qhia thiab Kev Khi Lus 110:14–16).

Tom qab tus Tswv muab cov yawm sij ua kev cai sib khi txum tim rov qab los rau Joseph Smith, ces twb pib txoj hauj lwm cawm seej nyob ob sab ntawm daim ntaub thaiv hauv peb lub caij nyoog tso txoj cai (saib 1 Kauleethaus 15:22, 29; Lus Qhuab Qhia thiab Kev Khi Lus 128:8–18).

Thawj Tswj Hwm Boyd K. Packer qhia tias “lub sij hawm tseem ceeb no los neeg ntiaj teb tsis quav ntsej txog, tiam sis twb hloov txoj hmoov ntawm txhua tus neeg uas tau ua neej nyob los sis yuav ua neej. Twb pib ua tej yam twj ywm xwb. Lub Koom Txoos no tau hloov los ua ib lub koom txoos uas ua tej lub tuam tsev.

“Nyob hauv lub ntiaj teb no nyob ub nyob no, sawv daws xav tias twb lam tshwm sim li no, tib neeg thiab tej lub koom haum pib xav nrhiav lawv caj ceg. Twb muaj li no txij thaum Eliyas tau tshwm sim nyob hauv lub Tuam Tsev Kirtland” (The Holy Temple [1980], 141).

“Txij thaum hnub ntawd, lub Peb Hlis Ntuj hnub tim 3, xyoo 1836, cov me nyuam lub siab pib tig mus rau lawv poj koob yawm txwv. Tom qab ntawd twb tau ua cov kab ke kom mus ib txhis li. Peb twb muaj lub hwj chim ua kev cai sib khi lawm. Tsis muaj ib txoj kev tso cai uas muaj nqis tshaj. Lub hwj chim ntawd ua rau txhua txoj kab ke uas ua raws li txoj cai yog lawm kav ib txhis rau cov neeg ciaj thiab cov neeg tuag huv tib si (Preparing to Enter the Holy Temple [2002], 28).

Cov kwv tij thiab cov muam, kev ua thiab kev siv cov tuam tsev hauv yeej yog ib lub cim txog Yexus Khetos lub Koom Txoos tseeb nyob hauv txhua lub caij nyoog tso txoj cai. Tom qab tau muab lub Tuam Tsev Salt Lake fij tseg nyob rau xyoo 1983, Thawj Tswj Hwm Wilford Woodruff tau hais kom cov mej zeej ntawm lub koom txoos nrhiav lawv cov poj koob yawm txwv cov ntaub ntawv thiab ceev lawv tej caj ceg cia kom puag thaum ub thiaj li yuav muaj npe uas nqa tau rau lub tuam tsev thiab ua cov kab ke ntawm txoj kev cawm seej thiab kev tsa nto (saib Teachings of Presidents of the Church: Wilford Woodruff [2004], 174).

Ib xyoos tom qab ntawd (1894), tus Thawj Tswj Hwm Woodruff ntawd twb saib xyuas txoj kev txhim tsa lub koom haum Genealogical Society of Utah. Ib puas xyoo tom qab ntawd, nyob rau xyoo 1994, Txwj Laug Russell M. Nelson, uas thaum ntawd nyob hauv Pawg Kaum Ob tug Thwj Tim hais tias, “Tej yam uas tshwm sim nyob rau xyoo ntawd twb txhim tsa qhov uas kev nrhiav tsev neeg zaj keeb kwm thiab kev ua hauj lwm hauv lub tuam tsev yog tib txoj hauj lwm nyob hauv lub Koom Txoos” (“The Spirit of Elijah,” Ensign, Kaum Ib Hlis Ntuj 1994, 85).

Cov kwv tij thiab cov muam, tus Tswv hais kom peb cov mej zeej hauv Nws lub Koom Txoos kom ceev peb tsev neeg zaj keeb kwm cia, kawm los ntawm peb cov poj koob yawm txwv, thiab npaj tej yam kom lawv txais tau cov kab ke ntawm txoj moo zoo nyob hauv lub tuam tsev pab lawv taug txoj kev ua raws li lawv tej kev khi lus, uas yuav foom koob hmoov rau lawv ua ib tsev neeg mus ib txhis li. Nov yog ib yam uas tseem ceeb heev nyob hauv peb Leej Txiv Saum Ntuj Ceeb Tsheej txoj hau kev: kev muab txhua tsev neeg sib khi hauv lub neej no thiab mus ib txhis li.

