Koom Ib lub Siab nrog Khetos

Raws li Thawj Tswj Hwm Dallin H. Oaks hais, hnub no yog Hnub Caiv Toov Laj, thaum lub Lim Tiam Dawb Huv pib, yog lub sij hawm nco txog thaum tus Tswv mus rau Yeluxalees, Nws txoj kev raug txom nyem nyob hauv Khexemanes thiab kev tuag saum tus ntoo khaub lig tom qab ntawd, thiab Nws txoj kev Sawv Rov Los thaum Hnub Caiv Easter. Thov kom peb nco ntsoov txog tej uas Yexus Khetos raug kom txhiv peb dim.¹ Thiab thov kom peb tsis txhob poob txoj kev xyiv fab uas peb yuav muaj nyob rau hnub Easter thaum peb xav txog Nws txoj kev kov yeej lub ntxa thiab lub txiaj ntsim rau txhua tus uas yog kev sawv rov los.

Hmo ua ntej Nws raug tej kev sim siab thiab raug ntsia saum ntoo khaub lig, Yexus tau noj ib pluas mov rau Kev Cai Hla Dhau nrog Nws cov Thwj Tim. Thaum yuav xaus Pluas Mov Zaum Kawg no, thaum Nws thov Vajtswv, Yexus tau thov Nws Txiv li no hais tias: “Leej Txiv tus uas Dawb Huv! Thov koj tsom kwm lawv ntawm koj lub npe uas muaj hwj chim, kom lawv thiaj yuav koom ib lub siab ib yam li koj thiab kuv koom ib lub siab.”²

Ces, tus Cawm Seej tau thov kom pab tag nrho cov uas ntseeg Nws thiab:

“Tsis yog kuv thov koj pab cov neeg no xwb, tiam sis kuv thov koj pab cov neeg uas hnov tej lus uas lawv qhia thiab los ntseeg kuv.

“Kom lawv koom ib lub siab. Txiv, thov cia lawv nyob hauv wb, ib yam li koj nyob hauv kuv thiab kuv nyob hauv koj; thov koj pab kom lawv ua tau ib lub siab.”³

Kev koom siab yog ib lub ntsiab ntawm Yexus Khetos txoj moo zoo thiab Vajtswv txoj kev qhia Nws cov me nyuam. Hais txog lub nroog Xi-oos nyob hauv Enauj lub caij nyoog, cov vaj lug kub hais tias lawv “koom ib siab thiab ib ntsws.”⁴ Hais txog Haiv Neeg Ntseeg hauv Yexus Khetos lub Koom Txoos thaum ub, Phau Tshiab hais tias, “Cov ntseeg txhua tus puav leej koom ua ib lub siab.”⁵

Nyob hauv peb lub caij nyoog, tus Tswv qhuab ntuas hais tias, “Kuv hais rau nej tias, cia li ua ib lub siab; thiab yog nej tsis ua ib lub siab ces nej tsis yog kuv li.”⁶ Tus Tswv kuj tau qhia vim li cas Haiv Neeg Ntseeg nyob hauv Missouri tsis tau txhim tsa Xi-oos vim lawv “tsis sib koom siab raws li kev koom siab uas txoj kev cai ntawm lub nceeg vaj xilethi-aus qhia tias yuav tsum muaj.”⁷

Thaum Vajtswv yeej hauv txhua lub siab, ces cov vaj lug kub hais tias cov neeg “lawv … ua ib pab, yog Khetos cov me nyuam.”⁸

Thaum tus Cawm Seej uas sawv rov los tshwm sim rau cov neeg hauv Phau Ntawv Maumoos thaum ub, Nws tsis pom zoo hais tias twb muaj kev sib cav sib ceg hauv cov neeg txog txoj kev ua kev cai raus dej thiab lwm yam. Nws txib tias:

“Thiab tsis txhob cia muaj kev sib cav nyob hauv nej, ib yam li tau muaj yav tas los; thiab tsis txhob cia muaj kev sib cav nyob hauv nej ntsig txog kuv tej lus qhuab qhia, ib yam li tau muaj yav tas los.

