Te Irua ibukin te Atatai n Tamnei
N na karakina teuana au namakin ae I karekea imwaain ae I riki bwa te Mataniwi ni Kabuta are e bon rangi n rootai. I tekateka iaon te waanikiba ni kaan ma te tia aki kakoaua ae rangi ni kinaaki ae imanonoa ana aki kakoaua iroun te Atua ai ngaia are I a waekoa ni kaota au kakoaua nakoina. “Ko kaairua,” I taku. “Iai te Atua. I ataia ae E maiu!”
E totoko, “Ko aki ataia. Akea ae ataa anne! Ko aki kona n ataia!” Ngke I aki kona ni katoka au kaitara, te tia aki kakoaua, are te tia kaetitua, e titiraki tao te titiraki ae te kabanea ni kangaanga iaon boton te kakoaua. “E raoiroi,” e taetae n te aro n aki karinerine, ni kan wanawana, “ko taku bwa ko ataia. Tuangai bwa ko kanga n ataia.”
Ngke I kataia ni kaeka, e ngae ngke I taui beeba aika bubura, I aki konamaki n taetae.
Ngke I kabonganai taeka aika Tamnei ao kakoaua, e kaeka te tia aki kakoaua, “I aki ataia bwa tera ae ko kataia n taekinna.” Taeka aika tataro, te konabwai ni motikitaeka, ao te onimaki, a bane n akea nanoia irouna ni kabane. “Ko noria,” e taku, “ko bon aki raoi ataia. Ngkana ko ataia, ko na bon kona n tuangai wa ko kanga n ataia.”
I namakina, ae kanga, I a tia ni kabongana au kakoaua nakoina ma te aki wanawana ao ni bua bwa tera ae I riai ni karaoia. E aki maan imwina ao e roko te namakin! E roko te bwai teuana n au iango. Ao I taekina ikai rongorongon te Burabeti ae Iotebwa Timiti: “Te aomata ae e rianako man nooran ana moan iango te tamnei n te kaotioti; n aron te katooto, ngkana ko namakina te wanawana ae itiaki ae e rinnako inanom, e kona n anganiko iango aika karina … ao man reiakinan Tamnein te Atua ao n ota iai, ko na kona n rikirake inanon reirein te kaotioti, ni karokoa ae ko a nakoraoi inanon Iesu Kristo.”1
N ai aron te iango ae roko n au iango, ao I a kangai nakon te tia aki kakoaua, “Kariaia bwa N na titirakiniko ngkana ko ataia bwa tera aron kanakin te taoro.”
“Eng I kariaia,” bon ana kaeka.
“Imwiina,” I taku, “ni iangoa bwa aongkoa I tuai ma ni kana te taoro, ni kabwarabwara nakoiu bwa aekara aron kanakina.”
Imwiin tabeua te iango, e taku, “Eng, I, aa, e bon aki karewerewe ao e aki mangiingi.”
“Ko a tia n tuangai bwa tiaki ngaia aekan anne, ao tiaki ae aekana raoi.”
Imwiin kakatai aika bati, eng, e bon aki kona ni karaoia. E aki kona ni kabwarabwara, n tii taian taeka, n aron ae e tataneiai iai ngkana e kana te taoro. I kaota au kakoaua nakoina teuana riki te tai ao I taku, “I ataia ae iai te Atua. Ko ngareakina te kakoaua anne ao n taku bwa ngkana I ataia, N na bon tuangko raoi bwa I kanga n ataia. E taetae ma te tamnei, raoraou, bwa I a tia ni kana te taoro. I aki kona riki ni kawenea nakoim n taian taeka bwa e kanga te ataibwai aei n roko nakon ae ko na tuangai bwa aekara aron kanakin te taoro. Ma I a manga kangai riki nakoim, iai te Atua! E maiu! Ao ibukin ae ko aki ataia, tai tuangai bwa I aki ataia, ma I bon ataia!”
Ngke ti a maenako, I ongo ana maningoongo, “I aki kainnanoa am aro bwa e na buokai! I aki kainnanoia.”
Man te namakin anne ni karokoa ngkai, I aki manga maama ke ni bwainrang bwa I aki kona ni kabwarabwara man taian taeka tii ngaia bwaai n tamnei ni kabane ake I atai. E taku te Abotoro Bauro n te kawai aei:
“Ti taetae, tiaki man taeka aika ti reireiaki n rabakaun te aomata, ma ti taekini baikai n taeka aika ti reireiaki iroun te Tamnei; ni kabotaui bwain te tamnei n taeka aika ana bwai te tamnei.
