Mahulu Hake ʻi ha Moʻungaʻi Tangata

Mei he 1856 ki he 1860, naʻe toho ai ʻe ha kau paionia ʻo e Siasí ʻe lauiafe ʻenau ngaʻotoʻotá ʻi ha ‘ū saliote ʻi ha maile ʻe 1,000 tupu (1,600 km) ʻi heʻenau fononga ki he Teleʻa Sōlekí. ʻI he taʻu ʻe teau onongofulu-mā-fitu kuohilí ʻi he uiké ni, ʻaho 4 ʻo ʻOkatopa 1856, naʻe ʻohovale ʻa Palesiteni Pilikihami ʻIongi ke ʻiloʻi naʻe kei kilomita ʻe laungeau mei Sōleki ʻa e ongo kulupu saliote toho tangata naʻe taki ʻe ʻEtuate Māteni mo Semisi Uilí, pea naʻe vave ʻa e hoko mai ʻa e faʻahitaʻu momokó.¹ ʻI he ʻaho pē hono hokó, ʻi ha feituʻu ʻoku ʻikai fuʻu mamaʻo mei he feituʻu ʻoku tau fakataha ai he ʻaho ní, naʻe tuʻu ʻa Palesiteni ʻIongi ʻi muʻa ʻi he Kāingalotú ʻo pehē: “ʻOku tokolahi hotau ngaahi tokoua mo e tuofāfine ʻi he ngaahi potu tokaleleí mo ha ʻū saliote toho tangata, pea kuo pau ke ʻomi kinautolu ki heni. … Mou ō ʻo ʻomi ʻa e kakai ko ia ʻoku lolotonga ʻi he potu tokaleleí.”²

Hili pē ha ʻaho ʻe ua mei ai, naʻe mavahe atu ʻa e fuofua kulupu fakahaofí ko e fekumi ki he kau paionia toho salioté.

Naʻe fakamatalaʻi ʻe ha mēmipa ʻo e kulupu ʻa Uilí ʻa e tūkunga faingataʻa kimuʻa pea aʻu ange ʻa e timi fakahaofí. Naʻá ne vahevahe ʻo pehē, “ʻI he taimi [pē] naʻe hangē ai ʻe siva ʻa e meʻa kotoa, … pea ʻikai ha toe ʻuhinga ke hoko atu ʻa e moʻuí, naʻe tali ʻe he ʻOtuá ʻemau ngaahi lotú ʻo hangē ha mana mei he langi tafitongá. Naʻe ʻasi mai … , ha kulupu fakahaofi, ʻo nau ʻomi mo kinautolu ha meʻakai mo e naunau. … ʻA ʻemau fakafetaʻi ki he ʻOtuá ʻi hono fakahaofi kimautolú.”³

Naʻe hoko ʻa e kau fakahaofi ko ʻení ko ha kau moʻungaʻi tangata ki he kau paioniá, ʻi heʻenau fepaki mo e fakatuʻutāmaki ʻi he ngaahi tūkunga kovi ʻaupito ʻo e ʻeá ke ʻomi hao ki ʻapi ʻa e tokolahi taha ʻe ala lavá. Ko e taha ʻo e kau moʻungaʻi tangata ko iá ko ʻIfalemi Hanisi.

ʻI he vaeuaʻanga ʻo ʻOkatopá, naʻe ʻikai ha ʻilo ʻa Hanisi ki he faingataʻaʻia ʻa e kau toho salioté, ka naʻá ne foki ki hono ʻapi ʻi Sōlekí hili haʻane folau, pea lolotonga ʻa e poʻulí, naʻe ofongi ia ʻe ha leʻo ne pehē, “ʻOku faingataʻaʻia ʻa e kakai toho salioté, pea ʻoku fiemaʻu koe; te ke ʻalu nai ʻo tokoniʻi kinautolu?”

