Taian Taabia

N te taina, ibukin ana bonginibung kainnabau, I anganna taabia aika tamaroa aika koora. A bon rangi ni kan iaona ngkai e abwabwaki, ma n taraaraoi i roroana, ao a karaoaki taabia akekei ni korotamneia te mronron aika a rangi ni katika te mata ngkana a mwaingiing n otan taai. Kainnabau, Yelena, e rangi ni katika te mata n tai are e bwaini. E rangi n tangiri taabia aikai.

Imwiina e a roko bongin ara katekeraoi n te motirawa ae te kabanea ni kaunga, ae ana bootaki ara mwaanga ni Kakiritimati. I bon tararuaa te waaki ni kakukurei aei n ara mwakoro i Penza, Russia, ai ngaia are I rangi ni katawe, n tangiria ni moantaai n roko ikekei n te tai ae rangi ni waekoa n aron are I kona ni kakoaua raoi bwa a bane n tauraoi bwaai ni kabane ibukin te waaki ni kakukurei. E aki kawaekoa Yelena ma e waakinako ni karaua raoi ni katauraoia. Ngke ai bon akea au tataonaki n nano, I a tuangnga bwa e na toki man bwaai ni katikiraoi, n tuangnga ma te matoa bwa e bon botonaine n akea te katikiraoi. Anne bon au kaairua. E tuangai bwa e aki kan nako n te tabo teuana, ao N nang mwananga tii ngai nakon te bootaki.

Aio are e waaki nakon te kauntaeka ae uarereke, ao ti a taekin taeka aika a kamatauninga nakoira n tatabemanira. N tokina ao e aki kakoroa nanon ana babaire, ma inanon te kaa iaon kawaira nakon te waaki ni kakukurei ti bon aki taekina naba teuana te taeka nakoira n tatabemaniira, n ai aron ae kanga ngaira aomata aika ti aki kinaira.

E karaoaki ara bootaki ni Kakiritimati n teuana te auti ae bubura ni uakaan ma te reirei. Raao ma kaain te Ekaretia n te mwaanga aika mwaane a tia ni buokira ni katikiraoa te ruu ma uee ao tamnein maiun ao maten te Uea. Ngke ti a roko ao ti tekateka n ara kaintekateka, ao e a kunea kainnabau bwa e a bwaina tii teuana te taabia. Aei bon te kamimi ae kabononano, ao ti a bon rangi ni mwaninga iai taekan ara kauntaeka. Ti taratara nako ni katoobibiira, ma—e bon aki kona ni kuneaki te taabia. Ti iangoia bwa e na rangi n tamaroa riki ngkana ti a mwaninga taekana n te tai moa anne ma ti na matakuakina te kaotioti ae tamaroa are a tia ni katauraoia raoraora.

E ngae ngke e rangi ni kakukurei te kaotioti, ma ngai ao kainnabau e aki bwanin kukureira iai. E nakobuaka ara bong, ao ti okira mweengara ma memeeren te tamnei inanora. Ti bon rangi n nanokawaki ni kabuaa te taabia, tiaki ibukina bwa e rangi ni boobuaka ao n tamaroa, ma ae kakaawaki riki ngkai bon te bwaintangira n tangira ibukin kainnabau.

Ngke I uti n te ingabong are imwiina, I a ataia bwa ti a bon kabuaa te bwai teuana riki ae rangi ni kakaawaki irarikin te taabia koora: te katiteuanaaki imarenara. I rairaki nakon Yelena, ao I taku, “Tara toan te taabia are teuana aei. Noora aron tamaroana ao aron otan te ota ae raneanea iaona. Iangoa arona bwa mwaitira te koora ao te korakora are e kainnanoaki bwa e na karaoia, ao nora aron wenena ikekei n tii ngaia iaon am taibora. N te tai are e bua iai are teuana, e a riki bwa ai te bwai teuana ae mangori arona nakon are ngke iai toana. Bon titebo naba ma ngaira. Ngkana ti katiteuanaki, ti kona n rangi n tamaroa, ni korakora, ao ni korakora n ara kakau iango ibukin te raoiroi. Ma ngkana ti aki katiteuanaaki, ti aki karekea te korakora ae ai aron aei, te mwaaka, ke te nakoraoi.”

A waanako ran ni mata iaon ubun kainnabau. E roko ao e rabwatai. E ruru bwanaana ngke e taetae, ma ana taeka e riingai mai atu nako tabon waeu: “Ti riai n aki manga kauntaeka n aki totoki. Ti riai ni katotoonga Tamara are i Karawa ao Natina, Iesu Kristo. Ti tangiriira ibon iroura, ao ti a tia ni kabaeaki n ara mare n aki totoki n te tembora ae tabu. E tangiria te riaboro ni urui utu iaon te aonaaba, ma e aki kona ni karaoia ngkana ti katiteuanaaki. I tangiriko riki n ae bati imwiin te bwai ae e a tia n riki aei. E a tia n tuangiira te Atua bwa tera raoi te utu.”

I mwaneia raoi inanon baiu, ma ranin matau aika bwaro iaon tabau. I ataia raoi ae I a mwanea inanon baiu au kakabwaia ae moan te t amaroa.