సమస్త సంగతులు మీ మేలు కొరకే
ఈ లోకములో మరియు నిత్యత్వములో, మన మేలు కొరకు సమస్త సంగతులను ఒకచోట చేర్చడమే సృష్టి యొక్క ఉద్దేశ్యం మరియు దేవుని స్వభావము.
ఈరోజు ఏప్రిల్ 6, యేసు క్రీస్తు పునఃస్థాపించిన తన కడవరి దిన సంఘము యొక్క వార్షికోత్సవం మరియు యేసు క్రీస్తు పరిపూర్ణ జీవితం, ప్రాయశ్చిత్త త్యాగం మరియు మహిమాన్వితమైన పునరుత్థానం గురించి మనం ఆనందంగా సాక్ష్యమిచ్చే ఈస్టర్ సమయంలో భాగము.
ఒక మనిషి యొక్క కుమారుడు అందమైన గుర్రాన్ని కనుగొనడంతో చైనీయుల కథ ఒకటి ప్రారంభమవుతుంది.
“ఎంత అదృష్టవంతుడు,” అని ఇరుగుపొరుగు వారు అన్నారు.
“మనము చూద్దాము,” అని ఆ మనిషి అంటాడు.
తర్వాత కుమారుడు గుర్రం మీద నుండి పడిపోయి శాశ్వతంగా గాయపడతాడు.
“ఎంత దురదృష్టవంతుడు,” అని ఇరుగుపొరుగు వారు అన్నారు.
“మనము చూద్దాము,” అని ఆ మనిషి అంటాడు.
నిర్భందించే సైన్యం వస్తుంది, కానీ గాయపడిన కొడుకును తీసుకెళ్లదు.
“ఎంత అదృష్టవంతుడు,” అని ఇరుగుపొరుగు వారు అన్నారు.
“మనము చూద్దాము,” అని ఆ మనిషి అంటాడు.
ఈ అస్థిరమైన ప్రపంచం తరచూ తుఫానుగా, అనిశ్చితిగా, కొన్నిసార్లు అదృష్టవంతంగా మరియు—చాలా తరచుగా—దురదృష్టకరమైనదిగా అనిపిస్తుంది. అయినప్పటికీ, ఈ కష్టాల ప్రపంచంలో,1 “దేవుని ప్రేమించువారికి మేలు కలుగుటకై సమస్తమును సమకూడి జరుగుచున్నవని మనము ఎరుగుదుము.”2 వాస్తవానికి, యథార్థముగా నడుచుకొని, మన నిబంధనలను జ్ఞాపకముంచుకొన్నప్పుడు, “మీ మేలుకొరకు సమస్తము సమకూడి జరుగును.”3
సమస్త సంగతులు మీ మేలు కొరకే.
ఒక అద్భుతమైన వాగ్దానం! దేవుని నుండి ఓదార్పునిచ్చే హామీ! ఒక అద్భుత విధానములో, సృష్టి యొక్క ఉద్దేశ్యం మరియు మన తండ్రి అయిన దేవుడు మరియు ఆయన కుమారుడైన యేసు క్రీస్తు యొక్క స్వభావం ఏమిటంటే, ప్రారంభమును మరియు అంతమును తెలుసుకొనియుండటం;4 మన మేలు కొరకై సమస్తమును తీసుకురావడం;యేసు క్రీస్తు కృప మరియు ప్రాయశ్చిత్తం ద్వారా మనం శుద్ధిచేయబడి, పవిత్రంగా మారినప్పుడు మనల్ని రక్షించడం మరియు ఉన్నతస్థితిలో వుంచటం.
యేసు క్రీస్తు యొక్క ప్రాయశ్చిత్తము మనలను పాపము నుండి విడుదల చేయగలదు. అయితే యేసు క్రీస్తు కూడా మన ప్రతి బాధను, శ్రమను, రోగమును,5 దుఃఖమును, ఎడబాటును అంతరంగికంగా అర్థం చేసుకుంటారు. ఈ లోకములో మరియు నిత్యత్వములో, మరణం మరియు నరకంపై ఆయన విజయం అన్ని విషయాలను సరిచేయగలదు.6 ఆయన విరిగిన మరియు తిరస్కరించబడిన వారిని నయం చేయడానికి, కోపంగానున్న మరియు విడిపోయిన వారిని సమాధానపరచటానికి, ఒంటరిగా మరియు విడిగా ఉన్నవారిని ఓదార్చడానికి, అనిశ్చియులను మరియు అసంపూర్ణులను ప్రోత్సహించడానికి మరియు దేవునికి మాత్రమే సాధ్యమయ్యే అద్భుతాలను ముందుకు తీసుకురావడానికి సహాయం చేస్తారు.