ʻI he toutou ongo mai ʻa e fehuʻi ko iá ki heʻene fakakaukaú, naʻá ne fakavavevave atu leva ki Sōleki Siti. Pea ʻi heʻene fanongo ki hono ui ʻe Palesiteni Hiipa C. Kimipolo ha kau ngāue lahi ange ke tokoní, naʻá ne ʻalu atu toko taha pē ʻi he ʻaho hono hokó, ke tokoni ʻi he fakahaofí. Naʻe fononga vave ʻa Hanisi, ʻo ne fakalaka ʻi he kau fakahaofi kehé, pea ʻi heʻene aʻu ki he kulupu ʻa Mātení, naʻe manatu ʻa Hanisi ʻo pehē, “He ʻikai toe ngalo ʻi heʻeku manatú ʻa e meʻa naʻá ku mamata ki ai ʻi heʻeku hū atu ki honau ʻapitangá … [pea] naʻe feʻunga ia ke ongo ki he loto-fefeka tahá.”⁴

Naʻe nofo ʻa ʻIfalemi Hanisi ʻi ha ngaahi ʻaho lahi ʻo hiki mei he tēniti ki he tēniti ʻi hono tāpuakiʻi ʻo e kau puké. Naʻá ne pehē, “ʻi he ngaahi taimi lahi, ʻi heʻemau faingāue ki he mahakí, mo valokiʻi ʻa e ngaahi mahakí ʻi he huafa ʻo e ʻEiki ko Sīsū Kalaisí, ne fakafokifā pē ʻa e fakaakeake ʻa e kau faingataʻaʻiá; naʻe meimei fakamoʻui kinautolu ʻi he taimi pē ko iá.”⁵ ʻE hoko maʻu pē ʻa ʻIfalemi Hanisi ko ha moʻungaʻi tangata ki he kau paionia fononga saliote ko iá ʻo taʻengata.

Tatau pē mo e fakahaofi fakaofo ko iá, ko e ngaahi meʻa ʻoku hoko ʻokú ne uesia ʻetau moʻuí pea aʻu pē ki he hisitōliá, ʻoku faʻa hoko ia ko e ola ʻo e ngaahi fili mo e lavameʻa ʻa e kakai tangata mo fafine fakafoʻituituí—kau ʻaati, kau saienisi, kau taki fakapisinisi, mo e kau politikale maʻongoʻonga. ʻOku faʻa fakalāngilangiʻi ʻa e niʻihi fakafoʻituitui tuʻu-ki-muʻa ko ʻení ko e kau moʻungaʻi tangata, pea langa ha ngaahi maka fakamanatu ke fakamanatu ʻaki ʻenau ngaahi ngāué.

ʻI heʻeku kei siʻí, ko ʻeku fuofua kau moʻungaʻi tangatá ko ha kau sipoti. Ko ʻeku ngaahi fuofua manatu melié ko hono tānaki ʻo e ʻū kaati peisipolo ʻoku ʻi ai ʻa e tā mo e fakamatala fakasitetisitika ʻo e kau vaʻinga Peisipolo Liiki Lalahí. ʻE lava ke fakafiefia mo loto-maʻa ʻa e “fakahīkihikiʻi ʻa e moʻungaʻi tangatá” ʻi he kei siʻí, ʻo hangē ko e tui ʻe he fānaú ʻa e teunga ʻo e kau moʻungaʻi tangata ʻoku nau saiʻia taha aí ki he Halouiní. Neongo ʻoku tau tanganeʻia mo fakaʻapaʻapaʻi ha kau tangata mo fafine talēnitiʻia mo fakaofo tokolahi koeʻuhí ko e ngaahi meʻa ʻoku nau malavá mo ʻenau tokoní, ka ko e tuʻunga ko ia hono fakaʻapaʻapaʻi kinautolú, kapau ʻe fuʻu tōtuʻa, ʻe lava ke tatau ia mo e lotu ʻa e fānau ʻa ʻIsilelí ki he ʻuhikiʻi pulu koula ʻi he toafa ʻo Sainaí.