“Vim kuv hais tseeb tseeb rau nej tias, tus uas muaj siab xav sib cav sib ceg twb tsis yog los ntawm kuv, tiam sis yog los ntawm tus dab phem, tus uas yog leej txiv ntawm kev sib cav sib ceg, thiab nws txhaub neeg lub siab kom ib leeg sib cav sib ceg npau taws rau ib leeg”⁹

Nyob hauv ib lub ntiaj teb uas nyiam sib cav sib ceg, yuav ua li cas kom koom siab koom ntsws, qhov tseem ceeb nyob hauv lub Koom Txoos vim peb yuav tsum muaj “tib tug Tswv, muaj tib txoj kev ntseeg, thiab muaj tib txoj kev cai raus dej xwb”?¹⁰ Povlauj qhia tias yuav tsum ua li cas:

“Nej twb ua kev cai raus dej rau sawv daws pom lawm hais tias, nej yog cov uas nrog Yexus Khetos koom ib txoj sia, nej thiaj coj tau nej tus yam ntxwv zoo ib yam li Yexus Khetos tus.

“Yog li ntawd, nej txhua tus uas nrog Yexus Khetos koom ib txoj sia, tsis hais cov Yudais los sis lwm haiv neeg, cov uas ua qhev los sis cov uas tsis ua qhev, tsis hais poj niam los sis txiv neej, nej txhua tus puav leej. koom ib lub siab rau ntawm Yexus Khetos.”¹¹

Peb nyias txawv nyias dhau thiab tej lub sij hawm tsis sib haum xeeb txaus kom los koom siab nrog lwm yam los sis raws li lwm lub npe. Tsuas yog los ntawm Yexus Khetos peb thiaj li yuav koom siab tiag.

Kev koom ib lub siab nrog Khetos los ua ib tug dhau ib tug—peb txhua tus pib ntawm peb tus kheej. Peb yog cov neeg uas muaj sab cev nqaij daim tawv thiab sab ntsuj plig thiab tej lub sij hawm peb tawm tsam peb tus kheej. Raws li Povlauj hais tias:

“Kuv muaj ib lub siab xav ua raws li Vajtswv txoj kev cai;

“Tiam sis kuv pom hais tias kuv muaj dua ib lub siab tawm tsam txoj kev cai uas nyob hauv kuv lub siab. Lub siab ntawd thiaj yuam kuv mus ua txoj kev txhaum qhev.”¹²

Yexus kuj muaj sab cev nqaij daim tawv thiab sab ntsuj plig. Nws raug kev sim siab; Nws to taub; Nws pab tau peb koom siab koom ntsws.¹³ Yog li ntawd, thaum peb siv Khetos txoj kev kaj thiab txoj kev tshav ntuj, peb thiaj li sim cia peb sab ntsuj plig—thiab tus Vaj Ntsuj Plig Dawb Huv—kav peb sab cev nqaij daim tawv. Ces thaum peb ua yuam kev, Yexus Khetos, los ntawm Nws txoj Kev Theej Txhoj, tau muab lub txiaj ntsim kev hloov siab lees txim thiab lub cim fim rau peb rov qab sim dua ntxiv.

Yog tias peb nyias “coj [nyias] tus yam ntxwv zoo ib yam li Yexus Khetos,” ces nyob ua ke peb yuav cia siab tias peb yuav koom siab, ib yam li Povlauj hais tias, peb yog “Khetos lub cev.”¹⁴ Kev “coj yam ntxwv zoo ib yam li Yexus Khetos” txhais tias peb cog lus tias peb yuav ua raws li Nws “thawj txoj lus txib uas tseem ceeb tshaj”¹⁵ uas yog peb txo kev cog lus tseem ceeb tshaj plaws, thiab yog peb hlub Vajtswv, peb yuav ua raws li Nws cov lus txib.¹⁶

