Temanna Te Tia kairiiri ae onoti

N na bon teimatoa n uringnga ma te kamoamoa temanna te tia kairiiri ae onoti ae bita maiu nakon ae tamaroa riki. Ngke I kaitibo ma neierei, ao aki mwaiti raoraou. I bon aki rangin n tataetae ao man aki kona ni moangare nakoia aomata. I aki iriiri n te tieminari ke waaki ni kakukurei riki tabeua. Ma ni bon koauana, I nanakon te taromauri ni katoa Taabati. Ma n te tai anne ao au iango e nakon te kiraati ibukiia Ataein Aine. Tabeman ataein aine a kataia n ana nanou, ma I aki kan reitaki ma ngaia.

Ngke e kataia te tia kairiiri aei ni kaaniai, e bon aki koro bukin ana iango. I bon aki ata arana n te moan tai. Imwiina e anganai te mwakuri bwa n na karaoia ao e moanna n onimakinai. I butimwaea te nakoa bukina bwa I aki ataia bwa n na kanga n tuanga bwa I aki. Ma, imwain ae I ataia, e moanna n riki bwa raoraou. I kataia ni kakorakoraai ni kakoroa nanon au mwakuri, mani moana au kakauongo n tain te kiraati. I a moana naba irakin te tieminari ao ana waaki ni kukurei te Ekaretia tabeua. I moana naba au iraorao ma ataei aika kairake n au uoote. N te tai ae aki maan ao e riki te euangkerio bwa te bwai ae moan te kakaawaki inanon maiu.

Antai ae moan karekei bitaki aikai inanon maiu? Bon au tia kairiiri. N te bong aei ngkana I taraa matana, I namakina te tangira ao te kakaitau ae korakora. I rangin ni kakaitau nakon Tamara are i Karawa ibukin karekean te tia kairiiri ae kororaoi. I rangi ni kamoamoa irouna ngke e katauraoai ao n raonai n tain karekean au entaumente i São Paulo Brazil Temple. I rangin ni kakaitau ibukin te katooto are e a tia ni kaotia ibukin te tangira, te tangira ae I kataia ni maiuakinna n oin maiu.

Ngkai ngai te tia kairiiri n te bootaki n Ataein Aine n au uoote, au kantaninga bwa n na kona ni karaoia nakoia au Ataein Aine iteran te bwai are e a tia ni karaoia nakoiu.