ʻI heʻetau hoko ko e kakai lalahí, ko e meʻa ko ia naʻe fakafiefia mo loto-maʻa ʻi he kei siʻí ʻe lava ke hoko ia ko ha maka tūkiaʻanga ʻi he taimi ʻoku fakatupu ai ʻe he “fakahīkihikiʻi ʻa e moʻungaʻi tangata” ʻo e kau politikalé, kau faʻu tohi ʻi he ʻinitanetí, kau tuʻuaki ʻi he mītia fakasōsialé, kau sipotí, pe kau hiva ʻiloá ke tau tokanga ki he ngaahi meʻa ʻoku “ʻikai mahuʻingá”⁶ pea ʻikai ke tau fakatokangaʻi ʻa e meʻa ʻoku mahuʻinga moʻoní.

Ki he fānau ʻa ʻIsilelí, naʻe ʻikai ko e polé ʻa e koula naʻa nau omi mo ia ʻi heʻenau fononga ki he fonua ʻo e talaʻofá, ka ko e meʻa naʻa nau fakangofua ke ngaohi ʻaki ʻa e koulá: ko ha tamapua, ʻa ia naʻe hoko ia ko e taumuʻa ʻo ʻenau moihuú, ʻo fakatafoki ai ʻenau tokangá meia Sihova, ʻa ia naʻá Ne fakamavaeuaʻi ʻa e Tahi Kulokulá mo fakahaofi kinautolu mei he nofo pōpulá. Naʻe hanga ʻe heʻenau tokanga taha ki he ʻuhikiʻi pulú ʻo uesia ʻenau malava ke moihū ki he ʻOtua moʻoní.⁷

Ko e moʻungaʻi tangata—ko ʻetau moʻungaʻi tangatá, ʻi he taimi ní pea maʻu ai peé—ko Sīsū Kalaisi, pea ʻilonga ha meʻa pe tokotaha ʻokú ne tohoakiʻi kitautolu mei Heʻene ngaahi akonakí, ʻo hangē ko ia ʻoku hā ʻi he folofolá mo e ngaahi lea ʻa e kau palōfita moʻuí, te ne lava ʻo uesia kovi ʻetau fakalakalaka ʻi he hala ʻo e fuakavá. Kimuʻa pea fakatupu ʻa e māmani ko ʻení, naʻa tau falala kia Sīsū Kalaisi ʻi he taimi naʻe mahino ai naʻe fakafaingataʻaʻiaʻi ʻa e palani naʻe fokotuʻu ʻe he Tamai Hēvaní, ʻa ia naʻe kau ai hotau faingamālie ke fakalakalaka pea hoko ʻo hangē ko Iá.

Naʻe ʻikai ngata pē ʻi he hoko ʻa Sīsū Kalaisi ko e taki ʻi hono taukapoʻi ʻa e palani ʻa ʻetau Tamaí, ka te Ne toe fuesia foki mo e fatongia mahuʻinga taha ʻi hono fakahoko iá. Naʻá Ne tali ki he Tamaí pea finangalo ke foaki ʻEne moʻuí “ko e totongi huhuʻi maʻá e kakai kotoa pē,”⁸ ke totongi ha moʻua te tau takitaha maʻu ʻi he angahalá ka naʻe ʻikai ke tau lava ʻo totongi ʻiate kitautolu pē.

Kuo akonaki ʻa Palesiteni Tāleni H. ʻOakesi, “Kuo fakahoko ʻe [Sīsū Kalaisi] ʻa e meʻa kotoa ʻoku mahuʻinga ki heʻetau fononga ʻi he moʻui fakamatelié ki he ikuʻanga kuo fakamatalaʻi ʻi he palani ʻa ʻetau Tamai Hēvaní.”⁹

ʻI he fehangahangai ʻa e Fakamoʻuí ʻi he Ngoue ko Ketisemaní, mo ha ngāue mafatukituki peheé, naʻá Ne folofola loto-toʻa ʻo pehē, “ʻOua naʻa fai hoku lotó, ka ko e finangalo ʻoʻoú,” pea hoko atu ke toʻo kiate Ia ʻa e ngaahi mamahí, mahamahakí, mo e faingataʻaʻiá koeʻuhí ko e ngaahi angahala ʻa kinautolu kotoa pē ʻe moʻuí.¹⁰ ʻI ha ngāue haohaoa ʻo e talangofuá mo e mateakí, naʻe fakakakato ai ʻe Sīsū Kalaisi ʻa e ngāue fisifisimuʻa mo toʻa ʻi he kotoa ʻo e fakatupú, ʻo fakaʻosi ʻaki ʻEne Toetuʻu nāunauʻiá.

