Xav Tau cov uas Ua rau Neeg Nyob Sib Haum Xeeb

Kuv cov kwv tij thiab cov muam, kuv zoo siab nrog nej koom ua ke! Rau lub hlis tas los, kuv pheej xav txog nej thiab thov Vajtswv pab nej. Kuv thov kom tus Vaj Ntsuj Plig Dawb Huv yuav qhia nej txog tej yam uas tus Tswv xav kom nej hnov thaum kuv hais lus rau nej tam sim no.

Thaum kuv kawm ua ib tug kws phais mob ntau xyoo tas los, kuv tau pab ib tug kws phais mob uas muab ib txhais ceg muaj nqaij lwj txiav tawm. Kev phais ceg ntawd yeej nyuaj heev. Ces, thaum muaj kev txhawj xeeb ntawd, ib tug hauv pawg phais mob tau ua ib yam tsis zoo, ces tus kws phais mob chim siab kawg. Thaum nws chim chim li ntawd, nws muab nws riam phais mob uas muaj kab mob ntau heev txawb. Twb chob kuv caj npab!

Txhua leej txhua tus nyob hauv chav phais mob—tsuas tsis yog tus kws phais mob uas tswj tsis tau nws tus kheej xwb—xav tsis thoob vim twb ua txhaum kev cai phais mob li no. Zoo siab uas tsis tau kis mob rau kuv. Tiam sis kuv twb nco ntsoov lub sij hawm ntawd. Tam sim ntawd, kuv cog lus rau kuv tus kheej tias txawm muaj dab tsi tshwm sim hauv kuv chav phais mob, kuv yeej yuav tsis cia kuv lub siab tswj kav kuv li ntawd. Hnub ntawd kuv kuj cog lus tias kuv yeej yuav tsis muab dab tsi txawb thaum kuv chim siab—tsis hais tej riam phais mob los sis hais tej lus phem.

Hnub no, ntau xyoo tom qab ntawd, ua rau kuv xav seb yog tias rab riam phais mob uas muaj kab mob ntau hauv kuv caj npab puas muaj taug tshaj tej kev sib cav sib ceg uas kis nyob hauv peb cov pej xeem txoj kev sib tham thiab ua rau tib neeg tsis sib raug zoo. Zoo li txoj kev txawj sib tham zoo twb ploj lawm hauv lub caij uas tib neeg tawg ua ob pawg thiab mob siab tsis sib pom zoo.

Kev hais lus dev, nrhiav kev txhaum, thiab kev hais lus phem txog lwm tus los ntshe muaj ntau heev. Muaj cov thawj coj tseem fwv, cov kws ua yeeb yam, thiab lwm tus muaj hwj huam coob uas yeej hais lus thuam tas li. Ua rau kuv txhawj tias tib neeg coob ntseeg tias twb tsim nyog kom rau txim, hais phem, thiab ua yeeb ncuab nrog leej twg uas tsis pom zoo li lawv. Neeg coob txaus siab hais tej lus thab kom lwm tus poob npe!

Kev chim siab yeej yaum tsis tau lwm tus. Kev ntxub pab tsis tau leej twg. Kev sib cav sib ceg tsis ua rau tib neeg tsim lub tswv yim tshiab. Tu siab uas tej lub sij hawm peb pom tias muaj mej zeej uas kuj sib cav sib ceg thiab. Peb hnov txog cov uas hais lus saib lawv tus khub thiab cov me nyuam tsis rau nqi, cov uas siv kev chim siab kom tswj kav lwm tus, thiab cov uas rau txim rau lawv tsev neeg thaum lawv tsis kam hais lus rau lawv. Peb hnov txog cov tub hluas ntxhais hluas thiab cov me nyuam uas thab lwm tus thiab cov neeg ua hauj lwm uas ua rau lwm tus rhuav ntsej muag.

Kuv cov kwv tij thiab cov muam, yeej yuav tsum tsis txhob zoo li no. Vim peb yog Yexus Khetos cov thwj tim, peb coj yam ntxwv txog kev nrog lwm tus sib tham—qhov tseem ceeb yog thaum peb xav tsis zoo ib yam. Txoj kev yooj yim tshaj kom paub tias leej twg yog tus coj raws li Yexus Khetos tiag tiag yog kev saib tus ntawd ua siab zoo rau lwm tus npaum li cas.

