Onimakinam Raoi

N taai nako, ti ikakorakora ma iango n aki mweeraoi. Ko a tia n titirakiniko: “Tera ae I kona ni karaoia bwa I aonga n namakina riki onimakinau?” ke “N na kanga n namakina ae tamaroa riki ibukiu?”

A rangi ni mwaiti kaekana ni koroboki aika tabu. E taekinaki bwa ngkana iai iroum te tangira ae kororaoi ao kariaia te tamaroa bwa e na karaoiroa am iango n aki toki, ao imwiina onimakinara e na rikirake ni matoatoa imatan te Atua (tara D&C 121:45). Te aeka n onimaki anne bon te onimaki ae koaua. Ngkana iai onimakinam iroun te Atua, ko kona n namakina te onimakinaki irouia tabemwaang.

Titirakiniko, “tera ae nanonaki n te tamaroa?” Beretitenti James E. Faust, Kauoman ni Kauntira n te Moan Beretitentii, e taku bwa te tamaroa e mwaiti kabwarabwarana—kabanea n tamaroa, te mwakuri ao te iango ae eti, te anua ae tamaroa, ao te itiaki.¹

Ao imwiina ao ko na titiraki: “N na kanga ni karaoa aei? Iai te bwai ae kona ni kairai?” Eng, bon iai. Taian moan tua ao reirei inanon Ibukin Kakorakoraia Kairake a kona ni kairiko bwa ko na karaoa am babaire bwa ko aonga ni kona ni karekea ana reitaki ma ngkoe te Tamnei ae Raoiroi. Ao ngkana iai iroum te Tamnei ae Raoiroi, n aron te iango, ko a bon, maeka imatan te Atua. Iangoa onimakinam iroun Tamam are i Karawa n anganakim Tamneina.

Ngkai ko maiuakin anua akana a kabwarabwaraki inanon Ibukin Kakorakoraia Kairake, e berita te Uea bwa “e na karikirakea am konabwai, karababa am nooraba, ao ni kakorakorako.”² Ko na rikirake n tamaroa, ao n rangi ni bon onimakiniko.

Ma ko riai ni karaurau. Aio tiaki te kawai ae te aonaaba e tuangko bwa e na iai onimakinam. E mwiokoiko te aonaaba bwa oin onimakinam iroum ko na karaoiroiko riki nakoia raom ni kawai tabeua—are ko kainanoi bwa a na mwaiti riki bwaai, raka riki am tarena, raka wanawanam, rangi ni kinaaki. Aio e bon aki eti. Anne bon te onimaki ae kaairua.

Anuan te Uea a bon kaokoro ma anuan te aonaaba aei. Ngkai te aonaaba e katuruturua ana taratara iaon te rabwata. “te Uea e tara te nano” (1 Tamuera 16:7). Ngkoe natin te Atua, ao oin rikim ae kakawaki e bon aki raoiroi ke ni buakaka ke ni korakora riki nakon temanna. Ni koauana, ni kabane—ni ikotaki ma ngkoe —-a bane ni kakaokoro aia tarena ao rabakauia. Aikai bon ana bwai n tangira te Tamnei are ko anganaki n te aro bwa ko aonga ni karaoa am mition ae kakaawaki n te aonaaba. Tamara are i Karawa e tangiriko bwa ko na kukurei, n rikirake ao n riki nakon are E tangiriko bwa ko na waaki iai.

Ngkana ko kaitara ma totoko ni maium, iangoi aomata aika a rangin tatangiraki mani kinaki man booki aika tabu. N aron Moote, ko kona ni karekea korakoram man te tataro ao n uringnga ae bon natin te Atua ngkoe (tara Moses 1:13, 20–22). Nibwaai ngaia te katooto ae raoiroi ibukin temanna are iai ana onimaki iroun te Uea. Ngke e tuangaki ma tarina bwa a na karekei bwaatua ake buraati, e onimaki raoi bwa e kona ni karaoia man ana ibuobuoki te Uea. E taku, “N na karaoi baike e a tia n tua te Uea, bwa I ataia bwa e na bon anga te kaetieti te Uea nakoia natia aomata, ma ti ngkana e a tia ni katauraoa te kawai ibukiia are a na kona iai ni kakoroa bukin te bwai are e tua nakoia bwa a na karaoia” (1 Nibwaai 3:7). Nibwaai e roko onimakinana irouna ibukin maiuna ae raoiroi.

N aiaron Moote ao Nibwaai ao a mwaiti riki, ngkai ko maiuakina te maiu ae raoiroi ko na kona ni karaoa am mition n te maiu aei ma te onimaki raoi, te onimakinaki are e na kamwaita, ke ni “karikirakea ataakin te Atua bwa e aonga n reirei n te mwaaka ao te kariaia mairoun te Atua.” Ti ataia bwa te oi n onimakinaki raoi e na bon reke nakon are tangiria ni “kariaia ana tamaroa bwa e na kanakoraoi (ana) iango n aki totoki.”