Bwaai Ni kabane A kaota Rongorongona

“E taku Toma nako ina, te Uea, ti aki ata ike Ko na nako iai; ao ti na iranna ni kona n ata te kawai?

“E taku Iesu nako ina, Bon Ngai te kawai, ao te koaua, ao te maiu: akea ane e nako n te Tama, bwa ti i Rou” (Ioane 14:5–6).

René Cyron:

“I ikawai rake n te utu ae a kaaina te ekaretia tabeman mai iai. I riai ni kaman motika au iango bwa te kawai raa ae N na iria. I rootaki man taian karaki n te Baibara ake e karakin tinau nakoiu. I noora aron tinau bwa e kanga aron maiuna. I noora aroia ana utu tamau bwa e kanga aron maiuiia. I noria aomata ake I mataaiakiniia n te Ekaretia bwa e kanga aron maiuiia. I ataia bwa a ira ana kawai te Tia Kamaiu, ao I a iangoia bwa N na bwabetitoaki.

“Ngkai ngkana I karaoi au rinerine, I iangoa te bwai are I a tia n reiakinna Irouna, ao I kataia ni Katootonga. E a tia ni kaota nakoiu te kawai ae rangi n nakoraoi. E kona ni buokira ni karikirakei ao ni kaotai konabwaira ake inanora. N na riki bwa te aomata ae akea bonganau ngkana I aki kona ni bitaki, ma I ataia bwa Rinanona, e na kona n reke te bitaki.”

“Taraia, I tei n te mataroa, ao I karebwerebwe: ngkana te aomata ae ongo bwanaau, ao e kauka te mataroa, N na rin nakoina, ao ni mooi ma ngaia, ao e na mena ma ngai” (Te Kaotioti 3:20).

René Cyron:

“E karebwerebwe te Tia Kamaiu ibukina bwa e tangiriira. E rangi ni bati ae E na anga, ma E a tia n anganai te inaomata n rineia bwa N na kauka te mataroa Nakoina ke N na aki. E na reireiai, ao ni buokai ma korakorau ao kabwakau.

“I kona ni kauka te mataroa ma te nimaamannei ao ni butimwaeia bwa E kona n reireiai. I kona ni kauka te mataroa ma butimwaeana bwa tera ae e reiakinaki, ni kinaa raoi ae iai bwaai ae N na biti mairou.

“Au kaantaninga bwa N na Kinaa n taai nako n te mataroa, ibukina bwa tabeman a karebwerebwe naba. Ao I tuangaki bwa N na karaoa ae ti tebo, bwa N na ukeriia tabemwaang ao ni kaoiia bwa a na roko Nakoina. Rinanora, a riai ni kona ni karekea Ataakina.”

“Mangaia aei ba ane ongo au taeka aikai n tau, ao e na atongaki ba ai aron te aomata ae wanawana, are katea batana i aon te b’a:

“Ao e b’aka te karau, ao e roko te raanga, ao e kare te ang, ao a neakina te bata arei; ao e aki b’aka: ba a kateaki bouana i aon te b’a” (Mataio 7:24–25).

“Uringnga bwa bon iaon te bwa are ara Tia Kaboomwi, are Kristo, natin te Atua, are kam na riai ni katea iai aami; … are bon aan te kateitei ni koaua, aan te kateitei are ngkana aomata a kateitei iaona ao aki kona ni bwaka” (Ereman 5:12).

Maike Adler:

“I ikawai rake bwa kaain te Ekaretia, ma ngke e a kaan au ka-14, I a iangoia bwa ai bane buakara korakorau—ao te kawai raa ae N na riai ni maiuakinna. N na riai ni iriia raoraou nakon taian bobotaki ake aki toki ni kaakairai nako iai, ke N na riai ni kaakaea te tieminari? I taetae nakoia au karo, ao I tataro. I karekea au kakoaua, ao I ataia bwa N na riai ni kaea te tieminari.

“N akean te Tia Kamaiu, bwaninin maiu e na bon rangi ni kaokoro—raoraou, ao kakaawakiu. I aki ataia bwa e aera I mena ikai. A mwaiti aomata ma aia reirei, ma tamaroan ao anuan te aonaaba a bitaki ao a mwainging. Ngke arona bwa I kateaki iaon te bwai ae aki matoatoa ao e mwainging, N na manga tangira katean aau ni katoa tai. Ko na riai ni karekea te bwai ae aki bibitaki bwa ko na kateitei iaona. E aki bibitaki Kristo. Ana eti e bon teimatoa n eti. Ko kona n nim Nakoina. E na aki kariaia bwa ko na bwaka.”