“Ao te aomata ae bon te aro n aomata e aki kaki i nanona bwaai ake ana bwai Tamnein te Atua: bwa e taku bwa te nanobaba; ao e aki kona n atai, bwa a neneraki aroni baikai n te aro n tamnei” (1 I-Korinto 2:13–14).
Te Bwana ae Uarereke, ma ni Maaraara
Bwanaan te Tamnei e kabwarabwaraaki ni koroboki aika tabu bwa e aki “tangimwaaka” ke n aki “matoatoa” (3 Nibwaai 11:3). Bon “tiaki bwaanaan te baa, ao tiaki … bwanaan te karongoa ae rangi ni korakora,” ma nooria, “bon te bwanaa ae rau ae kororaoi beebetena, ae kanga aron te wirikiriki,” ao e kona n “niniia nako te tamnei” (Ereman 5:30) ao “ma ni kabuea [nanoia]” (3 Nibwaai 11:3). Uringnga, e kunea bwanaan te Uea Eria ae e aki mena inanon te ang, ke inanon maeiein te aba, ke inanon te ai, ma bon te “bwana ae maaraara n rau” (1 Uea 19:12).
E aki anai ara iango te Tamnei man ana tatakaarua ke ni ioioira ma baina aika tinebu. Nooria e wirikiriki. E riinga te nano ma te karaurau kanga ai aron ae ti iango ao n aki namakinna.
N tabetai, e na bon tii roko inanora ni matoatoa tau bwa ti na taratara raoi. Ma n angiin te tai, ngkana ti aki taratara raoi ma te namakin ae karaurau anne, e na butakinako te Tamnei ao n tataninga ni karokoa ae ti a manga ukoukoria ao ni kakaea ao ni kakauongo ao n taetae n ara katei ao n ara kabwarabwara, n ai aron Tamuera n ririki aika bwakanako, “Taetae [te Uea], bwa e ongo am toro” (1 Tamuera 3:10).
Ko Aki Kona Ni Imanonoi Bwaai n Tamnei
Iai riki bwaai tabeua aika ko na reiakin. E aki kabwakaaki te kakoaua iaom; ma e rikirake te kakoaua. Ti karikirakei ara kakoaua n ai aron ae ti rikirake ni ikawai n tein rabwatara; ti kangaanga n ataia e bon riiriki kioina ngkai e riki man te rikirake.
Ko aki kona ni kaiangatoa ma bwaai n tamnei. N aron taeka aika imanonoa, kairoroa, taumatoaia, tabuia, karawawataa, ao n tua a aki kabwarabwara inaomatara ma te Tamnei. Ko na aki kaiangatoa ma te Tamnei nakon ae ko na imanonoa te biin bwa e na tiinako uaana ke te bunnimoa bwa e na raure imwaain ana tai. Ko kona ni karika tein kanoan te bong bwa e na kaungaa te rikirake, te maiuraoi, ao te katantan; ma ko aki kona ni kairoroa ao ni imanono ke ni kairoro: ko riai n tataninga te rikirake.
Tai nang bwaina te aki taotaonannano ni karekean te atatai n tamnei. Kariaia bwa e na rikirake, buokia bwa e na rikirake, ma tai imanonoia ke ko na kauka te kawai nakon te aki kairiraoi.
Kabonganai Kaubwaim Ni Kabane
Ti kaantaningaki bwa ti na kabongana te ota ao te ataibwai are ti a kaman karekea ni mwakurian maiura. Ti na aki kainnanoa te kaotioti bwa e na kaetiira ni karaoan ara beku, bwa ti a kaman tuangaki aron karaoaia inanon koroboki aika tabu; ao n aki naba kaantaninga te kaotioti bwa e na onea mwiin wanawanan tamneira ke rabwatara ake a kaman reke iroura—ma ti na tii karababai. Ti na waaki ni maiura aei n te kawai ae ti taneiai iai, ae okioki, ni iriira teina ao tuua ake a tautaekana aron te maiu.
Tuua aika tabangaki ao kaetieti n aobiti ao ana tua te Atua bon bwaai ni katantan aika a kakaawaki. Ngkana ti kainnanoa te kaetieti ae kaotaki aika a na biti kawaira, e na bon tataninga irarikin te kawai ngkana ti a roko n tain kainnanoana. Aomata a “kabaeaki n reirei” aika tamaroa bwa kawanawanakiia, (tara D&C 58:27).
