Te Iraa, te Boki, ao te Kakoaua

I maeka i Chile ao n tia ni kaina te Ekaretia ngke waniua au ririki. I a tia n rangi ni kinaaki bwa I kaaina te Ekaretia ae koaua, ao I namakina ae e a tia n reke au kakoaua n Ana Boki Moomon, ma bon te kakoaua man aia kakoaua tabeman. E ngae ngke I tangiria n aron anne, I bon tuai ni wareka Ana Boki Moomon ni kabanea. I tuai ni wareki ake imwin te moan Nibwaai.

N tairikin 4 n Turai, 2002, I nako ma raoraou ni kaea ara intitute kiraati iaon Ana Boki Moomon. Ti tiku ni marooro imwin te reirei ni karokoa tia ataia ae e a rangi ni bwakanako te tai. Ti rianna n okira mweengara n te tai ae 10:15, ao n te tai are tia roko n te tabo are ti nang maenako iai, tia manga tei n reitanako ara marooro.

Uoman mwane aika irarikira ao a titirakiniira bwa e a boo iraua, ma ti rangi n tabe ni marooro n te aro are tiaki ongo aia taeka. E aki maan ao a manga oki. E tauai are temanna mai ibuakoia, man kanimwa ana biti i roroau. Imwiina e kanakoai ao n taua raoraou ni kakamakua. E a manga tuangiira teuare temanna ibukin te mwane, ao ngke ti tuangnga bwa akea, ao a rangi ni un. A taumatoaira ibukin ara rabuna ni kunnikai ao ara baeki.

I a rangi ni maan ni kainanoa au rabuna ni kunnikai ao e a bon tibwa reke kaboana n te namakaina ae nako. I tangira naba au baeki, ae e tibwa anganai tariu ae ikawai. Iai ana bwai n reirei raoraou inanona are e riai n nikiria. I rangi ni maaku—n te aro are I aki kona ni kammwakuri ibukin te maaku. Bon te moan tai are e karaoaki iai te mwakuri ni iraa nakoiu.

Ti anganiia ara bwai n akea te bai ae ti taekinna. Ma n te tai ae aki maan I taku, “Taninga! Taiaoka ni kariaia bwa n na anaa au boki Ana Boki Moomon! Bon ti au bwai ae rangi ni kakawaki Irou.” E taraai ma te mata ni mimi te tia iraa ao e kariaia bwa n na kaotinakoa. Imwiina a birinako.

I koona te boki ao I aki tabe ma bwaai riki tabeua. I namakina te rau ibukin kamauran te boki are bon te bwai ae rangi ni kakawaki mai irouia taan ni iowawa ake uoman.

N te tairiki anne ao I iangoa kaotan au karabwarabwa ae korakora ibukin kaubwaaiu aei ao ibukia aomata ake anga ngaiia bwa e aonga ni kona n reke iroura Ana Boki Moomon. I moana warekana, ao I moanna n namakina te rau ae akea kabwarabwaraana ao te kukurei ae korakora. E rangi ni waekoa atakin bonganana ae mwaiti nakoiu. E bane irou inanon uoua te namwakaina imwiina, ao I karekea au kakoaua n tokin warekan te boki ibon irou.

I teimatoa n aki ataia bwa e reke mai ia te ninikoria are n na tuatua ibukin kaokan au boki, ma N na bon aki kabwara bure ngke I karaoia. I aki tiku ma te namakin n riribai anne ibukiia mwaane ake uoman ibukina bwa I a tia ni karekea au kakoaua n aron are I bon tangiria.

Te kakoaua anne are e a bon tia ni buokai ibukin kakorakoraau ni karaoan te mwakuri ni mitinare. I a okira ngkai mweengau imwiin au mwakuri ni mitinare i Argentina, te tabo are I a tia ni tuangiia iai aomata ibukin Ana Boki Moomon ao n tibwaua iai ma ngaiia aron kamimiin te mwakuri ni koaua aei.