Tus Cawm Seej tau piav meej txog qhov no nyob hauv Nws tej zaj lus qhia nyob rau hauv ob sab ntiaj teb no. Nws hais tias, “Cov uas ua rau neeg nyob sib haum xeeb … tau koob hmoov.”¹ “Yog leej twg ntaus nej sab plhu xis, nej cia li tig sab laug rau nws ntaus thiab.”² Thiab Nws kuj tau ntuas peb kom ua ib yam uas nyuaj rau peb txhua tus ua: “Hlub nej cov yeeb ncuab, foom koob hmoov rau cov uas foom tsis zoo rau nej, ua zoo rau cov uas ntxub nej, thiab thov Vajtswv rau cov uas txhob txwm siv nej thiab tsim txom nej.”³

Ua ntej Nws tuag, tus Cawm Seej txib Nws Kaum Ob tug Thwj Tim kom lawv ib leeg hlub ib leeg ib yam li Nws hlub lawv.⁴ Ces Nws hais tias, “Yog nej ib leeg hlub ib leeg, sawv daws thiaj yuav paub hais tias nej yog kuv cov thwj tim.”⁵

Tus Cawm Seej zaj lus yeej meej heev: Nws cov thwj tim tseeb yuav txhawb nqa, yaum, hais lus zoo, thiab tshoov neeg lub siab—tsis hais muaj xwm txheej nyuaj npaum li cas. Yexus Khetos cov thwj tim tseeb yog cov uas ua rau tib neeg sib haum xeeb.⁶

Hnub no yog Hnub Caiv Toov Laj. Peb tab tom npaj siab ua koob tsheej txog lub sij hawm tseem ceeb tshaj plaws uas nyob hauv lub ntiaj teb no uas yog tus Tswv Yexus Khetos txoj Kev Theej Txhoj thiab txoj Kev Sawv Rov Los. Ib yam zoo tshaj plaws uas peb ua tau kom hwm tus Cawm Seej yog kev ua ib tug uas tsim kev thaj yeeb.⁷

Tus Cawm Seej txoj Kev Theej Txhoj tau qhib kev rau peb kov yeej txhua yam kev phem—tsis hais kev sib cav sib ceg los yog. Tsis txhob xav ua yuam kev: kev sib cav sib ceg yeej yog kev phem! Yexus Khetos tau qhia tias cov uas “muaj siab xav sib cav sib ceg” tsis yog los ntawm Nws tiam sis lawv “yog los ntawm tus dab phem, tus ua yog leej txiv ntawm kev sib cav sib ceg, thiab [tus dab phem] txhaub neeg lub siab kom ib leeg sib cav sib ceg npau taws rau ib leeg.”⁸ Cov uas tsim kev sib cav sib ceg ntshe ua raws li Dab Ntxwg Nyoog txoj kev, txawm lawv paub lawv ua li ntawd los sis tsis paub los yog. “Tsis muaj leej twg yuav ua qhev tau rau ob tug tswv.”⁹ Yog peb txhawb nqa Dab Ntxwg Nyoog thaum peb cem lwm tus ces peb yeej tsis ua hauj lwm pab Vajtswv hlo li.

Kuv cov kwv tij thiab cov muam, qhov uas peb ib leeg ua li cas rau ib leeg muaj nqis tiag tiag! Qhov uas peb hais li cas txog lwm tus nyob hauv tsev, hauv tsev koom txoos, tom chaw ua hauj lwm, thiab nyob online muaj nqis heev. Hnub no, kuv thov kom peb yuav nrog lwm tus sib tham raws li ib txoj kev siab dua thiab dawb huv dua. Thov mloog zoo zoo. “Yog hais tias muaj tej yam dab tsi uas tsim txiaj, ntxim hlub, los yog muaj moo zoo los yog txaus qhuas”¹⁰ uas peb hais tau txog lwm tus—tsis hais tim ntsej tim muag los sis thaum nws tsis nyob—ces kev hais li ntawd yeej yog peb txoj kev cai hais lus.

Yog ib khub niam txiv hauv nej pawg ntseeg sib nrauj, los sis ib tug tub txib rov qab los tsev ntxov, los sis ib tug ntxhais hluas ua xyem xyav txog nws zaj lus tim khawv, lawv tsis xav tau nej txoj kev txiav txim. Lawv yuav tsum hnov Yexus Khetos txoj kev hlub nyob hauv nej tej lus thiab tej yam nej ua.

Yog ib tug phooj ywg nyob hauv social media txoj kev xav txog tseem fwv los yog lub sawm fem yeej tsis yog raws li nej ntseeg hlo li, nej txoj kev teb chim siab yeej yuav tsis pab. Yuav tsum ua ntau ntxiv kom thiaj li tsim ib txoj kev rau nej ib leeg to taub ib leeg, tiam sis qhov ntawd yeej yog qhov uas nej tus phooj ywg xav tau.