మనము హల్లెలూయా పాడతాము మరియు హోసన్నా అని కేకలు వేస్తాము! నిత్యమైన శక్తి మరియు అనంతమైన మంచితనంతో, దేవుని సంతోషము యొక్క గొప్ప ప్రణాళికలో, మన మేలు కొరకు సమస్తము సమకూడి జరుగుతాయి. మనం జీవితాన్ని నిర్భయంగా మరియు ఆత్మవిశ్వాసంతో ఎదుర్కోవచ్చు.
మన స్వంతానికి వదిలివేయబడితే, మన మంచితనం మనకు తెలియకపోవచ్చు. “నన్ను నేను ఎన్నుకున్నప్పుడు,” నేను నా స్వంత పరిమితులు, బలహీనతలు, అసమర్థతలను కూడా ఎన్నుకుంటున్నాను. అంతిమంగా, ఎక్కువ మేలు చేయాలంటే, మనం మంచిగా ఉండాలి.7 దేవుడొక్కడే తప్ప మరి ఎవడును సత్పురుషుడు కాడు కాబట్టి,8 మనం యేసు క్రీస్తులో పరిపూర్ణతను కోరుకుంటాము.9 మనం శరీరసంబంధియైన పురుషుడు లేదా స్త్రీని విడిచిపెట్టి, దేవుని ముందు ఒక బిడ్డగా మారినప్పుడు మాత్రమే నిజమైన, ఉత్తమమైన వ్యక్తులమవుతాము.
దేవునియందు మనకున్న నమ్మకం మరియు విశ్వాసంతో, పరీక్షలు మరియు బాధలు మన మేలు కోసం ప్రతిష్ఠించబడతాయి. ఐగుప్తులో బానిసగా అమ్మబడిన యోసేపు, అటు తర్వాత తన కుటుంబాన్ని మరియు ప్రజలను రక్షించాడు. లిబర్టీ చెరసాలలో ప్రవక్త జోసెఫ్ స్మిత్ ఖైదు చేయబడడం అతనికి “ఈ విషయాలు నీకు అనుభవమునిచ్చుటకు, నీ మేలుకొరకే”10 అని నేర్పింది. విశ్వాసం, పరీక్షలు మరియు త్యాగాలతో జీవించడం మనల్ని మరియు ఇతరులను ఎన్నడూ ఊహించని విధాలుగా ఆశీర్వదించగలదు. 11
మనం శాశ్వతమైన దృక్పథాన్ని పొందినప్పుడు అన్ని విషయాలు మన మేలు కోసం కలిసి పని చేయగలవని ప్రభువునందు నమ్మకాన్ని మరియు విశ్వాసాన్ని పెంచుకుంటాము;12 మన పరీక్షలు “కొద్దికాలము వరకు మాత్రమేనని” అర్థం చేసుకోండి;13 మన బాధలు మన ప్రయోజనము కొరకు ప్రతిష్టించబడతాయని గుర్తించండి;14 ప్రమాదాలు, అకాల మరణం, బలహీనపరిచే అనారోగ్యం మరియు వ్యాధి మర్త్యత్వములో భాగమని అంగీకరించండి; మరియు ప్రేమగల పరలోక తండ్రి శిక్షించడానికి లేదా తీర్పు తీర్చడానికి పరీక్షలను ఇవ్వరని విశ్వసించండి. ఆయన రొట్టెను అడుగువారికి రాతినివ్వడు, చేపలు అడుగువారికి పామునివ్వడు.15
పరీక్షలు వచ్చినప్పుడు, తరచుగా మనం ఎక్కువగా కోరుకునేది, ఎవరైనా వినాలని మరియు మనతో ఉండాలని.16 ఈ సమయంలో అవి ఓదార్పునిస్తాయని వారి ఉద్దేశ్యము, అయినప్పటికీ తరచుగా ఉపయోగించే అభిప్రాయాలు సహాయపడవు. కొన్నిసార్లు మనతో పాటు దుఃఖించి, బాధపడి మరియు రోదించి; బాధను, నిరాశను, కోపాన్ని కూడా వ్యక్తం చేయనిచ్చి; మనకు తెలియని విషయాలు ఉన్నాయని మనతోపాటు అంగీకరించే వారికోసం మనం ఆపేక్షిస్తాము.
