I ataia bwa kona utu n riki n akea tokina

I teimatoa n uringa te bong anne. E kona n riki bwa te kabanea ni kangaanga nakon maiu ngke arona bwa akea irou ana euangkerio Iesu Kristo. Bon Turai 12, 2001, ngke e mate tinau n te aoraki are e roko n tairikin te Taabati man anaa maiuna ni moaningabongin te Kaabong are imwiina. Ai te 16 au ririki ni maiu. I bon aki irii ukeuke n au reirei bwa n na bon tiku irarikiia au utu man ira te tataro n taunimate ibukin tinau.

I okira mweengau man te taunimate ma te uruaki n nano. E rootai te nanokawaki ae korakora, te nanokawaki are I taku bwa n naaki kona ni manga kukurei. I wene iaon te kainiwene, man moana tangiu ae korakora, man titirakinai ibon irou, “Bukin tera ngkai e na nako ni waekoa? Bukin tera ngkai e na kitanai?”

Ti iangoia ngai ma tariu ae 10-ana ririki bwa ti na anenei anenen te Ekaretia aika rau. I namakina te maroa, te nanokawaki ao te aki rau, ao imwiina e roko irou te namakin ae rau. I namakina te raoiroi ao te rau ae korakora. E bua te mata n nanokawaki, n ikotaki ma te namakin inanon bwabwaau.

I bon teimatoa n namakina tamnein te rau aei ngke I nako ma utu n te tabo n taromauri are a kaota iai nanokawakiia. A bane n nanokawaki au utu, tabeman a tang ni maikeike. E oti n ubuia te nanokawaki ae korakora. A taraia au utu ma te miimi, bwa e aera ti aki rangin nanokawaki n aroia. Ma e a moanna ni karaurau ni bukibuki buroou, ao e namakina te rau rabwatau ni kabane. I ataia bwa te tia Raoi, te Tamnei ae Raoiroi, e a tia ni kabebetea marakira. E kakoaua naba bwa Iesu Kristo ao Tamara are i Karawa a maiu ao aio bon te Ekaretia ni koaua, ma berita ibukin te maiu are akea tokina.

Imwiina, I koroia n au tienero: “E aki tangiria tinara bwa tina tang ni korakai. I rotaki n te nanokawaki, ma e teimatoa te rau inanou. N na bon ti kakorakoraai ao ni maiuakina te maiu ae tamaroa n te aro bwa n na manga nooria riki. Au onimaki ao au kakoaua e rikirake, n ikotaki ma nanou ni beku ibukin Atuau ao raoraou inanon au mwakuri ni mitinare ae bwanin ana tai. E na teimatoa ni mena ikekei, ni buokai ni kaeta kawaiu. I ataia bwa a kona utu n riki bwa utu n te maiu are akea tokina. N te bong n aron te bong aei 15 te ririki n nako, ngai ma au utu ti kabaeaki bwa utu ake akea tokiia n te Lima Peru Tembora, ao aio are e a karaua nanou.”

Ngai ma au utu ti teimatoa ni kaitara ma kangaanga aika bati. Ma n taainako ngkana e a kerikaaki au onimaki, I uringa te tai ngke anganai te rau te Tamnei ae Raoiroi ao ni kakoaua nakoiu koauan te euangkerio n te maiu are akea tokina.