Kev koom siab nrog peb cov kwv tij thiab cov muam uas koom nrog Khetos lub cev yuav loj tuaj thaum peb ua raws li txoj lus txib tseem ceeb thib ob—uas txuas rau thawj txoj lus txib—kom hlub lwm tus ib yam li peb hlub peb tus kheej.¹⁷ Thiab nyaj kev koom siab uas haj yam zoo dua yuav los rau peb yog tias peb ua raws li tus Cawm Seej txoj kev siab dua thiab dawb huv dua ua raws li txoj lus txib thib ob—kom hlub lwm tus ib yam li peb hlub peb tus kheej thiab raws li Nws hlub peb.¹⁸ Los yog hais tias, “txhua tus neeg nrhiav qhov zoo rau nws tus neeg zej zog, thiab ua txhua yam nrog lub qhov muag ntsia ntsoov rau Vajtswv lub yeeb koob.”¹⁹

Thawj Tswj Hwm Marion G. Romney, ib tug pab cuam hauv Thawj Pawg Thawj Tswj Hwm, tau piav tias yuav tsum ua li cas kom muaj kev kaj siab thiab kev koom siab uas kav ntev, hais tias:

“Yog tias ib tug neeg, ywj rau Dab Ntxwg Nyoog, ua raws li sab cev nqaij daim tawv xwb, ces nws tawm tsam nws tus kheej. Yog tias muaj ob tug neeg ywj li ntawd, ces nkawd tawm tsam nkawd tus kheej thiab ib leeg tawm tsam ib leeg. Yog tias muaj neeg coob ywj, ces tag nrho cov neeg [raug] kev nyuaj siab txhawj xeeb thiab sib cav sib ceg. Yog tias cov thawj coj hauv ib lub teb chaws ywj, ces muaj kev sib cav thoob plaws lub ntiaj teb.”

Thawj Tswj Hwm Romney hais ntxiv tias: “Vim tej uas ua los ntawm sab cev nqaij daim tawv hloov tau tag nrho txhua yam, txoj moo zoo kuj ua tau li ntawd thiab. Yog tias ib tug neeg ua nej raws li txoj moo zoo, nws nyob kaj siab lug. Yog tias ob tug neeg ua raws li txoj moo zoo, lawv yuav nyob kaj siab lug thiab ib leeg xav zoo txog ib leeg. Yog cov pej zeem ua li no, ces lub teb chaws muaj kev thaj yeeb. Thaum muaj tej lub teb chaws uas txais tus Ntsuj Plig txaus kom kav tej xwm hauv lub ntiaj teb, ces, tsuas yog thaum lub sij hawm ntawd xwb, yuav tso kev tsov kev rog tseg, thiab yuav muab cov chij ua rog kauv kom tso tseg. … (Saib Alfred Lord Tennyson, “Locksley Hall,” The Complete Poetical Works of Tennyson, tus kho ntawv yog W. J. Rolfe, Boston: Houghton-Mifflin Co., 1898, phab 93, kab lus 27–28.)”²⁰

Thaum peb “coj yam ntxwv zoo ib yam li Yexus Khetos,” peb muaj peev xwm muab tej kev sib cav sib ceg tso tseg. Ib zaj lus hauv lub Koom Txoos zaj keeb kwm yog kev qhia piv txwv txog kev kov yeej tej kev sib cav li no. Txwj Laug Brigham Henry Roberts (feem coob hu nws ua B. H. Roberts), uas yug los nyob hauv Askiv Teb nyob rau xyoo 1857, yog ib tug mej zeej hauv Thawj Pawg Xya Caum—hnub no peb hu pawg no ua Pawg Thawj Tswj Hwm rau cov Xya Caum. Txwj Laug Roberts yog ib tug uas tiv thaiv txoj moo zoo thiab lub Koom Txoos thaum raug tej xwm txheej nyuaj heev.