మనం దేవుణ్ణి మరియు మన పట్ల ఆయనకున్న ప్రేమను విశ్వసించినప్పుడు, మన హృదయ వేదనలు కూడా చివరికి మన మేలు కోసం కలిసి పనిచేస్తాయి.
నేను ప్రేమించే వారికి జరిగిన ఒక తీవ్రమైన కారు ప్రమాదం గురించి వార్త వచ్చిన రోజు నాకు గుర్తుంది. అటువంటి సమయాల్లో, వేదనలో మరియు విశ్వాసంతో, మనం యోబు చెప్పినట్లు మాత్రమే చెప్పగలము, “యెహోవా ఇచ్చెను యెహోవా తీసికొని పోయెను, యెహోవా నామమునకు స్తుతి కలుగునుగాక.”17
ప్రపంచవ్యాప్తముగా సంఘమంతటా, దాదాపు 3,500 స్టేకులు మరియు జిల్లాలు మరియు దాదాపు 30,000 వార్డులు మరియు శాఖలు ఆశ్రయం మరియు భద్రతను అందిస్తాయి.18 అయితే (ఎలాగో ఇంకా తెలియకుండానే) విషయాలు వారి మేలు కోసం కలిసి పనిచేస్తాయని తెలుసుకున్నప్పటికీ, మన స్టేకులు మరియు వార్డులలో, చాలా విశ్వాసులైన కుటుంబాలు మరియు వ్యక్తులు కష్టమైన సవాళ్లను ఎదుర్కొంటున్నారు.
ఇంగ్లండ్లోని హడర్స్ఫీల్డ్లో, కొత్త స్టేకు అధ్యక్షుడిగా పిలువబడడానికి కొద్దిసేపటి ముందు సహోదరుడు శామ్యూల్ బ్రిడ్జ్స్టాక్ నాలుగవ దశ క్యాన్సరుతో బాధపడుతున్నాడు. అతని తీవ్ర రోగనిర్ధారణ కారణంగా, ఇంటర్వ్యూకి కూడా వెళ్లటం ఎందుకు అని అతడు తన భార్య యాన్నాను అడిగాడు.
“ఎందుకంటే, మీరు స్టేకు అధ్యక్షుడిగా పిలువబడబోతున్నారు” అని సహోదరి బ్రిడ్జ్స్టాక్ చెప్పారు.
ప్రారంభంలో జీవించడానికి ఒక సంవత్సరం లేదా రెండు సంవత్సరాలే ఇవ్వబడ్డారు, ఐతే అధ్యక్షుడు బ్రిడ్జ్స్టాక్ (ఈరోజు ఇక్కడ ఉన్నారు) తన నాల్గవ సంవత్సరం సేవలో ఉన్నారు. అతను మంచి రోజులను మరియు కష్టమైన రోజులను కలిగియున్నాడు. అతని స్టేకు హెచ్చింపబడిన విశ్వాసంతో, సేవతో మరియు దయతో బలము తెచ్చుకున్నది. ఇది అంత సులభం కాదు, కానీ అతని భార్య మరియు కుటుంబ సభ్యులు విశ్వాసం, కృతజ్ఞత మరియు యేసు క్రీస్తు యొక్క పునఃస్థాపించే ప్రాయశ్చిత్తము ద్వారా శాశ్వతమైన ఆనందంగా మారతుందని వారు నమ్ముతున్న గ్రహింపశక్యమైన విచారంతో జీవిస్తున్నారు.19
మనం నిశ్చలంగా, నిష్కపటంగా మరియు భక్తితో ఉన్నప్పుడు, ప్రభువు అందించే నిబంధన యొక్క సౌందర్యము, ఉద్దేశ్యం మరియు ప్రశాంతతను మనం అనుభవించవచ్చు. పవిత్రమైన క్షణాలలో, మన దైనందిన జీవితాలలో భాగమైన విస్తారమైన నిత్య వాస్తవికతను ఆయన మనల్ని చూడనివ్వవచ్చు, అక్కడ చిన్న మరియు సాధారణ విషయాలు ఇచ్చేవారు మరియు స్వీకరించే వారి మేలు కోసం కలిసి పనిచేస్తాయి.
