“Tamau, I Kamoamoa Ibukim!”

Ibukin aki atakin te reirei teuana irou ma buu i Madrid, Spain, are a kabutaki irouia kaain Ana Ekaretia Iesu Kristo Ibukia Aika a Itiaki ni Boong Aika Kaitira ao ibukin tangiraia natira bwa ana reirei taekan te aro, tia kabaei araia n reirein te aro teuana are e bon kabutaki naba n te aro teuana. Ibukina bwa bon ti natira aika kain te Ekaretia ake a kaea te reirei aei, bon ara kantaninga bwa anaki bainikirinaki ibukin aia aro.

N te taina n Okitobwa 1999, natira te mwane ae Pablo 16 n te tai anne, e anganira te beeba ni kakao man te reirei bwa tina ira te reirei ao te maroro ae atunaki n “Te Aro ae Kaaitarai Koaua: Kaain te Moomon.” E na anga te reirei te aomata ae onimakinaki man korakora kinaakina man tia ni kabanea angiin ana tai ni kamatebwaia taekan taian aro ni maiuna, ni kaineti riki ibukin Ana Ekaretia Iesu Kristo Ibukiia Aika Itiaki ni Boong Aika Kaitira.

Ibukin makakin taekinan bwaai aika bure ibukin ara koaua, I reitaki ma te beretitenti n te titeiki man tuangnga ibukin te bowi. E taua mwiin te bong ao te tabo ao n tuangai bwa N na taetae ma te Church’s Public Affairs Department n tuangiia ngkana iai ae kona ni kaea ao ni kaekai titiraki ake ana kaoti.

Ngke e a roko te tai anne, I a nako ma buu, ao natiu te mwane ni kaea te reirei. Bon 500 te aomata ake a tekateka n te mwaneaba n te tai anne. N te tai are tia tekateka iai, e taratara nako matau ni kakaiia tabeman kaain te Ekaretia ngkana iai ni kaoti ibuakon te mwaiti n aomata are e kaona te ruu ae bubura aei. E aki rangi ni maan ngke I a noora Brother Quirce of Public Affairs. E katea bwaina ni iraorao man iteran te ruu.

E a waaki te boowi, ao te tia kaira te bootaki e kabwarabwara te tia taetae, e onrake aron kamoamoana ao ni kabwarabwaraaki ibukin mwiin ana uniwetiri are e a tia ni karekei iai ana beba aika ririeta, ibukin te rabakau ni bwaai tabeua ao te rabakau n rekereke ma te Ekaretia ni Kiritian. E moana ana kakarabwakau te tia taetae man rongorongo aika uarereke ibukin te Maiu ni Kiritian man ana tai Iesu Kristo ao Ana Abotoro ni karokoa te ririki1830, ngke e a moana iai te aonaaba n ongoraea taekan Ana Ekaretia Iesu Kristo Ibukiia Aika Itiaki ni Boong Aika Kaitira, are e kateaki i America.

E aki buakaka aron ana taeka te tia taetae ibukin bonganan ara koaua. Ma e oota bwa e atia ni wareki angiin ara booki bukina bwa e kamanenai kiibu tabeua man Ana Booki Moomon ao man te Doctrine and Covenants. E a manga reitanako naba ana wareware ni warekan rongorongon te Burabeti ae Iotebwa Timiti are karekea te Moan Kaotioti. E kataia ni kairia ana taan ongora nakon ana kainiin ae ngkana Kaain te Moomon e reke bwa te aro ni kaitarai koaua tabeua, n aron ae kakoaua, bon tiaki teuana mai ibuakon aro ae a rangi ni kakamaku.

I tau bwaai ni kabane ake I taku bwa aki eti, n aron are taku bwa Kaain te Moomon bon tiaki Kiritian, ao Iotebwa Timiti e a tia ni kaewea Ana Boki Moomon man aia boki ni karaki I-Amerika ngkoa. E rangin ni kamataataki raoi te kaongora man kabanea e raka iaon 90 te miniti, te tai are e reitinako iai takaruaia aomata ni kaota kukureia.

