Kaitaaraan te Maaku
Ti riai n aki maaku, bwa e bon raoniira te Uea, ao e tei irarikira (D&C 68:6).
E boboto iaon te karaki ae koaua
Tricia e karekea taraam ma matana aika rere man ranran inanon ana ruu ni matu n te tabo ni bwai. E uruaki te mataroa man aki kona ni in. Inanon te kunnikai ae roo kanga ai aron taraakia bwariko n aomata aika kakamaaku n tataninga bwa ana kiba man bwaai ni katinetine ao ni kawaekoa nakoina. Ni kabuakaka riki, e kona n ongo takaaruan te ikeike ae kanga e roko man te tabo ni bwai.
E ataia bwa iai aomata aika buakaka ae n tabetai a kona ni kammarakiia ataei. Temanna mai ibuakoia e kona ni karabaa n te tabo ni bwai! E uringa naba karakinan te teinimwaane n ana tai ni kiraati ngke e rangi ni uarereke ae karakina miina ae buakaka. E karakina ae kakioaki n te naeta ae ananau bukina. E reke iroun te naeta aei ao e kabaea ni bukina!
Tarin Tricia aika, MaryAnn ao Rebecca, a bon matuu naba n te ruu, ma e aki weweteia. Tera ae karabaa n te ruu ni bwai e na bon bae ni buakanna. E ongo bwa e rikirake ni uarereke karongoaan te TV. Are nanona bwa ana karo a tia ni mataku n te kaongora ao a nang iangoa te matu. Ma e aki kona ni biri nakoia—e aki kona naba ni kamwakuri.
E korakora maakun Tricia n te aro are rangi n tangiria ni kan tang, ma e aki iangoia bwa e na karongoa. Ti te bwai ae kona ni karaoia bon karekean taraan te rootongitong, te nako n nano n taraan te ruu ni bwai, kantaningaan te bwai are e aki nooria bwa e na aki reke iai.
N ana tai ni mimi Tricia, e roko te iango ae maarara irouna: “E aera ko aki tataro?” N te tai ae aki maan e namakina ae raoiroi teutana. E a tia n tuangnga tinana bwa e kona n tataro n te tai ae bon taku, n te tabo ae aki akaka. E kona naba n aki kaina matana! E karaurau n tataro Tricia. N te tai are e atonga iai, “N aran Iesu Kristo,” e roko te namakin ae rau irouna. E ataia ae Tamana are i Karawa e a tia n ongo ana tataro.
Ni katoaa ikeikena e namakina te rau. Te ikeike ni maaku e aki takarua n aron are mai mwaina. Ngke , e tabe ni kekerikaaki ni karaurau mani karaurau ikeikena, ai aron naba te ikeike man te tabo ni bwai. E taua ikena Tricia. E toki ni bon te akea te ikeike. N tokina e a oota—bwa e a tia ni maaka bon oin ikeikena!
E namakina te nanobaba teutana, ma e rangi ni karabwarabwa. N te tai are e iangoa iai Iesu, maakuna n ana iango e a tia ni katoka maakuna ae korakora, ao e kona n nooria bwa a rangi n naba. E uringa tamana n ana karaki ae kaitaraan te maaku bon te onimaki iroun te Uea Iesu Kristo. “Oin ana kantaninga Tatan e tangiria aomata bwa ana maaku,” e taku n ana iangoia. “A aki iangoa Iesu ngkana a maaku.”
E kamwengaraoia Tricia n rabunana ao e a manga tataro riki. N te tai aei e karabwa Tamana are i Karawa ibukin ongoraeakinan ana tataro ao buokana n tokanikai man te maaku. Ngke e a tia n tataro, e karaurau n anenea ae “Jesus Wants Me for a Sunbeam.” Ngkai e aki maaku ni kamatui matana ao e butimwaea te anene ma taekana bwa e aonga ni matu raoi. E aki rangi ni maan, e a reke matuuna.
“Ara onimaki iroun te Uea Iesu Kristo bon ngaia are korakora irouna te tamnei man anganiko ao ngai kakoauaan ae akea te bwai ae tina maakua.”
Unimwaane M. Russell Ballard man te Kooram n te Tengaun ma Uoman n Abotoro, “Ara Uea ao te Tia Kamaiu,” Riaona, Ritembwa 1997, 14; “You Have Nothing to Fear from the Journey,” Ensign, Meei 1997, 61.