నా మొదటి మిషను అధ్యక్షుడి కుమార్తె రెబెకా, మరొకరి ప్రార్థనకు జవాబివ్వడాని ఊహించని అవకాశంతో, ఆదరణ కోసం చేసిన ఆమె ప్రార్థనకు ప్రభువు ఎలా సమాధానమిచ్చారో పంచుకుంది.
ఇటీవల మరణించిన ఆమె తల్లి విషయమై దుఃఖిస్తూ ఉన్న రెబెకాకు ఒక సాయంత్రం ఆలస్యంగా, కారుకు గ్యాస్ కొనడానికి వెళ్లాలనే స్పష్టమైన ఆలోచన కలిగింది. ఆమె గ్యాస్ స్టేషన్కు వచ్చినప్పుడు, పెద్ద ఆక్సిజన్ ట్యాంక్తో పీల్చుకోవటానికి పోరాడుతున్న ఒక వృద్ధ మహిళను ఆమె కలుసుకుంది. ఆ తర్వాత, రెబెకా ఆ స్త్రీకి తన తల్లి యొక్క చిన్న ఆక్సిజన్ యంత్రాన్ని ఇచ్చింది. ఈ సహోదరి కృతజ్ఞతతో, “నువ్వు నాకు నా స్వేచ్ఛను తిరిగి ఇచ్చావు” అని చెప్పింది. యేసు క్రీస్తు చేసినట్లుగా మనం పరిచర్య చేసినప్పుడు సంగతులు మేలు కొరకు కలిసి పని చేస్తాయి.
బోధకుని వయస్సుగల తన కుమారునితోపాటు పరిచర్య సహచరునిగా నియమించబడిన ఒక తండ్రి ఇలా వివరించాడు, “పరిచర్య చేయుట అనగా బిస్కట్లను తెచ్చే పొరుగువారిగా ఉండుట నుండి నమ్మకస్తులైన స్నేహితులుగా, ఆత్మీయంగా అత్యవసరానికి స్పందించే వారిగా ఉండుట.” యేసు క్రీస్తుతో చేర్చబడిన నిబంధన ఓదార్పునిస్తుంది, జతపరుస్తుంది, పవిత్రం చేస్తుంది.
విషాదంలో కూడా, ఆత్మీయ సిద్ధపాటు అనేది మనం అత్యంత బలహీనంగా మరియు ఒంటరిగా భావించినప్పుడు మన పరలోక తండ్రి ఎరుగునని మనకు గుర్తు చేయవచ్చు. ఉదాహరణకు, తమ బిడ్డను ఆసుపత్రికి తీసుకువెళ్లిన కుటుంబానికి, వారు ఆశించవలసిన విషయాన్ని పరిశుద్ధాత్మ ముందుగానే గుసగుసలాడినట్లు జ్ఞాపకం చేసుకోవడంతో ఓదార్పు లభిస్తుంది.
విస్తారమైన నిత్య వాస్తవికత ఏమిటంటే కొన్నిసార్లు తెరకు అవతలివైపునున్న కుటుంబాన్ని కలిగి ఉన్నట్లుగా భావించేలా ప్రభువు మనల్ని అనుమతిస్తారు. పునఃస్థాపించబడిన యేసు క్రీస్తు సువార్తకు మారడంలో ఒక సహోదరి సంతోషమును కనుగొన్నది. రెండు గాయాలు ఆమె జీవితాన్ని తీవ్రంగా ప్రభావితం చేశాయి—ఒక పడవ ప్రమాదాన్ని చూడటం మరియు తన ప్రాణాలను బలిగొన్న తన తల్లిని విషాదకరంగా కోల్పోవడం.