E Kona Ni Matoatoa Riki Am Kakoaua Nakon Ae Ko Ataia
Ngkai, tai waeremwe ke ni maama ngkana ko aki atai bwaai ni kabane. E taku Nibwaai, “I ataia ae e tangiriira natina; ma I aki atai nanon bwaai ni kabane” (1 Nibwaai 11:17).
E na bae ni iai riki te korakora n am kakoaua nakon ae ko ataia. E taku te Uea nakoia Nibwaite:
“Ao ane e kawarai ma te nano ae uruaki ao te tamnei ae raraoma, ao N na bwabetitoia n te ai ao te Tamnei ae Raoiroi, n ai aroia Reimwanaite, ibukin aia onimaki irou n te tai are a rairaki iai, ao a bwabetitoaki n te ai ao te Tamnei ae Raoiroi, ao a bon aki ataia” (3 Nibwaai 9:20; e kaairaki katuruturuana).
N ririki aika mwaiti n nako I kaitibo ma temanna mai buakoia natiu mwaane n te tabo ae karaoaki iai te mwakuri ni mitinare ni iteran te aonaaba are te iterana. E a tia ni maeka ikekei n te maan ae teuana te ririki. Ana moan titiraki bon aei: “Tamau, tera ae N na kona ni karaoia bwa N na karikirakea tamneiu? I a tia ni keiaki ni kakorakoraai bwa N na karikirakea tamneiu, ma I tuai ma ni karekea te rikirake teutana.”
Anne bon noorakin bwaai irouna: ma nakoiu e kaokoro. I aki kona ni kakoaua te konabwai n rikirake, ao rikiraken te tamnei ae e a tia ni karekea tii inanon teuana te ririki. E “bon aki ataia” ae e a tia n roko n te rikirake, ae tiaki moanakin namakinan te rikirake n tamnei.
Kunea Am Kakoaua man Kaokaotana
E bon bebete aron karekean te taetae ni mitinare, “N na kanga ni kaota au kakoaua ni karokoa ae I karekea teuana? N na kanga ni kakoaua ae E maiu te Atua, ao Iesu bon te Kristo, ao bwa e koaua te Euangkerio? Ngkana I aki karekea te kakoaua, anne bon tiaki te aki kookoaua?”
O, ngkana I kona n reireiniko teuana te tua aei: e kona ni kuneaki te kakoaua ni kakaotakina! Ribuakon nako am keeti ibukin te atatai n tamnei, e na bon mena iai “te raka ae korakora n te onimaki” anne, n aron ae e taekinna te tia rabakau. Bon te tai are ko a roko iai i mataniwiin te ota ao n rinnako inanon te roo ao ni kunea bwa te kawai e bon ota imwaaim tao te rakana ke uaraka. “Tamnein te aomata bon,” ai aron are e rangi n tataekinaki ni koroboki aika tabu, ae “ana tauranenea te Uea” (Taeka n Rabakau 20:27).
Bon teuana te bwai aron karekean te kakoaua man te bwai ae ko a tia ni warekia ke ko a tia n taekinna; ao anne bon moanakina ae riai. Ao bon teuana naba kaokoron aron karekean kamatoatoaan te Tamnei nako nanom bwa te bwai are ko a tia ni kakoauaa ae koaua. Ko kona n noria ae e na karekeaki ngkana ko tibwauaia? Ngkana ko anga te bwai ane iai iroum, e na bon iai onean mwiina, ma te raka!
Taekinana bon tuoan am onimaki.
Kaota te kakoaua iaon bwaai aika ko ataia bwa a koaua, bwa mwakurin te onimaki. Bon te bwai teuana ae kataaki, n aron te kakatai are e karioa te burabeti Aramwa nakoia ana taan iriiria. Ti moanna man te onimaki— tiaki ma te atatai ae nakoraoi ni bwaai. Te kabwarabwara are n te ka-32 ni mwakoro n Aramwa bon teuana mai buakon taian rongorongo ae korakora ae tabu ae koreaki, bwa e koreaki nakon te tia moana kakaean te koaua, ae te tia ukeuke ae nanorinano. Ao e taua kiingin te kakoaua n te koaua.
