E Raoiroi Ataakina

Ngke ai 19 au ririki, I kitana au kaawa ae uarereke i nuukan Cambodia ao ni maeka ma tariu te ikawai ni kaawan te tua i Phnom Penh. Ni mwaitin te ririki mai mwaaina e a tia tariu ni kaitibo ma ataeinimwaane uoman aika kairake aika a bwainiia n te kabaraaki ae mainaina; ao ma nnen araia ae uarereke. Ngkai tariu e a kaotai nakon te euangkerio ao I a bwabetitoaki nakon te Ekaretia.

Ngke I bwabetitoaki, au beretitenti n te mwakoro, Beretitenti Pen Vibol, e tuangai, “Kauringi Taekan te Onimaki. A kabwarabwarai bwaai aika raoiroi inanon te Ekaretia, bwaai aika ko riai n uringnga n taai nako.” I taku bwa te kauring ae wanawana aei, ao I kauringi ni kabane ake 13 ao ni kaokioki ni kabatia taina. Imwiina bwaai ni kabane, ngkana iai ae titirakinai iaon te Kiritian, I tangiria ni kan kabwarabwara au onimaki. Ma I aki kona ni iangoa arona bwa aekara kakaawakin bwanaan Beretitenti Vibol are e na riki n ai arona.

E aki toki tariu ni kaunga nanou bwa N na karikirakea arou ao ni karekea au reirei. Tabeua te ririki imwiina I a bwabetitoaki, ao I a bwaati nakon te ukeuke ni karinrin n te reirei ae rietaata n te taetae ni Imatang, ao I a karekea te mwane ni buoka ae te aua-n-ririki bwa N na kamatebwai ibukin katanoata n anainano ni bitineti n te aonaaba n te Brigham Young Iuniwetiri–Hawaii.

Ma ni matoa n ai aron te ukeuke ni karinrin, te kabanea ni matoatoa ni itera riki are e na roko imwaaiu—karekean te kariaiakaki n rin i Amerika. Te kariaiakaki n rin i Amerika e bon kangaanga ao e bobuaka. N tabetai e aki kariaiakaki te bubuti n rin ibukia ataei ake a tia ni karekea te mwane ni buoka ngkana bon ibukiia naba ataein te reirei aika a na kaea te reirei ae rietaata i Amerika. I kanoai taian booma aika riai, karekea te tai ni marooro ma ana tia tei te tautaeka n Amerika, ao n te tai ae waekoa I a kuneai n tekateka imatan ana taibora te mwaane ae kairake ae buruu kanoan matana.

“A rangi ni mwaiti taian reirei aika rietaata i Amerika,” e taku te tia titiraki. “E aera ko tangiria ni kan nako BYU–Hawaii?”

“Ibukina bwa ngai kaain ana Ekaretia Iesu Kristo Ibukiia Aika Itiaki Ni Boong Aika Kaitira, ao bon ana iuniwetiri te Ekaretia,” I kaeka.

E kamwaingi ana beeba te tia titiraki. “I noria bwa tarim e a kaman mena naba ikekei,” e taku. I ataia bwa te tia tei ibukin te tautaeka e aki tangira ae raka iaon temanna n te utu bwa a na kitana te aba n te tai ae ti tebo.

“Eng,” I kariaia. “Tariu te ikawai e bon reirei n te BYU–Hawaii.” E aki mata ni kukurei te tia titiraki.

“A kona ni boutokaiko am karo?” te titiraki are imwiina.

“Te tia ununiki tamau, ao te tia boobwai tinau,” I taku. I tuangnga ae a aki rangi ni karekea te mwane ae bati.

“Ao ko na kanga ni karekea room n reirei i Amerika?” e titiraki te tia titiraki.

I anaa au reta ni butimwaeaki ao ni kabwarabwara ae I karekea te mwane ni buoka bwa N na reirei n te reirei ae rietaata.

Imwiin nooran te reta, e a kauka ruun ana taibora te tia titiraki ao n anaa te kaati ae uarereke. “Taekin aua man Taekan te Onimaki,” e taku.

I rangi n atai raoi n aron ae I rangi n ata oin arau. “Ti kakoaua te Atua, te Tama ae Akea Tokina, ao Natina ae Iesu Kristo, ao te Tamnei ae Raoiroi,” I moanna. Imwiin ae I bane n te kateniua, e a katokai te tia titiraki.

“Ngaia raoi, e rangi n tamaroa!” e taku, ao e kaoka te kaati nakon ruun ana taibora. “Ko kona n anaa am beeba ni kariaia ningaabong.”

I aki ataia bwa e aera te tia titiraki iai Taekan te Onimaki inanon ana taibora, ma I karabwarabwa bwa I aki manga iangoia te kauatai ngke e tuangai bwa N na taekini. Ataakin Taekan te Onimaki e na kona n aki uoti mwiia aika kakukurei n taai nako, ma a na rangi n raoiroi ataakiia.