అయినప్పటికీ, ఈ సహోదరి నీళ్ల పట్ల తనకున్న భయాన్ని పోగొట్టుకుని, ముంచబడుట ద్వారా బాప్తిస్మం తీసుకున్నది. మరియు చాలా సంతోషకరమైనదిగా మారిన ఒక రోజున, చనిపోయిన తన తల్లికి బదులుగా ప్రాతినిధ్యం వహించే వ్యక్తి దేవాలయములో బాప్తిస్మము పొందడాన్ని ఆమె ప్రత్యక్షంగా చూసింది. “దేవాలయ బాప్తిస్మము నా తల్లికి స్వస్థత చేకూర్చింది, అది నాకు విడుదలనిచ్చింది.” “మా అమ్మ చనిపోయిన తర్వాత నేను శాంతిని అనుభవించడం ఇదే మొదటిసారి” అని ఆ సహోదరి చెప్పింది.
మన పరిశుద్ధమైన సంగీతం, సమస్త సంగతులు మన మేలు కొరకు కలిసి పనిచేస్తాయనే ఆయన హామీని ప్రతిధ్వనిస్తుంది.
“నా ప్రాణమా, ఊరకుండుము: నీ దేవుడు బాధ్యత తీసుకొనును
తనకు గతం ఉన్నట్లుగా భవిష్యత్తును నడిపించుటకు.
నీ నిరీక్షణ, నీ విశ్వాసం దేనినీ కదిలించనివ్వలేదు;
ఇప్పుడు రహస్యమైనవన్నీ చివరికి ప్రకాశవంతంగా ఉంటాయి.20
రండి, రండి, పరిశుద్ధులారా, శ్రమ లేదు, భయం లేదు;
కానీ ఆనందంతో మీ దారిలోకి వెళ్లండి.
ఈ ప్రయాణం మీకు కష్టమైనదిగా కనబడినప్పటికీ,
కృప నీ దినము వలె ఉండును. …
మరియు మన ప్రయాణం ముగియకముందే మనం చనిపోతే,
సంతోషమైన రోజు! అంతా సవ్యంగా ఉంటుంది!21
యేసే క్రీస్తు మరియు దేవుడు ఆయన ప్రవచనాలను నెరవేరుస్తారు అనడానికి మన చేతితో పట్టుకోగల నిదర్శనము మోర్మన్ గ్రంథము. మన కాలాన్ని చూసిన ప్రేరేపించబడిన ప్రవక్తలచే వ్రాయబడిన మోర్మన్ గ్రంథం, ముఖ్యమైన విభేదాలతో వ్యవహరించే కుటుంబపు—అపరిపక్వమైన నాటకంతో ప్రారంభమవుతుంది. అయినప్పటికీ, మనం 1 నీఫై 1 నుండి మొరోనై 10 వరకు అధ్యయనం చేసి, లోతుగా ఆలోచిస్తున్నప్పుడు, అక్కడ, అప్పుడు జరిగినవి మరియు ఇక్కడ, ఇప్పుడు జరిగినవి మనలను ఆశీర్వదించగలవని దృఢమైన సాక్ష్యముతో మనం యేసు క్రీస్తుకు దగ్గరవుతున్నాము.