Kev sib cav sib ceg ua rau tus Ntsuj Plig khiav mus—txhua zaus. Kev sib cav sib ceg txhawb nqa lub tswv yim cuav hais tias kev sib tawm tsam yog txoj kev kom kho tej kev xav uas sib txawv; tiam sis yeej tsis yog li ntawd. Kev sib cav sib ceg yog ib txoj kev yus xaiv. Kev ua rau neeg sib haum xeeb yog ib txoj kev yus xaiv. Nej muaj kev ywj siab xaiv kev sib cav sib ceg los sis kev sib haum xeeb. Kuv yaum kom nej xaiv ua cov uas ua rau neeg sib haum xeeb, tam sim no thiab tas mus li.¹¹

Cov kwv tij thiab cov muam, peb hloov tau lub ntiaj teb—ib tug neeg thiab ib txoj kev sib tham zuj zus. Peb yuav ua li cas? Peb yuav tsum coj yam ntxwv txog kev sib tham uas ib leeg saib ib leeg rau nqi thaum xav tsis zoo ib yam.

Yeej yuav muaj neeg uas xav tsis zoo ib yam. Txhua hnub kuv ua hauj lwm nrog tus Tswv cov tub qhe uas tsis pom ib yam teeb meem zoo ib yam. Lawv paub tias kuv xav hnov lawv lub tswv yim thiab txoj kev xav txog txhua yam uas peb sib tham txog—qhov tseem ceeb yog tej teeb meem nyuaj heev.

Daim Duab

Thawj Tswj Hwm Dallin H. Oaks thiab Thawj Tswj Hwm Henry B. Eyring

Kuv ob tug pab cuam zoo, Thawj Tswj Hwm Dallin H. Oaks thiab Thawj Tswj Hwm Henry B. Eyring, yeej coj yam ntxwv zoo txog nkawd txoj kev qhia tias nkawd xav li cas—qhov tseem ceeb yog thaum nkawd xav tsis zoo ib yam. Nkawd ua li ntawd nrog kev sib hlub. Tsis muaj leej twg uas qhia tias nws paub qhov zoo tshaj plaws thiaj li yuav tsum tiv thaiv nws txoj kev xav. Tsis muaj leej twg uas xav tias yuav tsum sib tw nrog lwm tus. Vim nkawd ob leeg muaj lub siab hlub, “Khetos txoj kev hlub dawb huv,”¹² ces tus Tswv tus Ntsuj Plig thiaj li coj peb tej kev sib hais. Kuv yeej hlub thiab saib ob tug txiv neej zoo no rau nqi!

Kev siab hlub yog txoj kev kho kev sib cav sib ceg. Kev siab hlub yog lub txiaj ntsim ntawm sab ntsuj plig uas pab peb ntiab tus neeg ntiaj teb tawm, tus uas qia dub, pheej tiv thaiv tus kheej, muab hlob, thiab khib siab. Kev siab hlub yog tus cwj pwm tseem ceeb ntawm ib tug uas coj raws li Yexus Khetos tiag tiag.¹³ Kev siab hlub yeej pab ua rau neeg sib haum xeeb.

Thaum peb txo peb lub hwj chim rau Vajtswv thiab thov Nws kawg siab kawg ntsws, ces Vajtswv yuav muab kev siab hlub rau peb.¹⁴

Cov uas tau koob hmoov tau lub txiaj ntsim zoo tshaj plaws no yeej ua siab ntev thiab ua siab zoo. Lawv tsis khib lwm tus thiab tsis xav tias lawv tseem ceeb heev. Tsis yooj yim ua rau lawv chim thiab lawv tsis xav phem txog lwm tus.¹⁵

Cov kwv tij thiab cov muam, Yexus Khetos txoj kev hlub dawb huv yog txoj kev tu kev sib cav sib ceg uas peb raug niaj hnub no. Kev siab hlub ua rau peb xav “ib leeg txaus siab ris ib leeg tej nra”¹⁶ thiab tsis xav muab tej nra rau lwm tus ris. Khetos txoj kev hlub dawb huv ua rau peb xav “ua tim khawv txog Vajtswv txhua lub sij hawm thiab ua tim khawv txog txhua yam”¹⁷—qhov tseem ceeb thaum yog lub sij hawm txaus ntshai heev. Kev siab hlub cia peb qhia lwm tus kom lawv paub tias Khetos cov neeg hais li cas thiab ua li cas—qhov tseem ceeb yog thaum twg muaj neeg thuam lawv.

Kuv tsis hais tias yuav tsum sib haum xeeb txawm neeg ua li cas rau nej.¹⁸ Kuv hais txog txoj kev ua zoo rau lwm tus raws li nej tau khi lus ua thaum nej txais lub cim nco txog. Nej khi lus kom nco ntsoov tus Cawm Seej. Thaum twg muaj kev kub ntxov thiab neeg sib cav sib ceg, kuv caw nej nco ntsoov Yexus Khetos. Thov kom ua siab loj thiab muaj tswv yim hais los sis ua li Nws yuav ua. Thaum peb coj raws li tus Tub Vaj Ntxwv ntawm Kev Thaj Yeeb, ces peb yuav los ua Nws cov neeg uas tsim kev thaj yeeb.