Naʻe fakamanatu mai ʻe Palesiteni Lāsolo M. Nalesoni ʻi heʻetau konifelenisi lahi fakamuimuitahá: “Ko e hā pē haʻamou ngaahi fehuʻi pe palopalema, ʻoku maʻu maʻu pē ʻa e talí ʻi he moʻui mo e ngaahi akonaki ʻa Sīsū Kalaisí. Ako lahi ange fekauʻaki mo ʻEne Fakaleleí, ʻEne ʻofá, ʻEne ʻaloʻofá, ʻEne tokāteliné, mo ʻEne ongoongolelei ʻo e faifakamoʻuí mo e fakalakalaká kuo fakafoki maí. Tafoki kiate Ia! Muimui ʻiate Ia!”¹¹ Pea te u tānaki atu ki ai, “Fili Ia.”

ʻI hotau māmani mohu faingataʻá, ʻe lava ke ʻahiʻahiʻi kitautolu ke tau tafoki ki he kau moʻungaʻi tangata ʻo e sosaietí ʻi ha feinga ke maʻu ha ʻuhinga pe mahino ki he moʻuí ʻi he taimi ʻe ngali puputuʻu pe lōmekina aí. ʻOku tau fakatau ʻa e vala ʻoku nau fakapaʻangá, ʻoku tau tali ʻa e ngaahi meʻa fakapolitikale ʻoku nau taukaveʻí, pea ʻoku tau muimui ki heʻenau ngaahi fokotuʻu ʻoku vahevahe ʻi he mītia fakasōsialé. Mahalo naʻa lelei fakataimi pē ʻeni, ka kuo pau ke tau tokanga ke ʻoua naʻa liliu e tūkunga ko ʻeni hono fakahīkihikiʻi ʻo e moʻungaʻi tangatá ke hoko ko hotau ʻuhikiʻi pulu koulá. ʻOku ʻi ai ha ngaahi nunuʻa taʻengata hono fili ʻo e moʻungaʻi tangata totonú.

ʻI he tūʻuta homau fāmilí ki Sipeini ke kamata ʻema ngāue ko e ongo taki fakamisioná, ne ma maʻu ai ha kupuʻi lea meia ʻEletā Niila A. Mekisuele naʻe fakaʻesia ʻa ia naʻe ʻi ai ʻene kaunga ki he kau moʻungaʻi tangata ʻoku tau fili ke muimui ki aí. Naʻá ne pehē, “Kapau kuo teʻeki ke ke ʻuluaki fili ʻa e puleʻanga ʻo e ʻOtuá, he ʻikai mahuʻinga ʻi he ngataʻangá ʻa e meʻa kuó ke filí.”¹² Kāinga, ʻoku tau fili ʻa e puleʻanga ʻo e ʻOtuá ʻi heʻetau fili ʻa Sīsū Kalaisi, ko e Tuʻi ʻo e ngaahi tuʻí. Ko ha toe faʻahinga fili kehe pē ʻoku tatau ia mo hono fili ʻa e nima ʻo e kakanó, pe ko ha ʻuhikiʻi pulu koula, pea ʻe iku ia ke tau loto-mamahi ai.