అనేక ప్రదేశాలలో, ప్రభువు తన జీవిస్తున్న ప్రవక్త ద్వారా ప్రభువు యొక్క మందిరాలను దగ్గరగా తెచ్చినప్పుడు, దేవాలయ దీవెనలు మన మేలు కొరకు కలిసి పనిచేస్తాయి. మనము మన తండ్రియైన దేవుడు మరియు యేసు క్రీస్తు వద్దకు నిబంధన మరియు విధి ద్వారా వచ్చి, మర్త్యత్వముపై శాశ్వతమైన దృక్పథాన్ని పొందుతాము. సీయోను పర్వతంపై ప్రభువు యొక్క రక్షకుల మాదిరిలో యేసు క్రీస్తు నిబంధన దీవెనలను అందజేస్తున్నందున, ఒక్కొక్కటిగా, పేరు పేరునా, మన ప్రియమైన కుటుంబ సభ్యులకు—పూర్వీకులకు—చేసే దేవాలయ విధులు విస్తరించబడిన కుటుంబాన్ని ఏకం చేస్తాయి.22
అనేక ప్రదేశాలలో దేవాలయాలు మనకు దగ్గరగా వచ్చినప్పుడు, ప్రభువు యొక్క మందిరములో మరింత తరచుగా పరిశుద్ధతను వెదకడమే మనం అర్పించగల దేవాలయ బలి. అనేక సంవత్సరాలుగా మనము దేవాలయానికి రావడానికి పొదుపు చేసి, ప్రణాళిక చేసి, త్యాగం చేసాము. ఇప్పుడు, పరిస్థితులు అనుమతించినప్పుడు, దయచేసి ఆయన పరిశుద్ధ మందిరములో ప్రభువు వద్దకు మరింత తరచుగా రండి. క్రమమైన దేవాలయ ఆరాధన మరియు సేవ మిమ్మల్ని మరియు మీ కుటుంబాన్ని, అనగా మీకు ఉన్న కుటుంబాన్ని మరియు ఏదో ఒక రోజు మీరు కలిగియుండే కుటుంబాన్ని ఆశీర్వదించి, రక్షించి మరియు ప్రేరేపించనివ్వండి.
అలాగే, మీ పరిస్థితులు అనుమతించే చోట, దయచేసి మీ స్వంత దేవాలయ దుస్తులను సొంతం చేసుకునే ఆశీర్వాదాన్ని పరిగణించండి.23 నిరాడంబరమైన కుటుంబానికి చెందిన ఒక అమ్మమ్మ ప్రపంచంలో తాను ఎక్కువగా కోరుకునేది ఏదైనా ఉంది అంటే అది తన స్వంత దేవాలయ దుస్తులని చెప్పింది. ఆమె మనవడు ఇలా చెప్పాడు, “అమ్మమ్మ నెమ్మదిగా చెప్పింది, ‘నేను నా స్వంత దేవాలయ దుస్తులలో సేవ చేస్తాను మరియు నేను మరణించిన తరువాత, నన్ను వాటితో పాతిపెట్టండి.’” మరియు సమయం వచ్చినప్పుడు, ఆమెకు ఆలాగునే జరిగింది.
అధ్యక్షులు రస్సెల్ ఎమ్. నెల్సన్ బోధించినట్లుగా, “మనం నమ్మే సర్వస్వము మరియు దేవుడు తన నిబంధన ప్రజలకు చేసిన ప్రతీ వాగ్దానమూ దేవాలయంలో ఒకటిగా కలిసి వస్తాయి.”24
ఈ లోకములో మరియు నిత్యత్వములో, మన మేలు కొరకు సమస్త సంగతులను ఒకచోట చేర్చడమే సృష్టి యొక్క ఉద్దేశ్యం మరియు దేవుని స్వభావము.
ఇది ప్రభువు యొక్క శాశ్వతమైన ఉద్దేశ్యం. ఇది ఆయన శాశ్వతమైన దృక్పథం. ఇది ఆయన శాశ్వతమైన వాగ్దానం.
జీవితం చిందరవందరగా ఉన్నప్పుడు మరియు లక్ష్యం స్పష్టంగా లేనప్పుడు, మీరు బాగా జీవించాలనుకున్నారు కానీ ఎలా జీవించాలో తెలియనప్పుడు, మన తండ్రి అయిన దేవుడు మరియు యేసు క్రీస్తు వద్దకు రండి. వారు జీవిస్తున్నారని, మిమ్మల్ని ప్రేమిస్తున్నారని మరియు మీ మేలు కొరకు ప్రతిదీ కోరుకుంటారని విశ్వసించండి. వారు అనంతంగా మరియు శాశ్వతంగా చేస్తారని యేసు క్రీస్తు యొక్క పవిత్రమైన మరియు పరిశుద్ధమైన నామంలో నేను సాక్ష్యమిస్తున్నాను, ఆమేన్.