Kaota am iango

Inanon au tai ni mitinare i Venezuela, ti reireina temanna te mwane are e a tia ni karaoa te kakae ibukin aaro aika mwaiti ma e aki reke te bwai ae e kakaea. E tangiri bwaai ni kabane ake ti reireinna ibukin te Ekaretia, ma e aki namakina ae e a tia ni karekea boon ana titiraki rinanon te tataro. E moanna n rawata ana nano uoua. Ma a manga mauna. E tuangira ae n ana tai ni biri n te tabo ni kaa ao e kunea te Riaona n te tabo n tekateka. E tekateka ao e warekia, ao e kaekai ana titiraki. Man te tai anne ao a bairea naba ana tai ni bwabetito. Ko rabwa ibukin te Riaona!

Unimwane Jordan Eves, Chile Viña del Mar Mission

I kawara temboran Ana Ekaretia Iesu Kristo Ibukiia Aika Itiaki ni Boong Aika Kaitira i São Paulo, Brazil, n tain kaukakina nakoia aomata ibukin neweabaana, ao I koroi man taekin aron tamaroana! A rangi ni bane n tamaroa bwaina ni kabane. Ti bane ni butimwaeaki raoi ao ni tabeakinaki. I namakinna bwa e bon raonira Iesu Kristo.

A bane n rangi n tamaroa te naan ruu! Ao n ruu ni kabane I kona n namakina te rau ae akea aron kabwarabwarana. Te ruu are te teretiare ai aron karawa—I aki kona n taona nanou n te tangira ae kororaoi are I namakinna. Ko rabwa ibukin anganakira te tai aei. Ngai bon kaain te aro teuana, ma inanon rokou aei I a manga namakina booun te onimaki ao ana rau te Uea.

Marisa Pretti Ferreira, Brazil

Ti kanakoi ara kamauri ao ara karabwarabwa ni kamoamoa ibukin nooran aia mwakuri ami taan ni mwakuri ae akea n aiarona. Te Riaona bon ngaia te anga are ti kona iai n noora te aonaaba are ti kona iai n roota tokin te buraneti, are bon ngaia are e mena iai abara. E rangi n tamaroa aron kuneakin ana beeba ni kaongora te Ekaretia n Spanish iaon te Intanete.

Juan C. Giménez ao ana utu, Paraguay

Ngkai ngai te tia wareware ae marurung ni warekan ami beeba ni kaongora aika tamaroa, I aki kona n tataninga manga rokon ae boou ni katoa namwakaina. Bwaai ake a taibinaki ni iteran baan te Riaona—aia koroboki taan kairii n te Ekaretia, aia taetae n tain te maungatabu ni kabuta, taekan te onimaki, reta mairouia taan wareware, ao bwaai riki tabeua—a teimatoa n tabeka temanna ao ni katauraoi kairiri mai eta nakoiu. A kamwarakei tamneira, nanora, ao ara iango. A buokai n anganai kaekaan titiraki aika rangi ni kakawaki ao kangaanga aika kakaokoro inanon maiura. E kuri ni karekea te korakora, ao te kakoaua baana ni kabane. E kona n rangi ni kangaanga ibukia tabeman, ai uana ma te tia wareware ae nanououa ni kakoauaan bwaai, bwa e na teimatoa n aki kona n ringaki iroun te tamnei.

Vyacheslav Gureev, Russia