Tam sim no tej zaum nej xav tias zaj lus no yuav pab ib tug neeg uas nej paub heev. Tej zaum nej cia siab tias yuav pab nws ua siab zoo rau nej ntxiv. Kuv cia siab yuav ua li ntawd! Tiam sis kuv kuj cia siab tias nej yuav saib nyob hauv nej lub siab seb puas muaj kev muab hlob los sis kev khib siab uas ua rau nej tsis pab neeg sib haum xeeb.¹⁹

Yog nej xav pab muab Ixayees sau los ua ke tiag thiab xav txhawb nqa tej kev sib raug zoo uas yuav kav ntev mus ib txhis li, tam sim no yog lub sij hawm kom tso tej kev chim siab tseg. Tam sim no yog lub sij hawm kom txhob yuam muaj raws li nej txoj kev xwb. Tam sim no yog lub sij hawm kom txhob ua tej yam uas ua rau lwm tus ntshai heev yuav ua rau nej npau taws. Tam sim no yog lub sij hawm muab nej tej cuab yeej ua rog faus cia.²⁰ Yog tias nej txawj hais lus tawm tsam thiab cem thiab thuam lwm tus, tam sim no yog lub sij hawm tso tej ntawd tseg.²¹ Nej yuav muaj zog zuj zus hauv nej sab ntsuj plig kom ua Khetos haiv neeg.

Lub tuam tsev pab tau peb ua li no. Nyob ntawd peb txais vaj txiaj ntsim uas yog Vajtswv lub hwj chim, ua rau peb muaj peev xwm kov yeej Dab Ntxwg Nyoog, tus uas tsim txhua yam kev sib cav sib ceg.²² Cia li ntiab nws tawm! Peb yeej tawm tsam tus yeeb ncuab txhua zaus peb kho ib yam uas neeg to taub yuam kev los sis tsis kam tu siab txog ib yam. Tiam sis, peb muaj cib fim coj raws li kev siab hlub uas Yexus Khetos cov thwj tim tseeb muaj. Cov uas ua rau neeg sib haum xeeb yeej tus yeeb ncuab.

Cia peb ua ib haiv neeg uas yog ib lub teeb saum roob—ib lub teeb uas tsis muaj ib yam dab tsi thaiv tau.²³ Cia peb qhia tias muaj ib txoj kev kom ib leeg saib ib leeg rau nqi kho tej teeb meem nyuaj thiab ib txoj kev zoo kom sib hlub thaum tsis sib pom zoo. Thaum nej coj yam ntxwv muaj kev siab hlub zoo li cov uas coj raws li Yexus Khetos tiag tiag muaj, tus Tswv yuav pab txhawb nqa nej tej hauj lwm kom siab tshaj qhov nej xav.

Lub vas ntawm txoj moo zoo yog lub vas loj tshaj plaws hauv lub ntiaj teb. Vajtswv tau caw txhua leej txhua tus los cuag Nws, “tsis hais cov neeg dub los sis cov neeg dawb, cov neeg ua qhev los sis cov neeg ywj pheej, tsis hais poj niam los sis txiv neej.”²⁴ Muaj chaw rau txhua leej txhua tus. Tiam sis, yeej tsis muaj chaw rau kev ntxub ntxaug, kev rau txim, los sis kev sib cav sib ceg hlo li.

Kuv cov kwv tij thiab cov muam, cov uas siv lawv lub neej kom txhawb nqa lwm tus yeej yuav tau tej yam zoo thaum yav tom ntej. Hnub no kuv caw nej kom xav txog nej txoj kev ua ib tug thwj tim nyob ntawm qhov uas nej ua zoo li cas rau lwm tus. Kuv foom koob hmoov rau nej kom kho tej yam twg uas yuav tsum hloov kom saib lwm tus rau nqi nej thiaj li yuav coj cwj pwm uas tsim nyog coj zoo li ib tug uas coj raws li Yexus Khetos tiag.

Kuv foom koob hmoov rau nej kom nej ua siab ntev, to taub zoo, thiab nyob kaj siab lug pauv kev ua rog, kev ntxub, thiab kev sib cav sib ceg.

Vajtswv muaj txoj sia nyob! Yexus yog tus Khetos. Nws sawv ua tus thawj coj rau Nws lub Koom Txoos no. Peb yog Nws cov tub qhe. Nws yuav pab peb hloov los ua neeg uas tsim kev thaj yeeb. Kuv ua tim khawv li no los ntawm Yexus Khetos lub npe dawb ceev, amees.