Daim Duab

B. H. Roberts thaum hluas

Tiam sis nyob rau xyoo 1895, Txwj Laug Roberts txoj hauj lwm hauv lub Koom Txoos raug xwm txheej vim tias muaj kev sib cav. B. H. yog ib tug sawv cev rau lub rooj sab laj kom tsim ib daim ntawv txhooj lij choj rau Utah kom ua tau ib lub xeev. Ces tom qab ntawd nws txiav txim siab los ua ib tug sib tw ua tus uas neeg xaiv tsa hauv lub Teb Chaws Amelikas Pawg Tsim Kev Cai tiam sis nws tsis tau qhia Thawj Pawg Thawj Tswj Hwm los sis thov kom lawv pom zoo. Thawj Tswj Hwm Joseph F. Smith, ib tug pab cuam hauv Thawj Pawg Thawj Tswj Hwm, tau cem B. H. rau qhov ntawd nyob hauv kev sib ntsib pov thawj hwj. Cov neeg tsis tau xaiv tsa Txwj Laug Roberts thiab nws xav tias nws swb vim yog los ntawm Thawj Tswj Hwm Smith tej lus. Nws cem lub Koom Txoos cov thawj coj thaum nws hais lus txog tseem fwv thiab thaum muab nws xam phaj. Nws tsis tshua mus rau lub Koom Txoos npaum li qub. Nyob hauv kev sib ntsib hauv lub Tuam Tsev Salt Lake nrog cov neeg hauv Thawj Pawg Thawj Tswj Hwm thiab Pawg Kaum Ob tug Thwj Tim, B. H. siv zog hais tias nws tsis tau ua txhaum. Tom qab ntawd, “Thawj Tswj Hwm [Wilford] Woodruff cia [Txwj Laug Roberts] muaj peb lub lim tiam kom hloov siab. Yog tias nws tsis hloov siab lees txim, ces yuav muab nws tso Pawg Xya Caum tawm.”²¹

Tom qab muaj kev sib ntsib nrog ob tus Thwj Tim Heber J. Grant thiab Francis Lyman, B. H. thaum xub thawj nws tsis ywj hlo li, tiam sis thaum kawg kev sib hlub thiab tus Vaj Ntsuj Plig Dawb Huv yeej. Nws los kua muag. Ob tug Thwj Tim no tau hais txog tej kev tu siab thiab tej lus cem uas ua rau B. H. nyuaj siab thiab thaum kawg lawv twb muaj siab xav rov qab sib haum xeeb. Tag kis ntawd, tom qab nws thov Vajtswv, ntev, Txwj Laug Roberts tau xa ib tsab ntawv rau Txwj Laug Grant thiab Lyman qhia tias nws npaj siab rov qab nrog nws cov kwv tij koom ua ke.²²

Thaum nws ntsib Thawj Pawg Thawj Tswj Hwm, Txwj Laug Roberts hais tias, “Kuv tau mus thov tus Tswv thiab txais txoj kev kaj thiab tej lus qhia dhau los ntawm Nws tus Ntsuj Plig kom ywj rau Vajtswv txoj cai.”²³ Vim nws hlub Vajtswv, B. H. Roberts tau ua ib tug thawj coj hauv lub Koom Txoos uas rau siab ntseeg thiab muaj peev xwm mus tas nws lub neej.²⁴

Daim Duab

Txwj Laug B. H. Roberts

Peb kuj pom los ntawm zaj no hais tias kev koom siab tsis yog qhov uas sawv daws pom zoo ib yam hais tias sawv daws yuav tsum nyias ua nyias los sis mus ua raws li nws lub siab nyiam xwb. Peb yuav tsis koom ib lub siab tsuas yog peb sawv daws sib zog ua tib txoj hauj lwm xwb. Yuav tsum ua raws li B. H. Roberts tej lus, ywj rau Vajtswv txoj cai. Peb txhua tus yog ib feem ntawm Khetos lub cev, uas nyias muaj nyias tej hauj lwm ua thaum tej lub sij hawm—pob ntseg, qhov muag, taub hau, txhais tes, txhais ko taw—tiam sis koom ib lub cev.²⁵ Yog li ntawd, peb lub hom phiaj yog kom “lub cev sib faib tsis tau, rau qhov txhua yam ntawd ib yam yeej pab ib yam.”²⁶