ʻOku tau lau ʻi he Tohi ʻa Tanielá ʻi he Fuakava Motuʻá, ʻa e fakamatala kia Setaleki, Mēsake mo ʻApitenikoó, ʻa ia naʻa nau ʻiloʻi lelei ʻa e moʻungaʻi tangata ke nau filí—pea naʻe ʻikai ko ha taha ia ʻo e ngaahi ʻotua ʻa e Tuʻi ko Nepukanesá. Naʻa nau fakahaaʻi ʻi he loto-falala:

“ʻOku mālohi ʻa homau ʻOtuá, ʻa ia ʻoku mau tauhí, ke fakahaofi ʻa kimautolu mei he afi vela kakahá. …

“Pea kapau ʻe ʻikai, ke ke ʻilo pē ʻe tuʻi, ʻe ʻikai te mau tauhiʻi ho ngaahi ʻotuá, pe hū ki he meʻa fakatātā koulá.”¹³

Hangē ko e akonaki ʻa e ʻAposetolo ko Paulá, “ʻOku ʻi ai ʻa e ʻotua tokolahi,”¹⁴ pea tuku ke u tānaki atu ki ai mo e kau moʻungaʻi tangata tokolahi, ʻoku fakaafeʻi kitautolu ke tau punou ki ai, ke tau lotu ki ai, pea ke tau tali loto-fiemālie. Kae hangē ko ia ne ʻiloʻi ʻe he ngaahi kaungāmeʻa ʻe toko tolu ʻo Tanielá, ko e toko Taha pē ʻoku fakapapauʻi te Ne ʻomi ʻa e ola ʻoku leleí—koeʻuhí kuó Ne ʻosi fakahoko ia pea te Ne fakahoko maʻu ai pē.

ʻI heʻetau fononga ke foki ki he ʻao ʻo e ʻOtuá, ki hotau fonua ʻo e talaʻofá, ʻoku ʻikai ko e palopalemá ʻa e tokotaha politikalé, tokotaha hivá, tokotaha sipotí pe tokotaha faʻu vitiō ʻi he ʻinitanetí, ka ko e fili ko ia ke fakaʻatā ke nau hoko ko e tefitoʻi taumuʻa ʻo ʻetau tokangá, ʻo ne fetongi ai hotau Fakamoʻuí mo e Huhuʻí.

ʻOku tau fili Ia, ʻa Sīsū Kalaisi, ʻi heʻetau fili ke tauhi Hono ʻahó tatau ai pē pe ʻoku tau ʻi ʻapi pe ʻeveʻeva mālōlō. ʻOku tau fili Ia ʻi heʻetau fili ʻEne ngaahi folofolá ʻi he ngaahi tohi folofolá mo e ngaahi akonaki ʻa e kau palōfita moʻuí. ʻOku tau fili Ia ʻi heʻetau fili ke maʻu ha lekomeni temipalé pea moʻui taau ki hono fakaʻaongaʻí. ʻOku tau fili Ia ʻi heʻetau hoko ko ha kau faʻa fakaleleí pea ʻikai loto ke fakakikihi, “tautautefito ki he taimi ʻoku kehekehe ai ʻetau fakakaukaú.”¹⁵

Kuo teʻeki ai ha takimuʻa kuó ne fakahaaʻi ha loto-toʻa lahi ange, ʻikai ha ʻofa fakaetangata ʻe angaʻofa ange, ʻikai ha toketā te ne faitoʻo ha mahaki lahi ange, pea ʻikai ha taha ʻaati ʻe mohu founga ange ʻia Sīsū Kalaisi.

ʻI ha māmani ʻo e kau moʻungaʻi tangatá, mo e ngaahi maka fakamanatu mo e misiume ʻoku tāfataha ki he lavameʻa ʻa e kau tangata mo fafine fakamatelié, ʻoku ʻi ai ha Taha ʻoku mahulu hake ʻi he meʻa kotoa pē. ʻOku ou fakamoʻoni ʻoku ʻikai ngata pē ʻi he hoko ʻa Sīsū Kalaisi ko hotau moʻungaʻi tangatá; ka ko Ia hotau ʻEikí mo e Tuʻí, ko e Fakamoʻui mo e Huhuʻi ʻo e faʻahinga ʻo e tangatá. ʻI he huafa ʻo Sīsū Kalaisí, ʻēmeni.