Te Onea ae bwanin

Teutana imwain te Kirimati, ao iai atakin bwaai tabeua bwa a kona ni kamanenaaki irouia tabeman. I tuoi ruu teuana imwin teuana, ni kakai bwaai ake I kona n anga nakon Deseret Industries. N te tai are N nang roko iai n te kabanea n ruu are bon ara ruu, I uaia n nako ma buu nakon te tabo are ti kawakin iai ara bwai. Ti tuoi ara kunnikai.

“Ai bon akea au bwai n te tai aei,” I tuanga. “Ao ngkoe?”

E boboti kabaraaki tabeua David ao e kunei ana kau tabeua ake e a maan n aki kabonganai.

“Ao te onea ae bwanin aei?” e titirakinai. Bon oneana are I a tia n rineia ibukina n ririki aika nako ibukin ana intawiu ni kakaean ana mwakuri. E teimatoa ni boou taraana.

“Buu, tera am iango? E aki tau.”

“Ma e taraa ni boou,” I taku nakoina.

“I namakina ae e nang bon riai n nako oneau aei,” E taku David. E anaia man te ruu ni bwai.

Ibukin korakoran nanou n oneana, bon iai riki teuana, ao imwin katauan are teuana irouna, I kunea bwa e tuai n rang n tau irouna n te tai aei. I karaurau ni kawenea ibuakon bwaai ake ti na anga nako, ma e aki boraoi ma are I namakinna. Iai te bwai ae I tabeaianga iai. E aki riai n nako te onea aei, I koaua n aei.

E a manga nako David n noori ana neketai. E kaunai ma aron rinean ana bwai. E kaotinakoi tabeua ao ni katukui naba ma oneana ae bwanin aei, ma e teimatoa n aki eti ma nanou.

E aki rau matu ibukin te onea teuana are e mena ibuakon te kunnikai. I rangi ni mimi bwa e aera e korakora tabeaiangau ibukin te onea ae bwanin are e tuai n tau ao n te naan neketai ake a maan.

N te ingabong are imwina I a manga rinanon te naan bwariko ni kunnikai. E a manga roko naba korakoran te namakin bwa e bon riai n aki nako te onea ae bwanin aei. I anaia mai buakon te bwariko ni kunnikai ai uana naba ma tabeua te naan neketai. Imwiin karinan bwaai riki tabeua inanon taian baeki, I a manga tara naba te onea arei. “Ibukin antai?” I aki ataia.

I katorobubua n tataro irarikin au kainiwene. I nakon au taibora ao ni kataia ni iango. Ngai ma buu bon taan kairiri ngaira aika ti uarereke ibuakoia kaain ara uoote, ao ti ataia bwa antai te mitinare imwina. Te tai ae aki maan imwain nakona. Bon iai ana mwakuri ae teimatoa, ngaia are manga karekean oneana ae bwanin bon tiaki te kangaanga. E aki reke au bitiobi ngke I tareboonia ma e kaekaai te mitiin.

Imwina ao iai ae karebwerebwe n te mataroa. Ngke I kauka te mataroa ao I tounako ma te maaku.

“Mauri, Titita Ries,” te naan mitinare man ara uoote a moangare.

E waekoa atakin te onea are bwanin arei bwa ibukin antai. “I aki kakoaua aei” ti aikai taeka ake I kona n taekin. “Taiaoka n tataninga teutana. N na bon waekoa n oki.”

Ma te kukurei irou, I biri rake n te kaintamwarake ma ngareakinau irouia mitinare n aron butimwaeaia irou ae kamimi. I onrake n te kukurei ngke I uota n oki te onea ae bwanin aei.

“Bon 40 buburan te nangoa ni kunnikai,” Au taeka nakoia, “ao te naan kawaerake bon 33–32 buburaia” I tara te mitinare are temanna ma au kantaninga bwa, e tau irouna.

E ubu ni kukurei te mitinare are temanna. “Bon 40 buburau ao 33–30 buburan au kawaerake.” E taonaki n te kukurei. “I rangi n tataro ma au karo bwa e na reke oneau are nna oneai iai ni karokoa banen au mitinare. Ai ti teutana nikiran au tai, ao ai ti teutana tain kamanenana imwin banen taina.”

N ana onimaki te mitinare ao e butimwaea te bwai n tangira ae te onea ma taian neketai aikai mai iroun Tamana are i Karawa ma te kukurei, ao I a kaina au mataroa imwina, I manga okira naba au ruu ni matu ni katorobubua ao ni karabwa Tamau are i Karawa n Ana tangira ibukiia Natina. E teimatoa n ongo n ara tataro.