Tabo ni Mwane e Karaoi Bwaai ni Mwakuri aika Tamaroa Ibukin Tararuaan te Mwane

A mwaiti aia tai n anga taeka n reirei mataniwi n te Ekaretia ao Beretitenti Gordon B. Hinckley ni kaineti ma te toro-ni bwai, taarau, ao tararuaan te mwane ae tamaroa, ao ana Tabo te Ekaretia ni Buoka te Mweraoi e a tia ni karaoa te bwai ni mwakuri ae baireaki bwa e na buokia kaain te Ekaretia n ira nanon te taeka n reirei arei.

“A rang ni mwaiti ara aomata aika moan te mwaiti aia taarau ibukin bwaai aika aki kainnanoi,” e taekinna Beretitenti Hinckley n Okitobwa 2001. “I kairoroi ngkami kaain te Ekaretia bwa kam na inaomata man te taarau n te tai ae riai ao ni katuka teutana nakon boong ni buaka” (“The Times in Which We Live,” Liahona, Tianuare 2002, 84–85; Ensign, Nobembwa 2001, 72).

Te boki ae uarereke ae a manga bitaki tein kanoana, One for the Money: Guide to Family Finance, bon te bwai ni mwakuri ae kona n reke nakoia kaain te ekaretia bwa e na buokia n ataan raoi aron te taarau ao ni kona n tararua aia mwane.

“A bon aki kamanoaki kaain te Ekaretia man kangaangan te mwane,” e taekinna Dennis Lifferth, tarekita manatia ibukin te Tabo ni Buoka te Mweeraoi. “Mangke e moanaki te Ekaretia ti a kam anganaki taeka n reirei bwa ti na toro-ni bwai ao ni maiu inanon are ti karekea.”

Kanoan baan One for the Money: Guide to Family Finance bon man ana taetae Unimwaane Marvin J. Ashton (1915–94) man te Kooram n Abotoro n te bootaki ibukin Buokan te Mweeraoi inanon Eberi 1975. Ana kabanea n tai ni boretiaki bwa te boki ae uarereke bon inanon 1992. Te bitaki ae boou e karin bannan waare, aron teina ae tamaroa riki, ao e karaoaki te bitaki bwa e na kai reke te rongorongo are e taekinna ngkoa Unimwaane Ashton nakoia taan wareware. Te bitaki ae boou aei e karababa riki 12 moan tuua ake akea tokin taia are e taekin Unimwaane Ashton:

1. Koaua raoi ni kabwakaan te kabwianibwai.

2. Reiakina tararuaan te mwane imwain ae na tararuaiko.

3. Reiakina kaetan-arom ao kamatoan-arom ni kaineti ma te mwane.

4. Kabongana te kataumwane.

5. Moantaai n reireinia kaain te utu kakawakin te mwakuri ao karekean te mwane.

6. Reireinia ataei aron iango ni babaire iaon te mwane man tiatiana kabonganakina nakon are a kona ni karekea.

7. Reireinia kaain te utu n tatabemania n anga nakon ikotan bwaai ni buokan te utu.

8. Karika te reirei bwa te waaki ae reitinako.

9. Mwakuri nakon karekean oin mweengam.

10. Ira waakin te kabomwi n aron ae nakoraoi iroum.

11. Ataaraoi aron mwiin korakoran waaki nako ni kaineti ma mwanen te utu ao ana karinimwane.

12. Ira raoi waakin kawakinan te amwarake ao te katauraoi ibukin te kabuanibwai ae karina.

Te Ekaretia e a waakina karaoan te boki ae uarereke aei bwa e na kona ni karekeaki inanon aekaki n taetae aika: Chinese, English, French, German, Italian, Japanese, Korean, Portuguese, Russian, ao Spanish.

Te boki ae uarereke ae manga bitaki arona aei e na kona n reke n akea boona rinanon ana tienta n tibwatibwa te Ekaretia ke iaonrain (online) n te U.S. ao Canada n te ldscatalog.com. Te boki ae uarereke ae manga bitaki aron teina ma bwaai ni ibuobuoki iaon tararuaan te mwane a na kona ni karekeaki iaonrain n te providentliving.org.

E a tia n anga te berita aei Beretitenti Hinckley bwa: “Ngkana ko a tia ni kabwarai am taarau, ngkana iai am tania, e ngae ngkana e uarereke, ma n rokon te angibuaka iaomi, e na iai kamanoami ma buumi ao natimi ao te raunnano. Ti anne ae I kona n taekinna, ma I bon kan taekinna ma aron au kona ni kamatoa raoi nakoimi” (“To the Boys and to the Men,” Liahona, Tianuare 1999, 66; Ensign, Nobembwa 1998, 51).