Nrhiav Kom Tau Kev Nyob Kaj Siab Lug

Kuv cov kwv tij thiab cov muam, peb tau koob hmoov vim yog tej lus qhia thiab cov suab nkauj zoo nkauj uas tau txhawb nqa peb tuas thib ib ntawm lub tuam rooj sab laj no. Peb ua nej tsaug vim nej koom tes pab ua hauj lwm thiab nej muaj kev ntseeg.

Hnub no kuv yuav hais lus pub rau nej hais txog tej yam uas kuv tau kawm txog txoj kev nrhiav kom tau kev nyob kaj siab lug, txawm peb ua neej nyob li cas los xij. Tus Cawm Seej paub hais tias tag nrho Leej Txiv Saum Ntuj Ceeb Tsheej cov me nyuam xav kom tau kev nyob kaj siab lug, thiab Nws hais tias Nws yuav muab tau qhov kev nyob kaj siab lug ntawd rau peb. Nco qab txog Yexus Khetos cov lus uas sau tseg hauv phau ntawv Yauhas: “Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”¹

Saib Nws hais li cas txog kev kaj siab lug thiab saib Nws yuav ua li cas muab pub rau peb kawm tau los ntawm cov neeg uas hnov Nws hais cov lus ntawd. Cia li mloog cov lus uas Yauhas sau hais txog txoj kev xaus Khetos tej hauj lwm qhuab qhia. Tej kev phem tab tom nyob ib ncig ntawm Nws thiab tsis ntev yuav tawm tsam Nws cov thwj tim thiab.

Nov yog tus Cawm Seej cov lus:

“Yog nej hlub kuv, nej yeej yuav ua raws li kuv tej lus [txib].

“Kuv yuav thov Leej Txiv, thiab nws yuav txib dua ib tug [Nplij Siab] los, tus ntawd yuav nrog nej nyob mus ib txhis;

“Nws yog Vaj Ntsuj Plig, nws yuav qhia Vajtswv zaj uas yog qhov tseeb rau nej. Neeg ntiaj teb tsis lees yuav nws, rau qhov lawv tsis pom nws los sis tsis paub nws. Tiam sis nej paub nws, rau qhov nws nrog nej nyob thiab nws yuav nyob hauv nej lub siab.

“Kuv yuav tsis tso nej ua ntsuag ib zaug li; kuv yuav rov qab los cuag nej.

“Tshuav tsis ntev neeg ntiaj teb yuav tsis pom kuv lawm, tiam sis nej yuav pom kuv; nej yuav muaj txoj sia nyob, rau qhov kuv muaj txoj sia nyob.

“Thaum txog hnub ntawd nej yuav paub hais tias kuv nyob hauv Leej Txiv thiab nej nyob hauv kuv ib yam li kuv nyob hauv nej.

“Tus uas lees yuav kuv tej lus qhia thiab ua raws li tej lus ntawd, tus ntawd yog tus uas hlub kuv. Tus uas hlub kuv, kuv Txiv yuav hlub tus ntawd; kuv yuav hlub tus ntawd thiab qhia kuv rau nws paub.

“Yudas, tus uas tsis yog Yudas Ixakali-us, hais tias, Tus Tswv, ua li cas koj yuav qhia koj rau peb paub xwb, koj ho tsis qhia koj rau neeg ntiaj teb paub?

“Yexus teb Yudas hais tias, Tus uas hlub kuv yeej ua raws li kuv tej lus qhia. Kuv Txiv yuav hlub tus ntawd; kuv Txiv thiab kuv yuav los cuag nws thiab nrog nws nyob.

“Tus uas tsis hlub kuv yeej tsis ua raws li kuv tej lus qhia. Thiab tej lus uas nej hnov kuv qhia ntawd tsis yog kuv tej lus tiam sis yog Leej Txiv tus uas txib kuv los tej lus.

“Nim no kuv tseem nrog nej nyob, kuv thiaj qhia tej no rau nej.

“Tus [Nplij Siab] uas yog tus Vaj Ntsuj Plig tus Dawb Huv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm.

“Kuv muab kuv txoj kev kaj siab tso rau nej; txoj kev kaj siab uas kuv muab pub rau nej, kuv tsis muab rau nej li neeg ntiaj teb muab. Nej tsis txhob txhawj, tsis txhob nyuaj siab thiab tsis txhob ntshai.”²

Kuv tau kawm txog tsib qho tseeb los ntawm tus Cawm Seej cov lus qhia no.

Qhov thib ib, lub txiaj ntsim kev kaj siab lug yog muab tom qab peb muaj siab ntseeg ua raws li Nws cov lus txib. Rau lawv cov uas yog cov ntseeg tus Tswv lub Koom Txoos thiab tau khi lus lawm, peb kuj tau cog lus tias peb yuav mloog lus.

