Te Ingainga n Nano ibukin Waaki ni Kakukurei aika Raraoi e a Butinako rinanon te Bootaki n Aine

Karikirakean te katiteuanaaki inanon te kurubu n aine ao kakorakoraaia utu—bon anne ae katuuaki iangoana ni boutokaan te kainibaire ae boou ibukin mweenga, utu, ao karaoan waaki ni kakukurei aika raraoi ibon irouia ake a tia ni karinaki karaoakia n Tianuare are nako, n aron aia taeka kaain te beretitentii ni kabuta n te Bootaki n Aine, Bonnie D. Parkin, Kathleen H. Hughes, and Anne C. Pingree.

“Bon iai te ingainga n nano ni iteran katabeaia taan kairiiri ao aroia naba aine ake a ira te waaki ngke a bon ataiaraoi bwa aio te kawai ni ikotaki ibon imarenaia ni ikikina ike a kona iai aine ni karikirakea te waaki ni iraorao ao ni kunei kawai ni kakorakoran taian utu,” e taku Titita Pingree, ngaia are e bon tabeakin mweenga, utu, ao waaki n tatabemania ni kakukurei aika raraoi. “Ngkana e riki aei, a kakabwaiaki aomata ni kabane—ngaia n tatabemania, te utu, ao te uoote.”

N aron te reta man te Moan Beretitentii n Aokati 2005 are e katanoata te kainibaire ae boou ibukin mweenga, utu, ao bootaki ni waaki ni kakukurei aika raraoi ibukia n tatabemania, e taekinna Titita Pingree bwa te beretitentii ni kabuta e a kunea man ribooti ake a karekei man te Ekaretia bwa aine a bon karekea “te rabakau ni koaua n aron kakorakoran te utu man te mweenga, utu, ao waaki ni kakukurei aika raraoi ibukia n tatabemania. Te [kainibaire ae boou] a na bon karekei naba aron te kona ni karaoi riki waaki aika kakaokoro n oin naba aia tabo.”

Inanon te bowi ma te Church News, n ikotaki ma kaain te taibora ni kabuta aika Connie Cannon ao Helen Thiriot, e taekinna Titita Pingree bwa taan kairiiri n te Bootaki n Aine n taabo a na karaoi bwaai aikai ni kaineti ma te waaki ni kakukurei aika raraoi:

• Tuoi ao bairei kainnanoia aine inanon aia uoote ke mwaanga.

• Butimwaei iango mairouia aine.

• Kairiia inanon te waaki taan kairiiri n te nakoanibonga n aia tabo. Iai aia taratara ae korakora bitiobi ao beretitenti n te mwaanga ibukin kainnanoia aomata ao taian utu.

• Babaire ma te tataro ao te kantaninga.

A mwaiti katooto ake a karokoaki taekaia nakon te aobiti ni kabuta ibukin te Bootaki n Aine ni kaotia bwa a bon riki. Gail McHardy, te beretitenti n te Bootaki n Aine n te Mwaanga ae Houston, St. Robert Missouri Titeiki, e karaoi karekean iango bon man te tataro ma ana kauntira. E taekinna n te marooro iaon te tareboon bwa “E bon mena ikekei te Tamnei ni buokira.”

Ao manga, n reitaki ma ana boutoka te beretitenti n te mwaanga, e bon taekina te iango nakoia aine n te uoote. E bon rangi ni miimi ngke te waaki ni kakukurei ae a bane ni mate nanoia iai bon te reirei n te Taetae n te Kanikina iaon America. Temanna te aine inanon te mwaanga e a tia n reirei iaon te taetae n te kanikina ao e kukurei n angareirei n te kiraati.

E taekinna Titita McHardy bwa “Te beretitenti n te mwaanga e a tia ni kukurei bwa a na karinaki bwa kaain te kuaea n te tai ae waekoa.” E reitia naba bwa temanna te aine ae a tibwa okira te Ekaretia n iri waaki n te kiraati “e namakinna ae ai bon kaain te Bootaki n Aine.”

Sue Gaskill, te mataniwi ni waaki aika raraoi n te Kaua ni Uoote ae Holladay, Salt Lake Holladay Maiaki Titeiki, e kakaea buokana mairouia “taan rabakau” inanon ana uoote. Ni kabongana rabakaun Sue Gygi ao Julie Rawlings, e a tia te uoote ni moana te mwakuri iaon rongorongon te utu. A kawari mweenga Titita Gygi ao Rawlings ni buokia ibukin karinan te bwai ni mwakuri inanon aia kaombiuta ibukin rongorongon te utu ao ni kaota aron te moan waaki. N Tebetembwa 12, 2006, kaain te Bootaki n Aine n te uoote a tia n nakon te tembora ao ni karaoi mwakuri ibukia aia bakatibu ngaia n tatabemania.

E taku Titita Gaskill bwa a tia n amwarake n te tawanou ma aine ake a na okiri mweengaia. E reitia n taku bwa a bon kukurei ma bon te waaki ni kakukurei ae kairaki iroun te Tamnei are e a tia ni buokia aine aika kairake bwa a na “ataa aron kakukurei te Bootaki n Aine.”

Tabeua riki waaki ni kakukurei ni karaoaki rinanon te Ekaretia n aron aikai:

Te mwaanga i Mexico e reireinia aine aron korean iraia ataei, kuuka, ao aron moanakin te ituutu, ni buoka te kataumwane n te utu.

Te uoote i Blackfoot, Idaho, e anga te reirei ibukin te ituutu iaon kunnikai ibukin te taenti ae baireaki raoi.

Te uoote i Salt Lake City ma mwaitin kaaina aika taanga ake a tiba mareaki e anga te reirei iaon kakorakoran te mare ao te maiu iaon te kataumwane.

Te titeiki i Arizona e angareirei n te English nakoia ataei ao tiina ake a taetae n Spanish.

Te uoote i Salt Lake City ibukia ikawai ake a tuai iein e anga te reirei iaon te kamwakuri.

E taku Titita Pingree, “N au iango bwa rinanon te waaki ni iraorao ao kouru ake e karikirakeia ao e kakorakoraia aine ni manga kamatoaia utu, ti kona n namakina ana tangira te Uea ae korakora arona inanon maiura ao inanon ara utu.”

Karekeaki man te Church News, Aokati 19, 2006.