Kev koom siab tsis yuam kom txhua tus sib luag zos, tiam sis yeej yuav tsum nyob sib haum xeeb. Peb ib tug yuav tsum hlub ib tug, koom siab ntseeg thiab koom siab ua raws li cov lus qhuab qhia, tiam sis tsis tas txhawb nqa tib pawg sib tw ntaus pob, tsis tas xav zoo ib yam txog tej kev coj tseem fwv, thaum cuab hom phiaj thiab ua tej ntawd, thiab lwm yam li ntawd. Tiam sis peb yuav tsum tsis txhob ua li ntawd nrog kev chim siab los yog kev sib ntxub. Tus Cawj Seej hais tias:

“Vim kuv hais tseeb tseeb rau nej tias, tus uas muaj siab xav sib cav sib ceg twb tsis yog los ntawm kuv, tiam sis yog los ntawm tus dab phem, tus uas yog leej txiv ntawm kev sib cav sib ceg, thiab nws txhaub neeg lub siab kom ib leeg sib cav sib ceg npau taws rau ib leeg.

“Saib seb, nov tsis yog kuv txoj lus qhuab qhia, uas txhaub neeg lub siab kom npau taws, ib leeg tawm tsam ib leeg; tiam sis qhov no yog kuv txoj lus qhuab qhia, kom tsis txhob muaj tej ntawd.”²⁷

Ib xyoo tas los, Thawj Tswj Hwm Russell M. Nelson tau thov peb li no hais tias: “Tsis muaj ib tug neeg uas kav tau tej yam uas lwm lub teb chaws los sis lwm tus neeg los sis lwm tus hauv peb tsev neeg yuav ua. Tiam sis peb kav taus peb tus kheej. Kuv hais kom nej, kuv cov kwv tij thiab cov muam, muab tej kev tsis sib haum uas ntxhov hnyo hauv nej lub siab, nej tsev neeg, thiab nyob hauv nej lub neej tso tseg. Muab txhua yam kev xav ua rau lwm tus mob tso tseg—tsis hais kev chim siab, kev hais lus cem, los yog kev ntxub lwm tus vim nws ua rau nej tu siab los. Tus Cawm Seej txib kom peb tig lwm sab plhu rau lawv ntaus thiab [saib 3 Nifais 12:39], hlub peb cov yeeb ncuab, thiab thov Vajtswv pab cov uas siv peb kom ua tsis zoo [saib 3 Nifais 12:44].”²⁸

Kuv rov qab hais dua ntxiv tias tsuas yog peb txoj kev muab siab npuab Yexus Khetos thiab txoj kev hlub Nws peb thiaj li yuav muaj kev cia siab tias peb yuav koom siab koom ntsws—koom siab ntawm peb tus kheej, koom siab hauv tsev, koom siab hauv lub Koom Txoos, koom siab nyob hauv Xi-oos, thiab qhov tseem ceeb tshaj plaws, koom siab nrog Leej Txiv thiab Leej Tub thiab tus Vaj Ntsuj Plig Dawb Huv.

Kuv rov qab hais txog lub Lim Tiam Dawb Huv thiab kev muaj yeej ntawm peb tus Txhiv Dim. Yexus Khetos txoj Kev Sawv Rov Los ua tim khawv txog qhov uas Nws los saum ntuj los thiab Nws tau kov yeej txhua yam. Nws txoj Kev Sawv Rov Los ua tim khawv tias, vim peb nrog Nws khi lus, peb kuj yuav kov yeej txhua yam thiab koom ib lub siab. Nws txoj Kev Sawv Rov Los ua tim khawv tias los ntawm Nws, peb yuav muaj kev tsis txawj tuag thiab txoj sia nyob mus ib txhis los tau.

Tag kis no, kuv ua tim khawv txog Nws txoj Kev Sawv Rov Los thiab txhua yam uas muaj los ntawm qhov ntawd, los ntawm Yexus Khetos lub npe, amees.