E na roko nakoim Tamnein ao te kakoaua iroun Kristo ngkana, ao n tiku iroum tii ngkana, ko tibwauaia. N te waaki anne bon te bwai ae moan te kakaawaki n te euangkerio.
Tiaki aei kaotiotan te Kiritian ae nakoraoi? Ko aki kona ni kunea, ke n aki kona ni kaawakinna, ke n aki kona ni kabubura ao ni karokoa ae ko kukurei n tibwauaia. Bon man te anganako ma te inaomata ao e na bon riki bwa am bwai.
Ko Kona Ni Karaoa Ana Mwakuri te Uea
Iai te mwaaka ae korakora n te mwakuri aei, ae te mwaaka n tamnei. Te aomata ae bon kaain te Ekaretia n ai arom, ae e a tia ni karekea ana bwai n titutaraoi te Tamnei ae Raoiroi man te kamatoa, e kona ni karaoa ana mwakuri te Uea.
Ririki aika a nako ao e taekina te namakin teuana te rao. Ai bon 17 ana ririki ao e tei ma toana n te auti teuana ae uarereke n te titeite mai maiaki. Bon ana moan bong inanon karaoan ana mwakuri ni mitinare ao bon ana moan mataroa. Te aine temanna ae mainaina irana e tei inanon tikurinin te auti ao e titiraki bwa tera ae a tangiria. Teuare toana e butuia n anganibaina bwa e na waaki. Ma te maaku ao te bae n newe, n tokina e katinakoa ana taeka, “Ngkai te aomata bon te Atua ngkekei, ao e kona n riki te Atua bwa te aomata.”
Ma mimiina ae tau, ao e rangi ni ingainga ni kan ataia ao e titiraki bwa e reke maia irouna arei. E kaeka, “E mena inanon te Baibara.” E kitana te mataroa n te tai ae uarereke, ao e oki ma te Baibara. E taekinna bwa ngaia te minita n bootakin te taromauri teuana, ao e anga te boki nakoina ao e taku, “Aei, kaotia nakoiu.”
E anaa te Baibara ao e raibaeia nako moana ao bukina ma te nakonnano. N tokina ao e kaokia ao e taku, “Aei, I aki kona ni kunea. I aki raoi naba koaua ngkana e bon mena inanona, ao ngkana e bon mena inanona, I aki kona ni kunea. Bon te ataeinimwaane ae te tia ununiki ngai ae kainnano mai Cache Valley i Utah. E aki tau au kataneiai. Ma I roko man te utu ae ti maiuakina ana euangkerio Iesu. Ao e a tia man au utu bwa N na butimwaea te wewete bwa N na karaoa te mwakuri ni mitinare ibukin uoua te ririki, man oin au kabanemwane, n tuangiia aomata bwa tera au namakin iai.”
Imwiin te iterana te tienture, e taotaona tangina ngke e kaongoraeai ae e kauka te mataroa neierei ao e taku, “Nakomai riin, te ataeinimwaane. I tangiria ni kan ongora tera ae ko na taekinna.”
Reirei mairoun te Tamnei
E rangi ni bati riki ae ko na taekinna. I kona n taetae iaon te tataro, te aki mamatam, taekan te nakoanibonga ao te mwaaka ni kariaia, te kororaoi—ao bwaai ni kabane ake a tau nakon te kaotioti. Ngkana a ota raoi, a bane ni uaia ni mwakuri ni kabane—ao n nakoraoi. Ma tabeua bwaai ae temanna e riai n reiakini ibon irouna, ao n tii ngaia, ae reireiaki iroun te Tamnei.
I ataia man te namakin ae e rangi n tabu bwa E maiu te Atua, Iesu bon te Kristo, ao ana bwai n tituaraoi te Tamnei ae Raoiroi are ti anganaki n tain kamatoakira bon te bwaintangira mai karawa. E koaua ana Boki Moomon! Aio ana Ekaretia te Uea! Iesu bon te Kristo! E tararua iaora bon ana burabeti te Atua! E tuai n toki bongin taian kakai, ao a tuai man toki ni kaoti anera ao ni mwakuri nakoia aomata! Bwaintangira n tamnei a maeka inanon te Ekaretia. Rinerine ake ibuakoia bon ana bwain n tituaraoi te Tamnei ae Raoiroi!
Man te taetae are e karaoaki n tain te marooro ibukiia beretitenti n te mition aika boou n Tuun 25, 1982.