Qhov thib ob, tus Vaj Ntsuj Plig Dawb Huv yuav los nrog peb nyob. Tus Tswv hais tias, thaum peb rau siab muaj siab ntseeg, tus Vaj Ntsuj Plig Dawb Huv yuav nrog peb nyob ua ke. Nov yog lus cog tseg hauv zaj lus thov Vajtswv foom koob hmoov rau lub cim nco txog hais tias tus Ntsuj Plig yuav nrog peb nyob ua peb luag thiab hais tias peb yuav hnov, hauv peb lub siab lub ntsws, Nws txoj kev nplij siab.

Qhov thib peb, tus Cawm Seej cog lus hais tias thaum peb ua raws li peb tej kev khi lus, peb yuav hnov tau Leej Txiv thiab Leej Tub txoj kev hlub rau peb. Peb hnov tau qhov uas Vajtswv thiab Nws Leej Tub nkawd nyob ze rau peb hauv peb lub neej, ib yam li thaum peb yuav tau koob hmoov nrog Nkawd nyob mus ib txhis li.

Qhov thib plaub, qhov uas peb ua raws li tus Tswv cov lus txib yeej yog ntau tshaj qhov uas mloog lus xwb. Peb yuav tsum hlub Vajtswv kawg siab kawg ntsws kawg plab kawg plawv.³

Cov uas tsis hlub Nws tsis ua raws li Vajtswv cov lus txib. Thiab yog li ntawd lawv yuav tsis muaj qhov kev nyob kaj siab lug hauv lub neej no thiab lub neej nyob mus ib txhis li.

Qhov thib tsib, yeej meej meej uas tus Tswv hlub peb txhua tus txaus them tus nqi rau peb tej kev txhaum xwv kom peb yuav—dhau ntawm peb txoj kev ntseeg Nws thiab peb qhov kev hloov siab lees txim—muaj lub txiaj ntsim nyob kaj siab lug uas “xav tsis thoob li,”⁴ hauv lub neej no thiab nrog Nws nyob mus ib txhis li.

Tej zaum, nej ib txhia tsis hnov qhov kev kaj siab lug uas tus Tswv cog lus tias yuav muab. Tej zaum nej tau thov Vajtswv kom tau kev kaj siab lug thiab kev nplij siab ntawm sab ntsuj plig. Tej zaum nej yuav xav tias lub ntuj tsis fim nej tej kev thov kom tau kev pab.

Muaj ib tug yeeb ncuab tawm tsam nej sab ntsuj plig uas tsis xav cia nej, los sis cov uas nej hlub, nrhiav tau kev kaj siab lug. Nws yeej nyob kaj siab lug tsis tau li. Nws rau rau siab kom tab kaum nej kom nej tsis xav nrhiav kom tau kev kaj siab lug los ntawm tus Cawm Seej thiab Leej Txiv Saum Ntuj Ceeb Tsheej los uas nkawd xav muab pub rau nej.

Dab Ntxwg Nyoog tej kev tseb tej kev ntxub ntxaug thiab tej kev sib cav sib ceg loj hlob tuaj ib ncig ntawm peb. Peb pom tias muaj li no hauv tej teb chaws thiab tej nroog, tej koog chaw nyob, hauv koospistawj, thiab nyob thoob plaws ntiaj teb no.

Tiam sis yeej muaj qhov kev cia siab thiab: twb yog qhov uas tus Khetos txoj Kev Kaj nyob hauv txhua tus me nyuam uas yug los. Ua ke nrog lub txiaj ntsim ntawd yog qhov uas yus paub qhov yog thiab qhov tsis yog, thiab yus xav muaj siab hlub lwm tus neeg thiab xav kom lwm tus neeg hlub yus thiab. Vajtswv txhua tus me nyuam yeej muaj ib txoj kev txim lij thiab ib qho tseeb nyob hauv lawv lub siab lub ntsws thaum lawv yug los.

Qhov uas peb cia siab tias cov me nyuam no yuav tau kev kaj siab lug yog vim peb cia siab rau cov niam txiv los sis cov neeg uas saib xyuas thiab tu lawv. Yog tias cov niam txiv los sis cov neeg zov no tau ua hauj lwm kom thiaj txais tau lub txiaj ntsim kev kaj siab lug los ntawm tus Cawm Seej, lawv yuav, vim yog lawv tej hauj lwm thiab tej yam ntxwv, txhawb nqa tus me nyuam txoj kev ntseeg kom thiaj tau kev kaj siab lug ntawd rau nws tus kheej thiab.

Cov vaj lug kub qhia tias, “Qhia me nyuam kom paub ua nws lub neej, nws yuav nco ntsoov tej lus ntawd mus tas nws sim neej.”⁵ Tus neeg uas saib xyuas thiab tu cov me nyuam no yuav tsum tsim nyog thiaj tau lub txiaj ntsim kev kaj siab lug.

