Te Anene ae Tatangiraki e a Koro ana ka 50

Te anene n taromauri “Ngai Natin te Atua” (Hymns, nambwa 301) e a tia n tang ni kabuta te aba, e a tia ni katangitangaki ao mwanewena e aneneaki irouia ikawai ao ataein te Moanrinan ni kabuta te aonaaba man 1957.

Ngkai e a kaania ana kauring ibukin te ka 50, te anene, e a tia ni boretiaki inanon taetae ae raka nakon 90, e reitinako n riingi nanoia aika mwaiti.

Te rongorongo ibukin te anene n taromauri ae teniua-kibuna e reirei koaua n te euangkerio ae aomata n tatabemania bon natin te Atua ae a tia ni kanakomaiaki nakon te aba ma tibwangaia ae akea tokina. A tia ni butiaki kaaro ao taan reirei bwa a na buokia ataei n tatabemania ni karaoi rinerine aika kororaoi inanon aia waaki n te maiu ae mamate ae na kona ni kairiia nakon te maiu ae akea tokina ae kakukurei.

Aio taekan te anene n taromauri:

Naomi W. Randall, ae beku bwa kaain te taibora ni kabuta n te Moanrinan ao te kauntira n te beretitentii ni kabuta n te Moanrinan, e korea “Ngai natin te Atua” man te bubuti irouia kaain te taibora ni kabuta n te Moanrinan. Mildred T. Pettit, ae a tia naba ni beku bwa kaain te taibora ni kabuta n te Moanrinan, e karioa nootina.

Titita Randall e kabwarabwara aron ana waaki inanon korean taekan te anene:

“N te tairiki arei, I katorobubua n tataro ni kanenea bwanau, ni bubuti bwa Tamara are i Karawa e na anganai ataakin taeka aika riai ni koreaki. E a bo 2:00 n te karangaina, I a teirake ao ni moana iangoan taekan te anene. A roko taeka nakon au iango… . I a waekoa n teirake ao ni moana korean taeka ake a roko nakoiu. Teniua kiibu ao te koorati ae a waekoa n tia. I a manga tuoa riki te mwakuri anne ma te kakaitau, ni kukurei ibukin taekan te rongorongo, ao ni manga okira au ruu ni matu ike I a katorobubua nakon Tamau are i Karawa ao ni kangai ‘Ko rabwa!’ ” (in Karen Lynn Davidson, Our Latter-day Hymns (1988), 303–4).

E kanakoi taekana Titita Randall nakon Titita Sister Pettit, ngaia are e kabanea te aoa ae mwaiti ni mwakuria nootina.

Taekan ngkoa teuana te rain n te koorati e kangai, “Reiai ae nna ataia.” Imwiin korean te anene, Beretitenti Spencer W. Kimball e ira te maungatabu ike ataein te Moanrinan anenea kooratin te kuna aei. E titiraki imwiina ngkana e kukurei Titita Randall n te bitaki man “Reiai ae nna ataia” nakon “Reiai ae nna karaoia,” ao aingaia anne e a reke aron mwanewena ni boong aikai.

“E aki tau te aro ae ti bon ti ataia,” e taekinna aio Beretitenti Kimball. “Te riaboro e ataia ao e rurubenebene; te riaboro e atai bwaai ni kabane. Ti riai ni karaoa te bwai teuana” (“New Verse Is Written for Popular Song,” Church News, Eberi 1, 1978, 16).

Te kaua ni kibu ibukin te anene e koreaki ibukin aia anene kaain te Moanrinan n te maungatabu ni kabuta n Eberi 1957. Ngke e a katauraoaki te boki n anene ae bwainaki ngkai, a tia ni baireia te Komete ni Kabuta ibukin Katangitang ao te Tabo ni Mwakuri ibukin te Reitaki bwa te kibu are e karinaki bon tiaki raoi mwakoron te anene ao e bon aki karinaki iai.

Imwiina riki, ngke e a karikaki aia Bokinanene Ataei, a baireia kaain te taibora ni kabuta n te Moanrinan bwa e na karinaki. Te otooto ae aua-kibuna aio e a tia n rairaki nakon 20 aekaki n taetae ibukin aia Bokinanene Ataei ni kabuta te aonaaba. Aio taekan te kibu:

Te anene n taromauri aei e moan karinaki inanon Sing with Me, aia bokinanene ataei aei e boreetiaki inanon 1969, ao imwiina inanon aia Bokinanene Ataei inanon 1989 ma te nooti e baireaki arona iroun Darwin Wolford.

“Ngai natin te Atua” bon teuana maibuakon 45 anene n taromauri ao aia anene ataei aika mena inanon bokinreirei aika te Gospel Fundamentals ao Gospel Principles. Nanon aio bwa ngkana e moan karokoaki bwaai n reirei ibukin te Ekaretia nakon te taetae ae boou, “Ngai Natin te Atua” bon teuana maibuakon anene n taromauri ae a moantaai ni karekea aomata inanon te moan waaki.

Boki aika Tabu; bokinreirei; bwaai ni katangitang, kuaea, ke waaki ni bitaki tabeua; CDs; aia taetae Mataniwi ni Kabuta; “Ngai Natin te Atua” bwaai n anainano; ao aekaki ni bwai ni mwakuri ake a na katanoata te rongorongo ake iai taekaia ma katangitangia ibukin te anene n taromauri ae tatangiraki, are e a tia n roko rinanon katei, rabakau nako, ao waaki ni katei bwa e na rin man tiku inanoia aomata ni kabane koauan te euangkerio ae aomata n tatabemania bon natin te Atua.

Unimwaane Robert D. Hales man te Kooram n Abotoro ake Tengaun ma Uoman, ngke e kaina te Itingaun, e kamataata riki nanon te botoniango ibukin te anene inanon 1978: “Tamara are i karawa e korakora riki ana tangira nakoira nakon riki ae ti ataia. E a tia n taekinna bwa E ‘atai mwaitia ana aomata’ (Aramwa 26:37) ao bwa ngaira n tatabemanira ti bon kakawaki irouna. E tangiria bwa ti na oki man maeka ma Ngaia ao Iesu. E tangiriira bwa ti na reitaki ma Ngaia n te tataro, ni kaota tangirana, ao ni kaota ara tangira ni kawakinan Ana tua. N rinanon te ongeaba ti kona n riki n aiarona, ni karikirakei taian anua ake E tangiria bwa ana karekei natina” (“Ngai Natin te Atua,” Tambuli, Nobembwa 1978, 21; Friend, Maati 1978, 7).