Rau nej cov uas xav tias nej tsis txawj ua txoj hauj lwm no, nej yuav tsum paub tias nej tsis nyob nej ib leeg xwb. Peb txhua tus muaj peev xwm siv tej cuab yeej uas lub Koom Txoos tau npaj thiab nyob hauv tej qhov chaw FamilySearch, uas peb ib txwm hu ua qhov chaw nrhiav tsev neeg zaj keeb kwm. Twb tau tsim tej qhov chaw FamilySearch kom txhua leej txhua tus tuaj tau thiab tsis tas muaj leej twg pab ntau, es lawv nrhiav tau lawv cov poj koob yawm txwv cov xov xwm thiab npaj kom coj mus rau tus Tswv lub tsev. Thov nrog cov kws paub nrhiav tsev neeg zaj keeb kwm nyob hauv nej pawg ntseeg los sis ceg ntseeg tham es lawv yuav coj koj mus kom paub ua txhua yam.

Thaum peb ua raws li cov yaj saub qhia thiab kawm nrhiav peb tsev neeg zaj keeb kwm thiab ua cov kab ke rau peb cov poj koob yawm txwv, peb yuav muaj kev xyiv fab heev ua rau peb thiaj li xav ua tsis tu tsis tseg. Tus Ntsuj Plig yuav puv peb lub siab, tshoov peb lub siab kom txawj ua, thiab coj peb kev thaum peb nrhiav peb cov poj koob yawm txwv lub npe. Tiam sis cia peb nco ntsoov tias kev nrhiav tsev neeg zaj keeb kwm tsis yog kev nrhiav tej npe, tej hnub, thiab tej qhov chaw xwb. Yog txoj hauj lwm muab tsev neeg sib khi ua ke thiab muaj kev xyiv fab uas los ntawm txoj kev ua kab ke ntawm txoj moo zoo rau pub rau lawv.

Kuv nyiam peb tus yaj saub, Thawj Tswj Hwm Russell M. Nelson, tej lus qhia uas hais tias: “Lub tuam tsev yeej txhawb nqa peb txoj kev ntseeg thiab tiv thaiv peb sab ntsuj plig vim tus Cawm Seej thiab Nws cov lub qhuab qhia yog lub ntsiab ntawm lub tuam tsev. Txhua yam uas peb kawm hauv lub tuam tsev, los ntawm tej lus qhia thiab los ntawm tus Ntsuj Plig, yuav pab peb to taub txog Yexus Khetos ntxiv. Nws cov kab ke khi peb rau Nws los ntawm tej kev khi lus pov thawj hwj uas dawb ceev. Ces thaum peb ua raws li peb tej kev khi lus, Nws pub ntxiaj ntsim rau peb los ntawm Nws lub hwj chim uas txhawb peb dag zog” (“Lub Tuam Tsev thiab lub Hauv Paus rau Nej Sab Ntsuj Plig,” Liahona, Kaum Ib Hlis Ntuj 2021, 93–94).

Muaj tseeb tiag, txoj hauj lwm hauv lub tuam tsev thiab kev nrhiav tsev neeg zaj keeb kwm yog tib txoj hauj lwm hauv lub Koom Txoos.

Kuv ua tim khawv txog tej lus tseeb no. Kuv paub tias nov yog lub Koom Txoos ntawm tus Tswv Yexus Khetos, peb tus Cawm Seej thiab tus Txhiv Dim, tus uas peb hwm thiab nco txog hauv lub caij Easter no. Kuv paub tias Nws hlub peb, thiab thaum peb ua raws li peb tej kev khi lus thiab tso siab rau Nws, Nws muab txiaj ntsim rau peb uas yog Nws lub hwj chim kho mob thiab txhawb zog. Los ntawm Yexus Khetos lub npe, amees.