Ntxim tu siab, peb txhua tus paub txog qhov mob siab uas los rau cov niam txiv—los sis qee zaum ib leej niam los sis leej txiv xwb—uas tu me nyuam loj hlob thiab cov me nyuam ntawd xaiv txoj kev tu siab es tso txoj kev ntseeg thiab kev kaj siab lug tseg.

Txawm tias yeej muaj li ntawd qee zaum, kuv cia siab rau lwm lub txiaj ntsim los ntawm tus Tswv los. Lub txiaj ntsim yog li no: Nws muaj cov neeg tsim kev nyab xeeb coob tug nyob hauv Nws cov thwj tim. Lawv hnov tau Vajtswv txoj kev hlub thiab kev nyob kaj siab lug. Lawv muaj tus Vaj Ntsuj Plig Dawb Huv hauv lawv tej siab tej ntsws, thiab tus Tswv coj tau lawv mus ntsib cov yaj uas ua loj leeb.

Kuv tau pom hauv kuv lub neej thiab nyob thoob plaws lub ntiaj teb. Nyaj nej tau pom thiab. Qee zaum, thaum tus ntsuj plig coj yus mus pab lwm tus neeg, yeej zoo li tsis yog txhob txwm.

Muaj ib zaug, kuv nug ib tug neeg uas kuv ntsib hais tias, “Koj puas kam qhia kuv me ntsis txog koj tsev neeg?” Wb sib tham es nyob nyob kuv thov saib ib daim duab txog tus niam tsev no tus ntxhais uas twb tiav nkauj lawm, es nws hais tias nws tus ntxhais nyuaj siab. Kuv pom daim duab es xav tias tus ntxhais hauv daim duab ntawd muaj ib lub siab zoo. Muaj dab tsi tshoov kuv lub siab kom nug saib kom tau tus ntxhais qhov email. Thaum lub sij hawm ntawd tus ntxhais ntawd poob zoo es xav paub saib Vajtswv puas muaj lus qhia nws. Nws muaj tiag. Twb yog li no: “Tus Tswv hlub koj. Nws yeej los hlub tiag. Tus Tswv xav kom koj rov qab los. Tseem muaj tej koob hmoov uas cog lus rau koj nyob no.”

Cov ntseeg nyob thoob plaws lub Koom Txoos tau hnov tus Tswv lub txiaj ntsim kev kaj siab lug no. Nws yaum kom txhua tus pab lwm tus neeg muaj tej cib fim los cuag Nws thiab ua neeg tsim nyog txais kev kaj siab lug rau lawv tus kheej thiab. Ces, tom qab no, lawv yuav nrhiav kom tau kev tshoov siab kom thiaj paub saib lawv yuav ua li cas muab lub txiaj ntsim ntawd pub rau lwm tus neeg thiab.

Tiam neeg uas tseem yog me nyuam tam sim no yuav yog cov uas saib xyuas thiab tu tiam neeg tom ntej mus. Ua li no yuav muaj ib qho txuj ci tseem ceeb. Yeej yuav ncha mus thiab loj hlob tuaj, thiab tus Tswv lub nceeg vaj hauv lub ntiaj teb no yuav npaj lawm txais Nws yam zoo siab heev. Yuav muaj kev kaj siab lug hauv lub ntiaj teb.

Kuv ua tim khawv tseeb hais tias tus Cawm Seej muaj txoj sia nyob thiab Nws coj lub Koom Txoos no. Kuv hnov tau Nws txoj kev hlub hauv kuv lub neej thiab Nws txoj kev hlub rau tag nrho Leej Txiv Saum Ntuj Ceeb Tsheej cov me nyuam. Tus Cawm Seej cov lus caw kom los cuag Nws yog kev caw los txais kev kaj siab lug.

Thawj Tswj Hwm Russell M. Nelson yog Vajtswv tus yaj saub rau tag nrho lub ntiaj teb. Nws tau hais tias, “Kuv qhia tseeb rau nej hais tias txawm lub ntiaj teb los sis nej lub neej zoo li cas, los nej tseem cia siab thiab zoo siab txog lub sij hawm yav tom ntej.”⁶

Kuv hlub nej. Nej txoj kev ntseeg thiab kev hlub yeej ncav lwm tus neeg thiab cia tus Tswv hloov lawv tej siab tej ntsws thiab ua li ntawd lawv txais tau lub txiaj ntsim kev kaj siab lug uas xav tsis thoob li.

Kuv thov kom nej txais tau kev kaj siab lug, pab lwm tus nrhiav kom tau, thiab muab kev kaj siab lug pub rau lwm tus neeg. Yeej yuav muaj ib txhiab xyoo kev kaj siab lug thaum tus Tswv rov qab los. Kuv zoo siab hais lus tim khawv li no los ntawm Yexus Khetos lub npe, amees.