“Ao e manga taetae Iesu nako ia, ao E taku, Otan te aba Ngai: ane irai ao e na bon aki nakonako n te ro, ma e na karekea te ota ni kamaiu” (Ioane 8:12).

Jan-David Wohlleben:

“Ana euangkerio bon te ota are e anga kawain te maiu ae itiaki, te kawai ae I kona ni kamatoatoaai nako iai. Rinanon Ana reirei, ti karekea te ota bwa ti aera ti mena iaon te aba. Rinanon Ana mwakuri ni kamaiu, ti kona n oki nakon te Atua rinanon te rairannano. I a rangi ni iangoraoi riki iaon bwaai ngkai ake N na karaoi, ao n rangi n taratara raoi riki ma taeka ake N na taekin.

“Ngkai kaain ana Ekaretia Kristo, ko na bon aki kona ni maroaa. E na iai n taai nako te ibuobuoki ae tauraoi. E anganai te mweeraoi; E buokai ma kakaewenakoau; E buokai ma babaire ngkana I butiia inanon te tataro ma nanou raoi. Iriirakina e a tia ni bita maiu.”

“E kaeka Iesu ao e taku nako ina, Ngke tao ko ata ana bwai n tituaraoi te Atua, ao Teuae kangai nako im, kamai bwa N na moi; ao ko a kaman butia iai, ao E a anganiko te ran ae maiu… .

“Ma ane e moi n te ran ae N na anganna; ma te ran ae N na anganna ao bon te maniba n ran i nanona ae koburake nako nanon te maiu are aki toki” (Ioane 4:10, 14).

Jasmin Zanardo:

“I rangi ni kakaitau ibukin ana bwaintangira te euangkerio. E mwaiti raoraou i tinanikun te Ekaretia. A taku: ‘I aki atai bwaai ni kabane ae taekan te Atua, ma I nora arom ni maiu, I rangi ni mataiakiniko.’ E anganai te namakin ae I kakatonga bwa iai te bwai ae I kabaeaki nako iai, ibukina bwa a aki; a bon teimatoa n taka.

“Ti riai ni kakoaua iroun Kristo nakoia tabemwaang bwa a aonga n Ataia, bwa a aonga n roko ni kona ni mooi n te ran ae koburake nako nanon te maiu are aki toki.”

“Ma inanon Kristo Iesu ngkai ngkami aika kam mena i kiraroa ngkoa, kam riki ni kaan i nanon raraan Kristo… .

“Mangaia ae tiaki aomata ianena ngkami ngkai ao tiaki naba aomata aika kam maeka ni iruwa, ma kam buoka n aba ma ake a itiaki, ao ana utu naba te Atua ngkami;

“Ao kam kateaki i aon taian boua ake taan tuatua ma burabeti, ao Iesu Kristo naba te atibu are bouan te maninganinga are moan te kakannato;

“Are e bane ni kaboraoaki te kateitei i Rouna, ao e rikirake bwa te maneaba ae tabu inanon te Uea” (I-Ebeto 2:13, 19–21).

Jasmin Zanardo:

“E kaminomino te aonaaba ibukina bwa e aki tau ae e a tia n anga te aonaaba. A mwaiti aaro ma aia koaua. Ma te euangkerio ae ti karekea e bwanin. Aana are ti karekea e bon matoatoa.”

“E taku Iesu nako ia, Ngai te berena ni kamaiu: ane nako Iu ao e na bon aki baki, ao ane onimakinai ao e na bon aki taka” (Ioane 6:35).

Jasmin Zanardo:

“I bungiaki inanon te euangkerio, ma ni kabane aomata bwa teuanne ke neienne e na kakae ni bwaai tabeua ngkana e koaua te Ekaretia. Ai bon 12 au ririki ngke I tangiria ni kan ataia, ao I kunea. Rinanon ana Mwakuri ni Kamaiu Iesu, I a maiu. Rinanon taian kataaki aika kangaanga, I a tia n anganaki te rau n ataia bwa antai te Tia Kamaiu ao tera ae E a tia ni karaoia ibukira. Ana tangira ibukira e bon rangi ni korakora. E anga Maiuna ibukira. Bon Ngaia maiu.”