Ngke e toki te takarua ni kukurei ao e moanaki te marooro, te moan aomata are teirake bon te Tari Quirce, are e kabwarabwara bwa bon ngaia kaain te Ekaretia. E kabwarabwara bwa e kanga Iotebwa Timiti ni karekei te naan bwaatua koora ao tera tabena are e a tia ni karaoia ibukin tabena ni Burabeti ibukin Kaokan te Ekaretia.

N au tai n ongora iroun te Tari Quirce, I waekoa n namakina kainnanoan are n na teirake naba ni kabwarabwarai reirei tabeua bwa aonga aomata ake a roko n ata te koaua ibukin reirei ao ara kakoaua.

Ngke I tuangia au utu are I tangiria ni kan taetae, e maaku Pablo man taku, “Konaki, Tamau, taiaoka. Tai taekina te bwai teuana, bwa a bane ni kinaai kain te tabo aei, ao mwiina e na reke au kangaanga ma au taan reirei.” I taku n au iango bwa e aki tau ninikoriau ngke I katuka te Tari Quirce bwa ana ti ngaia n taetae, ma I aki kariaia natiu bwa e na reke ana kangaanga, ngaia are I kariaia bwa N na tiku n aki kakarongoa. Ma ngke e a waaki nako te tai, I kona n namakina rikiraken matoatoan te Tamnei.

I kaokioka tuangakia au utu te bwai ae I namakinna, ma e reitinako natiu ni kaitara are n na teirake. N tokina, I aki kona ni totokoa ana kairiri te Tamnei, I karaurau n teirake ao ni kakaea kawaiu n toua tinanikun te ruu bwa n na reitaki ma te Tari Quirce. Iai te maningongo ni mimi are e kaoti ibuakoia taan ongora: “Kaain naba te Moomon.”

N te tai are e nang anga iai ana taeka ni kainiin te Tari Quirce, I karina baiu n au bua ni buuti taeka ake I taau mwiia, ma I rangi ni mimi bwa akea kanoan au buua. I kitana au boki iaon au kaintekateka. N te tai anne are e a roko iai au tai.

I aki ataia bwa nna moanna mwaia. Bwaai ni kabane ake I a tia ni iangoi bwa N na taekin a bane ni mauna man au iango. I moanna man taekinan ae I a tia n riki bwa kain Ana Ekaretia Iesu Ibukiia Aika Itiaki ni Boong Aika Kaitira inanon 26 te ririki ao I ataia bwa bon ti ngaia te Ekaretia ni koaua iaon te aonaaba, are e a tia ni kaokia Iesu Kristo rinanon te Burabeti ae Iotebwa Timiti, bwa Iesu bon ti ngaia Natin te Atua—Ara Tia Kamaiu ao Tia Kabooi Maiura.

I aki uringnga bwa maanra Ngai n taetae ke mwaitira taeka ake I taekin. I ti uringnga aron te rau ae korakora ao aron namakinan aron ananaun aia taratara 500 te mata ake a taarai. Ngke I tia, I anga au karabwarabwa nakoia ake a roko ibukin anganakiu te tai bwa N na kaoti au koaua tabeua n rairaki ao ni kitana te ruu. E reke irou te rau, ma a ruru waeu.

N tokin te bowi ao I a manga okiria au utu, e kawarai natiu man taku, “Tamau, koa tia ni karaoa ae eti. Ko a tia ni kaota am kakoaua ae moan te tamaroa, ao ko taetae ma te korakora ao te mwaaka. Tamau, I kamoamoa iroum!”

E ataia Pablo bwa a na iai ana kangaanga n te reirei ibukin are I a tia ni karaoia, ma e a moamoa riki bonganan irouna atakin ae tamana iai ana koaua are e tei ibukina.